Read Nugunu Mélékusu 8 Bible Online

Mélékusu 8 - Nugunu bible

Mélékusu 8

¹Naá medúgú moánɛ méení, gɛcɛcá gá batɔ gɛ́ mba gɔnɔ́ bábándɛgɛna naá boayá bá Yésusu. Aŋa bá mbaá lɛ kanɛ gɔnɔ́ boóma bá go nyáa, gɛ́hɛ́ go dɔ́ŋɛnɔ behúúní bɛ́hɛ́ a amɔ́ gáábɔ́ a amɔ́:

²«Ŋgɛ́nana gɛcɛcá gá batɔ gɛ́ɛgɛ mahana, goakɛ́ medúgú mádadɔ́ mámáa bá lɔ́mɔ́ namɛ, bá dɛ bɛanánáa boóma bá go nyáa.

³Caá mbó gúlugie na ncaná, bá gaá yɛ́mɛ́lɛ́dá go pɛ́ na yɛ́, goakɛ́ gɛca gɛ́ lɛ́ naá olɔŋɔ yábɔ́ gɛ́ɛgɛ gɛ́ mbɛɛ́ ɛ́dá fadɛgana halaháláa.»

⁴Behúúní bɛ́hɛ́ go mo úhune bá amɔ́: «Bɛɛcɔ́ɔ bábáa halaháláa na gɛdɔŋɔ. Dɛ gaá ná gɔ́lɔ́ manyáanya má ŋaá má háa go go dúge batɔ biimée báaba áhanɛ́ɛ o?»

⁵Yésusu go bó úhune a amɔ́: «No lɛ́ na bɛlɛ́dɛ bínikíi hɔ́ɔlɔ́ o?» Behúúní go mo gundie bá amɔ́: «Bɛ́ lɛ́ bɛ́táanɔ na bɛ́andɛ́.»

⁶Gɔ́ɔ o oyanamɔ́ batɔ goŋaá bá lukumenene go cí. Gɛ́hɛ́ go gɔ́lɔ bɛlɛ́dɛ bɛ́táanɔ na bɛ́andɛ́ bɛ́ɛbɔ a báá béhiigí Asaŋa, a báá bɛ́ gɛ́sáa, i íŋenene behúúní bɛ́hɛ́ goŋaá bá abana mɔtɔ uŋkimée. Kɔ́ɔ bá mbaá abánáa batɔ.

⁷Bá mba lɛ́ tɔ́nɔ na baaná bá moɔbɔ́ sɔŋɛ. Yésusu go gɔnɔ béhiigi Asaŋa, a bíí íŋéné behúúní bɛ́hɛ́ moɔbɔ́ mɔ́ɔmɔ goŋaá bá abana batɔ biimée.

⁸Batɔ go nyáanya bá báá hóógío. Bá báá gɔ́lɔ́ bigísi bá bɛlɛ́dɛ bɛ́ɛbɛ bɛ́ mbaá síénénée, bá báá gundé na bɛ́; bɛ́ mba lɛ́ bɛ́ hóogono ncada ɛ́táanɔ na ɛ́handɛ́.

⁹Batɔ bɔ́ɔbɔ bá mba lɛ́ ombanɔ yá go héme batɔ tɔ́sɛnɔ ínni. Naá nnyimé ya manyáanya Yésusu go gúlugie gitúu gá batɔ gɛ́ɛgɔ.

¹⁰Mɔ́ɔ go dómba go bólɛga naá gilué olɔŋɔ na behúúní bɛ́hɛ́, gáábɔ́ go ɛ́da naá gɛdɔŋɔ gá Dalamanóta[46].

¹¹Gɔ́ɔ Befelisiéŋe bú úlemú bá báá bolá, gáábɔ́ go bayɛga cuŋí na Yésusu; aŋa bá mbaá lɛ bá maamana go mo dámbɛna, gáábɔ́ go mo úhune goŋaá a ŋa gieninye gá gobékúke gɛ́ɛgɛ gɛ́ dúfenyemú goŋaá ɛ ɛ́damɔ́ go úlene naá Asaŋa.

¹²Yésusu a á hélúmídé makɔ́nɔ́, go gálɛda a amɔ́: «Goakɛ́ batɔ bá ínoni báaba bú úhenemú gieninye gá gobékúke? Mammana, ŋgaá nyó oyáná caá, bá dɛ ná bɛa gieninye gá gobékúke akɛ́ gímmue.»

¹³Gɔ́ɔ a dómbamɔ́ go bó síe hɔ́ɔlɔ́, go bólɛga gɔnɔ́ naá gilué na behúúní bɛ́hɛ́ go go ɛ́da naá cɔ́lɔ yɛ́ɛyɛ intió.

¹⁴Behúúní bá Yésusu bá mba lɛ́ bófoolíolú go gɔ́lɔ bɛlɛ́dɛ, goana táŋɛ́ gímmue gɛ́ɛgɛ bá mbaá lɔmɔ́ na gɛ́ naá gilué.

¹⁵Yésusu go bó lɔsɛnɔ a amɔ́: «Bébeŋéemú nɔnɔ bese na ondɔ yá go fudugenye uguŋe yá Befelisiéŋe na yɔ́ɔyɔ yá ufuŋe Elóode.»

¹⁶Gɔ́ɔ behúúní bɛ́hɛ́ bɛ́ ɛ́damɔ́ go bágálɛnagalɛna go dogálɔ dá Yésusu goakɛ́ bá dɛ mbáa lɛ na bɛlɛ́dɛ.

¹⁷Yésusu go lɛnca boóma bɔ́ɔbɔ bá mbaá lɔmɔ́ bá bágálɛnagalɛna, go bó úhune a amɔ́: «No gá lɛ́ no do ɔ́bɔ́ lí no gá lɛ́ kanɛ go gumbene naá odóɛ o? Nciŋí yɛnyɔ́ ɛ gá lɛ́ ɛ dɛ bébuuné lí?

¹⁸No bɛanana oŋgíso yá kanɛ go ɛ́nana lí, no bɛananamɔ́ edúu yá kanɛ go ɔ́bɔnɔ[47] o? No do gɔnɔ́ béeniŋenye tɔ́nɔ lí?

¹⁹Gɛcamɛna gɛ́ɛgɛ mmbaá gɛ́sáa bɛlɛ́dɛ bɛ́táanɔ go go abana batɔ batɔ́sɛnɔ bátáanɔ, no mba lɛ́ hóógíolú ncada ínikí sá bigísi bá bɛlɛ́dɛ sɛ́ɛsɛ no mbaá gúlúgé na sɛ́ o?» Gáábɔ́ go mo gundie bá amɔ́: «Ncada sɛ́ɔ́dɔ́ na ɛ́handɛ́.»

²⁰«Caŋa táŋɛ́ mmue gɔ́ɔgɔ mmbaá gɛ́sáa bɛlɛ́dɛ bɛ́táanɔ na bɛ́andɛ́ go go abana batɔ batɔ́sɛnɔ bénni, no mba lɛ́ hóógío ncada sá bigísi bá bɛlɛ́dɛ ínikí sɛ́ɛsɛ no mbaá gúlúgé na sɛ́ o?» Gáábɔ́ go mo gundie bá amɔ́: «Ncada ɛ́táanɔ na ɛ́handɛ́.»

²¹Yésusu go gɔnɔ bó oyana a amɔ́: «Akɛ́ nɔ́ɔnɔ no gá lɛ́ no do ɔ́bɔ́ lí?»

²²Gɔ́ɔ Yésusu na behúúní bá bolamɔ́ naá tɛ́sɔnɔ ya Bɛcayɛ́da, batɔ go úle na ugélígeli naá boayá bá Yésusu bá báá mo bósógólídío goŋaá a mo báláfɛna.

²³Yésusu go gɔ́lɔ ugélígeli go ombɔ́gɔ, go húme nɛhɛ́ naá gɛdɔŋɔ gɛ́ɛgɔ. Gɛ́hɛ́ go cábɛda bɛdɛ́ a báá mo ágá go oŋgíso, a báá mo dálá ɛmbɔ́gɔ, a báá lɛ gó mo úhune a amɔ́: «Go ɛ́nana boóma lí?»

²⁴Ugélígeli a á fuuné oŋgíso go oyɛda a amɔ́: «Ŋgɛ́nana batɔ, bá lɛ́ aŋa mɛɛ́tɛ, kanɛ́ bɛ́ ɛnda.»

²⁵Yésusu go gɔnɔ mo dála ɛmbɔ́gɔ go oŋgíso, mɔtɔ go bayɛga go ɛ́nana bese bese, bigélí bɛ́hɛ́ bɛ́ báá maná, a bɛ́ɛ́ ɛ́dá go ɛ́nana moóma muimée aŋa mó lɔ́mɔ́.

²⁶Yésusu go mo gúlugie a báá mo oyáná a amɔ́: «Dómbáná goana go tómbana naá mamɔ́ nnyaŋá, o do bédúfíe go gɛdɔŋɔ.»

²⁷Gɔ́ɔ Yésusu ɛ ɛ́damɔ́ olɔŋɔ na behúúní naá bɛdɔŋɔ bɛ́ɛbɛ bɛ́ lɔ́mɔ́ mekúígíi na Sɛsalɛ́ɛ ba Fílibi[48]. Go pɛ́ hɔ́ɔlɔ́, gɛ́hɛ́ go bó úhune a amɔ́: «Batɔ bó oyamɔ́ bá amɔ́ ndɔ́mɔ́ ánɛ́ɛ o?»

²⁸Bá báá lɛ gó mo gundie bá amɔ́: «Batɔ bó oya bá amɔ́ o lɔ́mɔ́ Sáŋa Begiyuminye; bóncodío bá amɔ́ o lɔ́mɔ́ Elíi; bóncodío gɔnɔ́ bá amɔ́ o lɔ́mɔ́ mbúsí ya Asaŋa mmue.»

²⁹Kɔ́ɔ a bó úhunemú a amɔ́: «Kanɛ́ bɛɛnyɔ́ɔ, no oyamɔ́ no amɔ́ ndɔ́mɔ́ ánɛ́ɛ o?» Píele a á gɔ́lɔ́ dogálɔ, go mo gundie a amɔ́: «O lɔ́mɔ́ Kilítusu.»

³⁰Gɛ́hɛ́ go bó lɔsɛnɔ na mbébégidine goŋaá bá dɛ hóámá bá dɛ oyáná mɔtɔ ánɛ́ɛ a lɔ́mɔ́.

³¹Gɔ́ɔ Yésusu a bayɛgamɔ́ go húunenye behúúní bɛ́hɛ́, a bó oyanɛna a amɔ́: «Gó háanana goŋaá Moɔnɔ́ ba mɔtɔ a lumene na gɛɔ́bɛgɔ makɔ́nɔ́; bafɛanɔ́ɔ bá gɛdɔŋɔ, bagɔ́nɔ́ɔ bá bedúmbí bɛbáágá naá Asaŋa na muloodio má gicele bá mo umbe, batɔ bá mo óna, kanɛ́ naá nnyimé ya medúgú mádadɔ́, a fúfuge.»

³²A mba lɛ́ a bó oyanɛna moóma mɔ́ɔmɔ daŋɛ́daŋɛ. Píele go mo gɔ́gɛdɔ go boayá, go ɛ́da go mo goomanɛna a amɔ́ caá akɛ́ nɔ́ɔnɔ.

³³Yésusu a á bábondóná, a núune behúúní bɛ́hɛ́, go áncana Píele a amɔ́: «Tɔ́ŋɔ́mɛ́dɛ́náamɔ́ háalá! Sátana, ɛ́dá naá yɔmɔ́ nnyimé! O lɛ́ gikumí naá pɛ́ yamɛ ya bosɔ́mɔ. Mammana, mbééníŋínyí sáhɔ sɛ́ dɛ bósó sá Asaŋa, sɛ́ lɔ́mɔ́ sá batɔ.»

³⁴Yésusu go dɔ́ŋɛnɔ gitúu gá batɔ olɔŋɔ na behúúní go bó oyana amɔ́: «Aáŋa mɔtɔ a lɛ́galɛga go mbiene, ŋgáa a dɔmbɔ go ɔyɔ go gɛ́hɛ́ gá moatɛ́, a kélemene bɛdɔmbɔ, a lɛ go mbiene.

³⁵Mammana, mɔtɔ mɔ́ɔnyɔ a lɛ́galɛgamɔ́ go sódio gɛɔyɔ gɛ́hɛ́ a ná gɛ́ yímie; kanɛ́ mɔ́ɔnyɔ a ŋgaá yímíe gɛɔyɔ gɛ́hɛ́ go busío bámɛ gɔnɔ́ go busío bá Gɛnɔ́gɔ́ gá Cɔ́mɔ a ŋga gɛ́ sódío.

³⁶Mɔtɔ a amɔ́ a bóda cí iŋkimée, a soa obɔ moánɛ na gɛɔyɔ gɛ́hɛ́, kasɛ́á besé a lɔ́mɔ́ ba go dáŋaba o?

³⁷Boóma bó lɛ́ hɔ́ɔ bɔ́ɔbɔ mɔtɔ a lɔ́mɔ́ ba go íŋene go go fáŋa gɛɔyɔ gɛ́hɛ́ o?

³⁸Mammana, mɔtɔ a amɔ́ a nóanana odóɛ namɛ gɔnɔ́ na dogálɔ dámɛ naá tɛ́mádɛ́má ya batɔ bá ínoni báaba bá fíidenyemú Asaŋa nnyimé bá gɔnɔ lɔgɔ makɔ́nɔ́, Moɔnɔ́ ba mɔtɔ a ŋga mo nóɛ́ná tɔ́nɔ odóɛ gɔ́ɔgɔ a ŋguú úlé naá nigúmi ná Asaŋa Isée na bimmúmpúu bá bɛɛ́ŋgɛlɛsɛ.»