Read Nugunu Mélékusu 12 Bible Online

Mélékusu 12 - Nugunu bible

Mélékusu 12

¹Gɔ́ɔ Yésusu ɛ ɛ́damɔ́ go bó gálagala go ncaba a amɔ́: «Mɔtɔ ummue a mba bɔ́ŋɔ́ ntɛ́mɛ́ ya magónɛ́dá má bɛsamɔ́ bá mɔgɛ́bɔ; a báá yɛ dúméné omɛndɛ́, a báá gedíe osá, a báá fóágá tɔ́nɔ nnyaŋá ya mmoɛná go ogɛ́ga[67]. Kɔ́ɔ a yɛ íŋenemú go gɛdɛ́nɔ go boyogóní bá go dɛŋa mɔgɛ́bɔ, mɔ́ɔ a bɛ́ɛ́ ɛ́dá go oŋɛndɔ.»

²Aŋa mɔtɔ ba ntɛ́mɛ́ a mbaá lɛncɛ́gɛ́ná gɛcamɛna gá masáŋa, gɛ́hɛ́ go dóma uyogóní bɛhɛ́ ummue naá boyogóní bá go dɛŋa mɔgɛ́bɔ goŋaá bá mo dómɛna bɛ́hɛ́ bodáŋɔ.

³Bɔ́ɔbɔ go gumbene mɔtɔ ba bosɔ́mɔ, bá báá mo gidé bá báá mo gúlúgíe ɛmbɔ́gɔ ɛhandɛ́.

⁴Mɔtɔ ba ntɛ́mɛ́ go dóma uyogóní uncodío, ba ndiemi, bá báá mo gidée go odóɛ go odóɛ, bɛ́ ɛ́da bá mo sɛga.

⁵Gɛ́hɛ́ go gɔnɔ dóma uyogóní uncodío, mɔ́ɔnyɔ mɔ́ɔ boyogóní bá go dɛŋa mɔgɛ́bɔ bá mboó óná, caŋa táŋɛ́ mmue gɔ́ɔ bá mbaá ŋanánáa na gɛca gá boyogóní gɛ́ɛgɛ a mbaá lɛ a dómana, bá gide báaba, bó óna bóncodío.

⁶«Mɔtɔ ba ntɛ́mɛ́ a báa lɛ gó síene na moɔnɔ́ bɛhɛ́ ba odɛ́má. Gɛ́hɛ́ go súgudinye go bó dómɛna moɔnɔ́ moánɛ a amɔ́ gófɛnaá, bá gaá mo hálámáná.

⁷Kanɛ́ boyogóní bá go dɛŋa mɔgɛ́bɔ bɔ́ɔbɔ go bágálɛdɛna bá amɔ́: “A lɔ́mɔ́ moɔnɔ́ ba bigíndé. Úlé nɔnɔ dɛ mo óna, bigíndé bɛ́ ŋgɛ ɛ́dá go ɔ́bɛnɔnɔ nɛcɔ́!”

⁸Bá báá mo yɔkɛ́nɔ́, bá báá mo óná, bá búú umbé gigúe gɛ́hɛ́ halaháláa na ntɛ́mɛ́.»

⁹Kɔ́ɔ Yésusu u úhunemú batɔ a amɔ́: «Gɔ́ɔ kanɛ́ mɔtɔ ba ntɛ́mɛ́ a ná ŋamɔ́ nɛɛ́nɛ o? Caá a ná nco gunde, o óna boyogóní bá go dɛŋa mɔgɛ́bɔ bɔ́ɔbɔ púmú, a gɔ́lɔ ntɛ́mɛ́ yɛhɛ́ a yɛ íŋene go batɔ bóncodío!

¹⁰No lɛ́ kanɛ go bana naá Ŋgɔ́ŋɛ́ goŋaá: Ɛdánɛ́ nɛ́ɛnɛ befúégí bá mbuú umbé, nɛ́ nɛ́ lɔ́mɔ́ ɛ́yáalú ɛdánɛ́ ná bugído. Buelí bá Daadáa kanɛ́ bɔ́bɔ́ɔ: kasɛ́á boóma bá go békúke naá oŋgíso yɛ́cɔ́[68]!»

¹¹

¹²Gɔ́ɔ bɛ́ ɛ́damɔ́ go fúmbe pɛ́ ya go mo gumbene, kanɛ́ bá mba lɛ́ bá díine gitúu. Bá mba lɛncá goŋaá a mbaá ágá ncaba yɛ́ɛyɔ go busío bábɔ́. Gáábɔ́ go mo dɛ́ɛna, bɔ́ɔ bá báá dómbá.

¹³Gɔ́ɔ bá dómɛnamɔ́ Yésusu nɛnamá ná Befelisiéŋe na nɛnamá ná batɔ bá giimbó gá Elóode go go mo dámbɛna na ŋgúhune.

¹⁴Bɔ́ɔbɔ go úle go mo oyana bá amɔ́: «Iloodio, dɛ íyimene goŋaá go oya mammana; o do bɛanánáa bofoá na mbééníŋínyí sá batɔ, goakɛ́ o do díínée mɔtɔ go odɛ́nɛ́ yɛ́hɛ́, kanɛ́ o húunenye pɛ́ sá Asaŋa na mammana iŋkimée. Có oyánáamɔ́ aáŋa naá gicele gɛ́cɔ́ bó lɛ́ bese goŋaá dɛ soanana muinyí má tásɛ ya ufuŋe ogɔ́nɔ́ Sɛsáalɛ lí, ɛɛ́ŋ ɛ́na lí akɛ́ɛ o? Dɛ háanana go soanana lí, dɛ dɛ soáa o?»

¹⁵Yésusu a lɛncana bukuilí bábɔ́, go bó gundie amɔ́: «No támbana goakɛ́ o? Ŋgúlénéemú nɔnɔ na gɛkɔ́ŋɔ gá muinyí gímmue ŋgɛ́na!»

¹⁶Gáábɔ́ go mo úlene na gímmue. Yésusu go bó úhune a amɔ́: «busío bɔ́ɔbɔ bó lɔ́mɔ́ enínyéelú kɔ́ɔ na ufíno yɔ́ɔyɔ yó lɔ́mɔ́ dɛlɛ́dáalú kɔ́ɔ mó lɔ́mɔ́ má ánɛ́ɛ o?» Bɔ́ɔ go mo gundie bá amɔ́: «Mó lɔ́mɔ́ má ufuŋe ogɔ́nɔ́ Sɛsáalɛ.»

¹⁷Yésusu go bó oyanamɔ́ a amɔ́: «Gundínyée nɔnɔ Sɛsáalɛ bɔ́ɔbɔ bó lɔ́mɔ́ bá Sɛsáalɛ, no gundinye Asaŋa bɔ́ɔbɔ bó lɔ́mɔ́ bá Asaŋa.» Bá mba lɛ́ na bibékúkí makɔ́nɔ́ na kundíemú yɛhɛ́.

¹⁸Gɔ́ɔ nɛnamá ná batɔ bá giimbó gá Beseduseyéŋe bó úlemú naá boayá bá Yésusu. Beseduseyéŋe moánɛ bɔ́ɔ bá húunenyemú bá amɔ́ bɛlɔ́ŋɔ́ bɛ́ dɛ fúfúgénée[69]. Kɔ́ɔ bá mo úhunemú bá amɔ́:

¹⁹«Iloodio, Mɔ́sɛsɛ a mba có íŋéné gɛlɔsɛnɔ gɛ́ɛgɛ ɔ́ŋɔ́ɔlú a amɔ́: Aáŋa mɔtɔ a bɛanana ondimóní, ondimóní mɔ́ɔnyɔ a báá gúé a báá síé okɔ́dɔ kanɛ baaná, gó háanana goŋaá ondimóní a gada gisí gɛ́ɛgɔ a bíene baaná na gɛ́ naá ɛgoná há ondimóní mɔ́ɔnyɔ a mbaá gúé[70].

²⁰Bolimóní banɔ́mɔtɔ́ bá mba lɛ́ bátáanɔ na báandɛ́. Ba busío a mba giŋé a báá gúé kanɛ go síe baaná.

²¹Ba gáandɛ́ɛ a báá gadá gisí gɛ́ɛgɔ, a báá gúé kanɛ go síe baaná. Ba gádadɔ́ɔ caŋa mmue,

²²naá bɔ́ɔ biimée bátáanɔ na báandɛ́, bá mba gúé kanɛ go síe baaná. Naá nnyimé ya bɔ́ɔ biimée, okɔ́dɔ go gúe tɔ́nɔ.

²³Naá púfuge ya begúe, aŋa bá ŋgaá fúfúgé, a ŋgaá bɛ́ɛ́mbá ogánɛ́ ánɛ́ɛ o? Mammana, a mba lɛ́ okɔ́dɔ ba bɔ́ɔ biimée bátáanɔ na báandɛ́.»

²⁴Yésusu go bó gundie a amɔ́: «No bébelebele goakɛ́ no do íyíménée Ŋgɔ́ŋɛ́, akɛ́ bogaaga bá Asaŋa.

²⁵Mammana, aŋa batɔ bá ŋgaá fúfúgénée naá begúe, banɔ́mɔtɔ́ na bakɔ́dɔ bá dɛ ŋgá giŋenine, kanɛ́ bá ŋga bɛ́ɛ́mbá aŋa bɛɛ́ŋgɛlɛsɛ naá mmoɛná.

²⁶Aŋa ŋgúhune ɛ núunemú púfuge ya begúe, no gá báasa no do banáa naá kálata ya Mɔ́sɛsɛ gigísi gɛ́ɛgɛ gɛ́ gálagalamɔ́ go tudú ya gɛlɛ́mbɛ gá íyuke go lola, aŋa Asaŋa a mbo oyáná Mɔ́sɛsɛ a amɔ́: “Ndɛ́ Asaŋa ba Ábalaháma, Asaŋa ba Ɛ́saga, Asaŋa ba Yɔ́kɔbɔ[71]”.

²⁷A dɛ báá Asaŋa ba begúe, a lɔ́mɔ́ Asaŋa ba bɔgɔ́sɔ. No lɛ́ naá go nana moatɛ́ moatɛ.»

²⁸Gɔ́ɔ iloodio há bicele hímmue hɛ́ mbɔɔ́ ɔ́bɔ́ bá ná lɛ́ go bagɛnabagɛna. Hɛ́ bɛ́ɛ́ ɛ́ná goŋaá Yésusu a mba gundíe Beseduseyéŋe bɔ́ɔbɔ bese bese. Gɛ́hɛ́ go báyɛkɛna go mo úhune a amɔ́: «Naá bɛlɔsɛnɔ biimée, gɛ́hanɛ́ɛ gɛ́ lɔ́mɔ́ na bogaaga gɛ́ dómbana bɛ́ɛbɛ bíntió» o?

²⁹Yésusu go mo gundie a amɔ́: «Gá busío gɛ́ lɔ́mɔ́: Batɔ bá Ɛ́sɛlahɛ́ɛlɛ, bódólígínyóomú nɔnɔ bese. Daadáa, Asaŋa bɛcɔ́, a lɛ́ táŋɛ́ ummue[72].

³⁰O háanana go maamana Daadáa Asaŋa bahɔ na odɛ́má yáhɔ uŋkimée, na gɛɔyɔ gáhɔ giimée, na mbééníŋínyí yahɔ iŋkimée na bogaaga báhɔ buimée[73].

³¹Gá gáandɛ́ɛ gɛ́ lɔ́mɔ́: O háanana go maamana sɔ́gɔ́ɔ aŋa maamɔ́ɔ moatɛ́[74]. Gíncodío gá go dómba bɛ́ɛbɔ gɛ́ dɛ báá.»

³²Iloodio há bicele hɛ́ɛhɔ go gɔnɔ fediginye hɛ́ amɔ́: «Bese bese yɛ́yɔ́ɔ, Iloodio, boóma bɔ́ɔbɔ go oyamɔ́ bó lɛ́ mammana; Daadáa Asaŋa a lɛ́ táŋɛ́ ummue, uncodío a dɛ báá gɔnɔ́ hɔ́ɔ, goana mɔ́ɔ[75].

³³Mɔtɔ a háanana go mo maamana na odɛ́má yɛ́hɛ́ uŋkimée, na mbééníŋínyí yɛhɛ́ iŋkimée, na bogaaga bɛ́hɛ́ buimée, a gɔnɔ maamana sɔ́gɔ́ɔ bɛhɛ́ aŋa mɔ́ɔ moatɛ́, bɔ́ɔbɔ bó lɛ́ na ndénégé bó dómba bɛbáágá bá nnyama biimée bɛ́ɛbɛ bá lókononyomú naá gɛdálɛ́ná na bɛbáágá mbɔ́dɔ iŋkimée[76].»

³⁴Yésusu ɛ ɛ́ ɛ́ná goŋaá mɔtɔ mɔ́ɔnyɔ a á mo gundíe bese, gɛ́hɛ́ go mo oyana a amɔ́: «O lɛ́ mekúígíi go go dɛ́ɛna Asaŋa a gúme naá gɛɔyɔ gáhɔ.» Naá nnyimé hɔ́ɔlɔ́, mɔtɔ a dɛ mbáa lɛ bá go kélemene go go mo nɔɔ ŋgúhune intió.

³⁵Aŋa Yésusu a mbaá lɛ a dúmbenye na go húunenye naá Nnyaŋá ya Asaŋa, gɛ́hɛ́ go úhune a amɔ́: «Nɛɛ́nɛ muloodio má bicele mó lɔ́mɔ́ má go oya mó amɔ́ Mesíi u úlenemú naá nogɔgɔ́ ná Défidi o?

³⁶Mammana Défidi moatɛ́, aŋa Gimmúmpúu gá Giliíli a mbaá lɛ a mo oyanɛna, a mba gálɛ́dá a amɔ́: Daadáa Asaŋa a lɛ́ oyánáalú Daadáa bamɛ a amɔ́: Lukúméne naá boayá bá ombɔ́gɔ onɔ́mɛ yámɛ gó ɛ́da húme aŋa nná ŋamɔ́ goŋaá o níŋiside babɛlɔ́bɛlɔ báhɔ kɔndɔ́ go cí[77].

³⁷Défidi moatɛ́ a mo dɔ́ŋɔnɔ a amɔ́ Daadáa. Nɛɛ́nɛ a lɔ́mɔ́ tɔ́nɔ ba go úle naá nogɔgɔ́ nɛ́hɛ́ o? Gitúu gá batɔ gɛ́ɛgɛ gɛ́ mbaá lɛ hɔ́ɔ gɛ́ mba lɛ́ gɛ́ mo bódólonyo na bɛyaŋa makɔ́nɔ́.»

³⁸Kanɛ́ Yésusu a mba lɛ́ o oya naá gohúunenye gɛ́hɛ́ a amɔ́: «Békéŋékéŋéemú nɔnɔ go muloodio má bicele, mó maamana go ɛnɛnda na bɛdádálaga bá kaba, mó maamana goŋaá gásɛ́ bá á bó bédíígényée na mbúlugie naá indukí ya agósa yá gɛdɔŋɔ.

³⁹Mó maamana go lukumenene naá indukí ya busío naá nnyaŋá sá mbósógólí na naá bɛdágá.

⁴⁰Mó nyɛ́ɛna bisí bá bakɔ́dɔ, mó gɔnɔ ŋanana bɛntaálala bá mbósógólí go go bédúfenye naá batɔ. Bá ŋga bɛáa gɛantáanta gá noséésényée.»

⁴¹Gɔ́ɔ Yésusu a lukumenemú cɛŋɛ na hoóma háaha bá mbaá lɛ bá ágana bɛbáágá bá muinyí naá Nnyaŋá ya Asaŋa. A núune aŋa gitúu gá batɔ gɛ́ mbaá lɛ gɛ́ nco nɔɔnɔnɔ muinyí kɔ́ɔ. Banɔ́mɛnɔmɛ gɛca bá mba lɛ́ bá sugunene muinyí makɔ́nɔ́.

⁴²Gɔ́ɔ osógasoga ba gisí gá okɔ́dɔ u úlemú, gɛ́hɛ́ go nco nɔɔ muinyí ŋginyí má bɛkɔ́ŋɔ móandɛ́, nɛnamá ná motótóla.

⁴³Yésusu go dɔ́ŋɛnɔ behúúní bɛ́hɛ́ go bó oyana a amɔ́: «Ŋgaá nyó oyáná mammana caá; osógasoga ba gisí gá okɔ́dɔ mɔ́ɔnyɔ a á fáá a báá dómbá batɔ biimée báaba bá ncomɔ́ nɔɔnɔnɔ muinyí naá gɛágɛ́ná bɛbáágá.

⁴⁴Mammana, biimée púmú bá báá nco go ágana muinyí mɔ́ɔmɔ mó á lɔmɔ́ mó do gɔnɔ́ bó dúgune[78]. Kanɛ́ mɔ́ɔ, na gosóga gɛ́hɛ́ guimée, a báa nco fáa bɔ́ɔbɔ bó báá ná ŋá bó báa go mo síenine go gɛɔyɔ gɛ́hɛ́.»