Read Nugunu Mélékusu 14 Bible Online

Mélékusu 14 - Nugunu bible

Mélékusu 14

¹Gibíné gá Pásɛ́ka ya Beyúdene na gɛ́ɛgɛ gá bɛlɛ́dɛ bá kanɛ ondɔ yá go fudugenye bɛ́ mbaá ŋá bɛ́ báa go síene medúgú máandɛ́[86]. Bagɔ́nɔ́ɔ bá bedúmbí bɛbáágá naá Asaŋa na muloodio má gicele bá mba lɛ́ bá fúmbe pɛ́ ya go gumbene Yésusu naá nɛɔsɛgɔ goŋaá bá mo óna.

²Bá mba lɛ́ bá bágálɛnagalɛna bá amɔ́: «Dɛ dɛ háánánáa go mo gumbene gɛcamɛna gá gibíné, go go ásɛgɛna goŋaá batɔ bá dɛ ubíe ologodo naá boɛ́nɔ.»

³Naá gɛcamɛna moánɛ Yésusu a mba lɛ́ naá tɛ́sɔnɔ ya Beteníi, naá nnyaŋá ya mɔtɔ mɔ́ɔnyɔ a mbaá nómáa kúnú, ufíno yɛ́hɛ́ Símono. Aŋa a mbaá ŋá a ná lɛ́ go nyáanya, okɔ́dɔ ummue go úle a bíí íŋéné na idógódógó hɛ́ɛhɛ bá mbaá gedíe na ɛdánɛ́ ná ntɔ́nɔ nɛ́ɛnɛ bá dɔ́ŋɔnɔmɔ́ bá amɔ́ alabátɛlɛ. Hɛ́ mba lɛ́ dácɛ na alabɛ́nda ba ntɔ́nɔ gedíelú na náalɛ ya go fofa. Gɛ́hɛ́ go hɛ́ áda, a búú udénínée Yésusu alabɛ́nda moánɛ go odóɛ.

⁴Batɔ bóncodío báaba bá mbaá lɔmɔ́ hɔ́ɔ go duge odɛ́má, bá bágálɛnagalɛna bá amɔ́: «Kanɛ́ bá díeŋiemú alabɛ́nda mɔ́ɔnyɔ háalá goakɛ́ o?

⁵Bá á lɛ bá go dúe alabɛ́nda mɔ́ɔnyɔ go muinyí mɔ́ɔmɔ bá lɔ́mɔ́ bá go soɛna uyogóní ntɛ́mɛ́ go nnyómá mmue, bá mó abana go basógasoga.» Gɔ́ɔ bá mbɔɔ́ ɔ́bɛ́gɛ́nɔ́ okɔ́dɔ moánɛ makɔ́nɔ́.

⁶Kanɛ́ Yésusu go oyɛda a amɔ́: «Mo dɛ́ɛ́náamɔ́ nɔnɔ cacɔ́, no mo dugenye odɛ́má goakɛ́ o? Bɔ́ɔbɔ a yɔgɛdɛnɔmɔ́ go busío bámɛ bó lɛ́ besé makɔ́nɔ́.

⁷Mammana, no ŋga bɛ́ɛ́mbá na basógasoga bɛcamɛna biimée[87], no lɛ́ ba go bó ŋanana besé aŋa no lɛ́galɛgamɔ́. Kanɛ́ yɔmɔ́ɔ cɛ ná bɛ́ɛmba gɔgɔ́ nɛnyɔ́ bɛcamɛna biimée.

⁸Mɔ́ɔ a báa ŋa bɔ́ɔbɔ a báá ná lɔmɔ́ ba go ŋa. A báa dóana go fúenene nnyɔ́dɔ yamɛ alabɛ́nda go go yɛ gedie go gimie gá yɛ́.

⁹Ŋgaá nyó oyáná mammana caá: Naá cí iŋkimée, hoóma hiimée háaha bá ŋgaá dúményée Gɛnɔ́gɔ́ gá Cɔ́mɔ gɛ́ɛgɛ, bá ŋgo oyáa tɔ́nɔ boóma bɔ́ɔbɔ okɔ́dɔ mɔ́ɔnyɔ a báá ná ŋaáa, batɔ bá mo béeniŋenye go bɔ́.»

¹⁰Gɔ́ɔ Yódasɛ Ɛsɛkalɛ́ɔtɛ, ummue naá Bɛɔdɔ́ɔ na bɛ́andɛ́ bá behúúní, ɛ ɛ́damɔ́ gíde bagɔ́nɔ́ɔ bá bedúmbí bɛbáágá naá Asaŋa go go bó dúene Yésusu.

¹¹Aŋa bá mbɔɔ́ ɔ́bɔ́ cɔ́mɔ yɛ́ɛyɔ, gáábɔ́ go ɛ́da go békelenye makɔ́nɔ́, bá báá mo dánɛ́ná muinyí má go mo fáa. Yódasɛ go ɛ́da go fúmbe gɛnɔ́gɔ́ gá gɛcamɛna gá go bó dúene Yésusu.

¹²Budúgú bá busío bá gibíné gá bɛlɛ́dɛ bá kanɛ ondɔ yá go fudugenye, budúgú bɔ́ɔbɔ bá mbaá lɔmɔ́ bá sómba baaná bá bɛdómbáa nyɔlɔ́ go manyáanya má gibíné gá Pásɛ́ka ya Beyúdene, behúúní bá Yésusu go mo úhune bá amɔ́: «O lɛ́galɛgamɔ́ goŋaá dɛ ɛ́da go gedinye manyáanya má gibíné gá Pásɛ́ka ya Beyúdene áhanɛ́ɛ o?»

¹³Yésusu go dóma behúúní bɛ́hɛ́ báandɛ́ a amɔ́ gáábɔ́ a amɔ́: «Ɛ́dá nɔnɔ naá tɛ́sɔnɔ, no gaá luméné na mɔtɔ ummue na iséní há miimpo go odóɛ, dómbá nɔnɔ go mo biene.

¹⁴Hoóma háaha a gaá ní íŋéné, oyána nɔnɔ mɔtɔ ba nnyaŋá no amɔ́: “Iloodio u úhene a amɔ́: Cómba yɛ́ɛyɛ kaá ná nyáá gibíné gá Pásɛ́ka ya Beyúdene olɔŋɔ na behúúní bámɛ ɛ lɔ́mɔ́ áhanɛ́ɛ o?”

¹⁵A gaá dómbá go nyó dúfie gɛantá gá cómba naá nnyaŋá mmoɛná gedíelú aŋa gó háananamɔ́, buimée hɔ́ɔ. Hɔ́ɔ háa no gaá ná có gedínyée manyáanya má gibíné.»

¹⁶Behúúní go biene pɛ́, bá bɛ́ɛ́ ɛ́dá naá tɛ́sɔnɔ, gáábɔ́ go huenye boóma buimée aŋa Yésusu a mbaá bó oyáná, bá báá gedíe manyáanya má gibíné gá Pásɛ́ka ya Beyúdene.

¹⁷Hɛɔbɔ́bɔ́ɔ hɛ́ obana, Yésusu go úle a báá bolá olɔŋɔ na Bɛɔdɔ́ɔ na bɛ́andɛ́ bá behúúní.

¹⁸Aŋa bá mbaá lɛ ndukíi naá tábɛ́la go manyáanya, Yésusu go oyɛda a amɔ́: «Ŋgaá nyó oyáná mammana caá: ummue naá bɛɛnyɔ́ɔ a gaá túé, dɛ nyáanya na mɔ́ɔnyɔ moánɛ háalá[88].»

¹⁹Aŋa behúúní bɛ́hɛ́ bá mbɔɔ́ ɔ́bɔ́ dogálɔ dɔ́ɔdɔ, bá báa lɛ gó ɛ́da go bécíkilenye odɛ́má, bá mo úhene go ummue go ummue bá amɔ́: «A dɛ báá yɔmɔ́ɔ, ábɔ?»

²⁰Yésusu go bó gundie a amɔ́: «A lɔ́mɔ́ ummue naá bɛɛnyɔ́ɔ Bɛɔdɔ́ɔ na bɛ́andɛ́ mɔ́ɔnyɔ a dúmenemú gɛlɛ́dɛ gɛ́hɛ́ olɔŋɔ namɛ naá usóyóo[89].

²¹Mammana, Moɔnɔ́ ba mɔtɔ a gaá gúé aŋa Ŋgɔ́ŋɛ́ sɛ́ oyamɔ́ go busío bɛ́hɛ́[90]. Kanɛ́ mahana makɔ́nɔ́ go mɔ́ɔnyɔ a gaá ná mo dúé. Gó mba lɛ́ ba go bɛ́ɛmba bese go mɔtɔ ba ndiemi goŋaá a dɛ bébíéné.»

²²Gɛcamɛna gɛ́ɛgɛ bá mbaá lɛ bá nyáanya, Yésusu go gɔ́lɔ gɛlɛ́dɛ, a báá béhiigí Asaŋa, gɛ́hɛ́ go gɛ́ gɛ́sagɛsa, go bó íŋene a amɔ́: «Gɔ́lɔ́ nɔnɔ, bɔ́ɔbɔ bó lɔ́mɔ́ nnyɔ́dɔ yamɛ.»

²³Naá nnyimé, gɛ́hɛ́ go gɔ́lɔ ɛnnyóɛ́ná na mɔgɛ́bɔ kɔ́ɔ, a báá béhiigí Asaŋa, go bó íŋene bá báa hɛ́ bónyó bɔ́ɔ biimée púmú.

²⁴Gɛ́hɛ́ go bó oyana a amɔ́: «Bɔ́ɔbɔ bó lɔ́mɔ́ ɛnnyóɛ́ná há manɔ́ŋɔ́ mámɛ, manɔ́ŋɔ́ máama má lɔ́mɔ́ go go lada bugúle na Asaŋa[91], máama má lɔ́mɔ́ gɔnɔ́ udúgéelú go gɛca gá batɔ.

²⁵Ŋgaá nyó oyáná mammana caá: cɛ ŋgá gɔnɔ nyóɛna mɔgɛ́bɔ máama gó lama gó ɛ́da héme naá buisí bɔ́ɔbɔ ka ŋgaá nyóɛ́ná má mafáa naá Bufuŋe bá Asaŋa.»

²⁶Naá nnyimé ya go ágana ɛsagɔ ya bileebie, gáábɔ́ go fíde pɛ́ go go ɛ́da naá ogɔndɔ yá Boolifíe.

²⁷Yésusu go oyana behúúní bɛ́hɛ́ a amɔ́: «Bɛɛnyɔ́ɔ biimée no gaá tɛ́ɛ́ná mokáa. Mammana bó lɛ́ naá Ŋgɔ́ŋɛ́ goŋaá: “Nnó óna umbeŋíbéŋí, bɛdómbáa bá buufe bɛ́ lɛ go sálamanda hoóma hiimée[92]”.

²⁸Kanɛ́ aŋa nná fúfugemú, nnɛ́ ɛ́da nyó gɛ́gana naá Gelilée.»

²⁹Píele go gɔ́lɔ dogálɔ go mo oyana a amɔ́: «Akɛ́ biimée púmú bá go dɛ́ɛna mokáa, yɔmɔ́ɔ cɛ ŋgá go dɛ́ɛna akɛ́ go buisí.»

³⁰Gɔ́ɔ Yésusu a mo gundiemú a amɔ́: «Ŋgaá go oyáná mammana caá, maamɔ́ɔ, ínoni yɛ́ɛyɛ, gɔnɔ́ na budúgú bɔ́ɔbɔ, otóotoɛ yá goŋaá gɛnɔ́mɛ gá ŋgɔɔ́ gɛ́ dádɛda ɛŋɛndɔ ɛhandɛ́, o gaá ŋá o báa go mbásáŋona ɛŋɛndɔ ɛdadɔ́.»

³¹Píele go ɛ́da go élinenye a amɔ́: «Akɛ́ bó húme goŋaá kúe olɔŋɔ nahɔ, akɛ́ɛ, cɛ gaá go básáŋóná.» Nɔ́ɔ gɔ́ɔ biimée bá mbaá lɔmɔ́ bá gálagala caŋa mmue.

³²Yésusu na behúúní bɛ́hɛ́ go bola naá hoóma hémmue háaha bá dɔ́ŋɔnɔmɔ́ bá amɔ́ Gɛtɛsɛmanɛ́ɛ; gɛ́hɛ́ go bó oyana a amɔ́: «Síéne nɔnɔ háalá, yɔmɔ́ɔ mmanɛ go ɛ́da bósógolonyo.»

³³Gɔ́ɔ a gɔ́lɔmɔ́ Píele, Sáakɛ na Sáŋa olɔŋɔ nɛhɛ́. Gɛ́hɛ́ go bayɛga go ɔ́bɔnɔ bofoá, a sómbasomba odɛ́má,

³⁴go bó oyana a amɔ́: «Odɛ́má yámɛ yó lɛ́ dácɛ na mecíkílí má nigúe; gɛ́gáa nɔnɔ háalá, no kúle.»

³⁵Gɛ́hɛ́ go báyɛkɛna naá busío, go bádába mɔŋgɔlɛ́ go cí go ɛ́da go bósógolonyo goŋaá, amóŋa bó lɛ́ ba go báŋa, gɛcamɛna gá goɔ́bɛgɔnɔ gɛ́ɛgɛ gɛ́ ɛ́da halaháláa nɛhɛ́.

³⁶A mba lɛ́ o oya a amɔ́: «Ába, Baaba[93], boóma bá ndɔlɛ bó do báá naá maamɔ́ɔ. Tɔ́ŋɔ́nɛ́náamɔ́ ɛnnyóɛ́ná há makánya hɛ́ɛhɛ. Akɛ́ nɔ́ɔnɔ moánɛ, bó do báŋaáa aŋa yɔmɔ́ɔ ndɛ́galɛgamɔ́, goana go ndɛ́ga yahɔ.»

³⁷Gɛ́hɛ́ go gɔnɔ nco gunde na nnyimé go bó gíde go dɔnɔ́ɔ. A báa lɛ gó oyana Píele a amɔ́: «Símono, go ɛ́dana go dɔnɔ́ɔ o! O lɛ́ kanɛ go bɛa bogaaga bá go kúlide akɛ́ gigúlí gímmue!

³⁸Kúlée nɔnɔ, no bósógolonyo goŋaá no do obɛ́ná naá magálá má ɛsɔgɛdɔ. Ɛdɛ́má yɛnyɔ́ ɛ lɛ́ dácɛ na bɛnɔ́gɔ́ bá mbééníŋínyí, kanɛ́ nnyɔ́dɔ ɛ lɛ́ na bonɔ́nɔ́.»

³⁹Yésusu go gɔnɔ yáŋɛmɛda ɛ ɛ́da a bósógolonyo, a gálagala dogálɔ dúmmue aá dúmmue.

⁴⁰Gɔ́ɔ a gɔnɔmɔ́ nco gundidene anáa behúúní bɛ́hɛ́ bá mbaá lɔmɔ́, gɛ́hɛ́ go gɔnɔ bó huenye go dɔnɔ́ɔ; goakɛ́ dɔnɔ́ɔ do mba lɛ́ dácɛ naá oŋgíso yábɔ́. Bá dɛ mbí íyime aŋa bá lɔ́mɔ́ bá go mo gundie.

⁴¹Naá oŋɛndɔ yá gádadɔ́, gɛ́hɛ́ go nco gunde, go bó oyana a amɔ́: «Dúmbényée nɔnɔ na go ɛ́dana dɔnɔ́ɔ, no dúuge! Bó á háá kanɛ́. Gɛcamɛna gɛ́ á bolá gɛ́ɛgɛ bá gaá ná dúé Moɔnɔ́ ba mɔtɔ naá ɛmbɔ́gɔ ya bologílógí.

⁴²Fadɛ́gɛ́na nɔnɔ dɛ no dómba. Ɛ́ná nɔnɔ, mɔtɔ mɔ́ɔnyɔ a túenenemú a ná lɛ́ hɔ́ɔ.»

⁴³Hɔ́ɔ na hɔ́ɔ, Yésusu a gá lɛ́ na dogálɔ naá nyuudé, Yódasɛ, ummue mɔ́ɔnyɔ naá Bɛɔdɔ́ɔ na bɛ́andɛ́ bá behúúní, go úle a báá bolá, olɔŋɔ na gitúu gá batɔ báaba bá mbaá lɛ na kalafɔ gɔnɔ́ na ŋkɛ́báa. Bagɔ́nɔ́ɔ bá bedúmbí bɛbáágá naá Asaŋa, muloodio má gicele na bafɛanɔ́ɔ bá gɛdɔŋɔ, bɔ́ɔ bá mbaá bó dómá.

⁴⁴Yódasɛ mɔ́ɔnyɔ a mbaá lɛ ba go mo dúe a mbi íŋéné gitúu gá batɔ gɛ́ɛgɔ gilincie a amɔ́: «Mɔtɔ mɔ́ɔnyɔ kaá ná mo gɔ́lɔ́ kude, a lɔ́mɔ́ mɔ́ɔ, mo gumbénéemú nɔnɔ, no ɛ́da nɛhɛ́, no mo fɛ́fa bese.»

⁴⁵Yódasɛ a bolana, gɛ́hɛ́ go báyɛkɛna Yésusu a amɔ́: «Iloodio.» Gɔ́ɔ a mo gɔ́lɔmɔ́ kude.

⁴⁶Basɔ́gɔ́ɔ báaba bóncodío go úle, gáábɔ́ go yɔkɛnɔ Yésusu, bá báá mo gumbéné.

⁴⁷Kanɛ́ ummue naá batɔ báaba bá mbaá lɛ hɔ́ɔ, go somona kalafɔ yɛhɛ́, go canɛda uyogóní ba Ufuŋe yá bedúmbí bɛbáágá naá Asaŋa, a báá mo sólóná udúu[94].

⁴⁸Yésusu go gɔ́lɔ dogálɔ go bó oyana a amɔ́: «No ŋgúlenine na kalafɔ, na ŋkɛ́báa go go nco kumbene, no ɔ́ ɔ́bɔ́ no amɔ́ ndɛ́ uŋgúníní batɔ lí?

⁴⁹Miisí miimée, mmba lɛ́ nɛnyɔ́ naá Nnyaŋá ya Asaŋa kúunenye hɔ́ɔ, no lɛ́ kanɛ go kumbene. Kanɛ́ bó á báŋaáa go go hóogio bɔ́ɔbɔ bó mbaá lɛ ɔ́ŋɔ́ɔlú.»

⁵⁰Gɔ́ɔ biimée bá mo dɛ́ɛnamɔ́ mokáa, bá báá díínée.

⁵¹Ohaŋa ba mɔtɔ ummue a mba lɛ́ u úle a bienene Yésusu, na sanda ya gɛla básómbɛ́náalú. Batɔ bóntió báaba bá mbaá lɛ hɔ́ɔ bá amɔ́ bá mo gumbene,

⁵²a báa lɛ gó béduyune sanda yɛ́ɛyɔ ménnyimée, go gúduge na odɛ́dá nnyɔ́dɔ gɔdɔɔ́.

⁵³Gɔ́ɔ bɛ́ ɛ́damɔ́ na Yésusu naá Ufuŋe yá bedúmbí bɛbáágá naá Asaŋa. Biimée go bábándɛgɛna: bagɔ́nɔ́ɔ bá bedúmbí bɛbáágá naá Asaŋa, bafɛanɔ́ɔ bá gɛdɔŋɔ na muloodio má gicele.

⁵⁴Píele a mba lɛ́ a síene a fídene Yésusu gɛyábá a bɛ́ɛ́ ɛ́dá húme naá nnyaáŋgadɛ́ɛ ya ndáŋɛ ya Ufuŋe yá bedúmbí bɛbáágá naá Asaŋa. Hɔ́ɔlɔ́, gɛ́hɛ́ go lukumene émmué na bebeŋíbéŋí, go ɛ́da go ɔ́sɔbɔ mekúígíi na íyuke.

⁵⁵Bagɔ́nɔ́ɔ bá bedúmbí bɛbáágá naá Asaŋa na batɔ biimée báaba naá Nɛgála nɛgɔ́nɔ́ go ɛ́da go fúmbe gɛmbɛ́ná gá go ubie Yésusu naá gɛsɛnɛ goŋaá bá sómba bá amɔ́ a háanana na nigúe, kanɛ́ bá dɛ mbá gɛ́ bɛa.

⁵⁶Mammana, gɛca gá batɔ gɛ́ mba lɛ́ gɛ́ mo básómbanɛna[95], kanɛ́ bá dɛ mbáa lɛ bá húmene ukelú yúmmue naá bɛbásómbɛna bɛ́ɛbɔ.

⁵⁷Batɔ bóntió go gɔnɔ dɛ́lɛmɛna na gɛbásómbɛna gɛ́ɛgɛ, bá amɔ́:

⁵⁸«Dɛ mba mo ɔ́bɔ́ o oya a amɔ́: “Yɔmɔ́ɔ, nná gada Nnyaŋá ya Asaŋa yɛ́ɛyɛ batɔ bá mbaá fóágá na ɛmbɔ́gɔ, kunde póaga intió naá nnyimé ya medúgú mádadɔ́. Ya ndiemi ɛ dɛ ŋgá bɛ́ɛmba buelí bá ɛmbɔ́gɔ ya batɔ[96].”»

⁵⁹Akɛ́ naá ŋgoyáamɔ́ yɛ́ɛyɛ, bá dɛ mbáa lɛ ukelú yúmmue.

⁶⁰Ufuŋe yá bedúmbí bɛbáágá naá Asaŋa go fadɛgɛna naá tɛ́mádɛ́má ya nɛgála, go úhune Yésusu a amɔ́: «O do gundényée boóma o? Batɔ báaba bó oyamɔ́ ŋkádɛ náana go busío báhɔ o?»

⁶¹Yésusu go máma pɔ́ɔ́, a dɛ gundíe boóma. Ufuŋe yá bedúmbí bɛbáágá naá Asaŋa go gɔnɔ mo úhune a amɔ́: «O lɔ́mɔ́ Mesíi, Moɔnɔ́ ba Asaŋa, Asaŋa mɔ́ɔnyɔ dɛ gúmenyemú lí?»

⁶²Yésusu go gundie a amɔ́: «Ɛɛ́ɛŋ, ndɛ́. No ŋgɛ ɛ́ná kanɛ́ Moɔnɔ́ ba mɔtɔ ndukíi naá boayá bá ombɔ́gɔ onɔ́mɛ bá Asaŋa Bogaaga Buimée, a gɔnɔ go úlene naá nogálámbá dá mmoɛná[97].»

⁶³Gɔ́ɔ Ufuŋe yá bedúmbí bɛbáágá naá Asaŋa a lafamɔ́ bɛla bɛ́hɛ́ a amɔ́: «Dɛ dɛ gaá gɔnɔ́ fúmbe batɔ bóntió bá go mo sɔ́mɔnɔ.

⁶⁴No á bɔ́ɔ́bɛ́nɔ́ aŋa a sɛgamɔ́ Asaŋa. Dɛ́nyɔ́ no amɔ́ nɛɛ́nɛ o?» Batɔ biimée go oyɛda bá amɔ́ a lɛ́ na gɛoba, a háanana na nigúe[98].

⁶⁵Batɔ bóntió naá olɔŋɔ yábɔ́ go ɛ́da go mo cábana bɛdɛ́, bá mo góda busío, bá mo dóɛdana bibúme, bá mo oyanɛna bá amɔ́: «Lɛncá mɔ́ɔnyɔ a go ŋananamɔ́ boóma moánɛ.» Bebeŋíbéŋí Nnyaŋá ya Asaŋa go gɔ́lɔ Yésusu, go ɛ́da go mo lába ɛmbɔ́lɛ́[99].

⁶⁶Aŋa Píele a mbaá ŋá a gá lɛ́ gɛmbádáa gá nnyaáŋgadɛ́ɛ, okɔ́dɔ ba masɔ́mɔ ummue ba Ufuŋe yá bedúmbí bɛbáágá naá Asaŋa go bola.

⁶⁷Gɛ́hɛ́ go ɛ́na Píele ɔ ɔ́sɔbɔ, go mo ágɛna oŋgíso go oyɛda a amɔ́: «Maamɔ́ɔ mɔtɔ mɔ́ɔnyɔ, o mba lɛ́ tɔ́nɔ na Yésusu, mɔtɔ ba Násalɛdɛ mɔ́ɔnyɔ.»

⁶⁸Kanɛ́ Píele go básáŋona a gálagala a amɔ́: «Cɛ íyi, gɔnɔ́ cɛ ɔ́bɔ́nɔ́ɔ boóma bɔ́ɔbɔ o lɛ́galɛgamɔ́ go oyɛda.» Gɔ́ɔ ɛ ɛ́damɔ́ ɛ ɛ́dana go go úlukie naá nnyaángadɛ́ɛ ɛ ɛ́da anáa gɛasɛ́. [Gɛnɔ́mɛ gá ŋgɔɔ́ go dómba go dádɛda gɔ́gɔ́ɔ.]

⁶⁹Okɔ́dɔ ba masɔ́mɔ mɔ́ɔnyɔ go mo ɛ́na, go bayɛga go gɔnɔ go oyanɛna batɔ báaba bá mbaá lɛ hɔ́ɔ a amɔ́: «Mɔtɔ mɔ́ɔnyɔ a lɛ́ ummue mɔ́ɔnyɔ naá olɔŋɔ yábɔ́ cá!»

⁷⁰Píele go gɔnɔ básáŋona. Aŋa moɔnɔ́ ba gɛcamɛna a mbaá dómbá, batɔ báaba bá mbaá lɛ hɔ́ɔ go gɔnɔ gálɛda Píele bá amɔ́: «Mammana, o lɛ́ ummue mɔ́ɔnyɔ naá bɔ́ɔ, goakɛ́ maamɔ́ɔ tɔ́nɔ o lɛ́ ba Bégelilée.»

⁷¹Gɔ́ɔ Píele ɛ ɛ́damɔ́ go oya a amɔ́: «Aáŋa mbelebele, ŋgáa Asaŋa a céesenye! Ŋgaá bálɛáa caá cɛ íyíménée mɔtɔ mɔ́ɔnyɔ no oyamɔ́ mɔ́ɔnyɔ.»

⁷²Hɔ́ɔ na hɔ́ɔ, gɛnɔ́mɛ gá ŋgɔɔ́ go dómba go dádɛda go oŋɛndɔ yá gáandɛ́ɛ. Píele go béeniŋinye nogálɔ ná Yésusu nɔ́ɔnɔ a mbaá mo gálɛ́dá a amɔ́: «Otóotoɛ yá goŋaá gɛnɔ́mɛ gá ŋgɔɔ́ gɛ́ dádɛda ɛŋɛndɔ ɛhandɛ́, o gaá ŋá o báa go mbásáŋona ɛŋɛndɔ ɛdadɔ́.» Aŋa Píele a mbaá bééníŋínyée nogálɔ ná Yésusu nɔ́ɔnɔ, gɛ́hɛ́ go dómba go húme a báá dúmbúgé na mbií.