Read Nugunu Lókasɛ 2 Bible Online

Lókasɛ 2 - Nugunu bible

Lókasɛ 2

¹Naá gɛcamɛna moánɛ gíiní, ufuŋe ogɔ́nɔ́ Sɛsáalɛ Ógusu go fáa bogaaga bá go bana batɔ biimée báaba naá cí.

²Ombanɔ yá busío yɔ́ɔyɔ yó mba báŋaáa gɛcamɛna gɛ́ɛgɛ Kilínusu a mbaá lɔmɔ́ ŋgɔ́mɔnɔ ba Silíi.

³Mɔtɔ uŋkimée a mba lɛ́ ɛ ɛ́da bábana onyɔ moánɛ naá tɛ́sɔnɔ yɛhɛ́ ya mbíényée.

⁴Yósɛbɛ tɔ́nɔ go fadɛgɛna naá tɛ́sɔnɔ ya Násalɛdɛ naá Gelilée, go go ɛ́da naá tɛ́sɔnɔ yá Bɛ́tɛlɛhɛ́mɛ naá Yudée, anáa ufuŋe Défidi a mbaá bébíéné, goakɛ́ a mba lɛ́ mɔ́ɔ moatɛ́ naá cume ya Défidi.

⁵A mbɛ ɛ́dá goŋaá bá mo bana hɔ́ɔ olɔŋɔ na Malɛ́a gɛɔŋɛnɔ gɛ́hɛ́; a mba lɛ́ na ibume.

⁶Gɛcamɛna gɛ́ɛgɛ bá mbaá lɔmɔ́ naá Bɛ́tɛlɛhɛ́mɛ, buisí bɛ́hɛ́ bá go bíene go háa.

⁷Gɛ́hɛ́ go bíene moɔnɔ́ onɔ́mɔtɔ́ bɛhɛ́ ba busío. A báá mo lɛŋáa na bigísi bá bɛla, go mo bídiginye naá gɛnyáányɛ́ná gá bidúgé, goakɛ́ undukí yó do mbáa lɛ hɔ́ɔ go busío bábɔ́ naá nnyaŋá ya biinyí.

⁸Naá hoóma hémmue eé hémmue, bebeŋíbéŋí bidúgé bá mba lɛ́ hɔ́ɔ, bá beŋebeŋe bidúgé bábɔ́ naá bodɛ́agadɛ́ na budúgú.

⁹Ɛ́ŋgɛlɛsɛ ummue ba Daadáa go bó basɛna, gise gá nigúmi gá Daadáa go ɛ́da go bó bonya. Gáábɔ́ go bɛa bofoá makɔ́nɔ́.

¹⁰Ɛ́ŋgɛlɛsɛ go bó oyana a amɔ́: «No do bɛáa bofoá, goakɛ́ ŋgaá nyó úléné na gɛnɔ́gɔ́ gá cɔ́mɔ gɛ́ɛgɛ gɛ́ gaá ná fáá boɛ́nɔ buimée gɛcɛcá gá bɛyaŋa.

¹¹Na budúgú bá ínoni bɔ́ɔbɔ, naá tɛ́sɔnɔ ya Défidi, Usódí bɛnyɔ́ a báa bébíene, a lɔ́mɔ́ Mesíi, Daadáa.

¹²Gibélincígínyí gɛ́ɛgɛ no gaá ná mo lɛncá go gɛ́ gɛ́gɛ́ɛ: no gaá gídé moɔnɔ́ odɔmbɔ́ lɛŋálɛŋá, bídígínyéelú naá gɛnyáányɛ́ná gá bidúgé.»

¹³Hɔ́ɔ na hɔ́ɔ, gitúu gá bɛɛ́ŋgɛlɛsɛ bá mmoɛná go bénebiginye na ɛ́ŋgɛlɛsɛ mɔ́ɔnyɔ, gáábɔ́ go ɛ́da go búlugenye Asaŋa bá amɔ́:

¹⁴«Nigúmi nɛ́ bɛ́ɛmba na Asaŋa páábɔ́ naá mmoɛná, naá cí buumbénú bó bɛ́ɛmba go batɔ báaba a maamanamɔ́[17].»

¹⁵Aŋa bɛɛ́ŋgɛlɛsɛ bá mbaá bó úlúkínyée go go gunde naá mmoɛná, bebeŋíbéŋí bidúgé go bágálɛdɛna bá amɔ́: «Ŋgáa dɛ no ɛ́da kanɛ́ naá Bɛ́tɛlɛhɛ́mɛ, dɛ ɛ́da go ɛ́na bɔ́ɔbɔ bó á ná bolá hɔ́ɔ, bɔ́ɔbɔ Daadáa a có linciemú.»

¹⁶Gáábɔ́ go dómba go bágáyɛga go go ɛ́da hɔ́ɔ, bá báá huenyée Malɛ́a na Yósɛbɛ, na moɔnɔ́ odɔmbɔ́ bídígínyéelú naá gɛnyáányɛ́ná gá bidúgé.

¹⁷Aŋa bá mbaá mo ɛ́ná, gáábɔ́ go ɛ́da go oya boóma bɔ́ɔbɔ ɛ́ŋgɛlɛsɛ a mbaá bó oyáná go busío bá moɔnɔ́ odɔmbɔ́ mɔ́ɔnyɔ.

¹⁸Biimée báaba bá mbaá lɔmɔ́ bá bódólonyo bebeŋíbéŋí bidúgé, bá mba lɛ́ bá békúke buimée bɔ́ɔbɔ bá mbaá lɔmɔ́ bá bó oyanɛna.

¹⁹Kanɛ́ Malɛ́a mɔ́ɔ a mba lɛ́ a bɛ́dɛgana buimée bɔ́ɔbɔ naá odɛ́má yɛ́hɛ́, a gunde a bógoodo.

²⁰Gɔ́ɔ bebeŋíbéŋí bidúgé bá gundemú anáa bá mbɛɛ́ ɛ́dá go úle bɛ́ ɛ́da bá gúmenye Asaŋa, bá mo búlugenye go buimée bɔ́ɔbɔ bá mbɔɔ́ ɔ́bɔ́ bá báá gundé bá bɛ́ɛ́ ɛ́ná gɔgɔ́ aŋa ɛ́ŋgɛlɛsɛ a mbaá bó oyáná.

²¹Naá nnyimé ya medúgú mánnámanyɛ́, aŋa gɛcamɛna gá go anca moádɔmbɔ́ gɛ́ mbaá há, bá báa lɛ gó mo loga ufíno Yésusu, ufíno yɔ́ɔyɔ ɛ́ŋgɛlɛsɛ a mbaá dɔ́ŋɛ́nɔ́ otóotoɛ yá goŋaá nnyeedíi a súge ibume nɛ́hɛ́[18].

²²Gɔ́ɔ gɛcamɛna gá go ŋa giséégé gá gɛsogona gɛ́ háamɔ́ gɔgɔ́ aŋa gicele gá Mɔ́sɛsɛ gɛ́ oyamɔ́[19]. Bebíéní bá moádɔmbɔ́ go ɛ́da nɛhɛ́ naá tɛ́sɔnɔ ya Yolósalɛmɛ go go mo loodio naá Daadáa.

²³Aŋa bó lɔ́mɔ́ ɔ́ŋɔ́ɔlú naá gicele gá Daadáa goŋaá, bá ŋga yáŋóná moɔnɔ́ onɔ́mɔtɔ́ uŋkimée ba busío[20] go buelí bá Daadáa.

²⁴Bá mba lɛ́ tɔ́nɔ ba go fáa gɛbáágá gá binúké bɛ́andɛ́ ɛ́na lí baaná bá mmɛŋá báandɛ́ aŋa gicele gímmue eé gímmue gɛ́ oyamɔ́[21].

²⁵Hɔ́ɔlɔ́ naá Yolósalɛmɛ, mɔtɔ ummue a mba lɛ́ hɔ́ɔ ufíno yɛ́hɛ́ Símiyono. Mɔtɔ moánɛ a mba lɛ́ gɛtɛ́nɛ́ɛ gá mɔtɔ, a hálamanana Asaŋa; a mba lɛ́ a gɛ́gana mɔ́ɔnyɔ a mbaá lɛ ba go sódio Ɛ́sɛlahɛ́ɛlɛ, Gimmúmpúu gá Giliíli a mba lɛ́ nɛhɛ́.

²⁶Gimmúmpúu gá Giliíli moánɛ gɛ́ mba mo dóógínyóo goŋaá, a dɛ ná gúe kanɛ goŋaá ɛ ɛ́ ɛ́ná Kilítusu mɔ́ɔnyɔ Daadáa a dómamɔ́.

²⁷Símiyono go ɛ́da naá Nnyaŋá ya Asaŋa aŋa Giliíli a mbaá lɔmɔ́ a mo indenye. Aŋa bebíéní bá moádɔmbɔ́ Yésusu bá mbuú úlé go go nco hóogio bɔ́ɔbɔ gicele gɛ́ mbaá lɔmɔ́ gɛ́ oya go busío bɛ́hɛ́,

²⁸Símiyono go gɔ́lɔ moádɔmbɔ́, go ɛ́da go béhiigi Asaŋa a amɔ́:

²⁹«Daadáa, godɔ́ɔdɔ, tánɔ yahɔ ya ɛ́ ɛ́nánɛ́náa, o ná lɛ́ ba go dɛ́ɛna uyogóní bahɔ a gúe naá buumbénú,

³⁰goakɛ́, ŋgaá bɛ́ɛ́nɛ́ná na yɔmɔ́ oŋgíso yá moatɛ́ Usódí ba go nco go úle naá maamɔ́ɔ,

³¹mɔ́ɔnyɔ o mbaá gedíe go busío bá mɛɛ́nɔ miimée.

³²A lɛ́ gise gɛ́ɛgɛ gɛ́ ŋgaá go lincíe go bɛdɔŋɔ bá cí, a ŋga bɛ́ɛ́mbá nigúmi ná Ɛ́sɛlahɛ́ɛlɛ boɛ́nɔ báhɔ[22].»

³³Isée na nnyeedíi ba moádɔmbɔ́ bá mba lɛ́ bá békúke bɔ́ɔbɔ bá mbaá lɛ bá gálagala go busío bɛ́hɛ́.

³⁴Símiyono go bó fona, go oyana Malɛ́a, nnyeedíi ba Yésusu a amɔ́: «Go busío bá moádɔmbɔ́ mɔ́ɔnyɔ, gɛca gá batɔ naá Ɛ́sɛlahɛ́ɛlɛ gɛ́ nó obana ɛ́na lí gɛ́ fadɛgana; a ná bɛ́ɛmba gieninye gá Asaŋa gɛ́ɛgɛ batɔ bá ŋgaá lɔbɔ́ bá dɛ húmé ukelú.

³⁵Nɔ́ɔnɔ gɔ́ɔ a ŋgaá ágá naá gise mbééníŋínyí sá gɛca gá batɔ sɛ́ɛsɛ sɛ́ lɔ́mɔ́ ɔsɛ́gɔ́ɔlú naá ɛdɛ́má yabɔ́. Kanɛ́ naá báhɔ boayá, makánya má ŋga go poló odɛ́má aŋa kalafɔ.»

³⁶Okɔ́dɔ ummue tɔ́nɔ a mba lɛ́ hɔ́ɔ, mbúsí ya Asaŋa, ufíno yɛ́hɛ́ Ána; ombóla ba Fánoɛlɛ, naá nigúli ná Asɛ́ɛlɛ. A mbaá ŋá a ná lɛ́ gilunú gá kɔɔkɛ. A mbɔ ɔyɔ́ɔ nnyómá ɛ́táanɔ na ɛ́handɛ́ na onɔ́mɛ mɔ́ɔnyɔ a mbaá giŋéné nɛhɛ́.

³⁷Naá nnyimé hɔ́ɔlɔ́ gɛ́hɛ́ go síene gisí, a báá líhée nnyómá otíno énni na ínni[23]. Gɛɔyɔ gɛ́hɛ́ giimée gɛ́ mbaá lɛ naá Nnyaŋá ya Asaŋa, a yɔgɔnɛnɔ Asaŋa aŋa siisíi aŋa budúgú: a bécelene manyáanya, a bósógolonyo.

³⁸Gɛ́hɛ́ go bola naá gɛcamɛna gímmue eé gímmue, go ɛ́da go béhiigi Asaŋa. A gálagala go busío bá moádɔmbɔ́ go biimée báaba bá mbaá lɔmɔ́ bá gɛ́gana goŋaá Asaŋa a dúgune Yolósalɛmɛ.

³⁹Aŋa bebíéní bá Yésusu bá mbaá hóógío buimée bɔ́ɔbɔ gicele gá Daadáa gɛ́ úhenemú, gáábɔ́ go gunde naá Gelilée, naá tɛ́sɔnɔ yabɔ́ ya Násalɛdɛ.

⁴⁰Moádɔmbɔ́ a mba lɛ́ a goma, a bégíndenye. A mba lɛ́ na nciŋí dácɛ, Asaŋa tɔ́nɔ nnyimé yɛhɛ́.

⁴¹Nnyómá iŋkimée, bebíéní bá Yésusu bá mba lɛ́ bɛ́ ɛ́dana naá Yolósalɛmɛ go gibíné gá Pásɛ́ka ya Beyúdene.

⁴²Aŋa a mbaá hémé nnyómá sɛ́ɔ́dɔ́ na ɛ́handɛ́, bebíéní bá báa lɛ gó ɛ́da nɛhɛ́ naá Yolósalɛmɛ aŋa caŋa yabɔ́ ɛ mbaá lɔmɔ́[24].

⁴³Naá gibíné go mana, bɔ́ɔ bá báá gúlúgé, moádɔmbɔ́ Yésusu go síene naá Yolósalɛmɛ, bebíéní bɛ́hɛ́ bá dɛ íyímé.

⁴⁴Bá mba lɛ́ bá béeniŋenye goŋaá a gaá bɛ́ɛ́mbá olɔŋɔ na bɔsɔ́gɔ́ɔ bábɔ́. Gáábɔ́ go ɛnda buisí buimée buimée, kanɛ́ gáábɔ́ go bayɛga go mo fúmbe naá batɔ bábɔ́ na naá miíyíméníné mábɔ́.

⁴⁵Aŋa ba mbaá lɔ́mɔ́ bá dɛ mo ɛ́ná, gáábɔ́ go nco gunde naá Yolósalɛmɛ, bú úle bá mo fúmbe.

⁴⁶Naá nnyimé ya medúgú mádadɔ́, kɔ́ɔ bá ncomɔ́ mo gíde naá Nnyaŋá ya Asaŋa, ndukíi naá kadɛ́gadɛ́ɛ ya muloodio mogɔ́nɔ́, a bó bódólonyo, a bó nɔɔnɔnɔ ŋgúhune.

⁴⁷Biimée báaba bá mbaá lɛ bá mo bódólonyo bá mba lɛ́ bá békúke nciŋí ya kundíemú sɛ́hɛ́.

⁴⁸Aŋa bebíéní bá mbaá mo ɛ́ná, giekéné ga gɛ́ go bó gɔ́lɔ; nnyeedíi go mo úhune a amɔ́: «Moɔnɔ́ bámɛ, ɛkádɛ gɛ́gɛ́ɛ go á ná có ŋaáa náana o? Ɛ́ná goŋaá namɛ na tɛ́ɔ dɛ go fúmbe na bofoá.»

⁴⁹Gɛ́hɛ́ go bó gundie a amɔ́: «No púmbe goakɛ́ o? No do íyíménée goŋaá cɛmɛganana go yɔgɔnɔ masɔ́mɔ má Baaba[25] o?»

⁵⁰Kanɛ́ bá dɛ mbá bóso go ɔ́bɔ boóma bɔ́ɔbɔ a mbaá bó oyáná naá cí.[26]

⁵¹A báa lɛ gó gunde na bebíéní bɛ́hɛ́ naá Násalɛdɛ na ŋgɔ́bɛnɔ iŋkimée. Nnyeedíi a mba lɛ́ a bɛ́dɛgana moóma mɔ́ɔmɔ muimée naá mɔ́ odɛ́má.

⁵²Yésusu a mba lɛ́ a goma naá nnyɔ́dɔ na naá nciŋí, Asaŋa nnyimé yɛhɛ́ na batɔ tɔ́nɔ.