Read Nugunu Lókasɛ 14 Bible Online

Lókasɛ 14 - Nugunu bible

Lókasɛ 14

¹Buisí bá sábadɛ búmmue, gɔ́ɔ Yésusu i íŋenemú naá nnyaŋá ya ufuŋe yá Befelisiéŋe yúmmue go manyáanya. Batɔ báaba bá mbaá lɔmɔ́ hɔ́ɔ gáábɔ́ go ɛ́da go mo bédíbedibie.

²Mɔtɔ ummue a mba lɛ́ a nóma ogɔnɔ́ yá go úmbe, go nco mo dɛ́lɛmɛnɛna naá busío.

³Yésusu go gɔ́lɔ dogálɔ, go úhune muloodio má gicele na Befelisiéŋe a amɔ́: «Gicele gɛ́cɔ́ gɛ́ fáanana bogaaga bá go éŋugie mɔtɔ buisí bá sábadɛ lí gɛ́ dɛ fáánánáa o?»

⁴Batɔ bɔ́ɔbɔ go gúdumide, bá dɛ gundíe boóma. Gɔ́ɔ Yésusu a gɔ́lɔmɔ́ ogɔnɔ́gɔnɔ mɔ́ɔnyɔ, a báá mo éŋúgíe, a báa lɛ gó mo oyana goŋaá ŋgá a gúluge.

⁵Gɛ́hɛ́ go bó oyana kanɛ́ a amɔ́: «Ánɛ́ɛ ummue naá bɛɛnyɔ́ɔ a lɔ́mɔ́ bá goŋaá, aáŋa moɔnɔ́ bɛhɛ́ ɛ́na lí gúlúge yɛhɛ́ yɛ obɛna naá ɛbɛ́lá buisí bá sábadɛ, a dɛ dómbá go íŋene hɔ́ɔ na hɔ́ɔ a mo húmie, ɛ́na a yɛ húmie o?»

⁶Gáábɔ́ go lɔbɛnɔ yɛkɛ́ɛ kanɛ bogaaga bá go gundie boóma.

⁷Aŋa Yésusu a mbɛɛ́ ɛ́ná aŋa batɔ bá mbaá lɔmɔ́ bí iye goana indukí ya busío, gɛ́hɛ́ go bó ágɛna ncaba yɛ́ɛyɛ a amɔ́:

⁸«Mɔtɔ a amɔ́ a go dɔ́ŋɛnɔ naá gibíné gá gigiŋe, o do hóámá o do ɛ́dá bélukumenine naá undukí yá busío. Bo lɛ́ ba go bɛ́ɛmba goŋaá mɔtɔ mɔ́ɔnyɔ a go dómbanamɔ́ a lɛ́ tɔ́nɔ dɔ́ŋɛ́nɔ́ɔlú naá gibíné gɛ́ɛgɔ.

⁹Aŋa mɔtɔ mɔ́ɔnyɔ a bolamɔ́, mɔtɔ ba gibíné a lɛ́ bá go nco go oyana a amɔ́: “Fáá sɔ́gɔ́ɔ mɔ́ɔnyɔ undukí”, gɔ́ɔ odóɛ yáhɔ yó gaá ná nóá go go fadɛgɛna go ɛ́da lukumene naá undukí yɔ́ɔyɔ naá nnyimé.

¹⁰Kanɛ́, ŋanánáa goŋaá mɔtɔ a amɔ́ a go dɔ́ŋɛnɔ naá gibíné, go ɛ́da lukumene naá undukí yɔ́ɔyɔ naá nnyimé, aŋa gó lɔ́mɔ́ gá go bɛ́ɛmba goŋaá, mɔtɔ mɔ́ɔnyɔ a lɔ́mɔ́ go dɔ́ŋɛ́nɔ́ɔlú a go oyana a amɔ́: “Ugúle bamɛ, úlé naá busío háalá o nco lukumene[100].” Gɔ́ɔ bó gaá ná go fáá boɔtɔ naá oŋgíso yá basɔ́gɔ́ɔ báaba no lɔ́mɔ́ nabɔ́ naá tábɛ́la.

¹¹Mammana, mɔtɔ uŋkimée mɔ́ɔnyɔ a bébúlugenyemú bá ná mo siisie, kanɛ́ mɔ́ɔnyɔ a bésiisenyemú, bá ná mo búlugie.»

¹²Gɔ́ɔ Yésusu o oyanamɔ́ tɔ́nɔ mɔtɔ mɔ́ɔnyɔ a mbaá mo dɔ́ŋɛ́nɔ́ a amɔ́: «Aáŋa o ŋanana gɛdáágá naá mamɔ́ nnyaŋá akɛ́ siisíi, akɛ́ hɛɔbɔ́bɔ́ɔ, o do dɔ́ŋɔ́nɔ́ɔ begúle báhɔ, akɛ́ batɛ́ɔbɛnɔ, akɛ́ batɔ bá ncíbo yahɔ ya batɔ, akɛ́ banɔ́mɛnɔmɛ bá batɔ báaba bá lɔ́mɔ́ mebégu máhɔ, goakɛ́ bɔ́ɔ tɔ́nɔ bá lɛ́ ba go go dɔ́ŋɛnɔ naá bɔ́ɔ, nɔ́ɔnɔ, bá soa manyáanya máhɔ máama o mbaá bo fáá.

¹³Gɔ́ɔgɔ o lɔ́mɔ́ go gɛdáágá, o dɔ́ŋɔnɔ basógasoga, banɛ́mɔnɛmɔ, batɔ bá go cɔdɔ na begélígeli.

¹⁴Gɔ́ɔ o ŋgaá bɛáa besé makɔ́nɔ́ goŋaá batɔ bɔ́ɔbɔ bá lɛ́ kanɛ bogaaga bá go go gundinye boóma bɔ́ɔbɔ o lɔ́mɔ́ bó ŋaáalú. Asaŋa a ŋga go soɛná buisí bɔ́ɔbɔ bɛtɛ́nɛ́ɛ bá batɔ bɛ́ ŋgaá fúfúgé.»

¹⁵Aŋa ummue mɔ́ɔnyɔ naá batɔ báaba bá mbaá lɔmɔ́ bá nyáanya na Yésusu naá tábɛ́la a mbɔɔ́ ɔ́bɔ́ dogálɔ dɔ́ɔdɔ, gɛ́hɛ́ go mo oyana a amɔ́: «Besé makɔ́nɔ́ na mɔ́ɔnyɔ a ŋgaá nyáányáa naá gɛdáágá naá Bufuŋe bá Asaŋa!»

¹⁶Gɔ́ɔ Yésusu a mo gundiemú a amɔ́: «Mɔtɔ a mba gedíe gɛantá gá gɛdágá, a báá dɔ́ŋɔ́nɔ́ɔ batɔ gɛca.

¹⁷Aŋa gɛcamɛna gá go bayɛga manyáanya gɛ́ mbaá háá, gɛ́hɛ́ go dóma uyogóní bɛhɛ́ goŋaá ɛ ɛ́da go oyana batɔ bɔ́ɔbɔ a amɔ́: “Úlé nɔnɔ, moóma muimée mó ná lɛ́ gedíelú.”

¹⁸«Kɔ́ɔ batɔ biimée bɔ́ɔbɔ bɛ́ ɛ́damɔ́ go béhéeheninye. Ba busío go oyana uyogóní mɔ́ɔnyɔ a amɔ́: “Ka lɛ́ na go ɔ́ndɔ ntɛ́mɛ́ gɔ́ɔ káananamɔ́ go ɛ́da yɛ ɛ́na, sɔ́kɔlɛ, kééhínyéemú.”

¹⁹Uncodío a amɔ́: “Ká lɛ́ na go ɔ́ndɔ gúlúge sámɛ sɛ́ɔ́dɔ́, mmaamana go ɛ́da sɛ́ maga naá buelí, sɔ́kɔlɛ, kééhínyéemú.”

²⁰Uncodío gɔnɔ́ a amɔ́: “Ká lɛ́ na go giŋene, boóma moánɛ bɔ́ bó ndegemú go úle.”

²¹Gɔ́ɔ uyogóní a ncomɔ́ gunde a bóó oyáná ogɔ́nɔ́ɔ bɛhɛ́ ŋgoyáamɔ́ sɛ́ɛsɛ. Ogɔ́nɔ́ɔ bɛhɛ́ go ɔ́bɔ mpímí, go mo oyana a amɔ́: “Ɛ́dá fɛaŋɔ naá nnyaáŋgadɛ́ɛ sá tɛ́sɔnɔ na naá bɛbala bá tɛ́sɔnɔ, o nco kundine háalá na basógasoga, na banɛ́mɔnɛmɔ, begélígeli na batɔ bá go cɔndɔ.”

²²Aŋa moɔnɔ́ ba gɛcamɛna a mbaá dómbá, uyogóní mɔ́ɔnyɔ go nco gunde, go oyana ogɔ́nɔ́ɔ bɛhɛ́ a amɔ́: “Ogɔ́nɔ́ɔ, ŋgaá ŋaáa bosɔ́mɔ bɔ́ɔbɔ o báá ná tómá goŋaá ŋŋa. Kanɛ́ akɛ́ nɔ́ɔnɔ, indukí intió ɛ gá lɛ́ gɔdɔɔ́.”

²³Gɔ́ɔ kanɛ́ ogɔ́nɔ́ɔ o oyanamɔ́ uyogóní bɛhɛ́ a amɔ́: “Ɛ́dá naá pɛ́ sá bɛsɔgɔ, o bienenine mogága, o gaŋa batɔ bá nco go íŋene, go goŋaá nnyaŋá yamɛ ɛ hóogo.

²⁴Ŋgaá nyó oyáná caá: Kanɛ akɛ́ mɔtɔ ummue táŋɛ́ naá batɔ báaba bá mbaá lɔ́mɔ́ dɔ́ŋɛ́nɔ́ɔlú a dɛ gaá bédísídé manyáanya mámɛ.”»

²⁵Kanɛ́ aŋa batɔ bitúu bá mbaá lɛ bá bienene Yésusu, gɛ́hɛ́ go bó bábondona, go bó oyana a amɔ́:

²⁶«Mɔtɔ mɔ́ɔnyɔ u úlenemú naá yɔmɔ́ɔ, a dɛ báá bá go bɛ́ɛmba uhúúní bamɛ aáŋa a dɛ ndɛ́gálɛ́gáa go dómba aŋa gɔ́ɔgɔ a lɛ́galɛgamɔ́ isée, nnyeedíi, ogɛ́, baaná, bolimóní, akɛ́ gɛɔyɔ gɛ́hɛ́ gá moatɛ́.

²⁷Gɔ́nɔ́ aáŋa mɔtɔ a dɛ bádóɛ́gɛ́ná kolósi yɛ́hɛ́ a mbiene, a dɛ báá ba go bɛ́ɛmba uhúúní bamɛ.

²⁸«Ánɛ́ɛ naá bɛɛnyɔ́ɔ a lɔ́mɔ́ bá ŋaá, aáŋa a saŋa gɛantá gá gɛfóaga, a dɛ manɛ́ lukumene ɛ ɛ́na aáŋa a bɛanana muinyí mɔ́ɔmɔ mó háananamɔ́ go go bayɛga gɛfóaga gɛ́ɛgɛ a gɛ́ mana o?

²⁹Aáŋa a dɛ ŋaáa nɔ́ɔnɔ, a báá dandá a bayɛga gɛfóaga gɛ́hɛ́ go mbayɛga, a báá lɔbɛ́nɔ́ a dɛ gɛ́ maná, batɔ biimée báaba bá nɛ́ ɛ́damɔ́ go gɛ́ núune bɛ́ ɛ́da go hɔnɔ,

³⁰bá gálagala bá amɔ́: “Mɔtɔ mɔ́ɔnyɔ a lɛ́ bayɛ́gáalú gɛfóaga, gɛ́ báá mo sugé go mana!”

³¹«Ɛ́na goŋaá, ufuŋe yóhanɛ́ɛ yó lɔ́mɔ́ yá ŋaá, aáŋa yó gɛɛ́ ɛ́dá noa bidé na ufuŋe yúntió, yó do manɛ́ lukumene, yó ɛ́na aáŋa na batɔ́sɛnɔ bɛ́hɛ́ bɔ́ɔ́dɔ́ bá benuí bidé, yó lɛ́ bá go báaŋɛga sɔ́gɔ́ɔ mɔ́ɔnyɔ a lɔ́mɔ́ na benuí bidé batɔ́sɛnɔ nitíno o?

³²Yó amɔ́ yó ɛ́na goŋaá yó do gaá hódá, yó dóma batɔ naá sɔ́gɔ́ɔ mɔ́ɔnyɔ a gá lɛ́ halaháláa goŋaá bá bégedie naá lɛbɛlɛbɛ.

³³«Caŋa mmue tɔ́nɔ, uŋkimée bɛnyɔ́ a dɛ báá ba go bɛ́ɛmba uhúúní bamɛ aáŋa a dɛ básáŋóná buimée bɔ́ɔbɔ a bɛananamɔ́.

³⁴«Ɛɛ́ɛŋ! Masɛgɛ má lɛ́ gɛnɔ́gɔ́ gá boóma. Kanɛ́ má amɔ́ má sola, bá lɔ́mɔ́ bá go gɔnɔ má simidie nakɛ́ o?

³⁵Má dɛ báá gɔnɔ́ bese go busío bá cí, akɛ́ go busío bá giunde; bá má umbe go nnyaáŋgadɛ́ɛ. Mɔ́ɔnyɔ a lɔ́mɔ́ na edúu go go ɔ́bɔnɔ, ɔ ɔ́bɔ.»