Read Nugunu Lókasɛ 11 Bible Online

Lókasɛ 11 - Nugunu bible

Lókasɛ 11

¹Gɔ́ɔ buisí búmmue, Yésusu a bɛ́ɛmbamɔ́ a bósógolonyo naá hoóma hóncoó. Aŋa a mbaá dɔmbɔ́ go bósógolonyo, uhúúní bɛhɛ́ ummue go mo oyana a amɔ́: «Daadáa, có dúfíemú aŋa dɛ lɔ́mɔ́ ba go bósógolonyo, mbɔ́dɔ yɛ́ɛyɛ Sáŋa[81] a mbaá dúfíe behúúní bɛ́hɛ́.»

²Yésusu go bó oyana a amɔ́: «Gɛcamɛna gɛ́ɛgɛ no bósógolonyomú, oyáa nɔnɔ no a amɔ́: Baaba, lincíe batɔ biimée ánɛ́ɛ o lɔ́mɔ́, úlé na Bufuŋe báhɔ.

³Có fáamɔ́ manyáanya mɛ́cɔ́ má miisí miimée.

⁴Có hééhínyéemú bɛlɔgɔ bɛ́cɔ́, aŋa dɛ héehinenyemú biimée báaba bá có budemú. O do có dɛ́ɛ́ná dɛ dɛ obɛ́ná naá ɛsɔgɛdɔ.»

⁵Yésusu go gɔnɔ bó oyana a amɔ́: «Ŋgáa dɛ oyɛda dɛ amɔ́: Ummue mɔ́ɔnyɔ naá bɛɛnyɔ́ɔ a bɛanana ugúle, gɔ́ɔ ɛ ɛ́damɔ́ mo ɛ́na na odɛ́má yá budúgú, a báá mo oyáná a amɔ́: “Ugúle bamɛ, mbolíomú bɛlɛ́dɛ bɛ́dadɔ́.

⁶Ugúle bamɛ ummue a á mbolɛ́ná héení, a lɛ́ naá oŋɛndɔ, kanɛ́ cɛ bɛanánáa boóma bá goŋaá mmo fáa.”

⁷Ugúle bɛhɛ́ mɔ́ɔnyɔ, gɔgɔ́ naá ncíbo gadɛ́ɛ hɔ́ɔlɔ́, a lɛ go mo baga a amɔ́: “O do céésényée! Mbáa go bébuige, namɛ na baaná bámɛ dɛ ná lɛ́ mbɛ́dɛ́ɛ; cɛ bósó bá go fadɛgɛna nco go fáa bɛlɛ́dɛ”.

⁸Nnyó oyanɛna naá mammana caá: Akɛ́ a dɛ fadɛ́gɛ́ná goŋaá a mo fáa bɛlɛ́dɛ moánɛ goŋaá a lɛ́ ugúle, kanɛ́ a gaá fadɛ́gɛ́ná, a mo fáa boóma buimée bɔ́ɔbɔ a lɛ́galɛgamɔ́, goŋaá mɔ́ɔnyɔ ɛ ɛ́dana naá busío na go kɔŋɔnɔ.»

⁹«Gɔ́ɔ yɔmɔ́ɔ nnyó oyanamɔ́ caá: Ɔŋɛ́nɔ nɔnɔ, bá gaá nnyó fáá; fúmbée nɔnɔ, no gaá gídé; kɔŋɛ́dɛ́nɔ́ nɔnɔ, bá gaá nyó buunéné.

¹⁰Mammana, mɔtɔ uŋkimée mɔ́ɔnyɔ ɔ ɔŋɛnɔmɔ́ a bɛa, mɔ́ɔnyɔ a fúmbemú a gíde, bá buunene mɔ́ɔnyɔ a kɔŋɛdɛnɔmɔ́.

¹¹Isée ohanɛ́ naá bɛɛnyɔ́ɔ mɔ́ɔ a lɔ́mɔ́ ba ŋaá, moɔnɔ́ a amɔ́ a mo ɔŋɛnɔ[82] hɛɔbɔ́, mɔ́ɔ a mo fáa nnyɔ́gɔ o?

¹²Ɛ́na lí, a amɔ́ a mo ɔŋɛnɔ ɛgɛɛ́, mɔ́ɔ a mo fáa ŋgɛŋá o?

¹³Aáŋa bɛɛnyɔ́ɔ, mbɛ́ sá batɔ aŋa no lɔ́mɔ́ nɔ́ɔnɔ, no íyimene go fáanana baaná bɛ́nyɔ́ bɛnɔ́gɔ́ bá moóma, nɛɛ́nɛ Baaba mɔ́ɔnyɔ naá mmoɛná a gaá ná lɔbɔ́ a dɛ fáá Gimmúmpúu gá Giliíli gɛ́hɛ́ go báaba bá gɛ́ mo ɔŋɔnɔmɔ́ o?»

¹⁴Yésusu a mba lɛ́ a gúne gɛgáda gá giliíli gɛ́ɛgɛ gɛ mbaá lɛ gɛ́ gundenye mɔtɔ gimmúke. Aŋa gɛ́ mbaá húmé, gimmúke go ɛ́da go gálagala, bitúu bá batɔ go ɛ́da go békúke.

¹⁵Kanɛ́ bóncodío naá olɔŋɔ yábɔ́, bó oya bá amɔ́: «Bó lɔ́mɔ́ na bogaaga bá Belesebúlu[83], ufuŋe yá bɛgáda bá biliíli, gɔ́ɔ a gúnemú bɛgáda bá biliíli.»

¹⁶Bóncodío bá mba lɛ́ bá lɛ́galɛga go mo dámbɛna: gɔ́ɔ bá mo úhunemú goŋaá a ŋa gieninye gá gobékúke gɛ́ dúfenye goŋaá ɛ ɛ́damɔ́ go úlene naá Asaŋa.

¹⁷Kanɛ́, Yésusu a mba lɛ́ i íyimene mbééníŋínyí sábɔ́, gɛ́hɛ́ go bó oyana a amɔ́: «Bufuŋe buimée bɔ́ɔbɔ bó básalasalamɔ́ go go noanana bɔ́ na bɔ́, bó ɛ́dana go go fúe, nnyaŋá sɛ́ buhebuhe, yɛ́ɛyɛ yɛ obɛna yɛ́ɛyɛ.

¹⁸Aáŋa Sátana a básala go go noanana na mɔ́ɔ moatɛ́, nɛɛ́nɛ bufuŋe bɛ́hɛ́ bó lɔ́mɔ́ bá go ɛ́da naá busío bó gɛ́ga o? Aŋa no oyamɔ́ no amɔ́ go bogaaga bá Belesebúlu gɔ́ɔ kúnemú bɛgáda bá biliíli na bɔ́.

¹⁹Kanɛ́, ɛ́na yɔmɔ́ɔ kúne bɛgáda bá biliíli na bogaaga bá Belesebúlu, batɔ bɛ́nyɔ́ bá bɛ́ gúnemú na bogaaga bá ánɛ́ɛ o? Bɔ́ɔ moatɛ́ moatɛ bá dúfenyemú goŋaá no lɛ́ naá gɛoba.

²⁰Mammana, bó lɔ́mɔ́ go bogaaga bá Asaŋa[84] gɔ́ɔ kúnemú bɛgáda bá biliíli, bɔ́ bó dúfenyemú goŋaá Bufuŋe bá Asaŋa bó báa go nco bola naá bɛɛnyɔ́ɔ.

²¹Gɔ́ɔgɔ gɛgaaga gá mɔtɔ na bɛlɛŋɔ bɛ́hɛ́ gɛ́ beŋebeŋemú mɔ́ ndáŋɛ, mɔtɔ a dɛ báá bá go gélidie bonɔ́mɛ bɛ́hɛ́.

²²Kanɛ́ gɛgaaga gá mɔtɔ gɛ́ɛgɛ gɛ́ mo dómbanamɔ́ gɛ́ amɔ́ gɛ́ úle, gɛ́ báá mo manɛ́gɛ́ná, gɛ́ lɛ go bɔgɔ bɛlɛŋɔ bɛ́hɛ́ bɛ́ɛbɛ bɛ́ á ná lɔmɔ́ bɛ́ mo fáanana bogaaga, gɛ́ abana batɔ bóncoó bonɔ́mɛ buimée bɔ́ɔbɔ gɛ́ báá ná bɔgɔ́nɔ́ɔ.

²³Mɔtɔ uŋkimée mɔ́ɔnyɔ a lɔ́mɔ́ a dɛ báá gámɛ a lɛ́ mɔ́ɔnyɔ a nnuugenyemú; mɔ́ɔnyɔ a lɔ́mɔ́ a dɛ ŋgóhígínyóo go go bánda a lɛ́ mɔ́ɔnyɔ a kasamɔ́.»

²⁴«Gɛcamɛna gɛ́ɛgɛ gɛgáda gá giliíli gɛ́ hémemú naá mɔtɔ, gɛ́ lɛ go ɛ́da gɛ́ léelene naá bɛkótánɔ́ɔ bá hoóma go go fúmbe túúgídéné. Kanɛ́ aŋa gɛ́ ŋamɔ́ gɛ́ dɛ ɛ́ná, gɛ́ lɛ go bágálɛdɛna gɛ́ amɔ́: “Kaá gundé naá yɔmɔ́ nnyaŋá yɛ́ɛyɛ ndɔ́mɔ́ húméelú hɔ́ɔ.”

²⁵Kanɛ́ aŋa gɛ́ bolamɔ́, gɛ́ báá gídé nnyaŋá fólá fólá, gedíelú,

²⁶gɛ́ lɛ go bégundidene na nnyimé, gɛ́ ɛ́da gólio biliíli bíncodío bɛ́táanɔ na bɛ́andɛ́ bɛ́ɛbɛ bɛ́ lɔ́mɔ́ bɛkándáa bɛ́ gɛ́ dómbana. Bɛ́ lɛ go nco go íŋene, bɛ́ lukumene hɔ́ɔ. Gɔ́ɔ odɛ́nɛ́ ya mɔtɔ mɔ́ɔnyɔ yó gaá ná tɛŋgɛ́lɛ́dá gó dómba aŋa gɔ́ɔgɔ a mbaá lɔmɔ́ gá busío.»

²⁷Aŋa Yésusu a mbaá ŋá a gá gálagala nɔ́ɔnɔ, kɔ́ɔ okɔ́dɔ ummue a dúnugugiemú ukelú naá gɛca gá batɔ gadɛ́ɛ, go mo oyana a amɔ́: «Besé makɔ́nɔ́ na okɔ́dɔ mɔ́ɔnyɔ a mbaá go bɛanánáa naá gadɛ́ɛ, a báá gundé a báá go yúŋényée!»

²⁸Yésusu go gundie a amɔ́: «Besé makɔ́nɔ́ ɛ lɔ́mɔ́ na báaba bá bódólonyomú nogálɔ ná Asaŋa, bá gunde bá ŋanana aŋa nó oyamɔ́!»

²⁹Aŋa bitúu bá batɔ bɛ́ mbaá lɔmɔ́ bɛ́ béhunde naá boayá bá Yésusu, gɛ́hɛ́ go ɛ́da go gálagala a amɔ́: «Batɔ bá ínoni báaba bá lɛ́ bɛbɛ́ bá batɔ; bá ŋgúhene goŋaá ŋŋa gieninye gá gobékúke, bá dɛ gaá bɛáa gieninye gá gobékúke gíncoó, bó do dómbáa gɛ́ɛgɛ gá Yónasɛ.

³⁰Mammana, caŋa mmue aŋa Yónasɛ a mbaá bɛ́ɛ́mbá gieninye gá gobékúke go busío bá batɔ bá Ninífe[85], nɔ́ɔnɔ gɔ́ɔ tɔ́nɔ bɔ́ɔbɔ bó ŋgaá bádómbánáa na Moɔnɔ́ ba mɔtɔ bó ná bɛ́ɛmbamɔ́ gieninye gá gobékúke go busío bá batɔ bá ogɛlɛ yá ínoni yɔ́ɔyɔ.

³¹Naá buisí bá gosómba bɛsɛnɛ, Ufuŋe yá okɔ́dɔ yá Gɛmbádáa yó ŋga bólɛ́gɛ́ná batɔ bá ínoni, yó bó ubie na gɛsɛnɛ goakɛ́, yó mbɛ ɛ́dá fadɛgɛna naá bigísi bá cí halaháláa go go nco bódólonyo dogálɔ dá nciŋí dá Salomɔ́ŋɔ[86]. Ɛɛ́ɛŋ, ummue a lɛ́ háalá mɔ́ɔnyɔ a dómbanamɔ́ Salomɔ́ŋɔ!

³²Naá buisí bá gosómba bɛsɛnɛ, batɔ bá Ninífe bá ŋga bólɛ́gɛ́ná batɔ bá ínoni, bá bó ubie na gɛsɛnɛ, goakɛ́ bɔ́ɔ bá mba núgíe gɛɔyɔ aŋa bá mbɔɔ́ ɔ́bɔ́ cɔ́mɔ yɛ́ɛyɛ Yónasɛ[87] a mbaá lɛ a dúmenye. Ɛɛ́ɛŋ, anáa dɛ lɔ́mɔ́ háalá, ummue a lɛ́ hɔ́ɔ mɔ́ɔnyɔ a dómbanamɔ́ Yónasɛ.

³³«Mɔtɔ a dɛ nébígényée lámba go go yɛ ɔsɛgɔ, kanɛ́ a yɛ áganamɔ́ naá gɛdálɛ́ná gá yɛ́ goŋaá báaba bí íŋenemú naá ncíbo bɛ́ ɛ́na gise.

³⁴«Lámba ya nnyɔ́dɔ yahɔ ɛ lɔ́mɔ́ niíso. Gɛcamɛna gɛ́ɛgɛ niíso náhɔ nɛ́ lɔ́mɔ́ nɛgɔ́sɔ, nnyɔ́dɔ yahɔ iŋkimée ɛ lɛ́ tɔ́nɔ naá gise. Kanɛ́, aáŋa niíso náhɔ nɛ́ nóma, nnyɔ́dɔ yahɔ ɛ gaá bɛ́ɛmba tɔ́nɔ naá mbíno.

³⁵Kɔ́ɔ, hɛnyáhɛ́nyáa nɔnɔ bese aáŋa gise gɛ́ɛgɛ no lɔmɔ́ naá gɛ́ gɛ́ dɛ báá mbíno.

³⁶Aáŋa nnyɔ́dɔ yahɔ iŋkimée ɛ lɛ́ naá gise kanɛ goŋaá gigísi gíncodío gá yɛ́ gɛ́ bɛ́ɛmba naá mbíno, nnyɔ́dɔ yahɔ ɛ gaá bɛ́ɛ́mbá naá gise iŋkimée iŋkimée, caŋa mmue aŋa gɔ́ɔgɔ lámba ɛ go seemenyemú na gise gá yɛ́.»

³⁷Aŋa Yésusu a mbaá dɔmbɔ́ dogálɔ, moɔnɔ́ ba Befelisiéŋe ummue go nco mo dɔ́ŋɛnɔ goŋaá bɛ́ ɛ́da nyáanya naá nnyaŋá yɛhɛ́. Gɛ́hɛ́ go ɛ́da, a bíí íŋéné naá ncíbo ya mɔtɔ mɔ́ɔnyɔ, a báá lukúméné naá tábɛ́la go manyáanya.

³⁸Moɔnɔ́ ba Befelisiéŋe mɔ́ɔnyɔ go ɛ́da go békúke aŋa a mbɛɛ́ ɛ́ná Yésusu a nyáanya kanɛ go dóana go básogɛda ɛmbɔ́gɔ.

³⁹Daadáa go mo oyana a amɔ́: «Bɛɛnyɔ́ɔ Befelisiéŋe no lɔ́mɔ́ náana: No soga goana nnyimé ya kɔ́bɔ na nnyimé ya usóyóo, kanɛ́ naá gadɛ́ɛ, ɛdɛ́má yɛnyɔ́ ɛ lɛ́ dácɛ na buíbi na goɛ́la gá odɛ́má.

⁴⁰Bɛɛnyɔ́ɔ batɔ bá kanɛ nciŋí báaba: No fege no amɔ́ mɔ́ɔnyɔ a mbaá gedíe hanyɔ́ a dɛ mbá gedie tɔ́nɔ gadɛ́ɛ o?

⁴¹Dómbáa nɔnɔ go fáanana basógasoga moóma mɔ́ɔmɔ mó lɔ́mɔ́ naá gadɛ́ɛ, nɔ́ɔnɔ moóma muimée mó gaá bɛ́ɛ́mbá kanɛ biílo go busío bɛ́nyɔ́.

⁴²«Mahana makɔ́nɔ́, bɛɛnyɔ́ɔ Befelisiéŋe! No búlugenye Asaŋa na bɛɔdɔ́ɔ bá dumímbínyí dá go fofa, na mbínyí iŋkimée sɛ́ɛsɛ sɛ́ basamɔ́ naá ntɛ́mɛ́[88], kanɛ́ no do ŋanánáa basɔ́gɔ́ɔ bɔ́ɔbɔ bó lɔ́mɔ́ tɛ́nɛ́ɛ, no do maamánáa Asaŋa. Nɔ́ɔnɔ gó moánɛ no sɛmɛgananamɔ́ go ŋanana, kanɛ go sesidie mɔ́ɔmɔ múntió.

⁴³Mahana makɔ́nɔ́, bɛɛnyɔ́ɔ Befelisiéŋe, goŋaá no dómbamɔ́ go lukumenene naá indukí yá busío naá nnyaŋá sá mbósógólí, no gɔnɔ lɛ́galɛga goŋaá bá nyó bédíigenye na mbúlugie naá indukí ya agósa yá gɛdɔŋɔ!

⁴⁴Mahana makɔ́nɔ́ nɛnyɔ́! Goakɛ́ no lɛ́ aŋa bɛbɛ́lá bɛ́ɛbɛ bibélincígínyí bɛ́ báá ná manɛ́ go yímene, bɛ́ ɛnda kɔ́ɔ kanɛ go íyime.»

⁴⁵Gɔ́ɔ Iloodio hímmue há Gicele hɛ́ mo oyanamɔ́ hɛ́ amɔ́: «Iloodio, gɔ́ɔgɔ o gálagalamɔ́ nɔ́ɔnɔ, gó lɛ́ goŋaá go á có sɛgáa tɔ́nɔ bɛɛcɔ́ɔ.»

⁴⁶Yésusu go gundie a amɔ́: «Mahana makɔ́nɔ́ nɛnyɔ́ tɔ́nɔ, muloodio má gicele! No dóɛgana batɔ bilúututu bá bɛnóɛ́, no do bó óhígínyóo go bó dímbige akɛ́ na ɛnɔɔ́nnɔɔ́ go go bádóɛgɛna.

⁴⁷Mahana makɔ́nɔ́ nɛnyɔ́, goŋaá no fóaga bɛnɔ́gɔ́ bá bɛbɛ́lá go busío bá mbúsí sá Asaŋa, mbúsí sɛ́ɛsɛ biisée kɔ́nɔ́ɔ bɛ́nyɔ́ bá mboó ónáa.

⁴⁸Gɔ́ɔgɔ no ŋananamɔ́ nɔ́ɔnɔ, no dúfenye goŋaá no lɛ́ nnyimé na goŋa gá biisée kɔ́nɔ́ɔ bɛ́nyɔ́, goakɛ́ bɔ́ɔ bá mboó ónáa mbúsí, go gunde bɛɛnyɔ́ no sɛ́ fóagana bɛbɛ́lá bábɔ́!

⁴⁹Boóma moánɛ bɔ́ɔ Asaŋa, naá nciŋí yɛhɛ́, a mboó oyɛ́dá a amɔ́: Ka ŋga bó dómánɛ́náa mbúsí sá Asaŋa na baapótɛlɛ, bá ŋgo ónáa báaba, bá séesenye báaba.

⁵⁰Boóma moánɛ bɔ́ɔ batɔ bá ogɛlɛ ya ínoni yɔ́ɔyɔ bá ŋgaá bɛáa noséésényée go mbúsí sá Asaŋa iŋkimée sɛ́ɛsɛ bá mboó ónáa gó ɛ́da dúmine naá gobesie gá cí,

⁵¹gó bayɛga naá Ábɛlɛ gó nco go éme naá Sakalɛ́a mɔ́ɔnyɔ bá mboó óná naá kadɛ́gadɛ́ɛ yɛ́ɛyɛ na gɛdálɛ́ná na Gimmúmpúu gá Hoóma[89]. Ɛɛ́ɛŋ, ŋgaá nyó oyáná caá, batɔ bá ogɛlɛ ya ínoni yɔ́ɔyɔ bá ŋga bɛáa noséésényée.

⁵²Mahana makɔ́nɔ́ nɛnyɔ́, muloodio má gicele! No mba gɔ́lɔ́ ibuune há gɛasɛ́ gá golɛnca; bɛɛnyɔ́ɔ moatɛ́ no do íŋéné hɔ́ɔ, no gunde no legene báaba bá lɛ́galɛgamɔ́ go íŋene.»

⁵³Aŋa Yésusu a mbɛɛ́ ɛ́dá go úlukie naá hoóma hɔ́ɔhɔ, muloodio má gicele na Befelisiéŋe go mo bɛ́ɛ́ya, bá mo úhene mbɔ́dɔ sá masɔ́mɔ iŋkimée goŋaá á bo oyáa,

⁵⁴bá mo dámbanɛna goŋaá bá mo gumbene go nogálɔ nɔ́ɔnɔ a gaá né édíe go gálɛda.