Read Nugunu Mélékusu 1 Bible Online

Mélékusu 1 - Nugunu bible

Mélékusu 1

¹Mabayɛga má Gɛnɔ́gɔ́ gá Cɔ́mɔ gɛ́ɛgɛ gɛ́ oyamɔ́ gɛɔyɔ gá Yésu Kilítu, [Moɔnɔ́ ba Asaŋa] mámáa.

²Naá kálata ya mbúsí ya Asaŋa Iseyíi, bó lɛ́ ɔ́ŋɔ́ɔlú goŋaá: «Ɛ́ná, ŋgaá dúényée mɔtɔ bamɛ ba bosɔ́mɔ naá busío gáhɔ, goŋaá a gedegedie pɛ́ yahɔ.»

³Ukelú yá mɔtɔ yó mba lɛ́ yó dónogogana naá giolóo gá bodɛ́agadɛ́ yó amɔ́: Gedégédíe nɔnɔ pɛ́ ya Daadáa, bónónáa nɔnɔ ŋŋɛndɛ́ná sɛ́hɛ́[1].

⁴Gó moánɛ Sáŋa Begiyuminye a buyugugemú naá giolóo gá bodɛ́agadɛ́, a yumeninye batɔ ɛ ɛ́da a bó oyanɛna a amɔ́: Núgíe nɔnɔ gɛɔyɔ gɛ́nyɔ́[2], no béyuminye, manɛ́ Asaŋa a ná héehinyemú bɛlɔgɔ bɛ́nyɔ́.

⁵Gɛcɛcá gá batɔ gá go ɛ́da go úle naá Yudée na biimée báaba bá Yolósalɛmɛ bɛ́ ɛ́damɔ́ go úlene naá Sáŋa; bó oya bɛoba bábɔ́ daŋɛ́daŋɛ, a bó yumeninye naá Yɔlɔdɛ́ŋɛ.

⁶Gɛla gɛ́ɛgɛ Sáŋa a mbaá lɛ a bɛga gɛ́ mba lɛ́ gedíelú na binúmpe bá nnyama yɛ́ɛyɛ bá dɔ́ŋɔnɔmɔ́ bá amɔ́ samóo, kandáa ya gɛɔbɔ básómbɛ́náalú go nosɛ́ŋɛ́[3]. A mba lɛ́ a bédúge na bɛatatalá na megúdé má póɔ́ŋɛ́.

⁷Sáŋa a mba lɛ́ o oyanɛna gitúu gá batɔ cɔ́mɔ ya Asaŋa a amɔ́: «Mɔtɔ ummue u úlene naá nnyimé yamɛ, a lɛ́ gɛgaaga a tómbana, cɛ háánánáa naá odɛ́nɛ́ yá go gudimene, pulune nuelí ná nnaadɛna sɛ́hɛ́.

⁸Yɔmɔ́ɔ ŋgaá nyó yuménínyée na miimpo, mɔ́ɔ a ná nyó yumeninye na Gimmúmpúu gá Giliíli.»

⁹Naá gɛcamɛna moánɛ gíiní, gɔ́ɔ Yésusu a mbɛɛ́ ɛ́dá fadɛgɛna naá tɛ́sɔnɔ ya Násalɛdɛ ba Gelilée go go úle naá osaá yá Yɔlɔdɛ́ŋɛ; Sáŋa go mo yuminye hɔ́ɔ.

¹⁰Hɔ́ɔ na hɔ́ɔ, aŋa Yésusu a mbaá lɔmɔ́ a húmene naá miimpo, gɛ́hɛ́ go ɛ́na mmoɛná ɛ bébuune, Gimmúmpúu gá Giliíli go mo siisene aŋa mmɛŋá.

¹¹Gɛ́hɛ́ go ɔ́bɔ ukelú yó ɛ́da go úlene naá mmoɛná yó oya yó amɔ́: «O lɛ́ Moɔnɔ́ bamɛ ba odɛ́má, ŋgaá ágá bɛyaŋa bámɛ biimée naá maamɔ́ɔ[4].»

¹²Hɔ́ɔ na hɔ́ɔ, Giliíli ba Asaŋa a báá lɛ gó ɛ́da nɛhɛ́ naá giolóo gá bodɛ́agadɛ́.

¹³A mba gɛ́gáa hɔ́ɔ medúgú otíno áhandɛ́, Sátana a mo gogona. A mba lɛ́ ɔ ɔyɔ émmué na nnyama sá gɛsɔgɔ. Bɛɛ́ŋgɛlɛsɛ bá mo yɔgɔnɛnɔ.

¹⁴Naá nnyimé ya go gumbene Sáŋa, bá báá mo ágá naá ncíbo ya gɛaŋɔ́[5], Yésusu go ɛ́da naá Gelilée. A mba lɛ́ a dúmenye Gɛnɔ́gɔ́ gá Cɔ́mɔ gá Asaŋa, o oyanɛna batɔ a amɔ́:

¹⁵«Gɛcamɛna gɛ́ á háá, Bufuŋe bá Asaŋa bó á báyɛkɛ́ná. Núgíe nɔnɔ gɛɔyɔ gɛ́nyɔ́, no oliminyo gɛnɔ́gɔ́ gá Cɔ́mɔ.»

¹⁶Yésusu ɛ ɛnda naá cɔ́lɔ ya máŋɛ́ má Gelilée, gɛ́hɛ́ go ɛ́na bonóbí moɔbɔ́ báandɛ́, Símono na ondimóní Andɛlɛ́ɛ, bá nɔɔnɔnɔ mafɔ́ɔ́dɔ́ɔ naá máŋɛ́.

¹⁷Yésusu go bó oyana a amɔ́: «Mbienéemú nɔnɔ, nná nyó íyie bonóbí batɔ.»

¹⁸Bá báá lɛ gó dómba go síe bá báá cecúgíe mafɔ́ɔ́dɔ́ɔ mábɔ́, bá báá mo biené.

¹⁹Yésusu a á gɔnɔ́ báyɛkɛdɛna naá busío go ɛ́na bahaŋa bá Sebedée báandɛ́, Sáakɛ na ondimóní Sáŋa. Bá mba lɛ́ naá gilué, bá gedegedie mafɔ́ɔ́dɔ́ɔ mábɔ́.

²⁰Yésusu go dómba go bó dɔ́ŋɛnɔ. Bɔ́ɔ tɔ́nɔ go dómba go síe isée babɔ́ Sebedée na boyogóní bɛ́hɛ́ naá gilué, go mo biene.

²¹Yésusu na behúúní bɛ́hɛ́ go bola naá tɛ́sɔnɔ ya Kapɛlɛnahɔ́mɛ. Go buisí bá sábadɛ, gɛ́hɛ́ go íŋene naá nnyaŋá ya mbósógólí, go ɛ́da go húunenye.

²²Batɔ bá mba lɛ́ na bibékúkí na mbɔ́dɔ yɛhɛ́ ya go húunenye, goakɛ́ a mba lɛ́ a bó húunenye aŋa mɔtɔ mɔ́ɔnyɔ a bɛananamɔ́ nɛgaŋa, caá akɛ́ aŋa muloodio má bicele.

²³Mɔtɔ ba gɛgáda gá giliíli go bɛ́ɛmba hɔ́ɔ naá nnyaŋá ya mbósógólí; gɛ́hɛ́ go áncɛda ukelú naá mmoɛná a amɔ́:

²⁴«Yésusu ba Násalɛdɛ, ɛkádɛ o fúmbemú nɛcɔ́ o? O lɔ́mɔ́ úléelú go go nco có fúugie lí? Ŋgíyimene ánɛ́ɛ o lɔ́mɔ́: o lɔ́mɔ́ Gimmúmpúu mɔ́ɔnyɔ Asaŋa a mbaá dómá.»

²⁵Kɔ́ɔ Yésusu a áncɛdɛnamɔ́ gɛgáda gá giliíli gɛ́ɛgɔ a báá gɛ́ gálɛ́dá a amɔ́: «Buigé nyuudé, o húme naá mɔtɔ mɔ́ɔnyɔ!»

²⁶Gɛgáda gá giliíli go dómba go mo búgulidie, gɛ́ báá húmé naá mɔ́ nnyɔ́dɔ gɛ́ ɛ́da gɛ́ ágana kóokóo.

²⁷Batɔ biimée go ɛ́da go békúke, bá búúhenihenine bá amɔ́: «Bɔ́ɔbɔ náana ŋkádɛ o? Gɛpáa gá gohúunenye gɛ́gɛ́ɛ na nɛgaŋa dácɛ! A gálagala akɛ́ na bɛgáda bá biliíli bɛ́ mo ɔ́bɛnɔnɔ!»

²⁸Ufíno yá Yésusu go dómba go saa hoóma hiimée naá gigísi gá cí gá Gelilée.

²⁹Yésusu a á húmé naá nnyaŋá ya mbósógólí, gɛ́hɛ́ go ɛ́da olɔŋɔ na Sáakɛ na Sáŋa naá nnyaŋá ya Símono na Andɛlɛ́ɛ.

³⁰Kanɛ́ naá ncíbo, nnyeedíi ba ogánɛ́ Símono a mba lɛ́ mbɛ́dɛ́ɛ, nnyɔ́dɔ ɛ báá go bólɛga. Gɔ́ɔ bó oyanamɔ́ Yésusu.

³¹Yésusu a á báyɛkɛ́ná, go mo gumbene go ombɔ́gɔ a báá mo fedígínyée, hɔ́ɔ na hɔ́ɔ, nnyɔ́dɔ ya okɔ́dɔ go fuuge, mɔ́ɔnyɔ a báá lɛ gó dómba go go bó ala.

³²Na hɛɔbɔ́bɔ́ɔ, buisí bó báa go fúe púmú[6], batɔ bá báá lɛ gó ɛ́da go úlenine Yésusu na bɔgɔnɔ́gɔnɔ mbɔ́dɔ mbɔ́dɔ, na batɔ bá bɛgáda bá biliíli.

³³Kɔ́ɔ batɔ biimée báaba naá tɛ́sɔnɔ bá ncomɔ́ béhunde naá gɛasɛ́ gá nnyaŋá.

³⁴Yésusu a báá lɛ gó ɛ́da go éŋugenye bɔgɔnɔ́gɔnɔ mbɔ́dɔ mbɔ́dɔ, a gúne gɛca gá bɛgáda bá biliíli; a dɛ bɛ́ fáá pɛ́ ya go gálɛda, goakɛ́ bɛ́ mba lɛ́ bɛ́ íyimene ánɛ́ɛ a lɔ́mɔ́.

³⁵Aŋa gó mbaá bélíe, Yésusu go húme na gɛyɛ́nɛ́ túlúbú, mobínobínó má gá lɛ́, go ɛ́da naá giolóo gá hoóma, go oba go bósógolonyo hɔ́ɔ.

³⁶Símono na biimée báaba bá mbaá lɛ nɛhɛ́ go ɛ́da go go mo fúmbe.

³⁷Aŋa bá mbɛɛ́ ɛ́dá mo gíde, bá báá lɛ gó mo oyana bá amɔ́: «Batɔ biimée bá go fúmbe.»

³⁸Kanɛ́ Yésusu go bó oyana a amɔ́: «Ŋgáa dɛ no ɛ́da hoóma hóntió, naá motɔtɔ́ŋɔ má maayá. Hɔ́ɔ tɔ́nɔ, cɛmɛganana go dúmenye Gɛnɔ́gɔ́ gá Cɔ́mɔ: mammana, ndɔ́mɔ́ úléelú go busío moánɛ[7].»

³⁹Gɔ́ɔ Yésusu ɛ ɛ́damɔ́ ɛ ɛnda naá bɛdɔŋɔ bá Gelilée biimée, ɛ ɛ́da o oya Gɛnɔ́gɔ́ gá Cɔ́mɔ naá nnyaŋá sábɔ́ sá mbósógólí, a gúne bɛgáda bá biliíli.

⁴⁰Gɔ́ɔ ukúnúkunu ummue a ncomɔ́ gule enúu go ɛ́da go béyéeyenye Yésusu a amɔ́: «Aáŋa o lɛ́galɛga, o lɛ́ ba go cogona.»

⁴¹Mahana go gɔ́lɔ Yésusu[8], a á gaanóná ombɔ́gɔ go mo báláfɛna a amɔ́ gɛ́hɛ́ aá: «Ndɛ́galɛga, bɛ́ɛ́mba sogónáalú.»

⁴²Hɔ́ɔ na hɔ́ɔ, mɔtɔ go dúmbie go éŋuge, kúnú yɛhɛ́ ɛ báá maná.

⁴³Yésusu go dómba go mo gúlugie na mbébégene, a amɔ́:

⁴⁴«O bébeŋe, o do oyáná mɔtɔ boóma, kanɛ́ ɛ́dá bédúfie naá udúmbí bɛbáágá naá Asaŋa, o fáa go gɛsogona gáhɔ gɛbáágá gɛ́ɛgɛ Mɔ́sɛsɛ a mbaá sómbá, bó gaá dúfíe mɔtɔ uŋkimée goŋaá go é éŋúgé[9].»

⁴⁵Mɔtɔ moánɛ a á fídé pɛ́, gɔ́ɔgɔ gá goŋaá a buige nyuudé nɛ́hɛ́, go ɛ́da a gúmenye hoóma hiimée aŋa Yésusu a lɔ́mɔ́ mo éŋúgíelú. Go boóma moánɛ, Yésusu a dɛ mbáa lɛ bá go gɔnɔ go íŋene naá tɛ́sɔnɔ mmue daláŋɛ́ dalaŋɛ. Gɛ́hɛ́ go bɔ́gɔ́gɛdɔ go ɛ́da go gɛ́ga naá hoóma há kanɛ nnyaŋá, akɛ́ nɔ́ɔnɔ, batɔ bá mba lɛ́ bá mo úlenine maayá miimée.