Read Nugunu Lókasɛ 13 Bible Online

Lókasɛ 13 - Nugunu bible

Lókasɛ 13

¹Naá gɛcamɛna gɛ́ɛgɔ, gɔ́ɔ batɔ bóncoó bú úlemú go go nco go oyana Yésusu boóma bɔ́ɔbɔ bó mbaá ŋaáa nɛnamá ná batɔ bá Gelilée, aŋa Pɛlátɛ a mbaá bó ónáa gɛcamɛna gɛ́ɛgɛ bá mbaá lɛ bá fáanana Asaŋa bɛbáágá.

²Yésusu go bó gundie a amɔ́: «No béeniŋenye no amɔ́ batɔ bá Gelilée bɔ́ɔbɔ bá mba lɛ́ bɛantáanta bá bologílógí bá dómba batɔ bá Gelilée báaba bóncodío go gɔ́ɔgɔ bá mba luméné na mbɔ́dɔ ya gɛdɔmbɔ aŋa yɛ́ɛyɔ nɔ́ɔnɔ o?

³Akɛ́ɛ, ŋgaá nyó oyáná caá, aáŋa no do núgíe gɛɔyɔ, no ná gúe biimée aŋa bɔ́ɔ.

⁴Ɛ́na lí no béeniŋenye goŋaá batɔ buinyo na bádadɔ́ báaba giyóŋóŋkóo gá nnyaŋá ya Silóe gɛ mbaá bó obɛ́ná, gɛ́ báá bó ónáa, bá mba lɛ́ na bɛoba makɔ́nɔ́ bá dómba batɔ bóncodío biimée báaba naá Yolósalɛmɛ o?

⁵Akɛ́ɛ, ŋgaá nyó oyáná, kanɛ́ aáŋa no do núgíe gɛɔyɔ, no ná gúe biimée caŋa mmue aŋa bɔ́ɔ.»

⁶Yésusu go gɔnɔ bo ágɛna ncaba yɛ́ɛyɛ a amɔ́: «Mɔtɔ ummue a mba lɛ́ na boɛ́tɛ bɔ́ɔbɔ bá dɔ́ŋɔnɔmɔ́ bá amɔ́ bufiigíe naá mɔ́ ntɛ́mɛ́. Kɔ́ɔ u úlemú go go gása bɛsamɔ́ bá bɔ́, a dɛ gídé boóma.

⁷Gɛ́hɛ́ go oyana kanɛ́ mɔtɔ mɔ́ɔnyɔ a mbaá lɛ a yɔgɔnɔ ntɛ́mɛ́ yɛ́ɛyɔ a amɔ́: “Nnyómá ɛ́dadɔ́ sɛ́sɛ́ɛ ncomɔ́ fúmbe bɛondá naá bufiigíe bɔ́ɔbɔ cɛ gídé boóma. Bó dɛ́amɔ́; kanɛ́ bó nyáamɔ́ cí háalá go dugúnú goakɛ́ o?”

⁸Kanɛ́ uyogóní ntɛ́mɛ́ mɔ́ɔnyɔ go mo gundie a amɔ́: “Iloodio, gɔnɔ́ bó dɛ́ɛna go nnyómá yɛ́ɛyɛ, kaá bó díménée, mmbó ágɛna giunde;

⁹ádaga nnyómá yɛ́ɛyɛ yɛ úlenemú, bó ná úme bɛondá. Aáŋa caá nɔ́ɔ, manɛ́ o ná bó dɛ́amɔ́.”»

¹⁰Gɔ́ɔ Yésusu a bɛ́ɛmbamɔ́ a húunenye batɔ naá nnyaŋá ya mbósógólí mmue buisí bá sábadɛ.

¹¹Okɔ́dɔ uncodío go bɛ́ɛmba hɔ́ɔ mɔ́ɔnyɔ gɛgáda gá giliíli gɛ mbaá lɔ́mɔ́ mo ágáalú gɛnɛ́mɔ, bó ná lɛ́ nnyómá buinyo na ɛ́dadɔ́. A mba lɛ́ kɔncɛ́mɛ́dɔ́ɔlú, a dɛ bɛ́ɛ́mbá ba go bónogoga go busío buimée.

¹²Aŋa Yésusu a mbaá mo ɛ́ná go mo dɔ́ŋɛnɔ, go mo oyana a amɔ́: «Okɔ́dɔ, ŋgaá go dúgúné go gɛnɛ́mɔ gáhɔ.»

¹³Kɔ́ɔ a mo dálamɔ́ ɛmbɔ́gɔ. Hɔ́ɔ na hɔ́ɔ gɛ́hɛ́ go bónogoga a bɛ́ ɛ́da go búlugenye Asaŋa.

¹⁴Kanɛ́ ogɔ́nɔ́ɔ ba nnyaŋá ya mbósógólí go ɔ́bɔ mpímí goŋaá Yésusu a mbɛ éŋugie okɔ́dɔ mɔ́ɔnyɔ buisí bá sábadɛ. Gɛ́hɛ́ go gɔ́lɔ dogálɔ, go oyana batɔ báaba bá mbaá lɔ́mɔ́ hɔ́ɔ a amɔ́: «Medúgú má lɛ́ hɔ́ɔ mátáanɔ na búmmue máama mɔtɔ a háananamɔ́ go yɔgɔnɔ[97]. Úlénée nɔnɔ go miisí mɔ́ɔmɔ bá nyó éŋugenye, kanɛ́ caá naá buisí bá sábadɛ.»

¹⁵Gɔ́ɔ Yésusu a mo bagamɔ́ a amɔ́: «Bɛɛnyɔ́ɔ bekuilí báaba! Maamɔ́ɔ onyɔ moánɛ go buisí bá sábadɛ, o do bósó go súdune gúlúge yahɔ ɛ́na lí, abaŋa bɛbɛa bahɔ naá nisúŋe, go ɛ́da na yɛ́ goŋaá ɛ bónyo o?

¹⁶Kanɛ́, okɔ́dɔ mɔ́ɔnyɔ a lɔmɔ́ naá mbɔ́dɔ ya batɔ ya Ábalaháma, a lɛ́ naá iŋgolí ya ohándá nnyómá buinyo na ɛ́dadɔ́ sɛ́sɛ́ɛ. Gó báa háanana goŋaá bá mo súdune naá iŋgolí moánɛ buisí bá sábadɛ, ábɔ ɔɔ́?»

¹⁷Gobaga gá Yésusu gɔ́ɔgɔ go núugie babɛlɔ́bɛlɔ bɛ́hɛ́ odóɛ; gɔ́ɔ gitúu gá batɔ gɛ́ɛgɛ gɛ́ mbaá lɔ́mɔ́ hɔ́ɔ gɛ́ ɛ́damɔ́ go békelenye go moóma má go békúke mɔ́ɔmɔ Yésusu a mbaá lɔ́mɔ́ a ŋanana.

¹⁸Gɔ́ɔ Yésusu a gɔnɔmɔ́ go ága ncaba a amɔ́: «Bufuŋe bá Asaŋa bó fóananamɔ́ ŋkádɛ o? Gɔnɔ́ ndɔ́mɔ́ ba go bó eninye na ɛkádɛ o?

¹⁹Bó lɔ́mɔ́ caŋa táŋɛ́ mmue aŋa camɔ́ ya motáladɛ yɛ́ɛyɛ mɔtɔ a mbaá góná naá mɔ́ ntɛ́mɛ́. Aŋa ɛ basamɔ́, yɛ ɛ́ya boɛ́tɛ. Munoní mó nco fóaga aŋaanɔ naá ɛtáfɛ ya bɔ́.»

²⁰Yésusu go gɔnɔ go oyɛda a amɔ́: «Ndɔ́mɔ́ ba go eninye Bufuŋe bá Asaŋa na ɛkádɛ o?

²¹Bó lɛ́ caŋa táŋɛ́ mmue aŋa ondɔ yá go fudugenye uguŋe, yɔ́ɔyɔ okɔ́dɔ a gɔ́lɔnɔmɔ́ a dɔ́bɔnɔ naá uguŋe kílo nitíno na ɛtáanɔ gó ɛ́da go éme aŋa gikébé gɛ́ gaá ná fudúgée.»

²²Yésusu a mba lɛ́ fadɛ́gɛ́náalú go go ɛ́da naá Yolósalɛmɛ, gɛ́hɛ́ go ɛ́da a dɛ́lɛmana go tɛ́sɔnɔ na bɛdɔŋɔ bɛ́ɛbɛ a mbaá lɔmɔ́ a bácanana, a húunenye batɔ.

²³Gɔ́ɔ mɔtɔ ummue a mo úhunemú a amɔ́: «Iloodio, bó lɔ́mɔ́ goŋaá goana batɔ sɔŋɛ bɔ́ɔ Asaŋa a ŋgaá sódío lí?» Yésusu go gundie a amɔ́:

²⁴«Ŋgaá nyó oyáná caá, bágɛ́ndɛ́náamɔ́ nɔnɔ go go íŋene naá gɛasɛ́ gá gágálɛ́dáalú, goakɛ́ batɔ makɔ́nɔ́ bá ŋga magánáa go íŋene kɔ́ɔ, kanɛ́ bá dɛ ŋgɛ́ ɛ́na pɛ́.

²⁵«Aŋa mɔtɔ ba nnyaŋá a ŋgaá ŋá a báa go fadɛgɛna a báá buigé gɛasɛ́, bɛɛnyɔ́ɔ báaba no ŋgaá lɔbɛ́nɔ́ go hanyɔ́ no ŋgɛɛ́ ɛ́dá go gilene gɛasɛ́, no gálagala no amɔ́: “Ogɔ́nɔ́ɔ, có buunénéemú!” A lɛ go nyó baga a amɔ́: “Cɛ íyíménée anáa no ɛ́damɔ́ go úlene!”

²⁶Kanɛ́, bɛɛnyɔ́ɔ no lo go mo gundie no amɔ́: “Dɛ mba nyáányáa dɛ báá nyóánánáa olɔŋɔ nahɔ, o báá húúnényée naá hoóma hɛ́cɔ́.”

²⁷A lɛ go gɔnɔ nyó oyana a amɔ́: “Cɛ íyíménée anáa no ɛ́damɔ́ go úlene, dómbá nɔnɔ páábɔ́, bɛɛnyɔ́ɔ biimée báaba no lɔ́mɔ́ beŋií moóma mobɛ́[98].”

²⁸«Hɔ́ɔlɔ́ bó ŋga bɛ́ɛ́mbá mbií na gobanda gá bigélédé aŋa no ŋgɛɛ́ ɛ́ná Ábalaháma, Ɛ́saga, Yɔ́kɔbɔ na mbúsí sá Asaŋa iŋkimée naá Bufuŋe bá Asaŋa, bɛɛnyɔ́ɔ hɔ́ɔlɔ́ go hanyɔ́.

²⁹Batɔ bá ŋgɛɛ́ ɛ́dá go úlene gɛayá gá mbálɛ́ná buisí, na gá púíné buisí, na gɛmmoɛnáa na gɛmbádáa, bá nco lukumene go gɛdáágá naá Bufuŋe bá Asaŋa.»

³⁰«Kanɛ́ náana, nɛnamá níncoó ná báaba bá lɔ́mɔ́ godɔ́ɔdɔ bá nnyimé bá ŋga bɛ́ɛ́mbá bá busío, bóncodío báaba bá lɔ́mɔ́ godɔ́ɔdɔ bá busío bá bɛ́ɛmba bá nnyimé.»

³¹Naá gɛcamɛna moánɛ, Befelisiéŋe bóncodío go báyɛkɛna Yésusu, go mo oyana bá amɔ́: «Úlúkíe háalá, o dómba hoóma hóncodío, goakɛ́ Elóode a fúmbe go go óna.»

³²Gɛ́hɛ́ go bó gundinye a amɔ́: «Ɛ́dá no oyana mɔtɔ ba go lioliono aŋa pága mɔ́ɔnyɔ no amɔ́: Kúne bɛgáda bá biliíli, ŋgéŋugenye bɔgɔnɔ́gɔnɔ ínoni, nembeli na góbáláa, mmana yɔmɔ́ buelí.

³³Kanɛ́ gó háanana goŋaá ŋgɛ́da naá busío na yɔmɔ́ pɛ́ ínoni, nembeli na góbáláa, goakɛ́ mbúsí ya Asaŋa ɛ dɛ háánánáa goŋaá bá yɛ óna hoóma hóncodío, goana naá Yolósalɛmɛ.»

³⁴«Yolósalɛmɛ, Yolósalɛmɛ o, maamɔ́ɔ mɔ́ɔnyɔ go ónamɔ́ mbúsí sá Asaŋa na adánɛ́, o gɔnɔ go óna báaba Asaŋa a go dómanɛnamɔ́! Génikíi gɔ́ɔ mbáá ná manɛ́ go maga go bándɛgɛna baaná báhɔ aŋa ginnyeedíi gá ŋgɔɔ́ gɛ́ lɔ́lɔmɔ́ baaná naá bɛbaga cí, kanɛ́ no dɛ olímínyóo!

³⁵Ɛ́ná nɔnɔ! Asaŋa a ná cecugie nnyaŋá yɛnyɔ́. Gɔ́ɔ nnyó oyanamɔ́ caá: No do ná gɔnɔ ŋgɛ́na gó ɛ́da go éme aŋa no nó oyɛdamɔ́ no amɔ́: “Gɛfona gɛ́ bɛ́ɛmba na mɔ́ɔnyɔ u úlenemú go ufíno yá Daadáa[99]!”»