Read Nugunu Mélékusu 3 Bible Online

Mélékusu 3 - Nugunu bible

Mélékusu 3

¹Gɛ́hɛ́ go gɔnɔ go íŋene naá nnyaŋá ya mbósógólí mmue. Mɔtɔ ummue a mba lɛ́ hɔ́ɔ na ombɔ́gɔ ugúe.

²Batɔ go ágɛna Yésusu oŋgíso go go ɛ́na aáŋa a gaá mo éŋúgíe go buisí bá sábadɛ. Bá mba lɛ́ bá fúmbe go mo sɔ́mɛnɔ.

³Yésusu go oyana mɔtɔ mɔ́ɔnyɔ a mbaá lɛ na ombɔ́gɔ ugúe a amɔ́: «Fadɛ́gɛ́na hɔ́ɔlɔ́ naá oŋgíso yá mɔtɔ uŋkimée.»

⁴Yésusu go úhune kanɛ́ batɔ báaba bá mbaá lɛ hɔ́ɔ a amɔ́: «Gicele gɛ́cɔ́ gɛ́ oyamɔ́ nɛɛ́nɛ o?» Dɛ sɛmɛgananamɔ́ go ŋanana besé buisí bá sábadɛ lí, dɛ ŋanana gɛbɛ́ o? Ɛ́na lí, dɛ sɛmɛgananamɔ́ go sódio mɔtɔ lí, dɛ mo dɛ́ɛna a gúe o? Batɔ go gúdumidene pɔ́ɔ́.

⁵Yésusu a á bédíbíédíbíe na mpímí mɔtɔ uŋkimée, tɔ́nɔ na mahana naá odɛ́má, go oyana mɔtɔ mɔ́ɔnyɔ a amɔ́: «Gaanóna ombɔ́gɔ yáhɔ.» Gɛ́hɛ́ go yó gaanona, yó báá dúmbíe go éŋuge.

⁶Befelisiéŋe bá húmene naá nnyaŋá ya mbósógólí, gáábɔ́ go dómba go ɛ́da go cumbé na batɔ bá giimbó gá Elóode go go fúmbe pɛ́ sá go óna Yésusu.

⁷Gɔ́ɔ Yésusu a mbaá bɔ́gɔ́gɛ́dɔ́ olɔŋɔ na behúúní bɛ́hɛ́ naá cɔ́lɔ ya máŋɛ́ má Gelilée. Gitúu gá batɔ gɛ́ báá lɛ gó mo biene, báaba bɛ́ ɛ́da fadɛgana naá gɛdɔŋɔ gá Gelilée na gá Yudée.

⁸Báaba bóncodío bɛ́ ɛ́da go úlene naá tɛ́sɔnɔ ya Yolósalɛmɛ, gɛayá gá Idumée, báaba gɔnɔ́ naá boayá búunú bá osaá yá Yɔlɔdɛ́ŋɛ, bóncodío gɔnɔ́ bɛ́ ɛ́da go úlene gɛayá gɛ́ɛgɛ mekúígíi na tɛ́sɔnɔ ya Tíile na ya Sídono. Gɛcɛcá gá batɔ moánɛ gɛ́ mba lɛ́ gɛ́ úlenine Yésusu goŋaá gɛ́ mba lɛ́ gɛ́ ɔ́bɔnɔ meŋiigíe mɛ́hɛ́.

⁹Aŋa Yésusu a mbɛɛ́ ɛ́ná goŋaá batɔ bá ná lɛ́ go dídigenine bá mo óda, go oyana behúúní bɛ́hɛ́ goŋaá bá mo fúmbene gilué u úlukie naá cɔ́lɔ, i íŋene naá miimpo na gɛ́ go go bó gálagala kanɛ gɛdɔmbɔ.

¹⁰Mammana, aŋa a mbeé éŋúgényée gɛcɛcá gá batɔ, bɔgɔnɔ́gɔnɔ mbɔ́dɔ mbɔ́dɔ bá báá lɛ gó ɛ́da go bégínigenye go go mo báláfɛna bé éŋugene.

¹¹Aŋa gɔ́ɔgɔ tɔ́nɔ bɛgáda bá biliíli bɛ́ mbaá lɛ bɛ́ mo núune, bɛ́ mba lɛ bɛ́ mo obanɛna naá bɛgɔ́ndɔ́, bɛ́ oya ukelú naá mmoɛná bɛ́ amɔ́: «O lɛ́ Moɔnɔ́ ba Asaŋa.»

¹²Kanɛ́ Yésusu go bɛ́ bébégidine a amɔ́ bɛ́ dɛ hóámá bɛ́ dɛ oyáná mɔtɔ ánɛ́ɛ a lɔ́mɔ́.

¹³Gɔ́ɔ Yésusu a bólɛgamɔ́ naá ogɔndɔ mmoɛná go dɔ́ŋɛnɔ batɔ báaba a mbaá lɛ a maamana, bá búú úlénée.

¹⁴Naá tɛ́mádɛ́má yabɔ́, gɛ́hɛ́ go iyide batɔ bɔ́ɔ́dɔ́ na báandɛ́ [báaba a mbaá bó fínídínyée a amɔ́ baapótɛlɛ], bá gɛ́ga nɛhɛ́, a bó dómana go go dúmenye nogálɔ ná Asaŋa,

¹⁵gɔnɔ́ a bó fáanana nɛgaŋa ná go gúne bɛgáda bá biliíli.

¹⁶Batɔ bɔ́ɔ́dɔ́ na báandɛ́ báaba Yésusu a mbi iyídé bábáa: Símono, mɔ́ɔnyɔ Yésusu a mbaá mo fáá ufíno yúntió a amɔ́ Píele[18],

¹⁷Sáakɛ na ondimóní bɛhɛ́ Sáŋa, biimée báandɛ́ bahaŋa bá Sebedée, báaba Yésusu a mbaá bó logá a amɔ́ «Boanɛlɛyɛ́sɛ», nɔ́ɔnɔ gó lɛ́ aá «batɔ báaba bá fóananamɔ́ mbalámandáa[19]»,

¹⁸Andɛlɛ́ɛ, Fílibi, Betelemíi, Motíosi, Tómasɛ, Sáakɛ ohaŋa ba Alɛfɛ́ɛ, Tadɛ́ɛ, Símono, ba go noanana goŋaá gɛdɔŋɔ gɛ́hɛ́ gɛ́ bábɛa,

¹⁹na Yódasɛ Ɛsɛkalɛ́ɔtɛ, mɔ́ɔnyɔ ba go dúe Yésusu.

²⁰Gɔ́ɔ Yésusu a mbaá gundé naá nnyaŋá olɔŋɔ na behúúní bɛ́hɛ́. Gitúu gá batɔ go gɔnɔ bábándɛgɛna naá boayá bɛ́hɛ́ mbɔ́dɔ ya goŋaá mɔ́ɔ moatɛ́ na behúúní bɛ́hɛ́ bá dɛ bɛáa gɛcamɛna gá go nyáa boóma.

²¹Aŋa ncíbo yɛhɛ́ ya batɔ ɛ mbɔɔ́ ɔ́bɔ́ bosɔ́mɔ moánɛ, go fadɛgɛna go go ɛ́da mo gɔ́lɔ, goakɛ́ ɛ mba lɛ́ ɛ gálagala yɛ amɔ́[20]: «Nɛɛ́nɛ! Mɔtɔ mɔ́ɔnyɔ a ná lɛ́ na buegu lí?»

²²Muloodio má gicele mɔ́ɔmɔ mó mbɛɛ́ ɛ́dá go úle naá Yolósalɛmɛ, mó mba lɛ́ mó oya mó amɔ́: «A bɛanana bogaaga bá Belesebúlu, ombɛ́ ba mɔtɔ.» Mó mba lɛ́ mó gɔnɔ go oya mó amɔ́: «Bó lɔ́mɔ́ na bogaaga bá ufuŋe yá bɛgáda bá biliíli gɔ́ɔ a bɛ́ gúnemú.»

²³Kanɛ́ Yésusu go mó dɔ́ŋɛnɔ go mó ágɛna ncaba yɛ́ɛyɛ a amɔ́: «Sátana a lɛ́ ba go gɔnɔ bégúne mɔ́ɔ moatɛ́ moatɛ lí?

²⁴Aáŋa batɔ bá bufuŋe búmmue bá básalasala bɔ́ɔ na bɔ́ɔ, bufuŋe bɔ́ɔbɔ bó gaá fúé.

²⁵Caŋa táŋɛ́ mmue aáŋa batɔ bá ncíbo mmue bá básalasala bɔ́ɔ na bɔ́ɔ, ncíbo ya ndiemi ɛ gaá fúé.

²⁶Nɔ́ɔ gɔ́ɔ tɔ́nɔ, aáŋa Sátana a bénuugenye mɔ́ɔ ba moatɛ́ moatɛ, a amɔ́ a básalasala, bogaaga bɛ́hɛ́ bó do gɛɛ́ ɛ́dáná naá busío, bó gaá maná.

²⁷Mɔtɔ a dɛ báá ba go íŋene naá nnyaŋá ya sɔ́gɔ́ mɔtɔ mɔ́ɔnyɔ a lɔ́mɔ́ gɛgaaga, a gɔ́lɔ bonɔ́mɛ bɛ́hɛ́ kanɛ go dóana go mo góda iŋgolí; aŋa a ŋamɔ́ a báá go mo góda iŋgolí, a ná lɛ́ ba goŋaá a gɔ́lɔ bonɔ́mɛ buimée bɔ́ɔbɔ naá nnyaŋá yɛ́ɛyɔ.

²⁸«Mammana, ŋgaá nyó oyáná caá, Asaŋa a ŋga hééhínyée batɔ go bɛlɔgɔ bábɔ́ biimée na cigí sábɔ́ iŋkimée.

²⁹Kanɛ́ mɔtɔ mɔ́ɔnyɔ a ŋgaá sɛgɛ́dá Gimmúmpúu gá Giliíli, ba ndiemi Asaŋa a dɛ ŋgá mo héehinye, goŋaá a á ŋaáa gɛlɔgɔ gɛ́ɛgɛ Asaŋa a ŋga ŋá a dɛ bófoolío.»

³⁰Yésusu a mba lɛ́ a bó gálagala nɔ́ɔnɔ goŋaá bá mba lɛ́ bó oya bá amɔ́, «a lɛ́ na gɛgáda gá giliíli.»

³¹Gɔ́ɔ nnyeedíi na bolimóní bá Yésusu bú úlemú bá báá bolá; gáábɔ́ go lɔbɛnɔ go hanyɔ́, go dóma mɔtɔ goŋaá ɛ ɛ́da mo dɔ́ŋɛnɔ.

³²Gitúu gá batɔ gɛ́ mba lɛ́ ndukíi gɛ́ báá go mo géŋgelidie. Bá báá lɛ gó mo oyana bá amɔ́: «Yigúédíi na batɛ́ɔbɛnɔ bá lɛ́ go hanyɔ́, bá go fúmbe.»

³³Yésusu go bó gundie a amɔ́: «Ánɛ́ɛ a lɔ́mɔ́ mmaáa o? Baánɛ́ɛ bá lɔ́mɔ́ gɔnɔ́ bolimóní bámɛ o?»

³⁴Yésusu go bédíbedibie batɔ báaba bá mbaá lɔmɔ́ ndukíi bá báá go mo géŋgelidie, gɛ́hɛ́ go bó oyana a amɔ́: «Núúnée nɔnɔ, mmaáa na bolimóní bámɛ bɔ́ɔ bábáa.

³⁵Mammana, mɔtɔ uŋkimée mɔ́ɔnyɔ ɔ ɔyɔmɔ́ aŋa Asaŋa a maamanamɔ́, mɔ́ɔ a lɔ́mɔ́ ondimóní bamɛ, na nnyeedíi bamɛ.»