Read Nugunu Lókasɛ 21 Bible Online

Lókasɛ 21 - Nugunu bible

Lókasɛ 21

¹Gɔ́ɔ Yésusu a núunemú, a báa lɛ gó ɛ́na banɔ́mɛnɔmɛ bá ágana muinyí má bɛbáágá naá gisímbí.

²A báa lɛ gó ɛ́na tɔ́nɔ osógasoga ba gisí gá okɔ́dɔ ummue a ágana muinyí ŋginyí má bɛkɔ́ŋɔ móandɛ́[128].

³Yésusu go oyɛda a amɔ́: «Ŋgaá nyó oyáná mammana caá; osógasoga ba gisí gá okɔ́dɔ mɔ́ɔnyɔ a á fáá a báá dómbá batɔ biimée.

⁴Mammana, batɔ báaba bóncodío biimée bá báa nco go ágana muinyí mɔ́ɔmɔ mó lɔ́mɔ́ mó do gɔnɔ́ bó dúgune[129]; kanɛ́ mɔ́ɔ, na gosóga gɛ́hɛ́ guimée a báa nco fáa bɔ́ɔbɔ bó báá ná ŋá bó báa go mo síenine go gɛɔyɔ gɛ́hɛ́.»

⁵Aŋa batɔ bóncodío bá mbaá lɔmɔ́ bó oya goŋaá Nnyaŋá ya Asaŋa ɛ lɛ́ lɛŋálɛŋá na bɛnɔ́gɔ́ bá adánɛ́, na bɛnɔ́gɔ́ bá moóma biimée bɛ́ɛbɛ batɔ bá mbaá fáánánáa go go búlugenye Asaŋa kɔ́ɔ, Yésusu go bó oyana a amɔ́:

⁶«Naá moóma mɔ́ɔmɔ no núunemú mɔ́ɔmɔ, medúgú má úlene máama no ŋgaá ŋá no do gɔnɔ́ go ɛ́na ɛdánɛ́ nímmue nɛ́ lɔbɔ dáláalú naá sɔ́gɔ́ɔ ɛdánɛ́ mmoɛná, bá ŋga buhée buimée bɔ́ɔbɔ.»

⁷Gɔ́ɔ bá mo úhunemú bá amɔ́: «Iloodio, kanɛ́ boóma moánɛ bó ŋgaá báŋaáa nikíníi o? Gilincie gɛ́ɛgɛ gɛ́ dúfenyemú goŋaá boóma moánɛ bó ná báŋa gɛ́ lɔ́mɔ́ ŋkádɛ o?»

⁸Yésusu go oyɛda a amɔ́: «Bébeŋéemú nɔnɔ, mɔtɔ a dɛ nyó nenúgíe. Mammana, batɔ degédegé bá ŋgu úlénée bá béfínenye go ufíno yámɛ, bó oya bá amɔ́: “Yɔmɔ́ɔ ndɔ́mɔ́ Mesíi”, gɔnɔ́ “Gɛcamɛna gɛ́ á háá”. Kanɛ́ no do hóámá no do bó biené.

⁹Aŋa no ŋgɔɔ́ ɔ́bɔ́ bó oya cɔ́mɔ sá bidé na gobueŋenye, no do bɛáa bofoá. Mammana moóma moánɛ mó háanana go dóana go bola. Kanɛ́ bó do ŋgá dómba go bɛ́ɛmba gomana gá cí.»

¹⁰Gɔ́ɔ a gídenemú a amɔ́: «Boɛ́nɔ búmmue bó ŋga nɔɔ́ɔ sɔ́gɔ́ɔ boɛ́nɔ bidé, bufuŋe na sɔ́gɔ́ɔ bufuŋe.

¹¹Goyiŋkime gá cí na bogaaga gó ŋga bɛ́ɛ́mbá, ɛgɔnɔ́ ya púugie na incíli mó bɛ́ɛmba naá bigísi bá cí gɛca, biidí bá moóma tɔ́nɔ bá go góloninyo bofoá bɛ́ ŋga bɛ́ɛ́mbá hɔ́ɔ na bieninye bá gobékúke bɛ́ ɛ́da go úlene naá mmoɛná.»

¹²«Kanɛ́ moóma mɔ́ɔmɔ mó gá lɛ́ mó do bolá, bá ŋga nyó gumbénénée, bá nyó séesenye, bɛ́ ɛ́dana nɛnyɔ́ naá nnyaŋá sá mbósógólí go cáágá, bá nyó ágana naá ncíbo ya gɛaŋɔ́; bá nɛ́ ɛ́dana nɛnyɔ́ naá mefuŋe na baŋgɔ́mɔnɔ go busío bámɛ.

¹³Bó ŋga bɛ́ɛ́mbá pɛ́ ya goŋaá no ŋa ŋgominyo go busío bámɛ.

¹⁴Boóma bɔ́ɔbɔ no sɛmɛgananamɔ́ go bá ága naá odóɛ bó lɔ́mɔ́ goŋaá no do dóáná go yóbimido aŋa no ná bɔ́bɔgɔbɔgɔmɔ́ naá gɛsɛnɛ gɛ́nyɔ́.

¹⁵Ɛɛ́ɛŋ, yɔmɔ́ɔ moatɛ́ nná nyó fáa makóa na nciŋí, mɔ́ɔmɔ mó ná mánɛgɛnamɔ́ babɛlɔ́bɛlɔ bɛ́nyɔ́; bá dɛ gɔnɔ́ bɛa nyuudé.

¹⁶Akɛ́ bebíéní bɛ́nyɔ́, akɛ́ bolimóní bɛ́nyɔ́, akɛ́ nigúli nɛnyɔ́ ná batɔ, akɛ́ begúle bɛ́nyɔ́, bá ná nyó bɛ́ɛ́ya. Bá ágana naá ncíbo ya gɛaŋɔ́ gɛca naá olɔŋɔ yɛ́nyɔ́ go go bó óna.

¹⁷Batɔ biimée bá ŋga nyó bɛlábɛ́láa go busío bámɛ.

¹⁸Kanɛ́, akɛ́ cóɛ mmue naá odóɛ yɛ́nyɔ́ ɛ dɛ ŋgá yíme.

¹⁹Gɛ́ndɛ́mɛ́da nɔnɔ, goŋaá nɔ́ɔnɔ gɔ́ɔ no ná sódiomú bɛɔyɔ bɛ́nyɔ́.»

²⁰«Aŋa no nɛ́ ɛ́namɔ́ ɛlɔŋɔ ya bidé ɛ báá go géŋgelidie Yolósalɛmɛ, íyíme nɔnɔ no amɔ́ naá gɛcamɛna gɛ́ɛgɔ, bá gaá gá lɛ́ go mo gada.

²¹Gɔ́ɔ batɔ báaba bá ŋgaá bɛ́ɛ́mbá naá gɛdɔŋɔ gá Yudée bá salana naá ɛgɔndɔ; báaba bá ŋgaá bɛ́ɛ́mbá naá Yolósalɛmɛ gadɛ́ɛ, bɛ́ ɛ́dana halaháláa, ŋgáa báaba naá ntɛ́mɛ́, bá dɛ íŋéné naá tɛ́sɔnɔ.

²²Mammana, medúgú moánɛ má ŋga bɛ́ɛ́mbá medúgú má bibégundí, medúgú má go báŋa buimée bɔ́ɔbɔ Ŋgɔ́ŋɛ́ sɛ́ oyamɔ́[130].

²³Bakɔ́dɔ bá embume na báaba bá go yúuŋenye baaná bá ŋga bɛ́ɛ́mbá mahana makɔ́nɔ́ naá medúgú moánɛ! Mammana gɛantá gá mahana gɛ́ ŋgo obɛ́ná gɛdɔŋɔ, na mpímí ya Asaŋa go batɔ bá gɛdɔŋɔ gɛ́ɛgɔ.

²⁴Bá ŋga bó ónáa na kalafɔ, bá bɛ́ɛmba bɛɔlɛ́ naá kadɛ́gadɛ́ɛ ya bɛdɔŋɔ biimée, gɔnɔ́ batɔ bá bɛdɔŋɔ bíncodío bá ŋga bíndée Yolósalɛmɛ gó ɛ́da go éme aŋa gɛcamɛna gábɔ́ gɛ́ manamɔ́.»

²⁵«Bieninye bɛ́ ŋga bɛ́ɛ́mbá naá buisí, naá ofɛ́ na naá muotóti[131]. Gɛantá gá bofoá gɛ́ ŋga gumbéné mɛɛ́nɔ naá cí, má dɛ gɔnɔ́ hóda gɛcooma gá máŋɛ́ na gobégide gá miimpo.

²⁶Batɔ bá ŋga gúénénée na bofoá go go béeniŋenye gá boóma bɔ́ɔbɔ bó ŋgaá háánánáa go báŋa naá cí yɛ́ɛyɛ iŋkimée, mammana, magaaga máama naá mmoɛná má dɛ ŋgá gɔnɔ bɛa ndukúménínée.

²⁷Kɔ́ɔ bá ŋgɛɛ́ ɛ́ná Moɔnɔ́ ba mɔtɔ ɛ ɛ́da go úlene géŋgélídíelú na bidu bá mmoɛná na bogaaga gɔnɔ́ na nigúmi dácɛ[132].»

²⁸«Aŋa moóma mɔ́ɔmɔ mó ŋgaá dúmé go báŋanana, bónógóga nɔnɔ no fediginye odóɛ, goŋaá gisódio gɛ́nyɔ́ gɛ́ ná lɛ́ mekúígíi.»

²⁹Gɔ́ɔ Yésusu a gɔnɔmɔ́ bó ágɛna ncaba amɔ́: «Núúnée nɔnɔ bogónɛ́dá bá bufiigíe gɔnɔ́ na mɛɛ́tɛ máama móncodío miimée.

³⁰Gɔ́ɔgɔ no ɛ́namɔ́ goŋaá má á dúmé go tɔsɔ, no íyimene goŋaá gɛnɔ́gɔ́ gá gɛcamɛna gɛ́ ná lɛ́ mekúígíi.

³¹Caŋa mmue, bɛɛnyɔ́ɔ tɔ́nɔ, aŋa no ŋgɛɛ́ ɛ́ná moóma mɔ́ɔmɔ, íyíme nɔnɔ goŋaá Bufuŋe bá Asaŋa bó ná lɛ́ mekúígíi.

³²Ŋgaá nyó oyáná mammana caá, batɔ bá ogɛlɛ yɔ́ɔyɔ bá dɛ ŋgá fúe biimée kanɛ goŋaá moóma muimée mɔ́ɔmɔ mó á bolá.

³³Mmoɛná na cí mó ŋga maná, kanɛ́ dogálɔ dámɛ dó do ŋgá mana.»

³⁴«Lukúméne nɔnɔ bese! Bibíné na anyóa yá ginití na mecíkílí má gɛɔyɔ, mó do nyó ágá gonóa naá odɛ́má, aáŋa caá nɔ́ɔnɔ, buisí bá gɛɛmba bɔ́ɔbɔ bó ŋga nyó sulúŋényée

³⁵ɛɛ́ŋ, bó ŋgo obɛ́ná batɔ biimée bá cí yɛ́ɛyɛ iŋkimée aŋa ɛdámbɔ.

³⁶No do ɛ́dánáa go dɔnɔ́ɔ, bósógólónyóomú nɔnɔ bɛcamɛna biimée, goŋaá nó ba bɛáa bogaaga bá go pamba naá buimée bɔ́ɔbɔ bó ná báŋamɔ́, no gɔnɔ dɛ́lɛmɛna tɛ́nɛ́ɛ naá busío bá Moɔnɔ́ bá mɔtɔ.»

³⁷Na sisíi, Yésusu a mba lɛ́ a húunenye naá Nnyaŋá ya Asaŋa. Kanɛ́ hɛɔbɔ́bɔ́ɔ, a lɛ go ɛ́da bɛ́dɛmɛna naá kɔndɔ yɛ́ɛyɛ bá dɔ́ŋɔnɔmɔ́ bá amɔ́ Ogɔndɔ yá boolifíe.

³⁸Kanɛ́ batɔ biimée bá mba lɛ́ bá yáfana naá Nnyaŋá ya Asaŋa go go mo bódólonyo.