Read Nugunu Mélékusu 15 Bible Online

Mélékusu 15 - Nugunu bible

Mélékusu 15

¹Na gɛyɛ́nɛ́ túlúbú, bagɔ́nɔ́ɔ bá bedúmbí bɛbáágá naá Asaŋa go bábándɛgɛna go nɛganda olɔŋɔ na bafɛanɔ́ɔ bá gɛdɔŋɔ, muloodio má gicele, na batɔ biimée báaba naá Nɛgála nɛgɔ́nɔ́ ná gɛdɔŋɔ. Gáábɔ́ go góda Yésusu iŋgolí, go ɛ́da nɛhɛ́ bá báá mo íŋéné gá ŋgɔ́mɔnɔ Pɛlátɛ.

²Pɛlátɛ go mo úhune a amɔ́: «O lɛ́ ufuŋe yá Beyúdene lí?» Yésusu go mo gundie a amɔ́: «Go ó oyɛ́dá[100].»

³Bagɔ́nɔ́ɔ bá bedúmbí bɛbáágá naá Asaŋa bá báa lɛ gó ɛ́da go mo sɔ́mɔnɔ go gɛcɛcá gá bɛsɛnɛ.

⁴Gɔ́ɔ Pɛlátɛ a gɔnɔmɔ́ mo úhune a amɔ́: «O do gundényée boóma go go bósódio lí? Go ɔ́bɔnɔ gɛcɛcá gá bɛsɛnɛ gɛ́ɛgɛ bá go obeninyemú go nnyɔ́dɔ yahɔ o?»

⁵Kanɛ́ Yésusu go mo obɛna gɛmámɔ́, gɛmámɔ́ gɛ́ɛgɛ gɛ́ mbaá ŋaáa goŋaá Pɛlátɛ a békúke.

⁶Nnyómá iŋkimée naá gɛcamɛna gá gibíné gá Pásɛ́ka ya Beyúdene, Pɛlátɛ a mba lɛ́ a húmenye mɔtɔ ummue naá ncíbo ya gɛaŋɔ́ mɔ́ɔnyɔ gɛdɔŋɔ gɛ́ úhunemú.

⁷Kanɛ́ mɔtɔ ummue, ufíno yɛ́hɛ́ Balábasɛ, a mba lɛ́ naá ncíbo ya gɛaŋɔ́ na batɔ bóntió, goakɛ́ bá mbo óná mɔtɔ naá osaŋɔ́ yɔ́ɔyɔ yó mboó obá go go nuugenye bogɔ́nɔ́ɔ bá gɛdɔŋɔ gábɔ́.

⁸Gitúu gá batɔ go ɛ́da kanɛ́ naá Pɛlátɛ, gɛ́ mo úhene goŋaá a hóogio ŋgɔŋɛnɔ yabɔ́ aŋa naá bofɛ́lánɔ́ bábɔ́.

⁹Pɛlátɛ go bó úhune a amɔ́: «No lɛ́galɛgamɔ́ goŋaá nnyó dɛ́ɛnɛna ufuŋe yá Beyúdene lí?»

¹⁰Mammana, Pɛlátɛ a mba lɛ́ i íyimene goŋaá bagɔ́nɔ́ɔ bá bedúmbí bɛbáágá naá Asaŋa bá mba lɛ́ dúelú Yésusu go hɛagá.

¹¹Bagɔ́nɔ́ɔ bá bedúmbí bɛbáágá naá Asaŋa bɔ́ɔbɔ go ɛ́da go gínigenye gitúu gá batɔ go goŋaá bú úhune Pɛlátɛ a bó dɛ́ɛnɛna Balábasɛ, caá akɛ́ Yésusu.

¹²Pɛlátɛ go gɔnɔ go úhune gitúu gá batɔ a amɔ́: «Ŋnamɔ́ kanɛ́ ɛkádɛ na mɔ́ɔnyɔ no dɔ́ŋɔnɔmɔ́ no amɔ́ ufuŋe yá Beyúdene o?»

¹³Gáábɔ́ go mo gundie bá ánca ukelú naá mmoɛná bá amɔ́: «Mo gilénéemú naá kolósi.»

¹⁴Pɛlátɛ go bó úhune a amɔ́: «Gɛbɛ́ kanɛ́ gɛ́hanɛ́ a á ná ŋaáa o?» Bɔ́ɔ bɛ́ ɛ́dana naá busío bá ánca na bogaaga bá amɔ́: «Mo gilénéemú naá kolósi.»

¹⁵Aŋa Pɛlátɛ a mbaá lɛ a lɛ́galɛga go óbio gitúu gá batɔ bese, gɛ́hɛ́ go bó dɛ́ɛnɛna Balábasɛ. Go Yésusu, a báá manɛ́ fáa bogaaga bá go mo sóala bɛságɔ. Naá nnyimé, gɛ́hɛ́ go mo íŋene goŋaá bá mo gilene naá kolósi.

¹⁶Bisimbi go gɔ́lɔ Yésusu, go íŋene nɛhɛ́ naá ndáŋɛ. Gáábɔ́ go bándɛgɛna bisimbi bíntió, bɛ́ báá mo géŋgélídíe.

¹⁷Bá báá lɛ gó ága Yésusu gɛmbɛ́lɛŋɛnyɛ gá kaba, bá báá nogá ɛdada há bufuŋe na cɛ́ndɛ́ bá báá mo sɔnɛ́gɔ́ go odóɛ.

¹⁸Gɔ́ɔ bɛ́ ɛ́damɔ́ go mo gidenine ɛmbɔ́gɔ bá amɔ́: «Mbédíígí, ufuŋe yá Beyúdene.»

¹⁹Bá mo óndana ombalɔ go odóɛ, bá mo cábana bɛdɛ́, bá gɔnɔ mo gulenine enúu go go lɔŋɔmɛdɔnɔ mosío naá busío bɛ́hɛ́.

²⁰Aŋa bá mbaá dɔmbɔ́ go mo hɔnɔ, gáábɔ́ go mo úlie gɛmbɛ́lɛŋɛnyɛ gá kaba, bá báá gundíe go mo ága bɛla bɛ́hɛ́. Gáábɔ́ go húme nɛhɛ́ go go ɛ́da mo gilene naá kolósi.

²¹Símono untió, ba tɛ́sɔnɔ ya Siléene, isée ba Alɛgɛsándɛlɛ na Lúfusu[101], a mba lɛ́ a dómbana naá pɛ́ moánɛ, a nco gundene naá ntɛ́mɛ́. Bisimbi go mo gaŋa goŋaá a bádóɛgɛna kolósi ya Yésusu.

²²Gáábɔ́ go ɛ́da na Yésusu naá hoóma háaha bá dɔ́ŋɔnɔmɔ́ bá amɔ́ Gologóta, nɔ́ɔnɔ gó lɛ́ aá «hoóma háaha há fóananamɔ́ giŋóŋkólóŋó gá odóɛ.»

²³Aŋa bá mbaá bolá hɔ́ɔ, bá mba lɛ́ bá lɛ́galɛga go mo dóŋio mɔgɛ́bɔ nebígínyéelú na ondɔ yá gifuugie makánya, míile. Kanɛ́ Yésusu a mbi inyé go bónyo.

²⁴Gɔ́ɔ bá gilenemú Yésusu naá kolósi. Go go aba bɛla bɛ́hɛ́, bá báá bɛ́ nɔɔ́ɔ go adɔ go go íyime gɛ́ɛgɛ sɔ́gɔ́ɔ a gaá ná bɛáa[102].

²⁵Bó mba lɛ́ go bigúlí bɛ́nnámanyɛ́ na gímmue bá gɛyɛ́nɛ́ gɔ́ɔ bá mbaá mo giléné naá kolósi.

²⁶Ŋgɔ́ŋɛ́ yɛ́ɛyɛ ɛ mbaá lɛ ɛ dúfenye mbɔ́gɔ́ yá gɛsɛnɛ gá Yésusu go gúe go gɛ́ ɛ mba lɛ́ ɔ́ŋɔ́ɔlú náana: «Ufuŋe yá Beyúdene yɔ́yɔ́ɔ.»

²⁷Bá báá gilénée tɔ́nɔ bahándá báandɛ́ gɛcamɛna gímmue eé gímmue na Yésusu, onyɔ moánɛ naá yɛhɛ́ kolósi, mɔ́ɔnyɔ naá boayá bá ombɔ́gɔ onɔ́mɛ, mɔ́ɔnyɔ naá boayá bá ombɔ́gɔ odádɛ́. [

²⁸Gó mba báŋaáa nɔ́ɔnɔ goŋaá nogálɔ ná Asaŋa nɔ́ɔnɔ nó ɛ́nanɛna. Nó lɔ́mɔ́: Bá mba mo baná naá olɔŋɔ yá bepelípélí[103].]

²⁹Batɔ báaba bá mbaá lɛ bá dómbana hɔ́ɔ, bá mba lɛ́ bá gide ɛdóɛ bɛ́ ɛ́da bá mo sɛga, bá amɔ́ gɛ́hɛ́ bá amɔ́: «Ɛɛ́ɛŋ! Maamɔ́ɔ mɔ́ɔnyɔ o mbaá lɛ o lɛ́galɛga go gada Nnyaŋá ya Asaŋa go go fóaga intió go medúgú táŋɛ́ mádadɔ́[104],

³⁰bósódíomú maamɔ́ɔ moatɛ́, siisé naá kolósi aá!»

³¹Caŋa mmue, bagɔ́nɔ́ɔ bá bedúmbí bɛbáágá naá Asaŋa na muloodio má gicele bá hɔnɔ Yésusu bɔ́ɔ na bɔ́ɔ bá amɔ́: «A á sódónyóo batɔ bóntió, a dɛ bósó ba go bósódio mɔ́ɔ moatɛ́!

³²Kanɛ́ ŋgáa Mesíi, ufuŋe yá batɔ bá Ɛ́sɛlahɛ́ɛlɛ a siise godɔ́ɔdɔ naá kolósi aá!» Dɛ amɔ́ dɛ ɛ́na boóma moánɛ, dɛ gaá ágá odɛ́má yɛ́cɔ́ naá mɔ́ɔ. Batɔ báaba bá mbaá lɛ naá kolósi naá boayá bá Yésusu bá mo sɛga tɔ́nɔ.

³³Go tólóbóo, mbíno go dómba go oba naá gɛdɔŋɔ giimée, gó bɛ́ɛ́ ɛ́dá húme bigúlí bɛ́dadɔ́.

³⁴Go bigúlí bɛ́dadɔ́ bɛ́ɛbɔ, Yésusu go áncɛda ukelú naá mmoɛná, a amɔ́: «Eloyí, Eloyí, lámá sabakatanɛ́ɛ o?» Nɔ́ɔnɔ gó lɛ́ aá: «Asaŋa bamɛ, Asaŋa bamɛ, o túfiemú nnyimé náana goakɛ́[105] o?»

³⁵Batɔ báaba bá mbaá lɔmɔ́ hɔ́ɔ bá mo ɔ́bɔnɔ a gálagala nɔ́ɔnɔ, go oyɛda bá amɔ́: «Bódólígínyóomú nɔnɔ, a ná lɛ́ go dɔ́ŋɔnɔ Elíi.»

³⁶Mɔtɔ ummue mɔ́ɔnyɔ naá olɔŋɔ yábɔ́ go ɛ́da a díine, a báá dúmé giyugú naá gɛtóánɔ́ɔ gá mɔgɛ́bɔ, a báá gɛ́ cékígínyée naá ombalɔ, gɛ́hɛ́ go mo dóŋio goŋaá a libige ukelú yɛ́hɛ́ kɔ́ɔ[106], o oya a amɔ́: «Gɛ́gɛ́dɛ́na nɔnɔ, dɛ ɛ́na aáŋa Elíi a gaá ncó mo siisie naá kolósi.»

³⁷Gɔ́ɔ kanɛ́ Yésusu a áncɛdamɔ́ ukelú ogɔ́nɔ́, gɛ́hɛ́ go obɛnɛna.

³⁸Sanda ya goodo yɛ́ɛyɛ ɛ mbaá lɔmɔ́ ɛ sala Nnyaŋá ya Asaŋa go biseli bɛ́andɛ́[107] go salɛga go biseli bɛ́andɛ́, gó bayɛga gɛmmoɛnáa gó nco héme gɛmbádáa.

³⁹Ogɔ́nɔ́ɔ ba bisimbi mɔ́ɔnyɔ a mbaá lɛ tɛ́nɛ́ɛ cɛŋɛ na Yésusu ɛ ɛ́nana mbɔ́dɔ yɛhɛ́ ya nigúe, go gálɛda a amɔ́: «Mammana, mɔtɔ mɔ́ɔnyɔ a mba lɛ́ Moɔnɔ́ ba Asaŋa.»

⁴⁰Bakɔ́dɔ bóntió tɔ́nɔ bá mba lɛ́ hɔ́ɔ bá núune naá gɛyábá. Naá olɔŋɔ yábɔ́, Malɛ́a ba tɛ́sɔnɔ ya Magadaláa, Malɛ́a mɔ́ɔnyɔ nnyeedíi ba Sáakɛ ba gifío na Yósɛsɛ, na Salóma tɔ́nɔ.

⁴¹Bakɔ́dɔ bɔ́ɔbɔ bá mba lɛ́ bá mo bienene, bá mo óhigonyo go masɔ́mɔ gɛcamɛna gɛ́ɛgɛ a mbaá lɛ naá Gelilée. Bá mba lɛ́ gɔnɔ́ na gɛcɛcá gá bakɔ́dɔ gíntió gɛ́ɛgɛ gɛ́ mbɛɛ́ ɛ́dá olɔŋɔ na Yésusu naá Yolósalɛmɛ.

⁴²Aŋa hɛɔbɔ́bɔ́ɔ hɛ́ mboó oba, gɔ́ɔ, Yósɛbɛ, ba tɛ́sɔnɔ ya Alɛmatɛ́ɛ u úlemú a báá bolá. A mba lɛ́ giidí gá mɔtɔ gímmue naá Nɛgála nɛgɔ́nɔ́, mɔ́ɔ tɔ́nɔ a mba lɛ́ a bɛanana toodo odɛ́máa ya goŋaá Bufuŋe bá Asaŋa bó úlene. Bó mba lɛ́ buisí bá go bégedegedie go sábadɛ, naá gobélie. Gó moánɛ, Yósɛbɛ a mbɛɛ́ ɛ́dá na nigégé niimée naá Pɛlátɛ go go mo úhune gigúe gá Yésusu, a gɛ́ mie otóotoɛ yá sábadɛ.

⁴³

⁴⁴Kanɛ́ Pɛlátɛ a mba békúkée aŋa a mbɔɔ́ ɔ́bɔ́ goŋaá Yésusu a báa go gúe, gɛ́hɛ́ go oyɛda goŋaá bá dɔ́ŋɛnɔ ogɔ́nɔ́ɔ ba bisimbi go go mo úhune ɛ́na a báa gúe fueké.

⁴⁵Aŋa ogɔ́nɔ́ɔ ba bisimbi a mbaá mo oyáná goŋaá Yésusu a báá go gúe, Pɛlátɛ go fáa Yósɛbɛ bogaaga bá go gɔ́lɔ gigúe gá Yésusu.

⁴⁶Yósɛbɛ go ɔ́ndɔ nnɔ́mbɔ́ ya gɛla, gɛ́hɛ́ go úlie gigúe gá Yésusu naá kolósi, a báá gɛ́ máŋánáa naá nnɔ́mbɔ́ yɛ́ɛyɔ, go ɛ́da gɛ́ bídiginye naá gɛbɛ́lá gɛ́ɛgɛ bá mbaá dímé naá gɛdánɛ́dánɛ́. Gɔ́ɔ a tíŋgilidiemú gɛantá gá ɛdánɛ́ go go buige miíŋene má gɛbɛ́lá.

⁴⁷Malɛ́a ba Magadaláa na Malɛ́a mɔ́ɔnyɔ nnyeedíi ba Yósɛsɛ bá mba lɛ́ bá núune hoóma háaha bá mbaá mo ágá hɔ́ɔ.