Read Nugunu Motíosi 4 Bible Online

Motíosi 4 - Nugunu bible

Motíosi 4

¹Naá nnyimé hɔ́ɔlɔ́, gɔ́ɔ Giliíli ba Asaŋa ɛ ɛ́damɔ́ na Yésusu naá giolóo gá bodɛ́agadɛ́ go goŋaá ohándá a mo gogona hɔ́ɔ.

²Aŋa a mbaá ŋá a báa go dúmbie medúgú otíno áhandɛ́ a dɛ nyáá boóma, gɛ́hɛ́ go bɛa ncaná.

³Ohándá ba go mo gogona go báyɛkɛna a amɔ́ gɛ́hɛ́ a amɔ́: «Aáŋa[12] o lɛ́ Moɔnɔ́ ba Asaŋa, gálɛ́da adánɛ́ yáaya yá ɛ́ya manyáanya.»

⁴Kanɛ́ Yésusu go mo baga a amɔ́: «Bó lɛ́ ɔ́ŋɔ́ɔlú goŋaá: “Caá goana go manyáanya gɔ́ɔ mɔtɔ ɔ ɔyɔmɔ́, mɔtɔ ɔ ɔyɔmɔ́ go nogálɔ nuimée nɔ́ɔnɔ nó húmenemú naá nyuudé ná Asaŋa[13]”.»

⁵Gɔ́ɔ ohándá ɛ ɛ́damɔ́ nɛhɛ́ naá Gimmúmpúu gá Tɛ́sɔnɔ, go mo búlugie naá tóndi ya Nnyaŋá ya Asaŋa

⁶a amɔ́ gɛ́hɛ́ a amɔ́: «Aáŋa o lɛ́ Moɔnɔ́ ba Asaŋa mammana, bécuméemú go cí; goakɛ́, bó lɛ́ ɔ́ŋɔ́ɔlú goŋaá: “A ŋgi íŋéné bɛɛ́ŋgɛlɛsɛ bɛ́hɛ́ bogaaga bá go go nɛ́hanɛha naá ɛmbɔ́gɔ yabɔ́, gɛgɔ́ndɔ́ gáhɔ gɛ́ dɛ kúkéné ɛdánɛ́[14]”.»

⁷Yésusu go mo gundie a amɔ́: «Bó lɛ́ tɔ́nɔ ɔ́ŋɔ́ɔlú goŋaá: “O do ná gogona Daadáa Asaŋa bahɔ[15]”.»

⁸Ohándá go gɔnɔ go ɛ́da nɛhɛ́ naá giyéŋéŋkée gá ogɔndɔ, go mo dúfie mefuŋe má cí miimée na nigúmi ná má,

⁹a amɔ́ gɛ́hɛ́ a amɔ́: «Kaá go íŋéné buimée bɔ́ɔbɔ go amɔ́ kulene enúu go go mbúlugenye.»

¹⁰Gɔ́ɔ Yésusu a mo oyanamɔ́ a amɔ́: «Dómbá, Sátana! Mammana, bó lɛ́ ɔ́ŋɔ́ɔlú goŋaá: “Búlúgényée Daadáa Asaŋa bahɔ, o mo yɔgɔnɛnɔ, mɔ́ɔ mokáa[16]”.»

¹¹Gɔ́ɔ ohándá a mo dɛ́ɛnamɔ́. Bɛɛ́ŋgɛlɛsɛ go báyɛkɛna Yésusu, go ɛ́da go mo yɔgɔnɛnɔ.

¹²Aŋa Yésusu a mbɔɔ́ ɔ́bɔ́ goŋaá bá á gumbéné Sáŋa bá báá mo ágá naá ncíbo ya gɛaŋɔ́[17], gɛ́hɛ́ go fadɛgɛna go go ɛ́da naá Gelilée.

¹³A lɛ́ kanɛ go gɛ́ga naá Násalɛdɛ, kanɛ́ gɛ́hɛ́ go ɛ́da lukumene naá Kapɛlɛnahɔ́mɛ, tɛ́sɔnɔ yɛ́ɛyɛ ɛ lɔ́mɔ́ naá cɔ́lɔ ya máŋɛ́ má Gelilée, naá gigísi gá cí gá Sábɔlɔŋɔ na Nɛfɛtáalɛ[18].

¹⁴Bó mbaá lɔmɔ́ báŋaáalú nɔ́ɔnɔ go goŋaá dogálɔ dá mbúsí ya Asaŋa, Iseyíi, dɔ́ɔdɔ dó ɛ́nanɛna:

¹⁵«Cí ya Sábɔlɔŋɔ, cí ya Nɛfɛtáalɛ, gɛbala gá máŋɛ́, gɛdɔŋɔ gɛ́ɛgɛ naá Yɔlɔdɛ́ŋɛ boayá búunú, Gelilée mɔ́ɔnyɔ biinyí biinyí bá batɔ bɛ́ gɛ́gamɔ́ hɔ́ɔ!

¹⁶Gɛdɔŋɔ gɛ́ɛgɛ gɛ́ mbaá lɛ naá mbíno gɛ́ ɛ́ ɛ́ná gɛantáanta gá gise! Go batɔ báaba bá mbaá lɛ bɔ́ ɔyɔ naá duílilíe gɛdɔŋɔ gá nigúe, gise gɛ́ á bóloodío[19]!»

¹⁷Gó bayɛga naá gɛcamɛna gɛ́ɛgɔ, Yésusu go bayɛga go dúmenye a amɔ́: «Núgíe nɔnɔ gɛɔyɔ gɛ́nyɔ́[20], goakɛ́ Bufuŋe bá mmoɛná bó á báyɛkɛ́ná!»

¹⁸Yésusu ɛ ɛnda naá cɔ́lɔ ya máŋɛ́ má Gelilée, gɛ́hɛ́ go ɛ́na bonóbí moɔbɔ́ báandɛ́, Símono, mɔ́ɔnyɔ bá dɔ́ŋɔnɔmɔ́ bá amɔ́ Píele, na ondimóní Andɛlɛ́ɛ, bá nɔɔnɔnɔ mafɔ́ɔ́dɔ́ɔ naá máŋɛ́.

¹⁹Gɛ́hɛ́ go bó oyana a amɔ́: «Mbienéemú nɔnɔ, nná nyó íyie bonóbí batɔ.»

²⁰Bá báa lɛ gó dómba go síe bá báá cecúgíe mafɔ́ɔ́dɔ́ɔ mábɔ́, bá báá mo biené.

²¹Yésusu a á gɔnɔ́ báyɛkɛdɛna naá busío, go ɛ́na bahaŋa bá Sebedée báandɛ́; Sáakɛ na ondimóní Sáŋa. Bá mba lɛ́ naá gilué olɔŋɔ na isée babɔ́, bá gedegedie mafɔ́ɔ́dɔ́ɔ mábɔ́. Gɔ́ɔ Yésusu a bó dɔ́ŋɛnɔmɔ́.

²²Bɔ́ɔbɔ tɔ́nɔ go dómba go síe isée babɔ́ na gilué, go mo biene.

²³Gɔ́ɔ Yésusu ɛ ɛ́damɔ́ ɛ ɛnda naá bɛdɔŋɔ bá Gelilée biimée, a húunenye naá nnyaŋá sábɔ́ sá mbósógólí, a dúmenye Gɛnɔ́gɔ́ gá Cɔ́mɔ gá Bufuŋe bá mmoɛná, e éŋugenye ɛgɔnɔ́, bɛnɛ́mɔ mbɔ́dɔ iŋkimée, naá gɛdɔŋɔ.

²⁴Ufíno yɛ́hɛ́ go dómba go saa gɛdɔŋɔ gá Silíi giimée, bá báá lɛ gó ɛ́da go mo úlenine na bɔgɔnɔ́gɔnɔ mbɔ́dɔ iŋkimée na batɔ bá bɛgáda bá biliíli, buubí giti[21], bɛcɛ́gɛlɛ: Yésusu a bó éŋugenye.

²⁵Bitúu bitúu bá batɔ go mo bienene, bɛ́ ɛ́da go úlene naá Gelilée, naá gigísi gá cí gá Tɛ́sɔnɔ sɛ́ɔ́dɔ́, naá Yolósalɛmɛ, naá Yudée, na naá gigísi gá cí gɛ́ɛgɛ boayá búunú bá Yɔlɔdɛ́ŋɛ.