Read Nugunu Motíosi 7 Bible Online

Motíosi 7 - Nugunu bible

Motíosi 7

¹«No do bɛ́ɛ́mbá báaba bá sómbanɛnamɔ́ basɔ́gɔ́ɔ bɛsɛnɛ, go goŋaá Asaŋa a dɛ nyó sómbɛ́ná bɛɛnyɔ́ɔ.

²Mammana, Asaŋa a ŋga nyó sómbɛ́ná bɛsɛnɛ bɛ́nyɔ́ naá mbɔ́dɔ yɛ́ɛyɛ bɛɛnyɔ́ɔ no sómbanamɔ́ basɔ́gɔ́ɔ. Bá ŋga gɔ́lɔ́ go busío bɛ́nyɔ́ mɛ́da máama no lɔ́mɔ́ na má go bɔsɔ́gɔ́ɔ.

³Go busío báakɛ́ o núunemú gifumbú gɛ́ɛgɛ naá niíso ná tɛ́ɔbɛnɔ, kanɛ go ɛ́na boɛ́tɛ bɔ́ɔbɔ bó lɔ́mɔ́ naá náhɔ niíso o?

⁴Ɛ́na lí, nɛɛ́nɛ o lɔ́mɔ́ ba go oyana tɛ́ɔbɛnɔ go amɔ́: Tɛ́ɛ́náamɔ́ ko úlie gifumbú gɛ́ɛgɛ naá niíso náhɔ, gɔ́ɔ maamɔ́ɔ na boɛ́tɛ naá náhɔ o?

⁵Ukuilí mɔ́ɔnyɔ, manɛ́ dóana go búúlie boɛ́tɛ bɔ́ɔbɔ naá mamɔ́ niíso, o lo go nco go ɛ́nana bese go go úlie gifumbú gɛ́ɛgɛ naá niíso ná tɛ́ɔbɛnɔ.

⁶«No do íŋéné go mbóa bɔ́ɔbɔ bó lɔ́mɔ́ fonáalú, go goŋaá sɛ́ dɛ nyó békikílídínyée go go nyó nóma; no do nɔɔnɔ́nɔ́ɔ ndɛŋɔ sɛ́nyɔ́ go ŋgɔnɔ́bɛ́ goŋaá sɛ́ gaá sɛ́ naadánáa.

⁷«Ɔŋɔ́nɔ́ɔ nɔnɔ, manɛ́ bá ŋgaá nyó fáá; fúmbée nɔnɔ, manɛ́ no ŋgaá huenyée; gɔdɛ́dɛ́nɔ nɔnɔ bá lɛ go nyó buunene gɛasɛ́.

⁸Mammana, mɔtɔ uŋkimée mɔ́ɔnyɔ ɔ ɔŋɔnɔmɔ́, bá mo fáanana, mɔ́ɔnyɔ a fúmbemú a huenenye, mɔ́ɔnyɔ a gɔdɔnɔmɔ́ bá mo buunene gɛasɛ́.

⁹Ɛ́na lí, ánɛ́ɛ naá bɛɛnyɔ́ɔ a lɔ́mɔ́ ba goŋaá moɔnɔ́ a amɔ́ a mo ɔŋɛnɔ gɛlɛ́dɛ, a mo fáa ɛdánɛ́ o?

¹⁰Ɛ́na gɔnɔ́, moɔnɔ́ a mo ɔŋɛnɔ hɛɔbɔ́, mɔ́ɔ a mo fáa hɛɔnɛnɔ o?

¹¹Kanɛ́ bɛɛnyɔ́ɔ báaba no lɔ́mɔ́ bɛgáda bá batɔ, no íyimene go fáanana baaná bɛ́nyɔ́ bɛnɔ́gɔ́ bá moóma, ɛŋɛndɔ inikí Isée bɛnyɔ́ mɔ́ɔnyɔ naá mmoɛná a lɔ́mɔ́ ba go fáanana bɛnɔ́gɔ́ bá moóma go báaba bá mo ɔŋɔnɔmɔ́ o?

¹²«Buimée bɔ́ɔbɔ no lɛ́galɛgamɔ́ goŋaá batɔ bá nyó ŋɛɛna, bó ŋɛɛnáamɔ́ tɔ́nɔ obɔ moánɛ: hɔ́ɔlɔ́ há Gicele gá Mɔ́sɛsɛ na kálata sá mbúsí sá Asaŋa mó oyamɔ́[38].

¹³«Íŋénénée nɔnɔ naá gɛasɛ́ gá gágálɛ́dáalú; goakɛ́ gɛasɛ́ gá gɛsaágada gɔnɔ́ pɛ́ yɛ́ɛyɛ yɛ ɛ́danamɔ́ naá goyíme ɛ lɛ́ fɛaŋɔ; batɔ gɛca bá dómbanamɔ́ hɔ́ɔ.

¹⁴Kanɛ́, gɛasɛ́ gá cɔkɛnɛ, gɛ́ lɔ́mɔ́ pɛ́ yɛ́ɛyɛ yɛ indenyemú naá gɛɔyɔ, gɔ́ɔ batɔ sɔŋɛ bá yɛ fídenemú, goakɛ́ ɛ lɛ́ ndɔlɛ.

¹⁵«Bébeŋéemú nɔnɔ go mbúsí sá mbele. Sɛ́ nyó úlenine na mɔlɛŋɔ má bɛdómbáa, kanɛ́ naá gadɛ́ɛ gúunú, sɛ́ lɔ́mɔ́ ŋkɔ.

¹⁶No ŋga sɛ́ lɛncánáa go bɛsamɔ́ bá sɛ́. Bá dɛ gásáa bíkodóo naá gɛ́loŋká, ɛ́na mulíómólíómóo naá molɛ́ŋa.

¹⁷Caŋa táŋɛ́ mmue gɛnɔ́gɔ́ gá boɛ́tɛ gɛ́ úmemú bɛnɔ́gɔ́ bá bɛsamɔ́; gɛbɛ́ gá boɛ́tɛ gɛ́ úme tɔ́nɔ bɛbɛ́ bá bɛsamɔ́.

¹⁸Gɛnɔ́gɔ́ gá boɛ́tɛ gɛ́ dɛ úmée bɛbɛ́ bá bɛsamɔ́, nɔ́ɔnɔ tɔ́nɔ gɛbɛ́ gá boɛ́tɛ gɛ́ dɛ úmée bɛnɔ́gɔ́ bá bɛsamɔ́.

¹⁹Boɛ́tɛ buimée bɔ́ɔbɔ bó lɔ́mɔ́ bó do úmée bɛnɔ́gɔ́ bá bɛsamɔ́, bá bó sómba bá nɔɔnɔnɔ naá íyuke

²⁰Nɔ́ɔnɔ gɔ́ɔ no ŋgaá lɛncánáa mbúsí sá mbele go meŋiigíe má sɛ́.

²¹«Caákɛ́ biimée báaba bá pínenyemú bá amɔ́: “Daadáa, Daadáa!” bɔ́ɔ bá ŋgií íŋéné naá Bufuŋe bá mmoɛná, kanɛ́ goana báaba bá ŋananamɔ́ ndɛ́ga ya Baaba mɔ́ɔnyɔ naá mmoɛná.

²²Aŋa buisí bá go sómba bɛsɛnɛ bó ŋgaá bolá, gɛca gá batɔ gɛ́ ŋga ŋgoyáná gɛ́ amɔ́: “Daadáa, Daadáa, ábɔ caá go ufíno yáhɔ gɔ́ɔ dɛ mbaá dóógónyóo cɔ́mɔ sá Asaŋa o? Dɛ báá gúnée bɛgáda bá biliíli o? Dɛ báá ŋanánáa gɛca gá bɛsɛɔ o?”

²³Gɔ́ɔ ka ŋgaá bó oyáná daŋɛ́daŋɛ caá: “Ndɛ́ kanɛ go nyó íyime, ɛ́dá nɔnɔ halaháláa namɛ, bɛɛnyɔ́ɔ báaba no ŋananamɔ́ bobɛ́[39]!”

²⁴«Gɔ́ɔ mɔtɔ uŋkimée mɔ́ɔnyɔ a bódólonyomú dogálɔ duimée dɔ́ɔdɔ ká lɔ́mɔ́ na go gálagala a báá dó bɛ́dɛ́gɛ́ná, a ŋga bɛ́ɛ́mbá aŋa mɔtɔ ba nciŋí mɔ́ɔnyɔ a mbaá fóágá nnyaŋá yɛhɛ́ naá gɛdánɛ́dánɛ́ mmoɛná.

²⁵Nobóláa a báá naanánáa, ɛsɔmbɔ ɛ báá noncánáa, puŋe sɛ́ báá fufée na bogaaga, moóma muimée mɔ́ɔmɔ mó báá yúgúlényée nnyaŋá yɛ́ɛyɔ, akɛ́ nɔ́ɔnɔ ɛ dɛ mbá buhuge, goakɛ́ mogoná má yɛ́ mó mba lɛ́ dábɛ́gáalú naá gɛdánɛ́dánɛ́ mmoɛná.

²⁶Gɔ́ɔ mɔtɔ uŋkimée mɔ́ɔnyɔ a bódólonyomú dogálɔ duimée dɔ́ɔdɔ ká lɔ́mɔ́ na go gálagala a dɛ ŋaáa aŋa dó oyamɔ́, a ŋga bɛ́ɛ́mbá caŋa mmue aŋa mɔtɔ ba kanɛ nciŋí mɔ́ɔnyɔ a mbaá fóágá nnyaŋá yɛhɛ́ naá ɛcánána mmoɛná.

²⁷Nobóláa a báá naanánáa, ɛsɔmbɔ ɛ báá noncánáa, puŋe sɛ́ báá fufée na bogaaga, moóma muimée mɔ́ɔmɔ mó báá yúgúlényée nnyaŋá yɛ́ɛyɔ, gɔ́ɔ ɛ mbaá buhúgé; gobuhuge gá yɛ́ gó mba lɛ́ gɛɛmba.»

²⁸Aŋa Yésusu a mbaá dɔmbɔ́ témbuginye sɛ́ɛsɛ, bitúu bá batɔ bɛ́ báa lɛ gó ɛ́da go békúke go mbɔ́dɔ yɛhɛ́ ya go húunenye;

²⁹goakɛ́ a mba lɛ́ a bó húunenye aŋa mɔtɔ mɔ́ɔnyɔ a bɛananamɔ́ nɛgaŋa, caá akɛ́ aŋa muloodio mábɔ́ má bicele.