Read Nugunu Mélékusu 13 Bible Online

Mélékusu 13 - Nugunu bible

Mélékusu 13

¹Aŋa Yésusu a mbaá lɛ a húmene naá Nnyaŋá ya Asaŋa, uhúúní ummue naá behúúní bɛ́hɛ́ go mo gálɛda a amɔ́: «Iloodio, núúníde: kasɛ́á bɛnɔ́gɔ́ bá adánɛ́ gɔnɔ́ na mbɔ́dɔ sá bɛantáanta bá bɛfóaga!»

²Yésusu go mo gundie a amɔ́: «Go ɛ́nana bɛantáanta bá bɛfóaga bɛ́ɛbɛ o? Aŋa o bɛ́ núunemú náana, akɛ́ ɛdánɛ́ ná nímmue nɛ́ dɛ ŋgá lɔbɔ dáláalú naá sɔ́gɔ́ɔ ɛdánɛ́ mmoɛná; bá ŋga buhée buimée bɔ́ɔbɔ púmú.»

³Gɔ́ɔ Yésusu a lukumenemú naá ogɔndɔ yá magónɛ́dá má Boolifíe, cɛŋɛ na Nnyaŋá ya Asaŋa, Píele, Sáakɛ, Sáŋa na Andɛlɛ́ɛ, bɔ́ɔ bákáa nɛhɛ́, go mo úhune bá amɔ́:

⁴«Có oyánáamɔ́ gɛcamɛna gɛ́ɛgɛ boóma moánɛ bó ŋgaá báŋaáa na gilincie gɛ́ɛgɛ gɛ́ ŋgaá dúfíe goŋaá moóma moánɛ mó ŋgɛ ɛ́nánɛ́náa.»

⁵Gɔ́ɔ Yésusu a bayɛgamɔ́ go bó oyanɛna a amɔ́: «Bébeŋéemú nɔnɔ goŋaá mɔtɔ a dɛ nyó nenúgíe.

⁶Batɔ degédegé bá ŋgu úlénée bá béfínenye go ufíno yámɛ, bó oya bá amɔ́: “Yɔmɔ́ɔ ndɔ́mɔ́ Kilítusu”. Bá ŋga ŋaáa goŋaá gɛca gá batɔ gɛ́ nana mammana ya pɛ́.

⁷Aŋa no ŋgɔɔ́ ɔ́bɔ́nɔ́ɔ bó oya cɔ́mɔ sá bidé, na biuŋgúlú bá bidé, no do bɛáa bofoá, moóma moánɛ mó háanana go bola, kanɛ́ bó do ŋgá bɛ́ɛmba gomana gá cí.

⁸Mammana, boɛ́nɔ búmmue bó ŋga nɔɔ́ɔ sɔ́gɔ́ɔ boɛ́nɔ bidé, bufuŋe bó ŋa nɔ́ɔ caŋa mmue na sɔ́gɔ́ɔ bufuŋe. Goyiŋkime gá cí na incíli mó ŋga bɛ́ɛ́mbá naá bigísi bá cí gɛca. Bó ŋga bɛ́ɛ́mbá aŋa mabayɛga má gɛɔ́bɛgɔ gá manómana má okɔ́dɔ go bíene.

⁹Kanɛ́ bɛɛnyɔ́ɔ, bébeŋéemú nɔnɔ. Batɔ bá nɛ́ ɛ́dana nɛnyɔ́ naá nnyaŋá sá mógála na naá nnyaŋá sá mbósógólí, bá nyó sóala mobágɔ. Bá ŋga nyó dílíményée go cáágá naá busío bá baŋgɔ́mɔnɔ na naá mefuŋe go busío bámɛ, kɔ́ɔ no ŋga bɛ́ɛ́mbá ŋgominyo sámɛ naá busío bábɔ́.

¹⁰Bó úhene goŋaá Gɛnɔ́gɔ́ gá Cɔ́mɔ gɛ́ manɛ bó oya naá mɛɛ́nɔ miimée.

¹¹Gɛcamɛna gɛ́ɛgɛ bá nɛ́ ɛ́damɔ́ nɛnyɔ́ go cáágá, no do gá lɛ́ go yóbimido bo bɔ́ɔbɔ no ŋgoó oyáa. Kanɛ́ oyáa nɔnɔ dogálɔ dɔ́ɔdɔ bá ŋgaá nyó fáá naá gɛcamɛna moánɛ; mammana, caá bɛɛnyɔ́ɔ báa no ná gálagalamɔ́, a lɔ́mɔ́ Gimmúmpúu gá Giliíli.

¹²Ondimóní a ŋga dúé ondimóní goŋaá bá mo óna, caŋa mmue isée a ŋa nɔ́ɔ go moɔnɔ́, baábayɔ́ bá ná békikilidinye bebíéní bábɔ́, bá ŋa goŋaá bá bó óna[79].

¹³Batɔ biimée bá ŋga nyó bɛlábɛ́láa go busío bámɛ, kanɛ́ mɔ́ɔnyɔ a ŋgaá simbímídé, gó ɛ́da húme naá mamáná, Asaŋa a ŋga mo sódío.

¹⁴«Aŋa no ŋgɛɛ́ ɛ́ná mɔ́ɔnyɔ bá dɔ́ŋɔnɔmɔ́ bá amɔ́: “Mɔtɔ ba Gikume” dɛ́lɛ́mɛ́náalú naá hoóma háaha a lɔ́mɔ́ a dɛ sɛmɛ́gánánáa hɔ́ɔ[80] — ŋgáa umbení kálata ɔ ɔ́bɔ! — gɔ́ɔ batɔ báaba bá ŋgaá bɛ́ɛ́mbá naá gɛdɔŋɔ gá Yudée bá salana naá ɛgɔndɔ.

¹⁵Mɔ́ɔnyɔ a ŋgaá bɛ́ɛ́mbá naá balánda ba nnyaŋá mmoɛná, a dɛ siisé, a dɛ íŋéné naá mɔ́ ncíbo go go gɔ́lɔ boóma kɔ́ɔ;

¹⁶mɔ́ɔnyɔ a ŋgaá bɛ́ɛ́mbá naá ntɛ́mɛ́, a dɛ gundé na nnyimé go go gɔ́lɔ gɛla gɛ́hɛ́ gá isió.

¹⁷Bakɔ́dɔ bá embume na báaba bá go yúuŋenye baaná bá ŋga bɛ́ɛ́mbá mahana makɔ́nɔ́ naá medúgú moánɛ.

¹⁸Bósógólónyóomú nɔnɔ goŋaá moóma moánɛ mó do bolá naá gɛcamɛna gá gɛantá gá isió.

¹⁹Mammana, medúgú moánɛ má ŋga bɛ́ɛ́mbá na gɛɔ́bɛgɔ aŋa bó gá báasamɔ́ bó do báŋaáa ɛ ɛ́da sɛŋɛda aŋa Asaŋa a mbaá gedíe cí na moóma muimée, gó gunde bó do ŋgá gɔnɔ báŋa akɛ́ go buisí[81].

²⁰Aáŋa gɔnɔ́ Daadáa Asaŋa a dɛ mbá sómba go une medúgú má ndiemi, gásɛ́ mɔtɔ a dɛ mbáa lɛ ba go sódio gɛɔyɔ gɛ́hɛ́. Kanɛ́ go busío bá batɔ báaba a mbií iyídé go go ɔyɔ nɛhɛ́, a mbu uné medúgú mɔ́ɔmɔ.

²¹Gɔ́ɔ gó lɔ́mɔ́, mɔtɔ a amɔ́ a nyó oyana a amɔ́: “Yíkéne, Mesíi a lɛ́ háalá”, ɛ́na lí, o oyɛda a amɔ́ “a lɛ́ héení”, no do olímínyóo boóma bɔ́ɔbɔ a nyó oyanɛnamɔ́.

²²Mammana, bemesíi bá mbele na mbúsí sá mbele bá ŋga bológánáa. Bá ŋga ŋanánáa bieninye bá gobékúke na bɛsɛɔ go go fúmbe go nenugie akɛ́ báaba Asaŋa a mbií iyídé.

²³Kanɛ́ bɛɛnyɔ́ɔ, bébeŋéemú nɔnɔ, ŋgaá nyó dóógínyóo boóma buimée go ofalɔ.

²⁴«Kanɛ́ naá medúgú mɔ́ɔmɔ, naá nnyimé ya makánya go dómba, buisí bó ŋga fúé, ofɛ́ yó do gɔnɔ́ nomɛda,

²⁵muotóti mó káfakafa go mmoɛná mó obana; gɔnɔ́ magaaga máama naá mmoɛná má dɛ gɔnɔ́ bɛa ndukúménínée[82].

²⁶Gɔ́ɔ bá ŋgɛɛ́ ɛ́ná Moɔnɔ́ ba mɔtɔ ɛ ɛ́da go úlene, géŋgélídíelú na bidu bá mmoɛná na bogaaga gɔnɔ́ na nigúmi dácɛ[83].

²⁷Gɔ́ɔ a ŋgaá dómá bɛɛ́ŋgɛlɛsɛ naá maayá má cí miimée go go bándɛgɛna batɔ báaba Asaŋa a mbií iyídé, gó bayɛga naá ombálá yá cí yɔ́ɔyɔ gó ɛ́da súge naá yɔ́ɔyɔ yúntió[84].

²⁸«Ɔ́bɔ́ nɔnɔ gieninye gɛ́ɛgɛ bá gɔ́lɔnɔmɔ́ go bogónɛ́dá bá bufiigíe: “Gɛcamɛna gɛ́ɛgɛ bɛtáfɛ bá bɔ́ bɛ́ gundemú bɛdɔmbɔ́, gɔnɔ́ bɛáncɛ bá bɔ́ bɛ́ báá bayɛ́gá go tɔsɔ, no íyimene no amɔ́ gɛnɔ́gɔ́ gá gɛcamɛna gɛ́ ná lɛ́ mekúígíi”.

²⁹Caŋa mmue, bɛɛnyɔ́ɔ tɔ́nɔ, aŋa no ŋgɛɛ́ ɛ́ná moóma mɔ́ɔmɔ, íyíme nɔnɔ goŋaá Moɔnɔ́ ba mɔtɔ a nco gundene godɔ́ɔdɔ godɔ́ɔdɔ[85], a lɛ́ naá bɛasɛ́ bɛ́nyɔ́.

³⁰Ŋgaá nyó oyáná mammana caá, batɔ bá ogɛlɛ yɔ́ɔyɔ bá dɛ ŋgá fúe biimée, kanɛ goŋaá moóma muimée mɔ́ɔmɔ mó á bolá.

³¹Mmoɛná na cí mó ŋga maná, kanɛ́ dogálɔ dámɛ dó do ŋgá mana.

³²Mɔtɔ a dɛ íyíménée akɛ́ buisí ɛ́na lí gigúlí gá moóma moánɛ go bola, akɛ́ bɛɛ́ŋgɛlɛsɛ báaba naá mmoɛná, akɛ́ Moɔnɔ́, Baaba mokáa mɔ́ɔ i íyimenemú.

³³«Bébeŋéemú nɔnɔ bese, gɛ́gáa nɔnɔ pɔnyɛ́ɛ, goakɛ́ no do íyíménée gɛcamɛna aŋa gɛ́ ná bolamɔ́.

³⁴Bó ŋga bɛ́ɛ́mbá caŋa táŋɛ́ mmue aŋa mɔtɔ mɔ́ɔnyɔ ɛ ɛ́danamɔ́ go oŋɛndɔ, a síe a báá dɛ́ɛ́ná nnyaŋá yɛhɛ́ go gibeŋe go boyogóní bɛ́hɛ́, a fáa na onyɔ moánɛ buelí bá go ŋanana, a gunde a lɔsɛnɔ mɔtɔ ba go fɛ́fa gɛasɛ́ goŋaá a gɛ́ga pɔnyɛ́ɛ.

³⁵Gɛ́gáa nɔnɔ kanɛ́ pɔnyɛ́ɛ, goakɛ́ no do íyíménée gɛcamɛna gɛ́ɛgɛ mɔtɔ ba nnyaŋá a ŋgaá ncó gunde, bó lɛ́ ba go bɛ́ɛmba na hɛɔbɔ́bɔ́ɔ, akɛ́ na odɛ́má yá budúgú, akɛ́ naá godádɛda gá gɛnɔ́mɛ gá ŋgɔɔ́, ɛ́na lí na gɛyɛ́nɛ́.

³⁶Bébeŋéemú nɔnɔ goŋaá cɛ nyó sulúŋényée cɛ nyó gídé go dɔnɔ́ɔ.

³⁷Boóma bɔ́ɔbɔ nnyó oyanamɔ́ bɔ́ɔbɔ, ŋgaá bó oyɛ́dá go busío bá mɔtɔ uŋkimée caá: gɛ́gáa nɔnɔ pɔnyɛ́ɛ.»