Read Nugunu Mélékusu 4 Bible Online

Mélékusu 4 - Nugunu bible

Mélékusu 4

¹Gɔ́ɔ Yésusu a gɔnɔmɔ́ go ɛ́da go go húunenye naá cɔ́lɔ ya máŋɛ́ má Gelilée. Bitúu bitúu bá batɔ go mo géŋgelidie, bó báá ŋaáa goŋaá a bólɛga gilué naá máŋɛ́, a lukumene kɔ́ɔ. Bitúu bá batɔ go kíkene naá cɔ́lɔ mekúígíi na gilué gɛ́ɛgɛ a mbaá lɔmɔ́ kɔ́ɔ.

²A mba lɛ́ a bó húunenye gɛcɛcá gá moóma go ncaba a amɔ́ gáábɔ́ a amɔ́:

³«Bódólígínyóomú nɔnɔ náana. Mɔtɔ ummue a mba hémé go go kasana masámá.

⁴A lɛ́ naá go kasana nɔ́ɔnɔ, masámá móncodío go oba go pɛ́ gimbúlúu; munoní mó búú úlé, mó báá nyáá púmú.

⁵Masámá móncoó má bóó obá naá hoóma há adánɛ́, anáa cí ɛ mbaá lɛ ɛ dɛ íŋénénée. Camɔ́ sɛ́ báá basá gɛcamɛna kanɛ go dómba, goakɛ́ cí ɛ dɛ mbáa lɛ yɛ íŋenene.

⁶Aŋa gɛonyá gɛ́ mbɛɛ́ ɛ́dá go noma, gɛ́ báá lókónónyóo baaná bá magónɛ́dá bɔ́ɔbɔ, bá báá kótáa go kanɛ ɛŋaŋá.

⁷«Masámá móncoó má bóó obá naá musíníni, musíníni mɔ́ɔmɔ mó búú úbígéné, mó báá mɔ́mɛ́nɔ́ɔ magónɛ́dá, má báá lɔbɛ́nɔ́ kanɛ go úme bɛondá.

⁸Gɔ́ɔ masámá móncodío mó obanamɔ́ naá gɛnɔ́gɔ́ gá cí. Aŋa má mbaá basáa má báá gomáa, go ágana bɛondá: gɛondá gímmue na camɔ́ ntɛdɛ, gɛ́ɛgɛ na camɔ́ otíno ádadɔ́, gɛ́ɛgɛ gɔnɔ́ na camɔ́ nitíno na sɛ́ɔ́dɔ́.»

⁹Kanɛ́ Yésusu go oyɛda a amɔ́: «Mɔ́ɔnyɔ a lɔ́mɔ́ na edúu ɔ ɔ́bɔ!»

¹⁰Aŋa Yésusu a mbaá yáŋɛ́mɛ́dɛ́ná gitúu gá batɔ, báaba bá mbaá lɛ mekúígíi nɛhɛ́ olɔŋɔ na Bɛɔdɔ́ɔ na bɛ́andɛ́ bá behúúní, go mo úhune goŋaá a bó falonɛna ncaba sɛ́ɛsɔ.

¹¹Yésusu go bó gundie a amɔ́: «Bɛɛnyɔ́ɔ, no lɛ́ bɛáalú nnindíi ya Bufuŋe bá Asaŋa. Kanɛ́ batɔ bóntió, mbó gálagala moóma mɔ́ɔmɔ muimée go ncaba.

¹²Kálagala nɔ́ɔnɔ goŋaá, bá núune kanɛ go ɛ́nana mammana, bá bódólonyo kanɛ go ɔ́bɔ mammana. Bó lɔ́mɔ́ nɔ́ɔnɔ goŋaá bá dɛ kikílídíe gɛɔyɔ gábɔ́, bá bó héehinye[21].»

¹³Gɔ́ɔ Yésusu a bó úhunemú a amɔ́: «Ábɔ, no do ɔ́bɔ́nɔ́ɔ ncaba yɛ́ɛyɛ lí? Kanɛ́ nɛɛ́nɛ no lɔ́mɔ́ ba go ɔ́bɔ ncaba sɛ́ɛsɛ síntió o?»

¹⁴«Mɔtɔ ba go kasana masámá a lɔ́mɔ́ mɔ́ɔnyɔ o oyamɔ́ nogálɔ ná Asaŋa.

¹⁵Batɔ bóntió bá lɛ́ caŋa táŋɛ́ mmue aŋa bá lɛ́ “go pɛ́ gimbúlúu” gɔ́ɔgɔ bó oyamɔ́ nogálɔ ná Asaŋa. Gɛcamɛna gɛ́ɛgɛ bá nó ɔ́bɔnɔmɔ́, Sátana a lɛ go bola a nco go úlie nogálɔ nɔ́ɔnɔ nó ná lɔ́mɔ́ naá ɛdɛ́má yabɔ́.

¹⁶Caŋa táŋɛ́ mmue, batɔ bóntió bɔ́ ɔ́bɔnɔ Nogálɔ moánɛ aŋa “naá hoóma há adánɛ́”. Hɔ́ɔ na hɔ́ɔ, bá nó bódólonyo, bá nó gɛ́ndɛgɛna na bɛyaŋa.

¹⁷Kanɛ́ aŋa masámá, bá dɛ nó dɛ́ɛ́ná nó sume ɛŋaŋá naá gɛɔyɔ gábɔ́. Batɔ moánɛ bá bɛ́dɛgana nogálɔ ná Asaŋa go moɔnɔ́ ba gɛcamɛna. Aŋa gɔ́ɔgɔ gɛdɔmbɔ na noséésényée mó bó bolɛnamɔ́ go busío bá Nogálɔ, bá dómba go umbe gioliminyo.

¹⁸«Batɔ bóntió gɔnɔ́ bá bɛanana Nogálɔ nɔ́ɔnɔ aŋa “masámá naá musíníni”. Gɔ́ɔgɔ bá báá ná manɛ́ go nó bódólonyo,

¹⁹na mecíkílí má gɛɔyɔ, na golɛ́galɛga gá bonɔ́mɛ bá mbele, na mbééníŋínyí mbɔ́dɔ mbɔ́dɔ, moóma mɔ́ɔmɔ muimée mó lɛ go bó íŋenine naá gɛɔyɔ gábɔ́, mó mɔ́mɛnɔ Nogálɔ, nó lɔbɛnɔ kanɛ go ága gɛsamɔ́.

²⁰Kanɛ́ batɔ bóntió bá bɛanana Nogálɔ moánɛ “aŋa masámá máama naá gɛnɔ́gɔ́ gá cí”: bá bódólonyo Nogálɔ, bá nó gɛ́ndɛgɛna, bá ágana bɛondá: gɛ́ɛgɛ gɛondá camɔ́ “nitíno na sɛ́ɔ́dɔ́, gɛ́ɛgɛ otíno ádadɔ́, gíntió gɔnɔ́ camɔ́ ntɛdɛ”.»

²¹Yésusu a báá lɛ gó gɔnɔ bó úhune a amɔ́: «Mɔtɔ a nébigenyemú lámba go go nco yɛ ága naá iséní gadɛ́ɛ, ɛ́na naá ombɛ́dɛ́ cí lí? Ábɔ, caá bá yɛ ɛdɛganamɔ́ naá gɛɛdɛ́gɛ́ná gá yɛ́[22] o?

²²Boóma buimée bɔ́ɔbɔ bó lɔ́mɔ́ naá nɛɔsɛgɔ, bó ŋga húmé naá hanyɔ́. Akɛ́ bɔ́ɔbɔ bá ŋananamɔ́ naá nnindíi bó ŋga húmé naá gise.

²³Aáŋa mɔtɔ a lɛ́ na edúu ɔ ɔ́bɔ!»

²⁴Yésusu go gɔnɔ bó oyana a amɔ́: «Bébeŋéemú nɔnɔ go moóma mɔ́ɔmɔ no ɔ́bɔnɔmɔ́! Bá ŋga gɔ́lɔ́ go busío bɛ́nyɔ́ mɛ́da máama no lɔ́mɔ́ na má go bɔsɔ́gɔ́ɔ, bá gɔnɔ dúmbidinye[23].

²⁵Mammana, mɔtɔ mɔ́ɔnyɔ a bɛananamɔ́, bá ŋga gɔnɔ́ mo gídene; kanɛ́ mɔ́ɔnyɔ a lɔ́mɔ́ a dɛ bɛanánáa, bá ŋgu úlíe akɛ́ sɔŋɛ yɛ́ɛyɛ a bɛananamɔ́.»

²⁶Yésusu go gɔnɔ gálɛda a amɔ́: «Bufuŋe bá Asaŋa bó fóananɛna aŋa mɔtɔ ummue mɔ́ɔnyɔ a mbaá kasánáa camɔ́ naá ntɛ́mɛ́ yɛhɛ́.

²⁷Naá nnyimé ya go kasana, gɛ́hɛ́ go gunde a báá bɛ́dɛ́mɛ́ná ɛ ɛ́dana dɔnɔ́ɔ budúgú buimée, na sisíi a fadɛgɛna. Naá gɛcamɛna gɛ́ɛgɔ, camɔ́ sɛ́ síene sɛ́ bábasana, sɛ́ bágomana, mɔ́ɔ a dɛ íyímé aŋa bó báŋananamɔ́.

²⁸Cí moatɛ́ moatɛ ɛ dóananamɔ́ go besenye mbɔ́gɔ́ sá magónɛ́dá, naá nnyimé hɔ́ɔlɔ́ camɔ́ sɛ́ gónɛna naá gɛondá gadɛ́ɛ.

²⁹Gɛcamɛna gɛ́ɛgɛ camɔ́ sɛ́ báá ná manɛ́ go gónɛna, mɔtɔ ba ntɛ́mɛ́ a lɛ go bayɛga masáŋa[24].»

³⁰Yésusu go gɔnɔ go oyɛda a amɔ́: «Dɛ lɔ́mɔ́ ba go gɔ́lɔ gieninye gɛ́hanɛ́ gɛ́ɛgɛ gɛ́ fóananɛnamɔ́ na Bufuŋe bá Asaŋa, ɛ́na lí kasɛ́á ncaba dɛ lɔ́mɔ́ ba go ága go go bó eninye o?

³¹Bufuŋe bá Asaŋa bó lɔ́mɔ́ caŋa táŋɛ́ mmue na camɔ́ ya motáladɛ, gɛcamɛna gɛ́ɛgɛ bá yɛ gónamɔ́, ɛ lɛ́ ɛcaácamɔ́ go camɔ́ iŋkimée sɛ́ɛsɛ naá cí.

³²Kanɛ́ aŋa bá ŋamɔ́ bá báá go yɛ góna, ɛ báá basá, ɛ báá gomá, ɛ báá dómbá magónɛ́dá miimée, ɛ lɛ go ɛ́da go ágana bɛantá bá ɛtáfɛ bɛ́ɛbɛ munoní mó lɔ́mɔ́ ba go nco fóaga aŋaanɔ naá gifií gá bɔ́.»

³³Na mbɔ́dɔ sá ncaba aŋa sɛ́ɛsɛ náana, gɔ́ɔ Yésusu a mbaá lɔmɔ́ a bó dúmeninye Nogálɔ. A mba lɛ́ a bó húunenye nɔ́ɔnɔ nɛnamá ná goŋaá mɔtɔ uŋkimée mɔ́ɔnyɔ a mbaá lɔmɔ́ a mo bódólonyo a mba lɛ́ ba go mo ɔ́bɔ bese bese.

³⁴A dɛ mbáa lɛ a bó gálagala kanɛ go ága ncaba, kanɛ́ aŋa a síenemú na behúúní bɛ́hɛ́, a lɛ go bó falonɛna ncaba sɛ́ɛsɔ iŋkimée púmú.

³⁵Hɛɔbɔ́bɔ́ɔ há buisí moánɛ, Yésusu go oyana behúúní bɛ́hɛ́ a amɔ́: «Ŋgáa dɛ no yooga naá cɔ́lɔ boayá búunú.»

³⁶Gáábɔ́ go síe bá báá dɛ́ɛ́ná gitúu gá batɔ gɛ́ɛgɛ gɛ́ mbaá lɔmɔ́ gɛ́ úlene, gɛ́ bábánda go go bódólonyo nogálɔ ná Asaŋa. Behúúní bá Yésusu go mo gɔ́lɔ, go ɛ́da nɛhɛ́ naá gilué gɛ́ɛgɛ a mbaá lɛ kɔ́ɔ. Bilué bíntió bɛ́ mba lɛ́ mekúígíi nɛhɛ́.

³⁷Hɔ́ɔ na hɔ́ɔ, gɛantáanta gá puŋe go ɛ́da go fufe, gilué gɛ́ bɛ́ɛ́ ɛ́dá go hóogono miimpo.

³⁸Yésusu a mba lɛ́ naá nnyimé ya gilué, ɛ ɛ́dana dɔnɔ́ɔ, odóɛ naá kááda. Behúúní bɛ́hɛ́ bá báá lɛ gó mo foyona, bɛ́ ɛ́da bá mo gálagala bá amɔ́: «Iloodio, gogúe gɛ́cɔ́ gɔ́gɔ́ɔ, nɛɛ́nɛ o gɛ́gamɔ́ aŋa bó do go fóánɛ́náa náana o?»

³⁹Aŋa Yésusu a mbaá foyógá, gɛ́hɛ́ go áncɛdɛna puŋe, a báá gálɛ́dá miimpo má máŋɛ́ a amɔ́: «Pɔ́ɔ́! Súgé hɔ́ɔlɔ́.» Puŋe ɛ báá dúmbíe go yɔyɔ, miimpo má dɛ mbá gɔnɔ búugebugie gilué.

⁴⁰Gɔ́ɔ Yésusu u úhunemú behúúní bɛ́hɛ́ a amɔ́: «Nɛɛ́nɛ no lɔ́mɔ́ na bofoá makɔ́nɔ́ náana o? No gá lɛ́ no do ágá odɛ́má yɛ́nyɔ́ naá Asaŋa lí?»

⁴¹Kanɛ́ bá mba lɛ́ na bofoá makɔ́nɔ́, gáábɔ́ go ɛ́da go bágálɛnagalɛna bá amɔ́: «Kasɛ́á mbɔ́dɔ ya mɔtɔ yɛ́yɛ́ɛ náana, ya goŋaá akɛ́ ufufu, akɛ́ máŋɛ́ mó mo ɔ́bɛnɔnɔ[25] o?»