Read Nugunu Lókasɛ 18 Bible Online

Lókasɛ 18 - Nugunu bible

Lókasɛ 18

¹Go go dúfie goŋaá bó lɛ́ na ndénégé go go bósógolonyo bɛcamɛna biimée kanɛ go yoda bɛnamá, Yésusu go ágɛna behúúní bɛ́hɛ́ ncaba yɛ́ɛyɛ a amɔ́:

²«Naá tɛ́sɔnɔ mmue, usúmbí bɛsɛnɛ a mba lɛ́ hɔ́ɔ, a dɛ dííné Asaŋa, a dɛ hálámánáa mɔtɔ.

³Tɔ́nɔ naá tɛ́sɔnɔ mmue eé mmue, gisí gá okɔ́dɔ gímmue gɛ́ mba lɛ́ hɔ́ɔ, gɛ́ úlene naá usúmbí bɛsɛnɛ mɔ́ɔnyɔ, gɛ́ mo oyanɛna gɛ́ amɔ́: “Sómbá gɛsɛnɛ gámɛ gɛ́ɛgɛ na obɛlɔ́bɛlɔ bamɛ.”

⁴Gɛantá gá gɛcamɛna, usúmbí bɛsɛnɛ mɔ́ɔnyɔ i inyene; kanɛ́ naá go ɛ́da súgudinye, gɔ́ɔ a bágálɛdɛnamɔ́ a amɔ́: “Bó lɛ́ mammana, cɛ díínée Asaŋa, cɛ gɔ́lɔ́nɔ́ɔ gɛcamɛna na mɔtɔ.

⁵Kanɛ́ aŋa gisí gá okɔ́dɔ gɛ́ɛgɛ gɛ́ ncomɔ́ céesenye, kaá sómbá gɛsɛnɛ gɛ́ɛgɛ go besé yɛhɛ́, goŋaá a dɛ dɔ́bɔ́ɔ ɛ ɛ́dana naá busío, a nco ŋgáda edúu bɛcamɛna biimée.”»

⁶Daadáa go gídene a amɔ́: «Ɔ́bɔ́ nɔnɔ bese bese mbɔ́dɔ yɛ́ɛyɛ gɛbɛ́ gá usúmbí bɛsɛnɛ mɔ́ɔnyɔ a gálagalamɔ́!

⁷Kɔ́ɔ bɛɛnyɔ́, no béeniŋenye no amɔ́ Asaŋa a dɛ ŋgá gaŋɛmɛda go báaba mɔ́ɔ moatɛ́ a mbií iyídé, bá mo baŋanamɔ́ aŋa siisíi aŋa budúgú o? A ŋga gígényée go úle go go nco bó oyo o?

⁸Ŋgaá nyó oyáná caá, Asaŋa a ŋga sagɛ́mɛ́dá go gaŋɛmɛda go báaba mɔ́ɔ moatɛ́ a mbií iyídé. Kanɛ́ aŋa gɔ́ɔgɔ Moɔnɔ́ ba mɔtɔ a ŋguú úlé, a ŋga gídé gɔnɔ́ naá cí batɔ báaba bá lɔ́mɔ́ na gioliminyo o?»

⁹Yésusu go gɔnɔ go ága ncaba go báaba bá mbaá lɔ́mɔ́ bá bédúfenye bá amɔ́ bɔ́ɔ bá lɛ́ bɛtɛ́nɛ́ɛ naá busío bá Asaŋa, bá fánɛnafanɛna basɔ́gɔ́ɔ, a amɔ́:

¹⁰«Batɔ báandɛ́ bá mbɛ ɛ́dá naá Nnyaŋá ya Asaŋa go mbósógólí: ummue a mba lɛ́ moɔnɔ́ ba Befelisiéŋe, mɔ́ɔnyɔ ummue ugólí tásɛ.

¹¹Moɔnɔ́ ba Befelisiéŋe, a lɛ́ tɛ́nɛ́ɛ, a ŋanana mbósógólí yɛ́ɛyɛ naá mɔ́ gadɛ́ɛ[111] a amɔ́: “Asaŋa bamɛ, ko béhiigi goakɛ́ cɛ báá uŋgíbi, uŋií mobɛ́ ɛ́na akɛ́ odáŋadaŋa aŋa batɔ bóncodío, ɛ́na gɔnɔ́ aŋa ugólí tásɛ múunyú.

¹²Mbécelene manyáanya medúgú máandɛ́ naá gɛanyɛ. Páanana gɛɔdɔ́ɔ gá bonɔ́mɛ bámɛ buimée.”

¹³Ugólí tásɛ mɔ́ɔ, tɛ́nɛ́ɛ naá nibúne héení néení, a dɛ lɛ́gá akɛ́ go fediginye busío bɛ́hɛ́ go mmoɛná, a bégide ombɔ́gɔ go gɛsasɔ a bósógolonyo a amɔ́: “Asaŋa bamɛ, ŋgɛ́náamɔ́ mahana, goakɛ́ ndɛ́ ulogílógí!”

¹⁴Ŋgaá nyó oyáná caá: ba mesúgudinye mɔ́ɔnyɔ mɔ́ɔ a mbaá gundé naá mɔ́ nnyaŋá Asaŋa a báa go mo héehinye go bɛlɔgɔ bɛ́hɛ́, caá akɛ́ mɔ́ɔnyɔ uncodío, goakɛ́ mɔ́ɔnyɔ a bébúlugiemú, bá ŋga mo siisíe, mɔ́ɔnyɔ a bésiisiemú bá ŋga mo búlúgíe.»

¹⁵Kɔ́ɔ batɔ bá mbɛɛ́ ɛ́dá go úlenine Yésusu na baábayɔ́ na bá lɛɛ́lɛɛ́ kɛ́, goŋaá á ba bó dálá ɛmbɔ́gɔ. Behúúní go ɛ́na boóma moánɛ gɛbɛ́, bá bɛ́ɛ́ ɛ́dá go bó gundenye na nnyimé.

¹⁶Kanɛ́ Yésusu go bɔ́gɔ́gɛdɛnɔ baábayɔ́, go oyɛda a amɔ́: «Dɛ́ɛ́na nɔnɔ baábayɔ́ bú úlene naá yɔmɔ́ɔ! No do bó legénée, goakɛ́ Bufuŋe bá Asaŋa bó ɔ́bɔnɛnɔmɔ́ na báaba bá lɔ́mɔ́ aŋa bɔ́ɔ.

¹⁷Mammana, ŋgaá nyó oyáná caá; mɔtɔ mɔ́ɔnyɔ a ná ŋamɔ́ a dɛ olímínyóo Bufuŋe bá Asaŋa aŋa moádɔmbɔ́ o olimonyomú, a dɛ ní íŋene hɔ́ɔ.»

¹⁸Ufuŋe yá Beyúdene yúmmue gá yɔ́ɔ go úhune Yésusu yó amɔ́: «Gɛnɔ́gɔ́ gá Ogɔ́nɔ́ɔ, ndɔ́mɔ́ bá go ŋa ɛkádɛ goŋaá mbɛa bámɛ bodáŋɔ naá gɛɔyɔ gá kanɛ mesúge o?»

¹⁹Yésusu go mo gundie a amɔ́: «Ɛkádɛ́ o tɔ́ŋɔnɔmɔ́ gɛnɔ́gɔ́ gá ogɔ́nɔ́ɔ o? Mɔtɔ ba gɛnɔ́gɔ́ a dɛ báá, goana Asaŋa mokáa.

²⁰Go íyimene bɛlɔsɛnɔ bɛ́ɛbɛ: O do ŋaáa gɛdáŋa, o do óná mɔtɔ, o do íbé boóma, o do básómbɛ́ná mɔtɔ, o hálamana tɛ́ɔ na yigúédíi[112].»

²¹Ufuŋe yɔ́ɔyɔ go gundie yó amɔ́: «Ndɛ́ bɛ́dɛ́gɛ́náalú bɛlɔsɛnɔ bɛ́ɛbɛ biimée gó bayɛga naá bohaŋa bámɛ.»

²²Aŋa Yésusu a mbɔɔ́ mo ɔ́bɔ́ nɔ́ɔnɔ, gɛ́hɛ́ go mo oyana a amɔ́: «Boóma búmmue bó gá gɔnɔ go taŋanɛna: dúé buimée bɔ́ɔbɔ o lɔ́mɔ́ na bɔ́, go abana basógasoga, gɔ́ɔ o ná bɛamɔ́ bonɔ́mɛ naá mmoɛná; naá nnyimé úlé, mbienéemú.»

²³Aŋa ufuŋe yɔ́ɔyɔ yó mbɔɔ́ ɔ́bɔ́ nɔ́ɔnɔ, go dómba go súŋide busío, mammana yó mba lɛ́ na bonɔ́mɛ degédegé.

²⁴Yésusu ɛ ɛ́ná gobɛ́ɛmba gɛ́hɛ́, go oyɛda a amɔ́: «Bó lɛ́ ndɔlɛ makɔ́nɔ́ go batɔ báaba bá lɔ́mɔ́ na bonɔ́mɛ go go ɛ́da bola naá Bufuŋe bá Asaŋa.

²⁵Ɛɛ́ɛŋ, bó lɛ́ fɛaŋɔ goŋaá gɛantá gá nnyama aŋa samóo gɛ́ dómba naá gɛasɛ́ gá nnɔndɔ, kanɛ́ ndɔlɛ goŋaá onɔ́mɛnɔmɛ ba mɔtɔ i íŋene naá Bufuŋe bá Asaŋa!»

²⁶Báaba bá mbaá lɔmɔ́ bá mo bódólonyo go oyɛda bá amɔ́: «Ánɛ́ɛ kanɛ́ bá lɔ́mɔ́ ba go mo sódio o?»

²⁷Yésusu go oyɛda amɔ́: «Bɔ́ɔbɔ bó lɔ́mɔ́ ndɔlɛ naá busío bá batɔ, bó do báá ndɔlɛ naá Asaŋa.»

²⁸Píele go oyɛda a amɔ́: «Ɛ́ná, bɛɛcɔ́ɔ dɛ mba síé dɛ báá dɛ́ɛ́ná moóma mɛ́cɔ́ muimée go go go fíde!»

²⁹Yésusu go bó gundie a amɔ́: «Mammana, mammana, ŋgaá nyó oyáná caá, mɔtɔ a amɔ́ a síe a báá dɛ́ɛ́ná nnyaŋá, ogɛ́, bolimóní, bebíéní bɛ́hɛ́, ɛ́na baaná, go busío bá Bufuŋe bá Asaŋa,

³⁰a ŋga bɛáa moóma mɔ́ɔmɔ degédegé bó dómba naá gɛcamɛna gɛ́ɛgɛ dɛ lɔ́mɔ́ hɔ́ɔ gɛ́ɛgɛ, tɔ́nɔ a bɛa naá cí yɛ́ɛyɛ yɛ úlenemú gɛɔyɔ gá kanɛ mesúge.»

³¹Gɔ́ɔ Yésusu a gɔ́lɔmɔ́ Bɛɔdɔ́ɔ na bɛ́andɛ́, go bó oyana a amɔ́: «Ɔ́bɔ́ nɔnɔ, gɛ́cɔ́ go bólɛga naá Yolósalɛmɛ, anáa moóma muimée mɔ́ɔmɔ mbúsí sá Asaŋa sɛ́ mbɔɔ́ ɔ́ŋɔ́ɔ go busío bá Moɔnɔ́ ba mɔtɔ mó ná bóhóogiomú.

³²Bá ná mo dúe naá bindiíyímé Asaŋa, bɛ́ɛbɛ bɛ́ ná mo hɔnɔ, bɛ́ mo sɛga, bɛ́ mo cábana bɛdɛ́.

³³Bɛ́ ná mo gide na bɛságɔ bɛ́ gunde bɛ́ mo óna. Kanɛ́ naá buisí bá gádadɔ́ɔ, a fúfuge.»

³⁴Kanɛ́ behúúní bá mba lɛ́ kanɛ go ɔ́bɔ boóma bɔ́ɔbɔ akɛ́ sɔŋɛ; cí ya dogálɔ dɔ́ɔdɔ ɛ mba lɛ́ bó ɔsɛ́gɛ́nɔ́ɔlú, bá báá lɔbɛ́nɔ́ kanɛ go íyime bɔ́ɔbɔ Yésusu a mbaá lɔmɔ́ o oya.

³⁵Aŋa Yésusu a mbaá lɔmɔ́ ɛ ɛ́dana go go bola naá tɛ́sɔnɔ ya Yelíko, ugélígeli ummue a mba lɛ́ ndukíi naá boayá bá pɛ́, ɔ ɔŋɔnɔ hɔ́ɔ.

³⁶Ɔ ɔ́ ɔ́bɔ́ gitúu gá batɔ gɛ́ dómbana, gɛ́hɛ́ go úhune ɛkádɛ́ moánɛ.

³⁷Gɔ́ɔ bá mo oyanamɔ́ bá amɔ́, Yésusu ba Násalɛdɛ mɔ́ɔ a mbaá lɔmɔ́ a nco dómbana.

³⁸Kanɛ́ gɛ́hɛ́ go áncɛda ukelú naá mmoɛná a amɔ́: «Yésusu, Ohaŋa ba Défidi, ŋgɛ́náamɔ́ mahana!»

³⁹Batɔ báaba bá mbaá lɔmɔ́ bá dóanana naá busío go ɛ́da go mo kóndiokondio goŋaá a buige nyuudé, kanɛ́ mɔ́ɔ go áncɛda gɔnɔ́ ukelú naá mmoɛná a amɔ́: «Ohaŋa ba Défidi, ŋgɛ́náamɔ́ mahana!»

⁴⁰Yésusu go dɛ́lɛmɛna, a búú úhúné goŋaá ŋgáa bú úle nɛhɛ́ anáa mɔ́ɔ a mbaá lɔmɔ́. Ugélígeli a á mo báyɛkɛ́ná, Yésusu go mo úhune a amɔ́:

⁴¹«Ɛkádɛ o lɛ́galɛgamɔ́ goŋaá ŋŋa go busío báhɔ o?» Ugélígeli go mo gundie a amɔ́: «Daadáa, ŋaáa goŋaá ŋgɛ́nanɛna!»

⁴²Yésusu go mo oyana a amɔ́: «Ɛ́nánɛ́náa, Ɛ́dá, gioliminyo gáhɔ gɛ́ á go éŋúgíe[113].»

⁴³Hɔ́ɔ na hɔ́ɔ, gɛ́hɛ́ go ɛ́da go ɛ́nanɛna, a bienene Yésusu, a búlugenye Asaŋa. Gitúu gá batɔ giimée gɛ́ ɛ́ ɛ́ná boóma moánɛ, gá gɛ́ go ɛ́da go búlugenye tɔ́nɔ Asaŋa.