Read Nugunu Lókasɛ 10 Bible Online

Lókasɛ 10 - Nugunu bible

Lókasɛ 10

¹Naá nnyimé hɔ́ɔlɔ́, gɔ́ɔ Daadáa a gɔnɔmɔ́ go iyide behúúní bóncodío otíno ádadɔ́ na bɔ́ɔ́dɔ́ na báandɛ́[70], a báá bó dúényée báandɛ́ báandɛ́ naá tɛ́sɔnɔ iŋkimée na naá hoóma hiimée háaha mɔ́ɔ moatɛ́ moatɛ a mbaá lɛ ba go ɛ́da hɔ́ɔ.

²Gɛ́hɛ́ go bó oyana a amɔ́: «Masáŋa má lɛ́ degédegé, kanɛ́ boyogóní bá lɛ́ sɔŋɛ. Bósógólónyóomú nɔnɔ kanɛ́ Moatɛ́ɛ ba masáŋa a dóma boyogóní naá mɔ́ masáŋa.

³Ɛ́dá nɔnɔ! Ŋgaá nyó dómá aŋa baaná bá bɛdómbáa naá tɛ́mádɛ́má ya ŋkɔ.

⁴No do ɛ́dá na muinyí, akɛ́ gɛgada, akɛ́ nnaadɛna, no do dɛ́lɛ́mɛ́ná go pɛ́ go go bédíigie mɔtɔ.

⁵Nnyaŋá iŋkimée yɛ́ɛyɛ no ná ŋamɔ́ no íŋene kɔ́ɔ, no dóana go oyɛda no amɔ́: “Buumbénú bó bɛ́ɛmba na batɔ bá nnyaŋá yɛ́ɛyɛ”.

⁶Aáŋa mɔtɔ ba buumbénú a lɛ́ naá nnyaŋá yɛ́ɛyɔ, buumbénú bɛ́nyɔ́ bó gaá lɔbɛ́nɔ́ nɛhɛ́; aáŋa mɔtɔ ba nɔ́ɔnɔ a dɛ báá hɔ́ɔ, bó nco nyó gundene.

⁷Gɛ́gáa nɔnɔ naá nnyaŋá yɛ́ɛyɔ, no nyáanana no nyóanana buimée bɔ́ɔbɔ bá nyó fáamɔ́, goakɛ́ uyogóní a sɛmɛganana na bɛsoɛná bɛ́hɛ́[71]. No do dómbá dómbáa go nnyaŋá go nnyaŋá.

⁸«Gɔ́ɔgɔ no ná ŋamɔ́ no íŋene naá tɛ́sɔnɔ mmue, anáa bá nyó gɔ́lɔ bese, nyáá nɔnɔ buimée bɔ́ɔbɔ bá nyó fáamɔ́.

⁹No éŋugenye bɔgɔnɔ́gɔnɔ biimée báaba bá lɔ́mɔ́ hɔ́ɔ, no gunde no oyana batɔ no amɔ́: “Bufuŋe bá Asaŋa bó á nyó báyɛkɛ́ná.”

¹⁰Kanɛ́ naá iŋkimée yɛ́ɛyɛ no ní íŋenemú hɔ́ɔ, bá bíí inyé go nyó gɔ́lɔ bese, hémé nɔnɔ naá bɛbala, no oyɛda no amɔ́:

¹¹“Dɛ á nyó bágóbɛ́ná akɛ́ bibúu bá tɛ́sɔnɔ yɛnyɔ́ bɛ́ɛbɛ bɛ́ lɔ́mɔ́ naá bɛcɔ́ bɛgɔ́ndɔ́, akɛ́ nɔ́ɔnɔ, íyíme nɔnɔ goŋaá Bufuŋe bá Asaŋa bó á bolá.”

¹²«Ŋgaá nyó oyáná caá: Naá buisí moánɛ bɔ́ɔbɔ, noséésényée ná tɛ́sɔnɔ yɛ́ɛyɔ nó ŋga dómbá ná Sɔdɔ́mɔ[72].

¹³Mahana makɔ́nɔ́ na bɛɛnyɔ́ɔ batɔ bá Kolasɛ́ŋɛ, mahana makɔ́nɔ́ na bɛɛnyɔ́ɔ batɔ bá Bɛcayɛ́da! Mammana, aáŋa muune máama má á ná báŋanánáa naá bɛɛnyɔ́ɔ má mba báŋanánáa naá Tíile na naá Sídono, gásɛ́ fueké batɔ bá tɛ́sɔnɔ sɛ́ɛsɔ bá mba núgíe mbɔ́dɔ yabɔ́ ya goɔyɔ, bá báágana ŋkudu go nigúe, bá fúebe madɔ́ɔ[73].

¹⁴Ɛɛ́ɛŋ, naá buisí bá Asaŋa go sómba bɛsɛnɛ, noséésényée nɛ́nyɔ́ nó ŋga dómbá ná Tíile na ná Sídono.

¹⁵Kanɛ́ maamɔ́ɔ, Kapɛlɛnahɔ́mɛ, o ŋga bɛ́ɛ́mbá búlúgíelú go ɛ́da bola naá mmoɛná lí? Akɛ́ɛ, bá ŋga go siisíe go ɛ́da súge naá begúe[74].»

¹⁶«Mɔtɔ mɔ́ɔnyɔ a nyó ɔ́bɔnɔmɔ́, a ŋgɔ́bɔnɔ; mɔ́ɔnyɔ a nyó pímidemú, a pímidemú yɔmɔ́ɔ; kanɛ́ mɔ́ɔnyɔ a pímidemú, a pímidemú mɔ́ɔnyɔ a lɔ́mɔ́ tómáalú.»

¹⁷Gɔ́ɔ behúúní otíno ádadɔ́ na bɔ́ɔ́dɔ́ na báandɛ́ báaba Yésusu a mbaá dómá bá ncomɔ́ gunde na bɛyaŋa dácɛ, go mo oyana bá amɔ́: «Daadáa, akɛ́ bɛgáda bá biliíli bɛ́ có ɔ́bɛnɔnɔ gɛcamɛna gɛ́ɛgɛ dɛ bɛ́ áncanamɔ́ go ufíno yáhɔ.»

¹⁸Mɔ́ɔ go bó gundie a amɔ́: «Mmba núúnée Sátana ɛ ɛ́da káfogana naá mmoɛná a nco go obana aŋa balányɛ.

¹⁹Ɔ́bɔ́ nɔnɔ, ndɛ́ nyó fáalú bogaaga bá go nadana nnyɔ́gɔ na ŋgɛŋá[75], na bá go mánɛgɛna bogaaga buimée bá obɛlɔ́bɛlɔ, kanɛ boóma bá go nyó ŋa.

²⁰Kanɛ́ no do békelényée goŋaá bɛgáda bá biliíli bɛ́ nyó ɔ́bɛnɔnɔ, békelényéemú nɔnɔ goŋaá ifíno yɛnyɔ́ ɛ lɛ́ ɔ́ŋɔ́ɔlú naá mmoɛná.»

²¹Naá gɛcamɛna moánɛ gɛ́ɛgɔ, Yésusu dácɛ na bɛyaŋa go bogaaga bá Gimmúmpúu gá Giliíli, go oyɛda a amɔ́: «Ko búlugenye Baaba, Daadáa ba mmoɛná na cí; goŋaá o mba dúfíe moáyayɔ́ŋgáyayɔ moóma mɔ́ɔmɔ o mbɔɔ́ ɔsɛ́gɛ́nɔ́ benciŋínciŋi na bapɛgɔpɛ́gɔ́ɔ. Ɛɛ́ɛŋ, Baaba, bó lɔ́mɔ́ báŋaáalú nɔ́ɔnɔ go ndɛ́ga yahɔ.

²²Baaba a mba ncoóo boóma buimée. Mɔtɔ a dɛ bósó ba go íyime Moɔnɔ́ aáŋa caá Isée, tɔ́nɔ, mɔtɔ a dɛ bósó ba go íyime Isée aáŋa caá Moɔnɔ́, gɔnɔ́ na batɔ báaba Moɔnɔ́ a lɛ́galɛgamɔ́ go bó mo dúfie.»

²³Kɔ́ɔ Yésusu a bábondonamɔ́ behúúní, go bó oyana a amɔ́: «Besé makɔ́nɔ́ nɛnyɔ́ báaba no ɛ́nanamɔ́ moóma mɔ́ɔmɔ!

²⁴Mammana, ŋgaá nyó oyáná daŋɛ́daŋɛ caá: gɛcɛcá gá mbúsí sá Asaŋa na mefuŋe gɛca, bá mba lɛ́gálɛ́gáa go ɛ́na bɔ́ɔbɔ no ɛ́nanamɔ́, kanɛ́ bá lɛ́ kanɛ go bó ɛ́na, bɔ́ ɔ́bɔnɔ bɔ́ɔbɔ no ɔ́bɔnɔmɔ́, kanɛ́ bá lɛ́ kanɛ go ɔ́bɔ[76].»

²⁵Gɔ́ɔ kanɛ́ iloodio há gicele hímmue hɛ́ fadɛgɛnamɔ́, goŋaá a dámbɛna Yésusu, go mo úhune a amɔ́: «Iloodio, ndɔ́mɔ́ bá go ŋa ɛkádɛ go go bɛa gɛɔyɔ gá kanɛ mesúge o?»

²⁶Yésusu go mo gundie a amɔ́: «Gó lɔ́mɔ́ ɔ́ŋɔ́ɔlú nɛɛ́nɛ naá Gicele o? Gɔ́ɔgɔ o gɛ́ banamɔ́, o gɛ́ ɔ́bɔnɔmɔ́ naá cí nɛɛ́nɛ o?»

²⁷Mɔtɔ go mo gundie a amɔ́: «O maamana Daadáa Asaŋa bahɔ na odɛ́má yáhɔ uŋkimée, na gɛɔyɔ gáhɔ giimée, na bogaaga báhɔ buimée, na mbééníŋínyí yahɔ iŋkimée, o gɔnɔ maamana sɔ́gɔ́ɔ bahɔ aŋa maamɔ́ɔ moatɛ́[77].»

²⁸Yésusu go mo oyana a amɔ́: «Go á gundíe bese. Ŋanánáa nɔ́ɔnɔ, manɛ́ o ná bɛamɔ́ gɛɔyɔ[78].»

²⁹Kanɛ́ iloodio hɛ́ɛhɔ, goŋaá á ba dúfíe a amɔ́ mɔ́ɔ a lɛ́ naá pɛ́, go úhune Yésusu a amɔ́: «Ánɛ́ɛ a lɔ́mɔ́ sɔ́gɔ́ɔ o?»

³⁰Yésusu go mo gɔ́lɛnɔ giidí gɛ́ɛgɛ a amɔ́: «Mɔtɔ ummue a mba fadɛ́gɛ́ná naá Yolósalɛmɛ go go ɛ́da naá Yelíko. Gɔ́ɔ o obamɔ́ naá ɛmbɔ́gɔ ya biíbi, bɔ́ɔbɔ go mo yeyune, bá báá mo gidée, bá báá mo síé a kɔlɔgɔgɔnɔ na nigúe.

³¹Udúmbí bɛbáágá naá Asaŋa ummue a dómbana tɔ́nɔ naá pɛ́ yɛ́ɛyɔ, ɛ ɛ́ ɛ́ná mɔtɔ mɔ́ɔyɔ, a báá selíe pɛ́.

³²Caŋa táŋɛ́ mmue, mɔtɔ ummue ba Boya Léfi, go bola naá hoóma hɔ́ɔhɔ, ɛ ɛ́ ɛ́ná mɔtɔ mɔ́ɔnyɔ, a báá selíe pɛ́.

³³Kanɛ́ mɔtɔ ummue ba Samalɛ́ɛ naá oŋɛndɔ yɛ́hɛ́ naá pɛ́ mmue eé mmue, go bola mekúígíi na mɔtɔ mɔ́ɔnyɔ. Aŋa a mbaá mo ɛ́ná, mahana go mo gɔ́lɔ.

³⁴A á mo báyɛkɛ́ná, go gɔ́ɔdɛnɔ mpéŋé sɛ́hɛ́ na megúdé na mɔgɛ́bɔ[79], a báá sɛ́ gódáa. Gɔ́ɔ a mo básɛmbamɔ́, a báá mo lukúményée naá abaŋa bɛbɛa bɛhɛ́, go ɛ́da nɛhɛ́ naá nnyaŋá ya biinyí, mɔ́ɔ moatɛ́ a mo beŋebeŋe.

³⁵Aŋa gó mbaá bélíe, mɔtɔ ba Básamalɛ́ɛ mɔ́ɔnyɔ go somona bɛkɔ́ŋɔ bá muinyí bɛ́andɛ́ naá gɛgada gɛ́hɛ́, go íŋene mɔtɔ ba nnyaŋá ya biinyí, go mo oyana a amɔ́: “Síéne o beŋebeŋe mɔtɔ mɔ́ɔnyɔ. Aŋa nná ncomɔ́ gunde, bɔ́ɔbɔ bó ná síenemú bó bégídene go gibeŋe gɛ́hɛ́, nná go soɛna”.»

³⁶Yésusu go gídene a amɔ́: «Naá batɔ bádadɔ́ báaba, go go ɛ́na gáhɔ, ohanɛ́ a mbaá lɔmɔ́ bédúfíelú aŋa sɔ́gɔ́ɔ ba mɔ́ɔnyɔ a mboó obá naá ɛmbɔ́gɔ ya biíbi o?»

³⁷Iloodio há gicele go gundie a amɔ́: «A lɔ́mɔ́ sɔ́gɔ́ɔ mɔ́ɔnyɔ a mbaá dúfíe busi gɛ́hɛ́.» Yésusu go mo oyana a amɔ́: «Ɛ́dá, ŋanánáa nɔ́ɔnɔ tɔ́nɔ caŋa mmue.»

³⁸Aŋa Yésusu na behúúní bɛ́hɛ́ bá mbaá lɛ bó úle bɛ́ ɛnda, gɛ́hɛ́ go íŋene naá gɛdɔŋɔ gímmue, okɔ́dɔ ummue, ufíno yɛ́hɛ́ Mááta, go mo gɔ́lɔ bese naá nnyaŋá yɛhɛ́.

³⁹Mááta mɔ́ɔnyɔ a mba lɛ́ na ondimóní bɛhɛ́ ba okɔ́dɔ, ufíno yɛ́hɛ́ Malɛ́a. Mɔ́ɔnyɔ go nco lukumene naá bɛgɔ́ndɔ́ bá Daadáa go go mo bódólonyo[80].

⁴⁰Mááta mɔ́ɔ a mba lɛ́ a gúeneguene na gɛcɛcá gá mɔbɔ́yɔgɔnɔ naá kɛ́sɛna. Gɔ́ɔ a ncomɔ́ go ɛ́na Yésusu a amɔ́ gɛ́hɛ́ a amɔ́: «Daadáa, bó do go séésényée goŋaá ondimóní bamɛ a tɛ́ɛnɛna yɔmɔ́ɔ mokáa mɔbɔ́yɔgɔnɔ miimée o? Mo oyánáamɔ́ a nco ŋgóhiginyo kanɛ́.»

⁴¹Daadáa go mo gundie a amɔ́: «Mááta, Mááta, o bényíigenye odɛ́má, o bégide go gɛcɛcá gá moóma.

⁴²Kanɛ́ búmmue táŋɛ́ bɔ́ɔ bó lɔ́mɔ́ na ndénégé; Malɛ́a, mɔ́ɔ a báá ní iyídé bodáŋɔ bá bese bese, mɔtɔ a dɛ ŋgá mo úlinye.»