Read Nugunu Lókasɛ 17 Bible Online

Lókasɛ 17 - Nugunu bible

Lókasɛ 17

¹Gɔ́ɔ Yésusu o oyanamɔ́ behúúní bɛ́hɛ́ a amɔ́: «Bɛcamɛna biimée, moóma mó ŋga bɛ́ɛ́mbá hɔ́ɔ, goŋaá batɔ bá ŋanana moóma mobɛ́. Kanɛ́ mahana makɔ́nɔ́ na mɔ́ɔnyɔ ubenyemú basɔ́gɔ́ɔ naá gɛlɔgɔ!

²Bó lɛ́ bese nɛhɛ́ goŋaá bá mo gódana ɛdánɛ́ ná go gola go ukelú, bá mo nɔɔ naá máŋɛ́, a dɛ ŋaáa goŋaá ummue naá baábayɔ́ báaba obɛna naá gɛlɔgɔ.

³Bébeŋéemú nɔnɔ bese! Tɛ́ɔbɛnɔ a amɔ́ a go ŋa boóma bobɛ́, mo dúfíemú bese bese goŋaá a á go budée. Kanɛ́ a amɔ́ a bésíme gɛoba gɛ́hɛ́, o mo héehinye.

⁴A amɔ́ a go ŋa gɛbɛ́ ɛŋɛndɔ ɛtáanɔ na ɛhandɛ́ go buisí, a amɔ́ a nco go gundine gundine nɔ́ɔnɔ ɛŋɛndɔ ɛtáanɔ na ɛhandɛ́, oya a amɔ́ a bésíme bobɛ́ bɛ́hɛ́, o mo héehinye.»

⁵Gɔ́ɔ baapótɛlɛ bó oyanamɔ́ Daadáa bá amɔ́: «Ŋaáa goŋaá gioliminyo gɛ́cɔ́ gɛ́ goma.»

⁶Daadáa go gundie a amɔ́: «Aáŋa gɔ́ɔ no lɔ́mɔ́ na gioliminyo gɛ́ búe aŋa camɔ́ ya motáladɛ[103], gásɛ́ no lɛ́ ba go oyana boɛ́tɛ bɔ́ɔbɔ no amɔ́: “Bálɛ́ga háalá, go ɛ́da bágóna naá máŋɛ́, bó gaá nyó ɔ́bɛnɔ”.»

⁷«Ŋgáa dɛ eninye dɛ amɔ́: Ummue naá bɛɛnyɔ́ɔ a lɛ́ na uyogóní ba go mo kuhenine ntɛ́mɛ́ ɛ́na lí ba go mo beŋine beŋine bidúgé. Gɔ́ɔgɔ a mo ɛ́namɔ́ a na lɛ́ go nco gundene ntɛ́mɛ́, a gaá mo oyáná a amɔ́: “Úlé fɛaŋɔ, o ncó lukumene naá tábɛ́la go manyáanya lí?”

⁸Akɛ́ɛ, goana a gaá ná mo oyáná a amɔ́: “Kedínyéemú manyáanya, bénúgíemú bɛla go úle o nco ŋgana, o gɛ́gana goŋaá mmanɛ nyáa, nnyóa, manɛ́ kanɛ́ maamɔ́ɔ tɔ́nɔ o gaá ná súgúdínyée o nco nyáa, o nyóa.”

⁹A dɛ báá naá gɛgaŋa gá goŋaá á ba fáá uyogóní bɛhɛ́ bibéhiigí goakɛ́ a báa ŋa boóma bɔ́ɔbɔ a báá ná mo oyáná, ábɔ ɔ́?

¹⁰Bó lɛ́ nɔ́ɔnɔ caŋa mmue gɛ́nyɔ́. Aŋa nó náŋamɔ́ no báa go ŋa buimée bɔ́ɔbɔ bá nyó úhenemú, no gálɛda no á amɔ́: “dɛ lɛ́ bidugúnúu bá boyogóní, dɛ báa ŋa goana bɔ́ɔbɔ bá báá ná có úhúné goŋaá dɛ ŋa.”»

¹¹Aŋa gɔ́ɔgɔ Yésusu a mbaá lɔ́mɔ́ ɛ ɛ́dana naá Yolósalɛmɛ, gɛ́hɛ́ go dómba naá ombálá yɔ́ɔyɔ na Samalɛ́ɛ na Gelilée.

¹²I í íŋéné naá gɛdɔŋɔ gímmue, bekúnúkunu bɔ́ɔ́dɔ́ go úle go go lumene nɛhɛ́. Bá á dɛ́lɛ́mɛ́ná héení néení[104],

¹³gáábɔ́ go oyɛda ukelú naá mmoɛná bá amɔ́: «Yésusu, Ogɔ́nɔ́ɔ, có ɛ́náamɔ́ mahana.»

¹⁴Yésusu a á bó ɛ́ná, gɛ́hɛ́ go bó oyana a amɔ́: «Ɛ́dá no bédúfie naá bedúmbí bɛbáágá naá Asaŋa[105].» Aŋa bá mbaá ŋá bá gɛ́ ɛ́dana, gáábɔ́ go éŋuge.

¹⁵Aŋa ummue naá bɔ́ɔ a mbɛɛ́ ɛ́ná goŋaá a báa go éŋuge, gɛ́hɛ́ go nco gunde na nnyimé, u úle a gúmenye Asaŋa ukelú naá mmoɛná,

¹⁶go danda o obɛna Yésusu naá bɛgɔ́ndɔ́, busío dábáalú go cí, a bɛ́ɛ́ ɛ́dá go mo béhiigi; mɔtɔ mɔ́ɔnyɔ a mba lɛ́ ba Básamalɛtɛ́ŋɛ.

¹⁷Yésusu go oyɛda a amɔ́: «Bekúnúkunu biimée bɔ́ɔ́dɔ́ bá bée éŋuge, ábɔ ɔ́? Kanɛ́ báaba bóntió bánnámanyɛ́ na ummue bɔ́ɔ báhaába o?

¹⁸Mɔtɔ untió a dɛ báa nco gunde go go fáa Asaŋa bibéhiigí, goana uŋunyí mɔ́ɔnyɔ o?»

¹⁹Kanɛ́ Yésusu go mo oyáná a amɔ́: «Fadɛ́gɛ́na go ɛ́da, gioliminyo gáhɔ gɛ́ á go sódío.»

²⁰Gɔ́ɔ Befelisiéŋe bú úhunemú Yésusu bá amɔ́: «Bufuŋe bá mmoɛná bó lɔ́mɔ́ ba go úle nikíi o?» Gɛ́hɛ́ go bó gundie a amɔ́: «Bufuŋe bá mmoɛná bó do úlénée mbɔ́dɔ ya goŋaá no lɛ́ ba go bó ɛ́na.

²¹Bá dɛ ŋgá oyɛda bá amɔ́: “Núúnée nɔnɔ bɔ́ bɔ́bɔ́ɔ háalá”, ɛ́ná lí “Bɔ́ búunú héení”; kanɛ́ íyíme nɔnɔ goŋaá Bufuŋe bá Asaŋa bó lɛ́ naá kadɛ́gadɛ́ɛ yɛnyɔ́.»

²²Gɔ́ɔ a gɔnɔmɔ́ go oyana behúúní bɛ́hɛ́ a amɔ́: «Gɛcamɛna gɛ́ úlene gɛ́ɛgɛ no ná maamanamɔ́ go ɛ́na buisí búmmue bá miisí bá Moɔnɔ́ ba mɔtɔ, kanɛ́ no do ná bó ɛ́na.

²³«Bá ná nyó oyana bá amɔ́: “Núúnée nɔnɔ héení”, ɛ́na lí, “Núúnée nɔnɔ háalá”, kanɛ́ no do hóámá no do ɛ́dá no díine hɔ́ɔ.

²⁴Aŋa gobege gá mpólómɛnáa go sánamɔ́, gó seemenye bɔ́ɔbɔ boayá bá mpólómɛnáa aŋa bɔ́ɔbɔ, nɔ́ɔnɔ gɔ́ɔ Moɔnɔ́ ba mɔtɔ a ŋgaá bɛ́ɛ́mbá naá Buisí bɛ́hɛ́ bá goncogunde.

²⁵Kanɛ́ gó sɛmɛganana goŋaá a manɛ go ɔ́bɛgɔnɔ makɔ́nɔ́, batɔ bá ogɛlɛ yɔ́ɔyɔ bá mo inye.

²⁶«Moóma mɔ́ɔmɔ mó mbaá bádómbánáa naá gɛcamɛna gá Nóe, mó ŋga bádómbánáa caŋa táŋɛ́ mmue naá muúle má Moɔnɔ́ ba mɔtɔ:

²⁷Batɔ ba mba lɛ́ bá nyáanya, bá nyóanana, bá ŋanana bigiŋe, gó ɛ́da húme aŋa Nóe a mbií íŋéné naá gilué gɛgɔ́nɔ́, gɔ́ɔ nobólá ná púugie nó mbaá naáa, nó báá bó fúúgíe biimée[106].

²⁸Bó mba bɛ́ɛ́mbá gɔgɔ́ tɔ́nɔ naá medúgú má Lɔ́ɔtɛ: Batɔ bá mba lɛ́ bá nyáanana, bá nyóanana, bó ɔ́ndɔ bá dúenene, bá góna, bá fóaga;

²⁹kanɛ́ buisí bɔ́ɔbɔ Lɔ́ɔtɛ a mbaá húmé naá Sɔdɔ́mɔ, íyuke na ndusú gá mɔ́ go oba go naanana mo ɛ́da go úlene naá mmoɛná, mó báá bó fúúgíe púmú[107].

³⁰Bó ŋga bɛ́ɛ́mbá nɔ́ɔnɔ naá Buisí bɔ́ɔbɔ Moɔnɔ́ ba mɔtɔ a ŋgaá bédúfíe.

³¹«Naá Buisí bɔ́ɔbɔ, mɔ́ɔnyɔ a ŋgaá bɛ́ɛ́mbá naá balánda ba nnyaŋá mmoɛná gɔ́ɔ moóma mɛ́hɛ́ naá ncíbo, a dɛ siisé go go nco mó gɔ́lɔ[108], nɔ́ɔnɔ tɔ́nɔ mɔ́ɔnyɔ a ŋgaá bɛ́ɛ́mbá naá ntɛ́mɛ́, a dɛ ncó gunde na nnyimé.

³²«Bééníŋínyéemú nɔnɔ boóma bɔ́ɔbɔ bó mbaá bolɛ́ná ogánɛ́ Lɔ́ɔtɛ[109].

³³Mɔtɔ mɔ́ɔnyɔ a ná fúmbemú goŋaá á ba sódío gɛɔyɔ gɛ́hɛ́, a na gɛ́ yímie. Kanɛ́ mɔ́ɔnyɔ a ná yímiemú gɛɔyɔ gɛ́hɛ́, a ná gɔnɔ gɛ́ bɛa.

³⁴Ŋgaá nyó oyáná caá, naá budúgú bɔ́ɔbɔ, batɔ báandɛ́ bá ŋgaá bɛ́ɛ́mbá ombɛ́dɛ́ yúmmue mbɛ́dɛ́ɛ: bá gɔ́lɔ ummue, bá dɛ́ɛna mɔ́ɔnyɔ untió.

³⁵Bakɔ́dɔ báandɛ́ bá ŋga bɛ́ɛ́mbá naá ɛdánɛ́, bá gola camɔ́: bá ŋga gɔ́lɔ́ ummue, bá dɛ́ɛna mɔ́ɔnyɔ untió. [

³⁶Banɔ́mɔtɔ́ bá ŋga bɛ́ɛ́mbá naá ntɛ́mɛ́ olɔŋɔ: bá gɔ́lɔ mɔ́ɔnyɔ, ummue a síene.»]

³⁷Behúúní go mo úhune bá amɔ́: «Daadáa, áhanɛ́ɛ bó ŋgaá báŋaáa nɔ́ɔnɔ o?» Kanɛ́ gɛ́hɛ́ go gundie a amɔ́: «Anáa gigúe gɛ́ lɔ́mɔ́, hɔ́ɔ tɔ́nɔ bɛgɔ́mbɛ́ɛ bɛ́ ŋgaá bábándáa[110].»