Read Nugunu Lókasɛ 15 Bible Online

Lókasɛ 15 - Nugunu bible

Lókasɛ 15

¹Gɔ́ɔ bogólí tásɛ biimée na beŋií mobɛ́ bɛ́ ɛ́damɔ́ go báyɛkana Yésusu go go ɔ́bɔnɔ dogálɔ dɛ́hɛ́.

²Befelisiéŋe na muloodio má gicele go bayɛga go uŋguluŋgule, bó oya bá amɔ́: «Mɔtɔ mɔ́ɔnyɔ a gɔ́lɔnɔ beŋií mobɛ́ bese, a nyáanya olɔŋɔ nabɔ́.»

³Kɔ́ɔ Yésusu a bó ágɛnamɔ́ ncaba yɛ́ɛyɛ a amɔ́:

⁴«Ánɛ́ɛ naá bɛɛnyɔ́ɔ a lɔ́mɔ́ ba ŋaá, aáŋa a bɛanana bɛdómbáa ntɛdɛ, gímmue gɛ́ báá yímé, a dɛ síé bɛ́ɛbɛ otíno énni na buinyo na bínni naá bodɛ́agadɛ́, go go ɛ́da fúmbe gɛ́ɛgɛ gɛ́ báá ná yímé gó húme aŋa a gɛ́ ɛ́namɔ́ o?

⁵Aŋa a gɛ́ ɛ́namɔ́, a gɛ́ bááfɛga naá bibéndu na gɛca gá bɛyaŋa.

⁶Aŋa a bolamɔ́ naá mɔ́ nnyaŋá, a lɛ go bándɛgɛna begúle bɛ́hɛ́ na mebégu mɛ́hɛ́, a bó oyana a amɔ́: “Ŋgáa dɛ no békelenye, goŋaá ŋgɛɛ́ ɛ́ná gɛdómbáa gámɛ gɛ́ɛgɛ gɛ́ lɔ́mɔ́ yíméelú!”

⁷Ŋgaá nyó oyáná caá: nɔ́ɔ gɔ́ɔ tɔ́nɔ bɛyaŋa bɛ́ ná bɛ́ɛmbamɔ́ naá mmoɛná go uŋií mobɛ́ ummue táŋɛ́ mɔ́ɔnyɔ a núgiemú gɛɔyɔ, gó dómba bɛtɛ́nɛ́ɛ bá batɔ otíno énni na buinyo na bínni bɛ́ɛbɛ bɛ́ lɔ́mɔ́ bɛ́ dɛ gɔnɔ́ baŋa go núgie gɛɔyɔ.»

⁸«Ɛ́na lí, okɔ́dɔ ohanɛ́ a lɔ́mɔ́, aáŋa a bɛanana bafaláŋa bɛ́hɛ́ bá muinyí bɔ́ɔ́dɔ́, gɔ́ɔ a yímiemú mmue, a dɛ ágá lámba íyuke, a fóla ncíbo yɛhɛ́ na embúne kɛ́, gó ɛ́da héme aŋa a yɛ bádamɔ́ o?

⁹Kanɛ́, aŋa a ŋamɔ́ a báa go yɛ báda, a lɛ go bándɛgɛna begúle bɛ́hɛ́ na mebégu mɛ́hɛ́, a bó oyana a amɔ́: “Ŋgáa dɛ no békelenye, goakɛ́ ŋgaá bádá yɔmɔ́ faláŋa ya muinyí yɛ́ɛyɛ ɛ lɔ́mɔ́ yíméelú!”

¹⁰Nɔ́ɔ gɔ́ɔ nnyó oyanamɔ́ caá, bɛyaŋa bɛ́ lɛ́ naá bɛɛ́ŋgɛlɛsɛ bá Asaŋa gɔ́ɔgɔ uŋií mobɛ́ ummue táŋɛ́ a núgiemú gɛɔyɔ.»

¹¹Gɔ́ɔ Yésusu a gɔnɔmɔ́ bó oyana a amɔ́: «Mɔtɔ ummue a mba lɛ́ na bahaŋa bɛ́hɛ́ báandɛ́.

¹²Ba gifío go oyana isée a amɔ́: “Baaba, páamɔ́ gámɛ gigísi gá bonɔ́mɛ bá bigíndé gɛ́ɛgɛ gɛ́ lɔ́mɔ́ gámɛ.” Gɔ́ɔ isée a bó abɛdanamɔ́ bonɔ́mɛ bɛ́hɛ́.

¹³Medúgú sɔŋɛ má á dómbá, ohaŋa ba gifío go dúe moóma mɛ́hɛ́ muimée, a bɛ́ɛ́ ɛ́dá naá gɛdɔŋɔ gá halaháláa, a bóó obɛ́ná go díeŋedieŋie bonɔ́mɛ bɛ́hɛ́ go gɛbɛ́ gá gɛɔyɔ.

¹⁴Kanɛ́ aŋa a mbaá ŋá a báa go bude bonɔ́mɛ bɛ́hɛ́ buimée púmú, gɛantá gá ncaná gá gɛ́ go íŋene naá gɛdɔŋɔ. Gosóga gó báá bayɛ́gá go mo gumbenene.

¹⁵Kɔ́ɔ ɛ ɛ́damɔ́ gɔ́lɔ buelí naá mɔtɔ ummue ba gɛdɔŋɔ gɛ́ɛgɔ, mɔ́ɔnyɔ go mo dóma go go ɛ́da beŋebeŋe ŋgɔnɔ́bɛ́[101] sɛ́hɛ́ naá gɛsɔgɔ.

¹⁶A mba lɛ́ na ncaná ya goŋaá gásɛ́ a á nyáá moóma mɔ́ɔmɔ ŋgɔnɔ́bɛ́ sɛ́ mbaá lɛ sɛ́ nyáanana, kanɛ́ mɔtɔ a dɛ ŋgá nco mo díside.

¹⁷Gɔ́ɔ ɛ ɛ́damɔ́ go bógoodo odɛ́nɛ́ yɛ́hɛ́, go bágálɛdɛna a amɔ́: “Kanɛ́ boyogóní bá baaba bénnikí bá nyáanyamɔ́ mó bɛ́gabɛga o! Yɔmɔ́ɔ nco gúenene háalá na ncaná.

¹⁸Kaá fadɛ́gɛ́ná, kunde naá baaba, mmo oyana caá: Baaba, ŋgaá budée Asaŋa, mbáá go budée maamɔ́ɔ.

¹⁹Cɛ háánánáa goŋaá bá gɔnɔ pínenye bá amɔ́ ohaŋa bahɔ, kɔ́lɔ́ɔmɔ́ gɔ́ɔgɔ aŋa uyogóní bahɔ ummue.”

²⁰Gɔ́ɔ a fadɛgɛnamɔ́ go gunde naá isée. Aŋa a mbaá ŋá a gá lɛ́ halaháláa nɔ́ɔnɔ, isée go ɛ́da mo ɛ́na. Gɛ́hɛ́ go ɔ́bɔ gosóga degédegé naá odɛ́má. Go gúduge na odɛ́dá, a báá mo bágódá, a báá mo gɔ́lɔ́ kude.

²¹Gɔ́ɔ ohaŋa bɛhɛ́ a mo oyanamɔ́ a amɔ́: “Baaba, ndɛ́ budébudé Asaŋa, mbáa go budée tɔ́nɔ, cɛ háánánáa goŋaá bá pínenye bá amɔ́ ohaŋa bahɔ.”

²²Isée go oyana boyogóní bɛ́hɛ́ a amɔ́: “Úlé nɔnɔ fɛaŋɔ na gɛla gɛ́ɛgɛ gɛ́ dómbamɔ́ bonɔ́gɔ́, no mo ága. Mo ágáamɔ́ nɔnɔ mmándɔ naá ɛnɔɔ́nnɔɔ́, no mo ága gɔnɔ́ nnaadɛna naá bɛgɔ́ndɔ́.

²³Ɛ́dá no gɔ́lɔ gɛncɛlɛ gá gúlúge gá megúdé, no óna. Ŋgáa dɛ no nyáanya, dɛ békelenye,

²⁴goŋaá ohaŋa bamɛ mɔ́ɔnyɔ, a mba gúé, kanɛ́ a á ncó gunde naá gɛɔyɔ; a mba yímé, kanɛ́ ŋgaá gɔnɔ́ mo ɛ́ná.” «Gáábɔ́ go bayɛga go yaŋa.

²⁵Hɔ́ɔlɔ́, ohaŋa ba busío ba mɔtɔ mɔ́ɔnyɔ a mbaá ŋá a gá lɛ́ naá ntɛ́mɛ́. A ná lɛ́ go nco gundene, a ná lɛ́ mekúígíi na nnyaŋá, gɛ́hɛ́ go ɔ́bɔ gigudugudu gá mesígí na mebíné.

²⁶Gɔ́ɔ a dɔ́ŋɛnɔmɔ́ ummue mɔ́ɔnyɔ naá boyogóní goŋaá a mo oyana ɛkádɛ gɛ́ báá ná síéné gɛ́ bola naá nnyaŋá.

²⁷Uyogóní mɔ́ɔnyɔ go mo oyana a amɔ́: “Tɛ́ɔbɛnɔ a báa nco gunde, gɔ́ɔ tɛ́ɔ a báá nó óná gɛncɛlɛ gá gúlúge go busío bɛ́hɛ́, goakɛ́ ohaŋa bɛhɛ́ a báa nco mo gundine bese naá ɛmbɔ́gɔ.”

²⁸Kɔ́ɔ ohaŋa bɛhɛ́ mɔ́ɔnyɔ ɔ ɔ́bɔmɔ́ mpímí, a bíí inyé go íŋene naá ncíbo. Isée go héme, a bɛ́ɛ́ ɛ́dá go mo bósógolonyo goŋaá i íŋene.

²⁹Kanɛ́ moɔnɔ́ mɔ́ɔnyɔ go gundie isée a amɔ́: “Nnyómá sɛ́sɛ́ɛ kanɛ ombanɔ, ko yɔgɔnɛnɔ, ká báasa cɛ inyé go ŋa boóma bɔ́ɔbɔ o ŋgoyanamɔ́. Maamɔ́ɔ o gá báasa o do páá akɛ́ moɔnɔ́ ba mbúnyi goŋaá dɛ nyáa na begúle bámɛ, dɛ békelenye.

³⁰Kanɛ́ aŋa moɔnɔ́ bahɔ mɔ́ɔnyɔ, mɔ́ɔ mɔ́ɔnyɔ a mbaá díéŋédíéŋíe bonɔ́mɛ bahɔ go go bienebiene bakɔ́dɔ a ncomɔ́ gunde, go óna gɛncɛlɛ gá gúlúge gá megúdé go busío bɛ́hɛ́.”

³¹Kɔ́ɔ isée a mo oyanamɔ́ a amɔ́: “Moɔnɔ́ bamɛ, o lɛ́ bɛcamɛna biimée naá yɔmɔ́ boayá. Gɔnɔ́ boóma buimée bɔ́ɔbɔ mbɛananamɔ́ bó lɔ́mɔ́ báhɔ.

³²Kanɛ́ gó bá sɛmɛganana goŋaá dɛ ɔ́bɔnɔ bese, dɛ békelenye, goakɛ́ tɛ́ɔbɛnɔ mɔ́ɔnyɔ a lɔ́mɔ́ mɔ́ɔnyɔ, a mba gúé, kanɛ́ a á ncó gunde naá gɛɔyɔ. A mba yímé, kanɛ́ ŋgaá gɔnɔ́ mo ɛ́ná.”»