Read Nugunu Lókasɛ 20 Bible Online

Lókasɛ 20 - Nugunu bible

Lókasɛ 20

¹Buisí búmmue bɔ́ɔbɔ Yésusu a mbaá lɔmɔ́ a húunenye naá Nnyaŋá ya Asaŋa, a dúmenye Gɛnɔ́gɔ́ gá Cɔ́mɔ, gɔ́ɔ bagɔ́nɔ́ɔ bá bedúmbí bɛbáágá naá Asaŋa, muloodio má gicele na bafɛanɔ́ɔ bá gɛdɔŋɔ, bú úlemú bá báá bolá,

²bá amɔ́ gɛ́hɛ́ bá amɔ́: «Có oyánáamɔ́ na kasɛ́á nɛgaŋa o ŋananamɔ́ moóma mɔ́ɔmɔ, ɛ́na ánɛ́ɛ a lɔ́mɔ́ go íŋénéelú nɛgaŋa moánɛ o?»

³Gɛ́hɛ́ go bó gundie a amɔ́: «Yɔmɔ́ɔ tɔ́nɔ nnyó nɔɔ ŋgúhune mmue. Kundíemú nɔnɔ:

⁴Giyuminye gɛ́ɛgɛ Sáŋa a mbaá lɛ a yumeninye batɔ gɛ́ mbaá lɛ gɛ́ ɛ́da go úlene áhanɛ́ɛ[121]: naá Asaŋa lí, naá batɔ o?»

⁵Kanɛ́ gáábɔ́ go ɛ́da go bébidebide bá amɔ́: «Dɛ amɔ́ dɛ gundie dɛ amɔ́ “Naá Asaŋa”, a gaá có úhúné a amɔ́: “Kanɛ́ no mbií inyé go mo oliminyo goakɛ́ o?”

⁶Kanɛ́ dɛ amɔ́ dɛ gundie dɛ amɔ́: “Naá batɔ”, boɛ́nɔ buimée bó gaá có dóɛ́dánáa adánɛ́ go go có óna. Ɛɛ́ɛŋ, bí íyimene mammana goŋaá Sáŋa a mba lɛ́ mbúsí ya Asaŋa.»

⁷Kɔ́ɔ bá gundiemú bá amɔ́ bá dɛ íyíménée.

⁸Yésusu go bó oyana kanɛ́ a amɔ́: «Akɛ́ yɔmɔ́ɔ tɔ́nɔ cɛ gaá nyó oyáná nɛgaŋa nɛ́ɛnɛ ŋŋananamɔ́ moóma mɔ́ɔmɔ na nɛ́.»

⁹Kɔ́ɔ Yésusu ɛ ɛ́damɔ́ naá busío a báá ágɛ́ná batɔ ncaba yɛ́ɛyɛ a amɔ́: «Mɔtɔ ummue a mba bɔ́ŋɔ́ ntɛ́mɛ́ ya magónɛ́dá má bɛsamɔ́ bá mɔgɛ́bɔ[122]. Kɔ́ɔ a yɛ íŋenemú go gɛdɛ́nɔ go boyogóní bá go dɛŋa mɔgɛ́bɔ, mɔ́ɔ a báá dómbá go gɛntaálala gá gɛcamɛna.

¹⁰Aŋa mɔtɔ ba ntɛ́mɛ́ a mbaá lɛncɛ́gɛ́ná gɛcamɛna gá masáŋa, gɛ́hɛ́ go dóma uyogóní bɛhɛ́ ummue naá boyogóní bá go dɛŋa mɔgɛ́bɔ goŋaá bá mo dómɛna bɛ́hɛ́ bodáŋɔ. Kanɛ́ bɔ́ɔbɔ go gumbene mɔtɔ ba bosɔ́mɔ, bá báá mo gidée, bá báá mo gúlúgíe ɛmbɔ́gɔ ɛhandɛ́.

¹¹Mɔtɔ ba ntɛ́mɛ́ go gɔnɔ dóma uyogóní bɛ́hɛ́ uncodío, boyogóní bá go dɛŋa mɔgɛ́bɔ bá báá mo gidée tɔ́nɔ, bá báá mo sɛgáa, bá báá mo gúlúgíe ɛmbɔ́gɔ ɛhandɛ́.

¹²Kɔ́ɔ a gɔnɔmɔ́ dóma uyogóní ba gádadɔ́ɔ; mɔ́ɔnyɔ mɔ́ɔ bá mbaá mo lɛanánáa moobi, bá báá mo gúnée naá ntɛ́mɛ́.

¹³Gɔ́ɔ kanɛ́ mɔtɔ ba ntɛ́mɛ́ a bágálɛdɛnamɔ́ a amɔ́: “Ŋŋamɔ́ nɛɛ́nɛ dɔ́gɔ́ o? Kaá dómá moɔnɔ́ bamɛ ba odɛ́má. Mɔ́ɔ, bá gaá mo hálámáná.”

¹⁴Kanɛ́ aŋa boyogóní bá go dɛŋa mɔgɛ́bɔ bá mbaá gundíe oŋgíso bá báá mo ɛ́ná, gáábɔ́ go bágálɛdɛna bá amɔ́: “A lɔ́mɔ́ moɔnɔ́ ba bigíndé. Ŋgáa dɛ mo óna, bigíndé bɛ́ ɔ́bɛnɔnɔ nɛcɔ́.”

¹⁵Kɔ́ɔ bá mo húmiemú naá ntɛ́mɛ́ yɛ́ɛyɔ, bá báá mo óná.» Yésusu go úhune a amɔ́: «Gɔ́ɔ kanɛ́ mɔtɔ ba ntɛ́mɛ́ a ná ŋamɔ́ nɛɛ́nɛ o?

¹⁶Caá a ná nco gunde, o óna boyogóní bá go dɛŋa mɔgɛ́bɔ bɔ́ɔbɔ púmú, a gɔ́lɔ ntɛ́mɛ́ yɛhɛ́ a yɛ íŋene go batɔ bóncodío go gɛdɛ́nɔ!» Aŋa batɔ bá mbɔɔ́ ɔ́bɔ́ dogálɔ dɔ́ɔdɔ, gáábɔ́ go oyɛda bá amɔ́: «Akɛ́ɛ, caá akɛ́ nɔ́ɔnɔ!»

¹⁷Kanɛ́ Yésusu a bó núune cɛŋɛ, go bó oyana a amɔ́: «Nogálɔ ná Ŋgɔ́ŋɛ́ nɔ́ɔnɔ nó lɔ́mɔ́ nɛ́ɛnɛ naá cí: “Ɛdánɛ́ nɛ́ɛnɛ befúégí bá mbuú umbé, nɛ́ nɛ́ lɔ́mɔ́ ɛ́yáalú ɛdánɛ́ ná bugído[123] o?”

¹⁸Kɔ́ɔ mɔtɔ uŋkimée mɔ́ɔnyɔ a ŋgoó obá naá ɛdánɛ́ moánɛ a ŋga mɛ́ncámɛ́ncáa; gɔnɔ́ mɔ́ɔnyɔ nɛ́ ŋgaá mo obɛ́ná, nɛ́ ŋga mo goláa.»

¹⁹Muloodio má Gicele na bagɔ́nɔ́ɔ bá bedúmbí bɛbáágá naá Asaŋa bá mba lɛ́ bí íyimene bese bese goŋaá Yésusu a mbaá ágá ncaba yɛ́ɛyɛ go busío bábɔ́. Gáábɔ́ go ɛ́da go fúmbe pɛ́ ya go dómba go mo gumbene, kanɛ́ bá mba lɛ́ bá díine batɔ.

²⁰Kɔ́ɔ bɛ́ ɛ́damɔ́ go fɛ́fa Yésusu, bá báá mo dómɛ́ná batɔ bá mbédémbí, bá bɔ́gɔ́lɔnɔ aŋa gɛtɛ́nɛ́ɛ bá batɔ, bá fúmbe go mo dámbɛna na ŋgúhune go go mo gumbene naá dogálɔ dɛ́hɛ́, bɛ́ ɛ́da nɛhɛ́ naá ŋgɔ́mɔnɔ na naá magálá má ufuŋe ogɔ́nɔ́ Sɛsáalɛ.

²¹Kɔ́ɔ batɔ bɔ́ɔbɔ bá mo úhune bá amɔ́: «Iloodio, dɛ íyimene goŋaá o gálagala o gɔnɔ húunenye naá tɛ́nɛ́ɛ, o do díínée mɔtɔ go odɛ́nɛ́ yɛ́hɛ́, o húunenye pɛ́ sá Asaŋa na mammana iŋkimée.

²²Dɛ háanana go soa tásɛ ya Sɛsáalɛ lí, dɛ dɛ soáa o?»

²³Yésusu a lɛncana moloolio mábɔ́, go bó gundie a amɔ́:

²⁴«Túfíemú nɔnɔ gɛkɔ́ŋɔ gá muinyí gímmue. Busío na ŋgɔ́ŋɛ́ mɔ́ɔmɔ mó lɔ́mɔ́ kɔ́ɔ mó lɔ́mɔ́ má ánɛ́ɛ o?» Bá amɔ́: «Mó lɔ́mɔ́ má ufuŋe ogɔ́nɔ́ Sɛsáalɛ.»

²⁵Gɔ́ɔ a bó oyanamɔ́ a amɔ́: «Ɛɛ́ɛŋ, bese! Gundínyée nɔnɔ Sɛsáalɛ bɔ́ɔbɔ bó lɔ́mɔ́ bá Sɛsáalɛ, no gundinye Asaŋa bɔ́ɔbɔ bó lɔ́mɔ́ bá Asaŋa.»

²⁶Bá dɛ mbáa lɛ bá go mo gumbene naá dogálɔ dɔ́ɔdɔ a mbaá lɔmɔ́ a gálagala batɔ. Kanɛ́ bá báá békúkée kundíemú yɛhɛ́, bá báá gúdúmídénée.

²⁷Gɔ́ɔ nɛnamá ná batɔ bá giimbó gá Beseduseyéŋe nɛ́ mo báyɛkɛnamɔ́. Bɔ́ɔ bá suŋenenyemú bá amɔ́ bɛlɔ́ŋɔ́ bɛ́ dɛ fúfúgénée[124]. Kɔ́ɔ bá mo úhune bá amɔ́:

²⁸«Iloodio, Mɔ́sɛsɛ a mba có fáá gɛlɔsɛnɔ ɔ́ŋɔ́ɔlú goŋaá: “Aáŋa mɔtɔ a bɛanana ondimóní, ondimóní mɔ́ɔnyɔ a gúe a síe okɔ́dɔ kanɛ baaná, gó háanana goŋaá ondimóní a gada gisí gɛ́ɛgɔ, a bíene baaná na gɛ́ naá ɛgoná há ondimóní mɔ́ɔnyɔ a mbaá gúé[125]”.

²⁹Kɔ́ɔ bolimóní banɔ́mɔtɔ́ bá mba lɛ́ bátáanɔ na báandɛ́. Ba busío go giŋe a báá gúé kanɛ go síe moɔnɔ́.

³⁰Ba gáandɛ́ɛ a báá gadá gisí gɛ́ɛgɔ, a báá gúé kanɛ go síe baaná,

³¹ba gádadɔ́ɔ caŋa táŋɛ́ mmue. Bó báá gó bɛ́ɛmba nɔ́ɔnɔ nábɔ́ ná biimée bátáanɔ na báandɛ́, bá báá gúé kanɛ go síe baaná.

³²Naá nnyimé ya bɔ́ɔ biimée, okɔ́dɔ go gúe tɔ́nɔ.

³³Ɛɛ́ɛŋ kɔ́ɔ! Okɔ́dɔ mɔ́ɔnyɔ, naá púfuge ya begúe, a ŋgaá bɛ́ɛ́mbá ogánɛ́ ánɛ́ɛ o? Mammana, a mba lɛ́ okɔ́dɔ ba bɔ́ɔ biimée bátáanɔ na báandɛ́.»

³⁴Yésusu go bó gundie a amɔ́: «Banɔ́mɔtɔ́ na bakɔ́dɔ bá cí yɛ́ɛyɛ bá giŋenine.

³⁵Kanɛ́ banɔ́mɔtɔ́ na bakɔ́dɔ báaba bá ŋgaá háá na bodáŋɔ naá púfuge ya begúe na naá gɛɔyɔ naá cí yɛ́ɛyɛ yɛ úlenemú bá dɛ ŋgá bóso go giŋenine.

³⁶Bá dɛ ŋgá bóso go gɔnɔ gúe, bá lɛ́ caŋa mmue aŋa bɛɛ́ŋgɛlɛsɛ. Bá lɛ́ baaná bá Asaŋa caŋa mmue aŋa bá lɔ́mɔ́ baaná bá púfuge ya begúe.

³⁷Mɔ́sɛsɛ moatɛ́ a dúfenye daŋɛ́daŋɛ goŋaá begúe bá fúfugene. Naá gigísi gá ŋgɔ́ŋɛ́ gɛ́ɛgɛ gɛ́ gálagalamɔ́ go tudú ya gɛlɛ́mbɛ gá íyuke go lola, a dɔ́ŋɔnɔ Daadáa a amɔ́: “Asaŋa ba Ábalaháma, Asaŋa ba Ɛ́saga, Asaŋa ba Yɔ́kɔbɔ[126]!”

³⁸Asaŋa a dɛ báá Asaŋa ba begúe, kanɛ́ a lɔ́mɔ́ Asaŋa ba bɔgɔ́sɔ, mammana biimée bá lɛ bɔgɔ́sɔ naá mɔ́ɔ.»

³⁹Gɔ́ɔ muloodio má gicele múncodío mó mo gundiemú mó amɔ́: «Iloodio, go á gálɛ́dá bese.»

⁴⁰Bá dɛ mbáa lɛ gɔnɔ́ na kélemene ya go mo nɔɔ ŋgúhune incodío.

⁴¹Gɔ́ɔ Yésusu a bó gálɛdamɔ́ a amɔ́: «Nɛɛ́nɛ batɔ bá lɔ́mɔ́ bá go oyɛda goŋaá Mesíi u úlenemú naá nogɔgɔ́ ná Défidi o?

⁴²Défidi, mɔ́ɔ moatɛ́ moatɛ, o oya naá Kálata ya Ɛsagɔ a amɔ́: “Daadáa Asaŋa a mbo oyáná Daadáa bamɛ a amɔ́: Lukúméne háalá naá ombɔ́gɔ onɔ́mɛ yámɛ,

⁴³gó ɛ́da go éme aŋa nná ŋamɔ́ goŋaá babɛlɔ́bɛlɔ báhɔ bɛ́ ɛ́ya gɛdálɛ́ná bɛgɔ́ndɔ́ báhɔ[127]”.

⁴⁴Défidi a mo dɔ́ŋɔnɔ kanɛ́ a amɔ́ “Daadáa”, nɛɛ́nɛ mɔ́ɔ a lɔ́mɔ́ tɔ́nɔ ba go úle naá nogɔgɔ́ nɛ́hɛ́ o?»

⁴⁵Naá gɛcamɛna gɛ́ɛgɛ batɔ biimée bá mbaá ŋá bá gá bódólonyo moóma mɔ́ɔmɔ Yésusu a mbaá lɔmɔ́ o oya, gɛ́hɛ́ go oyana behúúní bɛ́hɛ́ a amɔ́:

⁴⁶«Bébeŋéemú nɔnɔ bese na muloodio má bicele, mó maamana go ɛnɛnda na bɛdádálaga bá kaba, mó maamana goŋaá gásɛ́ batɔ bá á bó bédíígényée na mbúlugie naá indukí ya agósa yá gɛdɔŋɔ; mó maamana go lukumenene naá indukí ya busío naá nnyaŋá sá mbósógólí na naá bɛdágá.

⁴⁷Mó nyɛ́ɛna bisí bá bakɔ́dɔ, mó gɔnɔ ŋanana bɛntaálala bá mbósógólí go go bédúfenye naá batɔ. Mó ŋga bɛáa gɛantáanta gá noséésényée.»