Read Nugunu Motíosi 6 Bible Online

Motíosi 6 - Nugunu bible

Motíosi 6

¹«Bébeŋéemú nɔnɔ go go hóógónyóo masɔ́mɔ mɛ́nyɔ́ má gioliminyo naá gɛtátáná, goŋaá mɔtɔ uŋkimée a nyó núune. No amɔ́ no má hóogonyo nɔ́ɔnɔ, no do ná bóso go dáŋaba bɛsoɛná bɛ́ɛbɛ naá Baaba bɛnyɔ́ mɔ́ɔnyɔ naá mmoɛná.

²Gɔ́ɔgɔ o fáananamɔ́ basógasoga muinyí, o do ŋaáa goŋaá batɔ bá go ága oŋgíso, nɔ́ɔ gɔ́ɔ bekuilí bá ŋananamɔ́ naá nnyaŋá sá mbósógólí na naá maayá má bɛbala: bá ŋanana nɔ́ɔnɔ go goŋaá batɔ bá bó búlugenye. Ŋgaá nyó oyáná naá mammana caá: bá báa na go dáŋaba bɛsoɛná bábɔ́.

³Kanɛ́ maamɔ́ɔ, gɔ́ɔgɔ o fáananamɔ́ basógasoga muinyí, ombɔ́gɔ odádɛ́ yáhɔ yó do háánánáa go íyime bɔ́ɔbɔ ombɔ́gɔ onɔ́mɛ yó ŋananamɔ́,

⁴go goŋaá pááná yahɔ yɛ́ɛyɔ ɛ lɔbɛnɔ naá nnindíi. Tɛ́ɔ ɛ ɛ́nana buimée bɔ́ɔbɔ o ŋananamɔ́ naá nnindíi, a ŋga go fáá bɛsoɛná.

⁵«Gɔ́ɔgɔ no bósógolonyomú, no do bɛ́ɛ́mbá aŋa bekuilí: bá maamana go bósógolonyo tɛ́nɛ́ɛ naá nnyaŋá sá mbósógólí na naá maayá má bɛbala[33], goŋaá batɔ biimée bá bó ɛ́na. Ŋgaá nyó oyáná mammana caá, bá báá na go dáŋaba bɛsoɛná bábɔ́.

⁶Kanɛ́ maamɔ́ɔ, gɔ́ɔgɔ o lɛ́galɛgamɔ́ go bósógolonyo, íŋéne naá mamɔ́ nɛgɛlɛ́, o buige gɛasɛ́, o bósógolonyo Tɛ́ɔ, a lɛ́ hɔ́ɔ naá hoóma hɔ́ɔhɔ há lɔ́mɔ́ nnindíi. Kɔ́ɔ Tɛ́ɔ ɛ ɛ́nana buimée bɔ́ɔbɔ o ŋananamɔ́ naá nnindíi, a ŋga go fáá bɛsoɛná.

⁷Gɔ́ɔgɔ no bósógolonyomú, no do degényée gɛcɛcá gá dogálɔ, aŋa biindiíyímé Asaŋa bɛ́ ŋananamɔ́. Bɛ́ fege bɛ́ amɔ́ hɔ́ɔlɔ́ gɔ́ɔ Asaŋa a bó bódólonyomú aŋa bɛ́ gálagala makɔ́nɔ́.

⁸No do ŋanánáa aŋa bɔ́ɔ, goakɛ́ Isée bɛnyɔ́, a ná lɛ́ go íyimene bɔ́ɔbɔ no lɔ́mɔ́ mbií ya bɔ́ otóotoɛ yá ŋaá no mo úhune.

⁹«Náana gɔ́ɔ no háananamɔ́ go bósógolonyo: Baaba bɛcɔ́ mɔ́ɔnyɔ naá mmoɛná, lincíe batɔ biimée ánɛ́ɛ o lɔ́mɔ́,

¹⁰úlé na Bufuŋe báhɔ, ŋgáa ndɛ́ga yahɔ ɛ báŋa naá cí aŋa naá mmoɛná.

¹¹Có fáamɔ́ manyáanya mɛ́cɔ́ má ínoni[34].

¹²Có hééhínyéemú mbudí yɛcɔ́, aŋa dɛ héehinenyemú báaba bá có budemú.

¹³O do có dɛ́ɛ́ná dɛ dɛ obɛ́ná naá ɛsɔgɛdɔ, có sódíomú go Ombɛ́[35].

¹⁴«Ɛɛ́ɛŋ, no amɔ́ no héehinenye batɔ bɛoba bábɔ́, Isée bɛnyɔ́ mɔ́ɔnyɔ naá mmoɛná a ŋga nyó hééhínényée tɔ́nɔ.

¹⁵Kanɛ́, aáŋa no do hééhínényée batɔ bɛoba bábɔ́, Isée bɛnyɔ́ a dɛ ŋgá nyó héehinenye tɔ́nɔ bɛoba bɛ́nyɔ́.

¹⁶«Gɔ́ɔgɔ no bécelenemú manyáanya, no do ɛ́dá go gɛ́ga gosóga gosóga aŋa bekuilí bá ŋananamɔ́: bá núgenye mosío mábɔ́ goŋaá mɔtɔ uŋkimée ɛ ɛ́na goŋaá bá bécelene manyáanya. Ŋgaá nyó oyáná mammana caá: bá báá na go dáŋaba bɛsoɛná bábɔ́.

¹⁷Kanɛ́ maamɔ́ɔ, gɔ́ɔgɔ o bécelenemú manyáanya, básogáamɔ́ busío o gunde o béfúe megúdé,

¹⁸go goŋaá batɔ bá dɛ ɛ́ná bá amɔ́ o bécelene manyáanya. Goana Tɛ́ɔ mokáa mɔ́ɔnyɔ a lɔ́mɔ́ hɔ́ɔ hɔ́ɔlɔ́ naá nnindíi, mɔ́ɔ i íyimenemú. Tɛ́ɔ mɔ́ɔnyɔ ɛ ɛ́nanamɔ́ bɔ́ɔbɔ o ŋananamɔ́ naá nnindíi, mɔ́ɔ a ná go déŋebiemú bɛsoɛná.

¹⁹«No do bábándánáa bonɔ́mɛ naá cí bɔ́ɔbɔ mesígídé na ŋgéŋeŋée mó ná díeŋiemú, ɛ́na lí biíbi bá áda ncíbo bí íbene.

²⁰Kanɛ́ bándáa nɔnɔ bonɔ́mɛ bɛ́nyɔ́ naá mmoɛná, anáa mesígídé akɛ́ ŋgéŋeŋée mó lɔ́mɔ́ mó do bɛ́ɛ́mbá ba go díeŋie, akɛ́ biíbi bá dɛ báá ba go áda ncíbo, bí íbene.

²¹Mammana, anáa bonɔ́mɛ báhɔ bó lɔ́mɔ́, hɔ́ɔ tɔ́nɔ odɛ́má yáhɔ yó lɔ́mɔ́.

²²«Lámba ya nnyɔ́dɔ ɛ lɔ́mɔ́ niíso. Aáŋa niíso náhɔ nɛ́ lɛ́ nɛgɔ́sɔ, nnyɔ́dɔ yahɔ iŋkimée ɛ lɛ́ naá gise.

²³Kanɛ́ aáŋa niíso náhɔ nɛ́ nóma, nnyɔ́dɔ yahɔ iŋkimée ɛ lɛ́ naá mbíno. Ábɔ aáŋa gise gɛ́ɛgɛ gɛ́ lɔ́mɔ́ naá maamɔ́ɔ gɛ́ lɛ́ mbíno, gɛbɛ́ gá mbíno moatɛ́, ɛɛ́ɛŋ!

²⁴«Mɔtɔ a dɛ báá ba go yɔgɔnɛnɔ bagɔ́nɔ́ɔ báandɛ́: a gaá bɛlábɛ́láa ummue, a maamana mɔ́ɔnyɔ untió. Ɛ́na lí, a gaá báladá na ummue, a fánɛna mɔ́ɔnyɔ untió. No do báá ba go yɔgɔnɛnɔ na Asaŋa na Muinyí.

²⁵«Nɔ́ɔnɔ gɔ́ɔ nnyó oyanamɔ́ caá: no do yóbímídónóo naá gɛɔyɔ gɛ́nyɔ́ go boóma bá go nyáa, [ɛ́na akɛ́ go boóma bá go bónyo], ɛ́na lí go bɛla bɛ́ɛbɛ no gaá ná báágánáa. Ábɔ, gɛɔyɔ gɛ́ dɛ dómbánáa manyáanya o? Nnyɔ́dɔ ɛ dɛ dómbánáa bɛla o?

²⁶Ɛ́ná nɔnɔ munoní: mó do gónáa, mó do sáŋáa, mó do bándáa naá bɛɔ́lɔ; kanɛ́ Isée bɛnyɔ́ mɔ́ɔnyɔ naá mmoɛná a mó dúge! No lɛ́ bɛantáanta bá moóma naá oŋgíso yá Asaŋa no mó dómbana!

²⁷Ánɛ́ɛ kanɛ́ naá bɛɛnyɔ́ɔ a lɔ́mɔ́ ba go bégídene medúgú akɛ́ sɔŋɛ naá gɛɔyɔ gɛ́hɛ́[36] goŋaá a yóbimidono o?

²⁸No yóbimidonomú kanɛ́ go bɛla goakɛ́ o? Núúnée nɔnɔ mbínyí na bióli bá sɛ́ naá bodɛ́agadɛ́ aŋa sɛ́ gomamɔ́: sɛ́ dɛ yɔgɔ́nɔ́ɔ, sɛ́ dɛ nogáa bɛla.

²⁹Kanɛ́ ŋgaá nyó oyáná caá, Salomɔ́ŋɔ mɔ́ɔ moatɛ́ moatɛ, naá nigúmi nɛ́hɛ́ niimée[37], a lɛ́ kanɛ go báága gɛla gá go éme bonɔ́gɔ́ aŋa mbínyí mmue naá sɛ́.

³⁰Aáŋa Asaŋa a lɛŋa nɔ́ɔnɔ mbínyí sá bodɛ́agadɛ́ sɛ́ɛsɛ sɛ́ lɔ́mɔ́ ínoni sɛ́ hɔ́ɔ, nembeli bá sɛ́ nɔɔ naá íyuke. Nɛɛ́nɛ a lɔ́mɔ́ a dɛ bɛ́ɛ́mbá bá go ŋa gɛ́nyɔ́ a dómba mbínyí, batɔ bá gioliminyo fágɔfágɔ báaba!

³¹No do ɛ́dá kanɛ́ go yóbimidono no gálagala no amɔ́: “Dɛ gaá ná nyáá ɛkádɛ o? Dɛ gaá ná bónyó ɛkádɛ o? Ɛ́na lí, dɛ gaá ná bálɛŋáa na ɛkádɛ o?”

³²Muimée mɔ́ɔmɔ, bindiolímínyóo Asaŋa bɛ́ mó fúmbe kanɛ tɔmbɛ́nɔ́ɔ. Isée bɛnyɔ́ mɔ́ɔnyɔ naá mmoɛná i íyimene buimée bɔ́ɔbɔ no baŋamɔ́.

³³Fúmbée nɔnɔ manɛ́ Bufuŋe bá mmoɛná na botɛ́nɛ́ɛ bá Asaŋa, manɛ́ a ná nyó ɛndɛgɛnɛnamɔ́ muimée mɔ́ɔmɔ.

³⁴No do yóbímídónóo go nembeli, nembeli a gaá yóbímídónóo go mɔ́ moatɛ́ moatɛ. Buisí buimée bó háanana na gɛdɔmbɔ gá bɔ́!