Read Nugunu Mélékusu 7 Bible Online

Mélékusu 7 - Nugunu bible

Mélékusu 7

¹Gɔ́ɔ nɛnamá ná Befelisiéŋe na nɛnamá ná muloodio má gicele bá go ɛ́da go úle naá Yolósalɛmɛ bá ncomɔ́ bábánda bá báá ágɛ́ná Yésusu gieŋí.

²Gáábɔ́ go ɛ́na goŋaá naá behúúní bá Yésusu, bóncodío bá lɛ́ hɔ́ɔ báaba bá nyáanyamɔ́ na biílo, nɔ́ɔnɔ gó lɛ́ aá kanɛ go soga ɛmbɔ́gɔ aŋa gɔ́ɔgɔ caŋa sá gɛdɔŋɔ sɛ́ oyamɔ́.

³Kanɛ́ Befelisiéŋe aŋa Beyúdene bóntió, biimée bá bienene gohúunenye gá biisée bábɔ́; bá dɛ nyáányáa kanɛ go básoga ɛmbɔ́gɔ aŋa gɔ́ɔgɔ gó háananamɔ́[40].

⁴Naá goncogunde gá nyonyí, bá dɛ nyáányáa kanɛ go básoga: bá bɛanana gɔnɔ́ gɛcɛcá gá caŋa gɛ́ɛgɛ biisée bábɔ́ bá mbaá bó dúmbínyée aŋa: gosoga gá kɔ́bɔ, na muséní, na bɛmbalɛ́ŋa bá isóyóo ya bɛkɔ́ŋɔ, [na ɛmbɛ́dɛ́ kɛ́][41].

⁵Gɔ́ɔ kanɛ́ Befelisiéŋe na muloodio má gicele bú úhunemú Yésusu bá amɔ́: «Go busío báakɛ́ behúúní báhɔ bá lɔ́mɔ́ bá dɛ bienénée caŋa sá biisée bɛ́cɔ́, bá nyáanya ɛmbɔ́gɔ na biílo o?»

⁶Yésusu go bó oyana a amɔ́: «Bekuilí báaba, mbúsí ya Asaŋa Iseyíi ɛ mba gálágáláa mammana, goakɛ́ bó lɛ́ ɔ́ŋɔ́ɔlú go busío bɛ́nyɔ́ goŋaá, Asaŋa a amɔ́: Boɛ́nɔ bɔ́ɔbɔ bó mbúlugenye goana na nyuudé, kanɛ́ odɛ́má yábɔ́ yó lɛ́ halaháláa namɛ;

⁷mbúlugie yabɔ́ go busío bámɛ ɛ lɛ́ godugúnú, goakɛ́ bicele bɛ́ɛbɛ bá húunenyemú bɛ́ lɔ́mɔ́ bɛ́ɛbɛ bá batɔ moatɛ́ go báágɛnana[42].

⁸No dɛ́ɛnana bicele bá Asaŋa go boayá go go bienene caŋa sá biisée bɛ́nyɔ́.»

⁹Yésusu gáábɔ́ gɔnɔ́ a amɔ́: «No íyimenemú go umbe gicele gá Asaŋa bese na bese go go bɛ́dɛgɛna caŋa sá biisée bɛ́nyɔ́.

¹⁰Mammana, Mɔ́sɛsɛ a mbo oyɛ́dá a amɔ́: “Hálámána tɛ́ɔ na yigúédíi”, gɔnɔ́ “mɔ́ɔnyɔ a yɔmɛnɔmɔ́ isée ɛ́na nnyeedíi, noséésényée nɛ́hɛ́ nó lɔ́mɔ́ nigúe[43].”

¹¹Kanɛ́ bɛɛnyɔ́ɔ no oya no amɔ́: “Mɔtɔ a lɛ́ ba go oyana isée ɛ́na nnyeedíi a amɔ́: gidúgune gɛ́ɛgɛ ŋgaá ná lɛ́ bá go go fáa gɛ́ ɛ́ ɛ́yá kolobána (gɔ́ɔgɔ gó lɛ́ aá gɛbáágá gɛ́ɛgɛ gɛ́ lɔ́mɔ́ fonáalú).”

¹²No á dɛ́ɛ́ná mɔtɔ mɔ́ɔnyɔ goŋaá a dɛ gɔnɔ́ go óhiginyo isée ɛ́na nnyeedíi.

¹³Nɔ́ɔnɔ no fúgune nogálɔ ná Asaŋa, no nó hɛŋa na caŋa sá biisée bɛ́nyɔ́ sɛ́ɛsɛ no húunenyemú, no gɔnɔ ŋanana gɛcɛcá gá moóma aŋa gɛ́ɛgɔ nɔ́ɔnɔ.»

¹⁴Gɔ́ɔ Yésusu a gɔnɔmɔ́ dɔ́ŋɛnɔ gitúu gá batɔ a amɔ́ gáábɔ́ a amɔ́: «Mbódólígínyóomú nɔnɔ biimée, no gunde no ɔ́bɔ.

¹⁵Boóma bá go íŋene naá nnyɔ́dɔ ya mɔtɔ bó mo ága biílo naá oŋgíso yá Asaŋa bó do báá. Kanɛ́ bɔ́ɔbɔ bó húmenemú naá gadɛ́ɛ gá mɔtɔ bɔ́ bó mo áganamɔ́ biílo. [

¹⁶Aáŋa no bɛanana edúu, no ɔ́bɔ boóma moánɛ bese!»]

¹⁷Aŋa Yésusu a mbaá yáŋɛ́mɛ́dɛ́ná gitúu gá batɔ a bɛ́ɛ́ ɛ́dá go íŋene naá nnyaŋá, behúúní bɛ́hɛ́ go mo úhune goŋaá a bó falonɛna ncaba yɛ́ɛyɔ.

¹⁸Yésusu go bó oyana a amɔ́: «Bɛɛnyɔ́ɔ no lɛ́ tɔ́nɔ kanɛ nciŋí o? No do bósó go íyimene goŋaá boóma bá go ɛ́da go úle naá hanyɔ́ bó íŋene naá gadɛ́ɛ gá mɔtɔ bó gunde bó mo ága biílo naá oŋgíso yá Asaŋa bó do báá hɔ́ɔ o?

¹⁹Mammana, boóma moánɛ bó do íŋénénée naá mɔ́ odɛ́má, kanɛ́ bó ɛ́danamɔ́ naá ɛsɔdɔ bó gunde bó húme bó ɛ́da naá gɛbɛ́lábɛ́lá. Yésusu a mba lɛ́ o oya naá dogálɔ dɔ́ɔdɔ goŋaá moóma má go nyáa muimée mó lɛ́ kanɛ biílo[44].»

²⁰Gɛ́hɛ́ go gɔnɔ bó oyana a amɔ́: «Boóma bɔ́ɔbɔ bó húmenemú naá gadɛ́ɛ gá mɔtɔ bɔ́ bó mo áganamɔ́ biílo.

²¹Mammana, naá gadɛ́ɛ gá mɔtɔ, naá odɛ́má yɛ́hɛ́ gɔ́ɔ bɛgáda bá mbééníŋínyí bɛ́ húmenemú hɔ́ɔ bɛ́ɛbɛ bɛ́ mo dómanamɔ́ goŋaá ɔ ɔyɔ gɛbɛ́ aŋa: buíbi, ŋgónana, goŋanana gá gɛdáŋa, go fídene gɛɔyɔ gá hanyɔ́, hɛagá, gɛlalaga gá odɛ́má, moliolio, gobéséesidinye go boóma bá sɔ́gɔ́ɔ, gobéségisegi, gɛɔyɔ gá mmɛndɛ́ɛ, godíeŋedieŋie gá ufíno yá sɔ́gɔ́ɔ, kanɛ nciŋí go moóma má bese.

²³Moóma mobɛ́ muimée mɔ́ɔmɔ mó húmenemú naá gadɛ́ɛ gá mɔtɔ, mó gunde mó mo ágana biílo naá oŋgíso yá Asaŋa.»

²⁴Yésusu u ú úlúkíe hɔ́ɔlɔ́, go ɛ́da naá gigísi gá cí gá tɛ́sɔnɔ ya Tíile. Gɛ́hɛ́ go íŋene naá nnyaŋá mmue, kanɛ́ a dɛ mbáá lɛ a lɛ́galɛga goŋaá mɔtɔ i íyime, akɛ́ nɔ́ɔnɔ, a dɛ mbáá lɛ ba go gɛ́ga naá nɛɔsɛgɔ.

²⁵Okɔ́dɔ ummue a mba lɛ́ a bɛanana ombóla bɛhɛ́ mɔ́ɔnyɔ gɛgáda gá giliíli gɛ́ mbaá lɛ gɛ́ mo génegenye. Gɔ́ɔ okɔ́dɔ ba ndiemi ɔ ɔ́bɔmɔ́ bá buŋe ufíno yá Yésusu. Hɔ́ɔ na hɔ́ɔ, gɛ́hɛ́ go nco gule enúu naá busío bɛ́hɛ́.

²⁶Okɔ́dɔ mɔ́ɔnyɔ a dɛ mbáá lɛ mbéní ya Beyúdene, a mbaá lɛ mbíényée ya gɛdɔŋɔ gá Fenesíi, naá gɛayá gá Silíi. Gɛ́hɛ́ go bósógolidio Yésusu goŋaá a húmie gɛgáda gá giliíli naá ombóla bɛhɛ́.

²⁷Yésusu go mo gundie a amɔ́: «Manɛ́ dɛ́ɛ́na baábayɔ́ bá nyáanya bá hóogio, goakɛ́ bó do fɛanánáa go gɔ́lɔ gɛlɛ́dɛ gá baábayɔ́ o fáa baaná bá mbóa.»

²⁸Okɔ́dɔ go oyana Yésusu a amɔ́: «Daadáa, bó lɛ́ mammana, hálá kanɛ́ baaná bá mbóa bá bédúgemú na pumbú sɛ́ɛsɛ baábayɔ́ bá belegedenyemú naá cí ya tábɛ́la.»

²⁹Yésusu a amɔ́ gá okɔ́dɔ a amɔ́: «Go busío bá kundíemú yahɔ yɛ́ɛyɔ, gundé, gɛgáda gá giliíli gɛ́ báá go húme naá ombóla bahɔ.»

³⁰Okɔ́dɔ a á gundé naá mɔ́ nnyaŋá, go gíde ombóla bɛhɛ́ naá ombɛ́dɛ́ a báa go máma pɔ́ɔ́. Gɛgáda gá giliíli gɛ́ mba ŋá gɛ́ báa go húme naá mɔ́ nnyɔ́dɔ.

³¹Gɔ́ɔ Yésusu u úlukiemú naá tɛ́sɔnɔ ya Tíile, a báá dómbá naá tɛ́sɔnɔ ya Sídono, a báá bácaá gigísi gá cí gá Tɛ́sɔnɔ sɛ́ɔ́dɔ́ go go nco gundine gɛayá gá máŋɛ́ má Gelilée.

³²Batɔ go mo úline na gɛndɔ́kɔ́ɔ gá mɔtɔ, gɛ́ gɔnɔ́ gɛ́ dɛ gálágáláa bese. Bá báá lɛ gó bósógolidio Yésusu goŋaá a mo dála ɛmbɔ́gɔ e éŋuge.

³³Yésusu go gɔ́lɔ mɔtɔ mɔ́ɔnyɔ naá bɔ́ɔ báandɛ́, go yáŋɛmɛdɛna gitúu gá batɔ. Yésusu go mo sɔgɔlɛdɔ edúu na monɔɔ́nnɔɔ́, a báá cábɛ́dá bɛdɛ́, go báláfɛna gɛlɛ́mbɛ gá mɔtɔ moánɛ na bɛ́.

³⁴Gɛ́hɛ́ go fediginye busío go mmoɛná a báá hélúmídé. Gɔ́ɔ a gálɛdamɔ́ mɔtɔ a amɔ́: «Ɛfáta[45]», nɔ́ɔnɔ gó lɛ́ aá «bébuunéemú.»

³⁵Hɔ́ɔ na hɔ́ɔ, edúu yá mɔtɔ go dómba go buunuge, gɛlɛ́mbɛ gɛ́hɛ́ gɛ́ báá béfulúné tɔ́nɔ, go dúme go gálagala kanɛ gɛdɔmbɔ.

³⁶Yésusu go lɔsɛnɔ batɔ biimée goŋaá bá dɛ hóámá bá dɛ bó oyɛ́dá go mɔtɔ. Kanɛ́ akɛ́ aŋa a mbaá lɛ a bó lɔsɛnɔnɔ nɔ́ɔnɔ, bɔ́ɔ bé élinenye na go oya boóma moánɛ.

³⁷Batɔ bá mba lɛ́ na gobékúke makɔ́nɔ́, bá gálagala bá amɔ́: «Buimée bɔ́ɔbɔ a ŋananamɔ́ bó lɛ́ goana bese á bese, a ŋanana goŋaá bɛndɔ́kɔ́ɔ bɛ́ ɔ́bɔnɔ, bimmúke bɛ́ gálagala.»