Read Nugunu Lókasɛ 19 Bible Online

Lókasɛ 19 - Nugunu bible

Lókasɛ 19

¹Gɔ́ɔ Yésusu íŋenemú naá Yelíko, a bɛ́ɛ́ ɛ́dá a dómbana naá tɛ́sɔnɔ.

²Mɔtɔ ummue a mba lɛ́ hɔ́ɔ, ufíno yɛ́hɛ́ Secée, a mba lɛ́ ufuŋe yá bogólí tásɛ na bonɔ́mɛ makɔ́nɔ́.

³Gɛ́hɛ́ go ɛ́da go fúmbe goŋaá ɛ ɛ́na ánɛ́ɛ a mbaá lɔmɔ́ Yésusu. Kanɛ́ aŋa batɔ bá mbaá lɔmɔ́ gitúu, a dɛ mbáa lɛ ba go mo ɛ́na, goakɛ́ a mba lɛ́ ibúcibúcí há mɔtɔ.

⁴Gɔ́ɔ a gɔ́lɔmɔ́ matɛ́tɛ́da, a báá dóáná naá busío, go ɛ́da bólɛga naá boɛ́tɛ bɔ́ɔbɔ bá dɔ́ŋɔnɔmɔ́ bá amɔ́ «sɛkɔmɔ́ɔlɛ», go go ɛ́na Yésusu mɔ́ɔnyɔ a mbaá lɛ bá go nco dómba boayá moánɛ.

⁵Aŋa Yésusu a mbaá ncó bola hɔ́ɔ, gɛ́hɛ́ go búlugie oŋgíso go mmoɛná, go oyana Secée a amɔ́: «Secée, siíse fɛaŋɔ, goŋaá cɛmɛganana go bɛ́ɛmba uŋunyí bahɔ ínoni yɛ́ɛyɛ.»

⁶Secée go dómba go siise fɛaŋɔ a báá mo gɛ́ndɛ́gɛ́ná na bɛyaŋa.

⁷Batɔ biimée báaba bá mbaá lɔmɔ́ hɔ́ɔ bɛ́ ɛ́ná boóma moánɛ, go ɛ́da go uŋguluŋgule bó oya bá amɔ́: «Mɔtɔ mɔ́ɔnyɔ a lama ɛ ɛ́da go íŋene go go gɛ́ga naá nnyaŋá ya ulogílógí múunyú!»

⁸Kanɛ́, Secée tɛ́nɛ́ɛ naá busío bá Daadáa, go ɛ́da go mo oyanɛna a amɔ́: «Ɛɛ́ɛŋ, Daadáa, kaá salá yɔmɔ́ bonɔ́mɛ biseli bɛ́andɛ́, páa basógasoga giseli gímmue, kunde aáŋa mba gɔ́lɔ́ dóla ya mɔtɔ uncodío naá kanɛ kɔ́ɔ, kaá mo gundínyée dóla ínni[114]!»

⁹Yésusu go mo oyana a amɔ́: «Gisódio gɛ́ ú úlé naá nnyaŋá yɛ́ɛyɛ ínoni, goakɛ́ mɔtɔ mɔ́ɔnyɔ a lɛ́ tɔ́nɔ onana yúmmue yá Ábalaháma.

¹⁰Kɔ́ɔ, Moɔnɔ́ ba mɔtɔ a mbuú úlé goŋaá á ba fúmbée báaba bá mbaá yímé, a bó sódio.»

¹¹Gɔ́ɔ Yésusu a gɔnɔmɔ́ go ágɛna batɔ báaba bá mbaá ŋá bá gá lɛ́ na go ɔ́bɔnɔ dogálɔ dɛ́hɛ́ ncaba, goakɛ́ a mba lɛ́ mekúígíi na Yolósalɛmɛ, batɔ bá mba lɛ́ ba béeniŋenye bá amɔ́ Bufuŋe bá Asaŋa bó gaá dómbá go úle hɔ́ɔ na hɔ́ɔ.

¹²A mbaá bó oyáná a amɔ́: «Giidí gá mɔtɔ gímmue gɛ́ mba fadɛ́gɛ́ná, go ɛ́da naá gɛdɔŋɔ gá halaháláa goŋaá bɛ́ ɛ́da mo búlugie naá odɛ́nɛ́ yá ufuŋe hɔ́ɔ, a lɛ go nco gunde.

¹³A gá lɛ́ a dɛ biené pɛ́, gɛ́hɛ́ go dɔ́ŋɔnɔ bɔ́ɔ́dɔ́ naá boyogóní bɛ́hɛ́, a báá bó abánáa onyɔ moánɛ kɛ́ásɛ́ ya muinyí má góolo ya go oŋona makɔ́nɔ́, a báá bó oyáná a amɔ́: “Síéne no ŋa nyonyí na muinyí mɔ́ɔmɔ gó ɛ́da go éme aŋa nná ncomɔ́ gunde.”

¹⁴Kanɛ́ aŋa a mbaá ŋá a báa go biene pɛ́, batɔ bɛ́hɛ́ bá gɛdɔŋɔ báaba bá mbaá lɔmɔ́ bá mo ágana mbɛlɔ́ go síene bá dóma batɔ goŋaá bɛ́ ɛ́da go oyɛda bá amɔ́: “Dɛ dɛ lɛ́gálɛ́gáa goŋaá mɔtɔ mɔ́ɔnyɔ a bɛ́ɛmba ufuŋe yɛ́cɔ́.”

¹⁵Gɔ́ɔ bá mo búlugiemú ufuŋe, gɛ́hɛ́ go nco gunde naá mɔ́ gɛdɔŋɔ. Aŋa a mbaá bolá, gɛ́hɛ́ go dɔ́ŋɔnɔ boyogóní bɛ́hɛ́ báaba a mbaá bó fáánánáa muinyí go go íyime aŋa onyɔ moánɛ a mbaá yɔgɔ́nɔ́ɔ na mɔ́.

¹⁶Ba busío a búú úlé a amɔ́ gɛ́hɛ́ a amɔ́: “Ogɔ́nɔ́ɔ, ndɛ́ bódáalú kɛ́ásɛ́ sá muinyí sɛ́ɔ́dɔ́ síncoó na yɛ́ɛyɛ o mbaá páá.”

¹⁷Ufuŋe go mo oyana a amɔ́: “Bese yɛ́yɔ́ɔ, o lɛ́ gɛnɔ́gɔ́ gá uyogóní; goakɛ́ go á bɛ́ɛ́mbá na pídefide naá boóma bá sɔŋɛ, ŋgaá go búlúgíe ŋgɔ́mɔnɔ ba tɛ́sɔnɔ sɛ́ɔ́dɔ́.”

¹⁸Bá gáandɛ́ɛ a búú úlé a amɔ́ gɛ́hɛ́ a amɔ́: “Ogɔ́nɔ́ɔ, ŋgaá bódá kɛ́ásɛ́ sá muinyí ɛ́táanɔ síncoó na yɛ́ɛyɛ o mbaá ncoóo.”

¹⁹Ufuŋe go oyana sɔ́gɔ́ɔ mɔ́ɔnyɔ a amɔ́: “Maamɔ́ɔ tɔ́nɔ, ŋgaá go búlúgíe ŋgɔ́mɔnɔ ba tɛ́sɔnɔ ɛ́táanɔ.”

²⁰Uyogóní untió go úle a amɔ́: “Ogɔ́nɔ́ɔ, kɛ́ásɛ́ ya muinyí yahɔ yɛ́yɔ́ɔ; mba yɛ bɛ́dɛ́gɛ́ná naá nábɛ́kɛna gadɛ́ɛ.

²¹Moatɛ́, mmba lɛ́ ko díine, goakɛ́ o lɛ́ na bɛbabɛna, o gɔ́lɔnɔ bɔ́ɔbɔ o báá lɔmɔ́ o do ágá, o sáŋa bɔ́ɔbɔ o báá lɔmɔ́ o do kasánáa.”

²²Ufuŋe go mo oyana a amɔ́: “Gɛbɛ́ gá uyogóní gɛ́ɛgɛ, kaá go bidée naá dogálɔ dáhɔ dá moatɛ́. O mba lɛ́ go íyimene goŋaá ndɛ́ na bɛbabɛna, kɔ́lɔnɔ bɔ́ɔbɔ ndɔ́mɔ́ kanɛ go ága, cáŋa bɔ́ɔbɔ ndɔ́mɔ́ kanɛ go kasana.

²³Kɔ́ɔ, goakɛ́ o mbaá lɔmɔ́ o do ɛ́dá go ága yɔmɔ́ muinyí naá nɛbɛ́dɛgɛna o? Naá goncogunde gámɛ náana, ŋgɛ́da gɔ́lɔ yɔmɔ́ muinyí na bɛdálɛ́ná.”

²⁴Kɔ́ɔ, o oyanamɔ́ batɔ báaba bá mbaá lɔmɔ́ hɔ́ɔ a amɔ́: “Gɔ́lɔ́ nɔnɔ kɛ́ásɛ́ ya muinyí yɛ́ɛyɛ a lɔ́mɔ́ na yɛ́ yɛ́ɛyɔ, no íŋene mɔ́ɔnyɔ a bɛananamɔ́ kɛ́ásɛ́ sá muinyí sɛ́ɔ́dɔ́.”

²⁵Bɔ́ɔbɔ go mo gundie bá amɔ́: “Ogɔ́nɔ́ɔ, ábɔ, caá a ná lɛ́ na kɛ́ásɛ́ sá muinyí sɛ́ɔ́dɔ́!”

²⁶Ufuŋe yɔ́ɔyɔ go gundie yó amɔ́: “Ŋgaá nyó oyáná caá: mɔtɔ uŋkimée mɔ́ɔnyɔ a lɔ́mɔ́ na bɔ́ bá ŋga mo gídéné; kanɛ́ mɔ́ɔnyɔ a lɔ́mɔ́ kanɛ bɔ́, bá ŋga mo úlínyé hɛómaŋkóma hɛ́ɛhɛ a bɛananamɔ́.

²⁷Kanɛ́ go babɛlɔ́bɛlɔ bámɛ, batɔ báaba bá mbaá lɔmɔ́ bá amɔ́ cɛ bɛ́ɛ́mbá ufuŋe yábɔ́, bó gɔ́lɔ́ɔmɔ́ nɔnɔ, no bó óna háalá naá yɔmɔ́ oŋgíso.”»

²⁸Aŋa Yésusu a mbaá ŋá a báa go gálagala nɔ́ɔnɔ, gɛ́hɛ́ go gɔ́gɛdɔ gitúu gá batɔ gɛ́ɛgɔ naá busío go go ɛ́da naá Yolósalɛmɛ.

²⁹Aŋa a mbaá ŋá a ná lɛ́ mekúígíi na tɛ́sɔnɔ sɛ́ɛsɛ Bɛ́tɛ́fasɛ na Beteníi, go go ɛ́da Ogɔndɔ yá magónɛ́dá má boolifíe[115], gɛ́hɛ́ go dúenye behúúní báandɛ́, a báá bó oyáná a amɔ́:

³⁰«Ɛ́dá nɔnɔ naá gɛdɔŋɔ gɛ́ɛgɔ gɛ́ lɔ́mɔ́ cɛŋɛ nɛnyɔ́ gɛ́ɛgɔ. Naá gobola hɔ́ɔ, no gaá gídé moɔnɔ́ ba abaŋa bɛbɛa súnígéelú, mɔtɔ a gá báasa a dɛ mo bólɛ́gá. Mo súdúnéemú nɔnɔ, no úle nɛhɛ́.

³¹Kanɛ́ mɔtɔ a amɔ́ a nyó úhune a amɔ́: “No mo súdune goakɛ́ o?” Mo gundíemú nɔnɔ no amɔ́: “Bó lɛ́ goŋaá Daadáa[116] a lɛ́ ncaná yɛhɛ́!”»

³²Gɔ́ɔ behúúní bɔ́ɔbɔ bɛ́ ɛ́damɔ́ bá báá gídé boóma buimée gɔgɔ́ aŋa Yésusu a mbaá lɔmɔ́ bó oyánáalú.

³³Aŋa bá mbaá lɔmɔ́ bá súdune moɔnɔ́ ba abaŋa bɛbɛa, batɔ bɛ́hɛ́ go bó úhune bá amɔ́: «No súdunemú moɔnɔ́ ba abaŋa bɛbɛa mɔ́ɔnyɔ goakɛ́ o?»

³⁴Bɔ́ɔ go gundie bá amɔ́: «Daadáa a lɛ́ ncaná yɛhɛ́.»

³⁵Kɔ́ɔ bú úlenemú Yésusu na nnyama yɛ́ɛyɔ. Gáábɔ́ go nɔɔnɔnɔ naá nnyimé ya yɛ́ bɛla bábɔ́, go yelie Yésusu kɔ́ɔ[117].

³⁶Aŋa a mbaá lɔmɔ́ ɛ ɛ́da ɛ ɛnda, batɔ bá ana bɛla bábɔ́ pɛ́ iŋkimée[118].

³⁷Aŋa a mbaá ŋá a ná lɛ́ mekúígíi na Yolósalɛmɛ, naá pɛ́ yɛ́ɛyɛ ɛ gɔsɔnɛnɔmɔ́ Ogɔndɔ yá boolifíe, gitúu gá behúúní giimée, na bɛyaŋa dácɛ, go ɛ́da go gúmenye Asaŋa ukelú naá mmoɛná go muune miimée máama ba mbɛɛ́ ɛ́nánáa.

³⁸Ba mba lɛ́ bó oya bá amɔ́: «Gɛfona gɛ́ bɛ́ɛmba na mɔ́ɔnyɔ u úlenemú, ufuŋe, go ufíno yá Daadáa! Buumbénú naá mmoɛná, nigúmi naá mmoɛná páábɔ́ gúunú[119]!»

³⁹Befelisiéŋe bóncodío báaba bá mbaá lɔmɔ́ naá gitúu gɛ́ɛgɔ, go oyana Yésusu bá amɔ́: «Iloodio, oyána behúúní báhɔ bá máma.»

⁴⁰Gɛ́hɛ́ go bó gundie a amɔ́: «Ŋgaá nyó oyáná caá, bá amɔ́ bá máma, adánɛ́ yá gaá áncáa.»

⁴¹Kanɛ́ aŋa Yésusu a mbaá ŋá a ná lɛ́ mekúígíi na tɛ́sɔnɔ ya Yolósalɛmɛ, a báá yɛ ɛ́ná, gɛ́hɛ́ go ɛ́da go yɛ baŋa,

⁴²o oya a amɔ́: «Aáŋa maamɔ́ɔ tɔ́nɔ o lɛ́ ba go ɔ́bɔ ínoni, boóma bɔ́ɔbɔ bó lɔ́mɔ́ bá go go fáa buumbénú! Kanɛ́ áhanɛ́ɛ, bá mba go bó ɔsɛ́gɛ́nɔ́!

⁴³Ɛɛ́ɛŋ, medúgú má ná go úline máama babɛlɔ́bɛlɔ báhɔ bá ná go bɔŋɛnɔmɔ́ na gɛgaaga gá omɛndɛ́ yá adánɛ́, bá go gaŋɛna, bá go mɔ́mɛnɔ maayá miimée.

⁴⁴Bá ná go gada púmú, maamɔ́ɔ na batɔ báhɔ, bá dɛ ná go dɛ́ɛnɛna akɛ́ ɛdánɛ́ nímmue nɛ́ lɔbɔ dáláalú naá sɔ́gɔ́ɔ ɛdánɛ́ mmoɛná, goakɛ́ o lɛ́ kanɛ go íyime gɛcamɛna gɛ́ɛgɛ Asaŋa a lɔ́mɔ́ úléelú go gidúgune gáhɔ.»

⁴⁵Gɔ́ɔ Yésusu i íŋenemú naá Nnyaŋá ya Asaŋa, gɛ́hɛ́ go ɛ́da go gúne bedúí moóma,

⁴⁶a bó gálagala a amɔ́: «Bó lɛ́ ɔ́ŋɔ́ɔlú goŋaá: Nnyaŋá yamɛ ɛ ná bɛ́ɛmba nnyaŋá ya mbósógólí. Kanɛ́ bɛɛnyɔ́ɔ no báa go yɛ íyie nɛbɔ́ɔsɛgɔ ná biíbi[120].»

⁴⁷A mba lɛ́ a húunenye medúgú miimée naá Nnyaŋá ya Asaŋa. Bagɔ́nɔ́ɔ bá bedúmbí bɛbáágá naá Asaŋa, muloodio má gicele na bafɛanɔ́ɔ bá batɔ bá gɛdɔŋɔ bá mba lɛ́ bá fúmbe go mo óna.

⁴⁸Kanɛ́ bá dɛ mbáa lɛ bí íyimene nɛɛ́nɛ bá lɔ́mɔ́ bá ŋaá bá ŋa, goŋaá gɛdɔŋɔ gɛ́ mba lɛ́ edúu eŋkimée go go bódólonyo moóma mɔ́ɔmɔ Yésusu a mbaá lɔmɔ́ a húunenye.