Read Nugunu Mélékusu 9 Bible Online

Mélékusu 9 - Nugunu bible

Mélékusu 9

¹Yésusu go gɔnɔ bó oyana a amɔ́: «Mammana, ŋgaá nyó oyáná caá, batɔ bóntió naá báaba bá lɔ́mɔ́ háalá, bá dɛ ŋgá gúenene kanɛ goŋaá bɛ́ ɛ́ ɛ́ná Bufuŋe bá Asaŋa bó úlene na bogaaga.»

²Naá nnyimé ya medúgú mátáanɔ na búmmue, Yésusu go gɔ́lɔ Píele, Sáakɛ na Sáŋa, go yáŋɛmɛda nabɔ́ bákáa naá giyéŋéŋkée gá ogɔndɔ. Yésusu go dómba go bénúgie naá oŋgíso yábɔ́.

³Bɛla bɛ́hɛ́ bɛ́ báá gundé begibegi, bɛ́ púmene mbɔ́dɔ yɛ́ɛyɛ mɔtɔ naá cí a lɔ́mɔ́ a dɛ bɛ́ɛ́mbá ba go púmenye[49].

⁴Behúúní bá bádadɔ́ go nco teme Mɔ́sɛsɛ na Elíi bá báá go basa; bó oya ŋkanɔ́ na Yésusu.

⁵Píele go gɔ́lɔ kanɛ́ dogálɔ go oyana Yésusu a amɔ́: «Iloodio, bó lɛ́ bese goŋaá dɛ bɛ́ɛmba háalá; ŋgáa dɛ dábɛga bincumu bɛ́dadɔ́: gáhɔ gímmue, gá Mɔ́sɛsɛ gímmue, gá Elíi gímmue.»

⁶Moatɛ́ a dɛ mbáa lɛ íyimene boóma bá go oyɛda, mammana, mɔ́ɔ moatɛ́ na behúúní báaba bóncodío bá mba lɛ́ na mayayɔ́ makɔ́nɔ́.

⁷Nogálámbá go úle nó báá bó boɛgɛ́ná, ukelú go dónogoga naá nogálámbá yó amɔ́: «Mɔ́ɔnyɔ mɔ́ɔ a lɔ́mɔ́ Moɔnɔ́ bamɛ ba odɛ́má. Mo bódólónyóomú nɔnɔ.»

⁸Hɔ́ɔ na hɔ́ɔ behúúní go ɛ́da go egelegele, bá dɛ gɔnɔ́ go ɛ́na mɔtɔ uncodío, goana Yésusu mɔ́ɔnyɔ bá mbaá lɛ nɛhɛ́.

⁹Aŋa bá mbaá ŋá bá ná lɛ́ go siisene ogɔndɔ, Yésusu go bó lege goŋaá bá dɛ hóámá bá dɛ oyáná mɔtɔ boóma bɔ́ɔbɔ bá mbɛɛ́ ɛ́ná gó ɛ́da héme aŋa Moɔnɔ́ ba mɔtɔ a ŋgaá fúfúgé naá kadɛ́gadɛ́ɛ ya begúe.

¹⁰Gáábɔ́ go bɛ́dɛgɛna gɛlɔsɛnɔ gá Yésusu gɛ́ɛgɔ, bɛ́ ɛ́da bá búúheninene bá amɔ́: «Ɛkádɛ gɛ́ lɔ́mɔ́ gofúfuge gɔ́ɔgɔ naá kadɛ́gadɛ́ɛ ya begúe o?»

¹¹Behúúní go mo úhune bá amɔ́: «Goakɛ́ muloodio má gicele mó oyamɔ́ mó amɔ́ Elíi a háanana go manɛ go úle[50] o?»

¹²Gɛ́hɛ́ go bó gundie a amɔ́: «Kanɛ cuŋíi, Elíi a háanana go manɛ go úle, a díliminye buimée. Kanɛ́ goakɛ́ Ŋgɔ́ŋɛ́ sɛ́ oyamɔ́ goŋaá Moɔnɔ́ ba mɔtɔ a ná lumenene na bɛdɔmbɔ makɔ́nɔ́, bá mo fánɛnafanɛna[51] o?

¹³Kanɛ́ ŋgaá nyó oyáná mammana caá: Elíi a báá go úle, batɔ bá báá ŋaáa buimée bɔ́ɔbɔ bá mbaá lɛ́gálɛ́gáa go ŋa nɛhɛ́, gɔgɔ́ aŋa Ŋgɔ́ŋɛ́ sɛ́ oyamɔ́ go busío bɛ́hɛ́.»

¹⁴Gɔ́ɔ Yésusu olɔŋɔ na behúúní bɛ́hɛ́ báaba a mbaá bɔ́gɔ́gɛ́dɔ́ nabɔ́ bá mbaá bolá mekúígíi na behúúní báaba bóncodío, gáábɔ́ go ɛ́na gitúu gá batɔ gɛ́ báa go bó ágɛna gieŋí, muloodio má gicele mó suŋe na behúúní bɔ́ɔbɔ.

¹⁵Aŋa gitúu gá batɔ gɛ́ɛgɔ gɛ́ mbaá gundíe oŋgíso gɛ́ bɛ́ɛ́ ɛ́ná Yésusu, bá báá békúkée makɔ́nɔ́, bá báá kúlúgúgé go go mo bédíigie.

¹⁶Yésusu go úhune behúúní a amɔ́: «No suŋemú ɛkádɛ nabɔ́ o?»

¹⁷Mɔtɔ naá gitúu go mo gundie a amɔ́: «Iloodio, mbúu úle na ohaŋa bamɛ naá maamɔ́ɔ; a lɛ́ na gɛgáda gá giliíli gɛ́ɛgɛ gɛ́ mo legenemú go gálɛda.

¹⁸Hoóma hiimée háaha gɛ́ mo gumbenemú, gɛ́ mo góba go cí, ɛ ɛ́da go émenye mbúcú, a banda bigélédé, a dómba go canagaga; mbóo oyana behúúní báhɔ goŋaá bá gúne gɛgáda gá giliíli moánɛ, gɛ́ báá bó yágɛ́gɛ́ná.»

¹⁹Yésusu go gɔ́lɔ dogálɔ go bó oyana a amɔ́: «Ogɛlɛ yá edúu bɛlɔ́kɔ́, nná bɛ́ɛmba nɛnyɔ́ gó ɛ́da héme nikíníi o? Nná nyó bénúmitenye gó ɛ́da héme nikíníi o? Ŋgúlénéemú nɔnɔ nɛhɛ́ háalá.»

²⁰Gɔ́ɔ bú úlemú nɛhɛ́ naá boayá bá Yésusu. Aŋa gɛgáda gá giliíli gɛ́ɛgɔ gɛ́ mbɛɛ́ ɛ́ná Yésusu, gá gɛ́ go búgulidie moádɔmbɔ́ na bogaaga, a bóó obá go cí, a bébígisenye, a húmenye mbúcú.

²¹Yésusu go úhune isée ba moádɔmbɔ́ a amɔ́: «Bɛcamɛna bínikíi gɔ́ɔ bó mo ŋananamɔ́ náana o?» Isée a amɔ́: «Gó bayɛga na boábayɔ́ bɛ́hɛ́.

²²Gɛcamɛna gíntió, gɛgáda gá giliíli gɛ́ lɛ́ go bɛ́ɛmba gɛ́ mo nɔɔ naá íyuke ɛ́na akɛ́ naá miimpo go go mo óna. Kanɛ́ aáŋa o lɛ́ ba goŋaá o ŋa boóma, có óhígínyóomú go mahana máhɔ go busío bɛ́cɔ́.»

²³Yésusu go mo gundie a amɔ́: «O gálagalamɔ́ go amɔ́: Aáŋa o lɛ́ ba go ŋa boóma! Boóma bó do bósó hɔ́ɔ bá go suge mɔtɔ mɔ́ɔnyɔ a áganamɔ́ odɛ́má yɛ́hɛ́ naá Asaŋa.»

²⁴Hɔ́ɔ na hɔ́ɔ, isée ba moádɔmbɔ́ go áncɛda ukelú naá mmoɛná a amɔ́: «Ŋgágana odɛ́má naá Asaŋa! Ŋgóhígínyóomú goakɛ́ cɛ latɛ́nánáa go ágana odɛ́má.»

²⁵Yésusu ɛ ɛ́nana gitúu gá batɔ gɛ́ béhunde naá boayá bábɔ́, gɛ́hɛ́ go áncɛdɛna gɛgáda gá giliíli a amɔ́: «Gɛbɛ́ gá giliíli gɛ́ɛgɛ gɛ́ legenemú mɔtɔ go gálɛda, ɛ́na lí go ɔ́bɔnɔ, ŋgaá go oyáná caá, húmé naá moádɔmbɔ́ mɔ́ɔnyɔ, o do gɔnɔ́ nco gunde akɛ́ gɔnɔ́ go buisí bá búmmue.»

²⁶Gɛbɛ́ gá giliíli go ága kóokóo, gɛ́ báá búgúlídíe moádɔmbɔ́ na bogaaga, gá gɛ́ go húme. Moádɔmbɔ́ go lɔbɛnɔ aŋa a lɛ́ ugúe; bɛ́ ɛ́nana nɔ́ɔnɔ, naá gitúu gá batɔ, gɛca gɛ́ mba lɛ́ gɛ́ oya gɛ́ amɔ́: «A á manɛ́ná.»

²⁷Kanɛ́ Yésusu go mo gɔ́lɔ go ombɔ́gɔ, a báá mo fedígínyée, moádɔmbɔ́ a báá dɛ́lɛ́mɛ́ná tɛ́nɛ́ɛ dagadaga.

²⁸Aŋa Yésusu a mbɛɛ́ ɛ́dá naá nnyaŋá, bá ná lɛ́ bɔ́ɔ na bɔ́ɔ, behúúní bɛ́hɛ́ bá báá lɛ gó mo úhune bá amɔ́: «Ɛkádɛ́ gɛ́ báá ná có legé bɛɛcɔ́ɔ go gúne gɛgáda gá giliíli gɛ́ɛgɛ o?»

²⁹Yésusu go bó gundie a amɔ́: «Mbɔ́dɔ ya gɛgáda gá giliíli aŋa yɛ́ɛyɛ náana bá yɛ gúnemú goana na mbósógólí.»

³⁰Gɔ́ɔ Yésusu na behúúní bɛ́hɛ́ bú úlukiemú hɔ́ɔlɔ́, gáábɔ́ go báca gɛdɔŋɔ gá Gelilée. A dɛ mbáa lɛ a lɛ́galɛga goŋaá mɔtɔ i íyime anáa a mbaá lɔmɔ́.

³¹Mammana, a mba lɛ́ a húunenye behúúní bɛ́hɛ́ a amɔ́: «Bá ná dúe Moɔnɔ́ ba mɔtɔ go ɛmbɔ́gɔ ya batɔ; bá ná mo óna, aŋa bá ná ŋamɔ́ bá báá go mo óna, a lɛ go fúfuge naá nnyimé ya medúgú mádadɔ́.»

³²Kanɛ́ behúúní bá dɛ mbɔ́ ɔ́bɔ nogálɔ nɔ́ɔnɔ naá cí, bá báá dííné go mo úhune boóma.

³³Gɔ́ɔ bá ncomɔ́ gunde na nnyimé naá Kapɛlɛnahɔ́mɛ. Aŋa bá mbií íŋéné naá ncíbo, Yésusu go úhune behúúní a amɔ́: «No úlemú no suŋene suŋene ɛkádɛ go pɛ́ o?»

³⁴Gɔ́ɔ bá gúdumidenemú pɔ́ɔ́, goakɛ́ naá pɛ́, bá mba lɛ́ bá suŋene suŋene go go íyime ánɛ́ɛ a lɔ́mɔ́ gɛkɔ́nɔ́nɔ́ɔ a dómba basɔ́gɔ́ɔ.

³⁵Aŋa Yésusu a mbaá lukúméné, gɛ́hɛ́ go dɔ́ŋɛnɔ Bɛɔdɔ́ɔ na bɛ́andɛ́ bá behúúní go bó oyana a amɔ́: «Aáŋa mɔtɔ a lɛ́galɛga go bɛ́ɛmba mɔtɔ ba busío, a háanana go bɛ́ɛmba ba mesúgudinye go batɔ biimée, a gunde a bɛ́ɛmba uyogóní ba biimée.»

³⁶Kɔ́ɔ a gɔ́lɔmɔ́ moádɔmbɔ́ ummue go mo díliminye naá kadɛ́gadɛ́ɛ yabɔ́, a báá mo bɔ́lɔ́lɛ́gɛ́nɔ́, go bó oyana a amɔ́:

³⁷«Mɔ́ɔnyɔ a gɛ́ndɛgɛnamɔ́ moádɔmbɔ́ aŋa mɔ́ɔnyɔ go busío bámɛ, a kɛ́ndɛgɛnamɔ́ yɔmɔ́ɔ moatɛ́, gɔnɔ́ mɔ́ɔnyɔ a kɛ́ndɛgɛnamɔ́; a dɛ bósó yɔmɔ́ɔ mɔ́ɔ a kɛ́ndɛgɛnamɔ́, a gɛ́ndɛgɛnamɔ́ Mɔ́ɔnyɔ a lɔ́mɔ́ tómáalú.»

³⁸Sáŋa go oyana Yésusu a amɔ́: «Iloodio, dɛ bɛ́ɛ ɛ́na mɔtɔ mɔ́ɔnyɔ a lɔ́mɔ́ a dɛ bɛ́ɛ́mbá nɛcɔ́ a gúne bɛgáda bá biliíli a buŋe ufíno yáhɔ. Dɛ báá ŋá dɛ amɔ́ dɛ mo lege.»

³⁹Kanɛ́ Yésusu go oyɛda a amɔ́: «No do mo legé: mɔtɔ a dɛ bósó ba go ŋa gɛsɛɔ a buŋe ufíno yámɛ, hɔ́ɔ na hɔ́ɔ ɛ ɛ́da go kálagala go dobɛ́.

⁴⁰Mammana, mɔ́ɔnyɔ a lɔ́mɔ́ a dɛ có nuigényée a lɛ́ nnyimé yɛcɔ́.

⁴¹Mɔtɔ mɔ́ɔnyɔ a ŋgaá nyó fáá miimpo go go ɔ́bɔnɛnɔ gɛ́nyɔ́ na Kilítusu, mammana, ŋgaá nyó oyáná caá: a dɛ ŋgá yímie bɛsoɛná bɛ́hɛ́.

⁴²«Uŋkimée mɔ́ɔnyɔ a ŋamɔ́ goŋaá ummue táŋɛ́ naá baábayɔ́ báaba bá áganamɔ́ odɛ́má yábɔ́ naá yɔmɔ́ɔ o obɛna naá gɛlɔgɔ, bó lɛ́ bese nɛhɛ́ bá mo gódana go ukelú gɛantá gá ɛdánɛ́ ná go gola, bá mo nɔɔ naá máŋɛ́.

⁴³Aáŋa ombɔ́gɔ yáhɔ yó go dómana goŋaá o lɔgɔ, yó sómbáamɔ́; bó lɛ́ bese go busío báhɔ o bɛa gɛɔyɔ gá kanɛ mesúge na ombɔ́gɔ yúmmue, gó dómba aŋa o lɔ́mɔ́ ba go ɛ́da naá gɛbɔlɔ́gɔdɔ gá íyuke há kanɛ go fúenene na ɛmbɔ́gɔ yahɔ iŋkimée ɛhandɛ́. [

⁴⁴Naá hoóma moánɛ, ŋkibi sɛ́ɛsɛ sɛ́ bogodonyomú nnyɔ́dɔ sɛ́ dɛ gúénénée, íyuke hɛ́ dɛ fúénénée hɔ́ɔ.]

⁴⁵Aáŋa gɛgɔ́ndɔ́ gáhɔ gɛ́ go dómana goŋaá o lɔgɔ, gɛ́ sómbáamɔ́; bó lɛ́ bese go busío báhɔ goŋaá o bɛa gɛɔyɔ gá kanɛ mesúge na gɛgɔ́ndɔ́ gímmue, gó dómba aŋa o lɔ́mɔ́ ba go ɛ́da naá gɛbɔlɔ́gɔdɔ gá íyuke há kanɛ go fúenene na bɛgɔ́ndɔ́ báhɔ biimée bɛ́andɛ́. [

⁴⁶Naá hoóma moánɛ, ŋkibi sɛ́ɛsɛ sɛ́ bogodonyomú nnyɔ́dɔ sɛ́ dɛ gúénénée, íyuke hɛ́ dɛ fúénénée hɔ́ɔ.]

⁴⁷Aáŋa niíso náhɔ nɛ́ go dómana goŋaá o lɔgɔ, nɛ́ báláamɔ́ o nɛ́ umbe halaháláa nahɔ; bó lɛ́ bese go busío báhɔ goŋaá go íŋene naá Bufuŋe bá Asaŋa na gigélí, bó dómba goŋaá bá go nɔɔ naá gɛbɔlɔ́gɔdɔ gá íyuke há kanɛ go fúenene na oŋgíso yáhɔ eŋkimée,

⁴⁸anáa ŋkibi sɛ́ lɔ́mɔ́ sɛ́ dɛ gúénénée, íyuke hɛ́ dɛ fúénénée[52].

⁴⁹Bá ŋga ágɛ́ná mɔtɔ uŋkimée íyuke naá nnyɔ́dɔ go go mo sogona[53].

⁵⁰Masɛgɛ má lɛ́ gɛnɔ́gɔ́ gá boóma, kanɛ́ má amɔ́ má sola, bá lɔ́mɔ́ bá go gɔnɔ má simidie nakɛ́ɛ o? Bɛáa nɔnɔ masɛgɛ naá bɛɛnyɔ́ɔ moatɛ́ moatɛ, no ɔyɔ naá buumbénú bɛɛnyɔ́ɔ na bɛɛnyɔ́ɔ.»