Read Nugunu Mélékusu 5 Bible Online

Mélékusu 5 - Nugunu bible

Mélékusu 5

¹Gɔ́ɔ Yésusu na behúúní bɛ́hɛ́ bá mbaá yoogá máŋɛ́ má Gelilée, go go bola boayá búunú naá gɛdɔŋɔ gá Béyeleseniéŋe.

²Aŋa bá mbaá siisé naá gilué, hɔ́ɔ na hɔ́ɔ, mɔtɔ ummue ba gɛgáda gá giliíli a húmene naá bɛbɛ́lá go úle giluméní nɛhɛ́.

³Kɛ́gɛ́ná yɛhɛ́ ɛ mbaá lɛ naá bɛbɛ́lá. Mɔtɔ a dɛ mbáa lɛ a gɔnɔ bɛanana bogaaga bá go mo gumbene go go mo góda iŋgolí, akɛ́ na magala.

⁴Bɛcamɛna bíntió, bá mba lɛ́ bá góda bɛgɔ́ndɔ́ bɛ́hɛ́ na duelí dá bɛkɔ́ŋɔ, ɛmbɔ́gɔ yɛhɛ́ na magala tíŋítíŋí. Akɛ́ nɔ́ɔnɔ, a mba lɛ́ a gása duelí dá bɛkɔ́ŋɔ dɔ́ɔdɔ na magala kɛ́. Mɔtɔ a dɛ mbáa lɛ tɔ́nɔ a bɛanana bogaaga bá go mo mánɛgɛna, akɛ́ bá go mo mémie pɔ́ɔ́.

⁵Bɛcamɛna biimée, aŋa siisíi aŋa budúgú, a mba lɛ́ a lémpe naá bɛbɛ́lá, a gɔsɔ a bólɛga naá ɛgɔndɔ, ɛ ɛ́da a ágana kóokóo, a bácana na adánɛ́.

⁶Aŋa a mbɛɛ́ ɛ́ná Yésusu a gɛɛ́ ɛ́da go úlene páábɔ́, mɔtɔ go gɔ́lɔ odɛ́dá go nco gule enúu naá busío bɛ́hɛ́.

⁷Gɛ́hɛ́ go áncɛda na ukelú ogɔ́nɔ́ a amɔ́: «Yésusu, Moɔnɔ́ ba Asaŋa ba Páábɔ́ naá Mmoɛná, o fúmbemú ŋkádɛ́ namɛ o? Sɔ́kɔlɛ go ufíno yá Asaŋa, o do páá noséésényée.»

⁸Mammana, Yésusu a mba mo oyáná a amɔ́: «Gɛgáda gá giliíli, húmé naá mɔtɔ mɔ́ɔnyɔ.»

⁹Kanɛ́ Yésusu a báá lɛ gó mo úhune a amɔ́: «Ufíno yáhɔ yó lɔ́mɔ́ ánɛ́ɛ o?» Gɛ́hɛ́ go mo gundie a amɔ́: «Ufíno yámɛ yó lɔ́mɔ́ Nɛgósa, goŋaá dɛ lɛ́ degédegé.»

¹⁰A báá lɛ gó ɛ́da go bósógolonyo Yésusu a latɛnana goŋaá a dɛ bɛ́ gúné bɛ́ dɛ húmé naá gigísi gá cí gɛ́ɛgɔ.

¹¹Kanɛ́ hɔ́ɔ hɔ́ɔlɔ́, gɛayáa gá ogɔndɔ, buufe bá ŋgɔnɔ́bɛ́[26] bó mba lɛ́ bó nyáanya.

¹²Bɛgáda bá biliíli bɛ́ɛbɔ go ɛ́da go béyéeyenye Yésusu bɛ́ amɔ́: «Có dómáamɔ́ naá ŋgɔnɔ́bɛ́ dɛ íŋenene kɔ́ɔ.»

¹³Gɛ́hɛ́ go oliminyo. Bɛgáda bá biliíli bɛ́ báá lɛ gó húmene naá mɔtɔ, go íŋenene naá ŋgɔnɔ́bɛ́. Buufe buimée bá ŋgɔnɔ́bɛ́ go ɛ́da kíkide naá ogɔndɔ go nco bésugune naá máŋɛ́ cuuu, go fúe púmú naá miimpo.

¹⁴Bebeŋíbéŋí ŋgɔnɔ́bɛ́ bá báá díínée, go cekie naá tɛ́sɔnɔ na naá nnyimé ya gɛdɔŋɔ boóma bɔ́ɔbɔ bó mbaá bádómbánáa. Batɔ go úle kanɛ́ go go nco go ɛ́na boóma moánɛ.

¹⁵Aŋa bá mbaá ncó bola naá Yésusu, gáábɔ́ go ɛ́na mɔtɔ mɔ́ɔnyɔ a mbaá lɛ a bɛanana gɛca gá bɛgáda bá biliíli. A mba lɛ́ ndukíi, na bɛla go nnyɔ́dɔ, nciŋí yɛhɛ́ ɛ báá go nco gunde. Kɔ́ɔ bá bɛamɔ́ bofoá.

¹⁶Batɔ báaba bá mbɛɛ́ ɛ́ná boóma bɔ́ɔbɔ buimée, go oyana báaba bá mbaá bolá nnyimé boóma bɔ́ɔbɔ bó mbaá bolɛ́ná mɔtɔ ba bɛgáda bá biliíli na ŋgɔnɔ́bɛ́.

¹⁷Gɔ́ɔ bɛ́ ɛ́damɔ́ go béyéeyenye Yésusu goŋaá u úlukie naá gɛdɔŋɔ gábɔ́.

¹⁸Gɛcamɛna gɛ́ɛgɛ Yésusu a mbaá ŋá a ná lɛ́ go bólɛgana naá gilué, mɔtɔ mɔ́ɔnyɔ bɛgáda bá biliíli bɛ́ mbaá húmé naá mɔ́ nnyɔ́dɔ go mo úhune goŋaá bá lɔbɛnɔ nɛhɛ́.

¹⁹Yésusu a dɛ mbó oliminyo go lɔbɛnɔ nɛhɛ́, kanɛ́ a báá mo oyáná a amɔ́: «Gundé naá mamɔ́ nnyaŋá naá boahɔ, o bó oyanɛna buimée bɔ́ɔbɔ Daadáa a ná go ŋaáa go ŋgɛ́na mahana yɛhɛ́.»

²⁰Mɔtɔ moánɛ go dómba go biene pɛ́, go bayɛga go dúmenye naá gigísi gá cí ufíno yá gɛ́ Tɛ́sɔnɔ Sɛ́ɔ́dɔ́, buimée bɔ́ɔbɔ Yésusu a mbaá ŋaáa go busío bɛ́hɛ́. Batɔ biimée bá mba lɛ́ bá mo bódólonyo, bá békúke.

²¹Gɔ́ɔ Yésusu na behúúní bɛ́hɛ́ bá gɔnɔmɔ́ nco gunde [naá gilué] naá cɔ́lɔ ya gɛsɔmbɔsɔ́mbɔ́ɔ boayá bɔ́ɔbɔ. Gɛca gá batɔ gɛ́ báá lɛ gó mo géŋgelidie. A mba lɛ́ tɛ́nɛ́ɛ naá cɔ́lɔ.

²²Ogɔ́nɔ́ɔ ba nnyaŋá ya mbósógólí ummue ufíno yɛ́hɛ́ Yeyílusu go úle a báá bolá. Aŋa a mbɛɛ́ ɛ́ná Yésusu, a báá lɛ gó cúbimene naá busío bɛ́hɛ́,

²³ɛ ɛ́da a mo béyéeyenye, a mo yidenye a amɔ́: «Moádɔmbɔ́ bamɛ ba okɔ́dɔ a ná lɛ́ nigúe nɛ́nɛ́ɛ, gɛɔyɔ gɛ́gɛ́ɛ. Sɔ́kɔlɛ, úlé o mo dála ɛmbɔ́gɔ goŋaá e éŋuge, ɔ ɔyɔ.»

²⁴Yésusu nɛhɛ́ na Yeyílusu go biene pɛ́. Gitúu gá batɔ makɔ́nɔ́ gɛ́ mba lɛ́ gɛ́ mo bienene gɛ́ mo óda.

²⁵Kanɛ́ okɔ́dɔ ummue a mba lɛ́ hɔ́ɔ mɔ́ɔnyɔ a mbaá lɛ a nóma ogɔnɔ́ yá go húmene manɔ́ŋɔ́. Yó mbaá ŋá yó báá go ŋa naá nnyɔ́dɔ yɛhɛ́ nnyómá sɛ́ɔ́dɔ́ na ɛ́handɛ́.

²⁶A mba ŋá a báá go ɔ́bɛgɔnɔ makɔ́nɔ́ naá ɛmbɔ́gɔ ya gɛca gá bogóódíníní, a báá dúé bonɔ́mɛ bɛ́hɛ́ buimée. Akɛ́ nɔ́ɔnɔ a dɛ mbé éŋuge, ogɔnɔ́ yɛ́hɛ́ yó ɛ́dana naá busío yó áyɛkanɛna.

²⁷Aŋa okɔ́dɔ mɔ́ɔnyɔ a mbɔɔ́ ɔ́bɔ́ bá gúmenye Yésusu, gɛ́hɛ́ go íŋene naá gitúu gá batɔ, naá nnyimé ya Yésusu go báláfɛna gɛla gɛ́hɛ́.

²⁸A mba lɛ́ a bágálɛnagalɛna a amɔ́: «Caá mbáláfɛna goana akɛ́ bɛla bɛ́hɛ́, keé éŋúgé.»

²⁹Hɔ́ɔ na hɔ́ɔ, ogɔnɔ́ yɛ́hɛ́ yá go húmene manɔ́ŋɔ́ yó báá sómbɛ́gɛ́ná, go bɔ́ɔ́bɔ goŋaá e é éŋúgé.

³⁰Naá gɛcamɛna moánɛ, Yésusu go dómba go lɛnca goŋaá bogaaga bó á húmé naá mɔ́ nnyɔ́dɔ. A á bábondóná naá kadɛ́gadɛ́ɛ ya gitúu, go úhune a amɔ́: «Ánɛ́ɛ a báláfɛnamɔ́ bɛla bámɛ o?»

³¹Behúúní bɛ́hɛ́ go mo gundie bá amɔ́: O do ɛ́nánáa gitúu gá batɔ gɛ́ɛgɛ gɛ́ go ódamɔ́ maayá miimée, maamɔ́ɔ o gɔnɔ go úhune go amɔ́: «Ánɛ́ɛ a mbáláfɛnamɔ́ o?»

³²Yésusu go ɛ́da go bédíbedibie naá gitúu go go lɛnca ánɛ́ɛ a mbaá mo báláfɛ́ná.

³³Okɔ́dɔ a lɛncana bɔ́ɔbɔ bó mbaá bádómbánáa naá nnyɔ́dɔ yɛhɛ́, go ɛ́da a tatana na bofoá buimée, a báá ncó bɔ́nɔ naá bɛgɔ́ndɔ́ bá Yésusu cí, a báá mo oyáná mammana iŋkimée.

³⁴Yésusu go mo oyana a amɔ́: «Ombóla bamɛ, gioliminyo gáhɔ gɛ́ á go sódío[27], ɛ́dá naá buumbénú, éŋúge ogɔnɔ́ yáhɔ.»

³⁵Yésusu a gá lɛ́ na dogálɔ naá nyuudé, batɔ bá bosɔ́mɔ naá nnyaŋá ya ogɔ́nɔ́ɔ ba nnyaŋá ya mbósógólí go úle bá báá bolá go mo oyana bá amɔ́: «Ombóla bahɔ a báá go síene a gúe, o gá gɔnɔmɔ́ génegenye Iloodio goakɛ́ o?»

³⁶Yésusu a mba lɛ́ ɔ ɔ́bɔnɔ dogálɔ dɔ́ɔdɔ aŋa a dɛ ɔ́bɔ́nɔ́ɔ, gɛ́hɛ́ go oyana ogɔ́nɔ́ɔ ba nnyaŋá ya mbósógólí mɔ́ɔnyɔ a amɔ́: «O do bɛáa bofoá, ágá goana odɛ́má yáhɔ naá Asaŋa.»

³⁷Yésusu a lɛ́ kanɛ go dɛ́ɛna mɔtɔ untió a mo díligene, goana Píele, Sáakɛ na Sáŋa mɔ́ɔnyɔ a lɔ́mɔ́ ondimóní ba Sáakɛ.

³⁸Bɛ́ ɛ́ ɛ́dá bola naá nnyaŋá ya ogɔ́nɔ́ɔ ba nnyaŋá ya mbósógólí, Yésusu go ɛ́na batɔ bá bégide, bá baŋa, bá ágana kóokóo.

³⁹Gɛ́hɛ́ go íŋene naá ncíbo go úhune batɔ bɔ́ɔbɔ a amɔ́: «Ɛkádɛ gɛ́ lɔ́mɔ́ gá go bégide na mbií náana o? Moádɔmbɔ́ mɔ́ɔnyɔ a dɛ báá gúe, a lɔ́mɔ́ go dɔnɔ́ɔ.»

⁴⁰Gɔ́ɔ batɔ bɛ́ ɛ́damɔ́ go mo hɔɔnɔ. Yésusu go dúmbie go ága mɔtɔ uŋkimée go hanyɔ́, a bíí íŋéné na isée na nnyeedíi bá moádɔmbɔ́, olɔŋɔ na behúúní bɛ́hɛ́ bádadɔ́. Kɔ́ɔ bɛ́ ɛ́damɔ́ naá nɛgɛlɛ́, anáa moádɔmbɔ́ a mbaá lɛ mbɛ́dɛ́ɛ.

⁴¹Yésusu go mo gumbene go ombɔ́gɔ, go mo oyana a amɔ́: «“Talɛ́tá kumi[28]”, nɔ́ɔnɔ gó lɛ́ aá: “Moádɔmbɔ́ ba okɔ́dɔ mɔ́ɔnyɔ, ndɔ́mɔ́ caá, fadɛ́gɛ́na.”»

⁴²Moádɔmbɔ́ ba okɔ́dɔ mɔ́ɔnyɔ a mba lɛ́ na nnyómá sɛ́ɔ́dɔ́ na ɛ́handɛ́, gɛ́hɛ́ go dómba go fadɛgɛna go bayɛga go ɛnda. Batɔ bɛ́ ɛ́ ɛ́ná boóma moánɛ, go ɛ́da go békúke makɔ́nɔ́.

⁴³Yésusu go bó bébégidine a amɔ́ bá dɛ ŋaáa goŋaá mɔtɔ untió i íyime boóma bá ndiemi. Gɛ́hɛ́ go gɔnɔ bó oyana a amɔ́: «Fáá nɔnɔ moádɔmbɔ́ mɔ́ɔnyɔ manyáanya.»