Read Nugunu Lókasɛ 22 Bible Online

Lókasɛ 22 - Nugunu bible

Lókasɛ 22

¹Gibíné gá bɛlɛ́dɛ bá kanɛ ondɔ yá go fudugenye gɛ́ɛgɛ bá dɔ́ŋɔnɔmɔ́ bá amɔ́ gibíné gá Pásɛ́ka ya Beyúdene gɛ́ mbaá ŋá gɛ́ ná lɛ́ mekúígíi[133].

²Bagɔ́nɔ́ɔ bá bedúmbí bɛbáágá naá Asaŋa na muloodio má bicele go ɛ́da go fúmbe pɛ́ ya go óna Yésusu, kanɛ́ bá mba lɛ́ bá díine boɛ́nɔ.

³Gɔ́ɔ Sátana i íŋenemú naá odɛ́má yá Yódasɛ Ɛsɛkalɛ́ɔtɛ, ummue naá Bɛɔdɔ́ɔ na bɛ́andɛ́ bá behúúní.

⁴Yódasɛ go ɛ́da gíde bagɔ́nɔ́ɔ bá bedúmbí bɛbáágá naá Asaŋa na bagɔ́nɔ́ɔ bá bebeŋíbéŋí Nnyaŋá yá Asaŋa, go go éme ukelú naá mbɔ́dɔ ya go bó dúene Yésusu.

⁵Gáábɔ́ go ɛ́da go békelenye makɔ́nɔ́, aŋa bá mbɔɔ́ ɔ́bɔ́ cɔ́mɔ yɛ́ɛyɛ, bá báá mo dánɛ́ná muinyí má go mo fáa.

⁶Yódasɛ go oliminyo, go ɛ́da go fúmbe gɛnɔ́gɔ́ gá gɛcamɛna gá go bó dúene Yésusu, gitúu gá batɔ gɛ́ dɛ íyímé.

⁷Gɛcamɛna gá gibíné gá bɛlɛ́dɛ bá kanɛ ondɔ yá go fudugenye go bola. Buisí moánɛ, bá mba lɛ́ bá sómba baaná bá bɛdómbáa nyɔlɔ́ go gibíné gá Pásɛ́ka ya Beyúdene.

⁸Yésusu go dómá Píele na Sáŋa a amɔ́ gáábɔ́ a amɔ́: «Ɛ́dá nɔnɔ no có gedinye manyáanya má gibíné gá Pásɛ́ka ya Beyúdene[134], goŋaá dɛ nyáa.»

⁹Gáábɔ́ go mo úhune bá amɔ́: «O lɛ́galɛgamɔ́ go amɔ́ dɛ ɛ́da má gedie áhanɛ́ɛ o?»

¹⁰Gɛ́hɛ́ go bó gundie a amɔ́: «Aŋa no gaá ní íŋéné naá tɛ́sɔnɔ, no gaá luméné na mɔtɔ na iséní há miimpo go odóɛ; mo bienéemú nɔnɔ naá nnyaŋá yɛ́ɛyɛ a gaá ní íŋéné hɔ́ɔ.

¹¹Manɛ́ no gaá nó oyáná mɔtɔ ba nnyaŋá no amɔ́: “Iloodio u úhene a amɔ́: Cómba yɛ́ɛyɛ kaá ná nyáá gibíné gá Pásɛ́ka ya Beyúdene olɔŋɔ na behúúní bámɛ ɛ lɔ́mɔ́ áhanɛ́ɛ o?”

¹²A gaá nyó dúfíe gɛantá gá nɛgɛlɛ́ naá nnyaŋá mmoɛná gedíelú aŋa gó háananamɔ́. Hɔ́ɔ háa no gaá ná có gedínyée manyáanya má gibíné.»

¹³Behúúní go ɛ́da, go huenye boóma buimée aŋa Yésusu a mbaá bó oyáná, bá báá gedíe manyáanya má gibíné gá Pásɛ́ka ya Beyúdene.

¹⁴Aŋa gɛcamɛna gɛ́ mbaá háá, Yésusu go lukumene naá tábɛ́la olɔŋɔ na baapótɛlɛ bɛ́hɛ́.

¹⁵Gɛ́hɛ́ go bó oyana a amɔ́: «Ŋgaá lɛ ndɛ́galɛga goŋaá nnyáa manyáanya má gibíné gá Pásɛ́ka ya Beyúdene máama olɔŋɔ nɛnyɔ́, otóotoɛ yá goŋaá ŋgɔ́bɛgɔnɔ.

¹⁶Mammana, ŋgaá nyó oyáná caá, cɛ ná gɔnɔ má nyáa, gó ɛ́da go éme aŋa buimée bɔ́ɔbɔ má oyamɔ́ naá cí, bó ŋgaá bó hóógío naá Bufuŋe bá Asaŋa.»

¹⁷Gɛ́hɛ́ go gɔ́lɔ ɛnnyóɛ́ná na mɔgɛ́bɔ kɔ́ɔ, a báá béhiigí Asaŋa, go oyɛda a amɔ́: «Gɔ́lɔ́ nɔnɔ ɛnnyóɛ́ná hɛ́ɛhɛ, no nyóɛna bɛɛnyɔ́ɔ biimée.

¹⁸Ŋgaá nyó oyáná mammana caá: cɛ ná gɔnɔ nyóɛna mɔgɛ́bɔ máama gó lama gó ɛ́da húme aŋa Bufuŋe bá Asaŋa bó nú úlemú.»

¹⁹Gɛ́hɛ́ go gɔnɔ gɔ́lɔ gɛlɛ́dɛ, a báá béhiigí Asaŋa, go gɛ́ gɛ́sagɛsa, go bó íŋene a amɔ́: «Bɔ́ɔbɔ bó lɔ́mɔ́ nnyɔ́dɔ yamɛ íŋénéelú go busío bɛ́nyɔ́. Ŋanánáa nɔnɔ boóma moánɛ no mbéeniŋenye.»

²⁰Naá nnyimé ya manyáanya, a báa ŋaáa caŋa mmue na ɛnnyóɛ́ná, a gálagala a amɔ́: «Bɔ́ɔbɔ bó lɔ́mɔ́ ɛnnyóɛ́ná há gɛpáa gá gɛlada bugúle na Asaŋa go manɔ́ŋɔ́ mámɛ máama má lɔ́mɔ́ udúgéelú go busío bɛ́nyɔ́[135].

²¹«Moánɛ, núúnée nɔnɔ, mɔ́ɔnyɔ a gaá ná túé, a nyáanya olɔŋɔ namɛ naá tábɛ́la háalá[136].

²²Mammana, Moɔnɔ́ ba mɔtɔ a gaá gúé aŋa Asaŋa a mbaá dílímínyée. Kanɛ́ mahana makɔ́nɔ́ na mɔ́ɔnyɔ a gaá ná mo dúé.»

²³Gáábɔ́ go ɛ́da go búúhenine ánɛ́ɛ naá olɔŋɔ yábɔ́ a gaá ná ŋaáa boóma aŋa bɔ́ɔbɔ nɔ́ɔnɔ.

²⁴Gɔ́ɔ bɛ́ ɛ́damɔ́ go suŋene suŋene go go íyime ánɛ́ɛ naá kadɛ́gadɛ́ɛ yabɔ́ a lɔ́mɔ́ ba go bɛ́ɛmba gɛkɔ́nɔ́nɔ́ɔ a dómba basɔ́gɔ́ɔ.

²⁵Yésusu go bó oyana a amɔ́: «Mefuŋe má bɛdɔŋɔ mí íligene batɔ bábɔ́, bɛgaaga bɛ́ bó míneminie, bɛ́ lɛ́galɛga goŋaá bá bɛ́ dɔ́ŋɔnɔ Beŋií besé.

²⁶Bó do báá nɔ́ɔnɔ naá kadɛ́gadɛ́ɛ yɛnyɔ́. Kanɛ́ mɔ́ɔnyɔ a lɔ́mɔ́ ogɔ́nɔ́ɔ naá kadɛ́gadɛ́ɛ yɛnyɔ́ a háanana go gɔ́lɔ undukí yá moádɔmbɔ́; mɔ́ɔnyɔ a nonamɔ́ basɔ́gɔ́ɔ, a gɔ́lɔ odɛ́nɛ́ yá uyogóní.

²⁷Mammana, ohanɛ́ a lɔ́mɔ́ ogɔ́nɔ́ɔ a dómbana basɔ́gɔ́ɔ o? Mɔ́ɔnyɔ a lɔ́mɔ́ ndukíi naá tábɛ́la lí, mɔ́ɔnyɔ a yɔgɔnɔmɔ́ o? Ábɔ caá mɔ́ɔnyɔ a lɔ́mɔ́ ndukíi naá tábɛ́la o? Kanɛ́ yɔmɔ́ɔ ndɛ́ naá kadɛ́gadɛ́ɛ yɛnyɔ́ aŋa mɔ́ɔnyɔ a yɔgɔnɔmɔ́.

²⁸«Bɛɛnyɔ́ɔ no lɛ́ báaba no mbaá kéléméné namɛ naá bɛdɔmbɔ bámɛ.

²⁹Gó moánɛ nnyó fáamɔ́ bufuŋe bá Asaŋa aŋa Baaba a mbaá páá.

³⁰No ŋga nyáányáa, no nyóanana naá tábɛ́la yamɛ naá yɔmɔ́ Bufuŋe; no lukumenene naá ɛŋgɛ́yɔ́ go go sómba bɛsɛnɛ bá egúli yɔ́ɔ́dɔ́ na áhandɛ́ yá Ɛ́sɛlahɛ́ɛlɛ.»

³¹Yésusu go gálɛda a amɔ́: «Símono, Símono, Sátana a bɔ́ɔ ɔŋɛnɔ bogaaga bá go nyó fúne aŋa bá fúnemú camɔ́ go go úlie bifúnú.

³²Kanɛ́ yɔmɔ́ɔ, ŋgaá bósógólónyóo go busío báhɔ, goŋaá, gioliminyo gáhɔ gɛ́ dɛ yímé. Aŋa o ná ncomɔ́ gunde naá yɔmɔ́ɔ, gíndényée batɛ́ɔbɛnɔ.»

³³Píele go mo oyana a amɔ́: «Daadáa, ndɛ́ pɛnɛ́ɛ goŋaá dɛ ɛ́da naá ncíbo ya gɛaŋɔ́, akɛ́ goŋaá dɛ gúenye.»

³⁴Yésusu go mo gundie a amɔ́: «Píele, otóotoɛ yá goŋaá gɛnɔ́mɛ gá ŋgɔɔ́ gɛ́ dádɛda ínoni yɛ́ɛyɛ, o gaá ŋá o báa go mbásáŋona ɛŋɛndɔ ɛdadɔ́ go amɔ́, o do ŋgíyíménée.»

³⁵Gɛ́hɛ́ go gɔnɔ bó oyana a amɔ́: «Gɔ́ɔgɔ mbaá nyó dómánáa kanɛ gɛgada gá muinyí, kanɛ gɛgada gá oŋɛndɔ, kanɛ nnaadɛna, no mba baŋɛ́dá boóma lí?» Gáábɔ́ go mo gundie bá amɔ́: «Akɛ́ gɔnɔ́ɔ.»

³⁶Gɛ́hɛ́ go bó oyana a amɔ́: «Godɔ́ɔdɔ, mɔ́ɔnyɔ a lɔ́mɔ́ na gɛgada gá muinyí, ŋgáa a gɛ́ gɔ́lɔ, caŋa mmue na mɔ́ɔnyɔ a lɔ́mɔ́ na gɛgada gá ɔŋɛndɔ; mɔ́ɔnyɔ a lɔ́mɔ́ a dɛ bɛanánáa kalafɔ, a háanana go dúe gɛla gɛ́hɛ́ gá isió, go go yɛ ɔ́ndɔ.

³⁷Ŋgaá nyó oyáná naá mammana caá, bó úhene goŋaá Ŋgɔ́ŋɛ́ yɛ́ɛyɛ ɛ bóhóogio naá nnyɔ́dɔ yamɛ: “Bá mba mo baná naá olɔŋɔ yá bepelípélí[137].” Ɛɛ́ɛŋ, buimée bɔ́ɔbɔ bó nnúunemú, bó ná bóhóogio.»

³⁸Gáábɔ́ go mo oyana bá amɔ́: «Daadáa, kalafɔ ɛ́handɛ́ sɛ́sɛ́ɛ.» Gɛ́hɛ́ go bó gundie a amɔ́: «Gó háanana nɔ́ɔnɔ.»

³⁹Yésusu go húme, go bofɛ́lánɔ́ bɛ́hɛ́ go go ɛ́da naá Ogɔndɔ yá boolifíe. Behúúní bɛ́hɛ́ bá báa lɛ gó mo biene.

⁴⁰Aŋa a mbɛɛ́ ɛ́dá bola naá hoóma há ndiemi, gɛ́hɛ́ go bó oyana a amɔ́: «Bósógólónyóomú nɔnɔ goŋaá no do obɛ́ná naá magálá má ɛsɔgɛdɔ.»

⁴¹Gɔ́ɔ a bó yáŋɛmɛdɛnamɔ́ boóma bá nnɛɛnɔ́ ya ɛdánɛ́, go gule enúu go cí, a bósógolonyo, a gálagala a amɔ́:

⁴²«Baaba, aáŋa o lɛ́galɛga, tɔ́ŋɔ́nɛ́náamɔ́ ɛnnyóɛ́ná há makánya hɛ́ɛhɛ. Kanɛ́ caá akɛ́ go ndɛ́ga yamɛ, ŋgáa bó báŋa go ndɛ́ga yahɔ.» [

⁴³Gɔ́ɔ ɛ́ŋgɛlɛsɛ ba Asaŋa a mo ɛ́nɛgɛnamɔ́ go go mo gíndenye.

⁴⁴Aŋa a mbaá bɛáa bofoá bá nigúe, Yésusu go ɛ́da go bósógolonyo na bogaaga gɔnɔ́ makɔ́nɔ́. Giukú naá mbɔ́dɔ ya manɔ́ŋɔ́, go ɛ́da go mo húmene, gɛ́ débe go cí.]

⁴⁵Naá nnyimé ya mbósógólí, gɛ́hɛ́ go fadɛgɛna, go nco gunde anáa behúúní bɛ́hɛ́ bá mbaá lɔmɔ́, go bó gíde go dɔnɔ́ɔ, na gɛdɔmbɔ gá odɛ́má go kánya.

⁴⁶Gɛ́hɛ́ go bó úhune a amɔ́: «Nɛɛ́nɛ no lɔ́mɔ́ go dɔnɔ́ɔ o? Fadɛ́gɛ́na nɔnɔ no bósógolonyo goŋaá no do obɛ́ná naá magálá má ɛsɔgɛdɔ.»

⁴⁷A gá gálagala nɔ́ɔnɔ, gɔ́ɔ gitúu gá batɔ gɛ́ magamɔ́ boasɛ. Ummue naá Bɛɔdɔ́ɔ na bɛ́andɛ́ bá behúúní, ufíno yɛ́hɛ́ Yódasɛ, mɔ́ɔ a mbaá lɛ a bó gɔ́gɔ, gɛ́hɛ́ go báyɛkɛna Yésusu go go mo gɔ́lɔ kude.

⁴⁸Yésusu go mo úhune a amɔ́: «Yódasɛ, o gɔ́lɔnɔ Moɔnɔ́ ba mɔtɔ kude go go mo dúe o?»

⁴⁹Báaba bá mbaá lɛ mo géŋgélídíelú bɛ́ ɛ́nana boóma bɔ́ɔbɔ bó mbaá lɔmɔ́ bá go bola, go mo úhune bá amɔ́: «Daadáa, dɛ háanana go somona kalafɔ sɛ́cɔ́ lí?»

⁵⁰Ummue naá bɔ́ɔ go canɛda uyogóní ba Ufuŋe yá bedúmbí bɛbáágá naá Asaŋa, a báá mo sólóná udúu yá ombɔ́gɔ onɔ́mɛ[138].

⁵¹Kanɛ́ Yésusu go bó oyana a amɔ́: «Dɛ́ɛ́na nɔnɔ, bó háanana nɔ́ɔnɔ.» Gɛ́hɛ́ go báláfɛna udúu yá mɔtɔ mɔ́ɔnyɔ, a báá mo éŋúgíe.

⁵²Gɔ́ɔ o oyanamɔ́ biimée báaba bá mbaá bégedíe go go mo gumbene, bagɔ́nɔ́ɔ bá bedúmbí bɛbáágá naá Asaŋa, bagɔ́nɔ́ɔ bá bebeŋíbéŋí Nnyaŋá ya Asaŋa na bafɛanɔ́ɔ bá gɛdɔŋɔ a amɔ́: «No búu úle na kalafɔ na ŋkɛ́báa aŋa go go gumbene ohándá!

⁵³Gɔ́ɔgɔ ŋgaá lɔmɔ́ nɛnyɔ́ miisí miimée naá Nnyaŋá ya Asaŋa, no lɛ́ kanɛ go tála ombɔ́gɔ. Kanɛ́ gɛcamɛna gɛ́nyɔ́ gɛ́gɛ́ɛ, gɛcamɛna gá bogaaga bá ohándá.»

⁵⁴Gáábɔ́ go yɔkɛnɔ Yésusu, go ɛ́da nɛhɛ́ naá nnyaŋá ya Ufuŋe yá bedúmbí bɛbáágá naá Asaŋa. Píele a bó bienene gɛyábá.

⁵⁵Bá mba fóáná gɛantá gá íyuke go tɛ́mádɛ́má ya nnyaáŋgadɛ́ɛ, Píele go lukumene olɔŋɔ na báaba bá mbaá lɛ hɔ́ɔ bá báá hɛ́ géŋgélídíe.

⁵⁶Okɔ́dɔ ba masɔ́mɔ ummue go ɛ́na Píele ndukíi naá gise gá íyuke, go mo ágɛna oŋgíso a amɔ́: «Múunyú tɔ́nɔ a mba lɛ́ olɔŋɔ nɛhɛ́.»

⁵⁷Kanɛ́ gɛ́hɛ́ go básáŋona a amɔ́: «Okɔ́dɔ, cɛ mo íyíménée.»

⁵⁸Moɔnɔ́ ba gɛcamɛna naá nnyimé, mɔtɔ untió go mo ɛ́na, go gálɛda a amɔ́: «Maamɔ́ɔ tɔ́nɔ o lɛ́ olɔŋɔ nabɔ́.» Píele go gundie a amɔ́: «Akɛ́ɛ, cɛ báá kɔ́ɔ.»

⁵⁹Boóma bá gigúlí gímmue naá nnyimé hɔ́ɔlɔ́, mɔtɔ gɔnɔ́ untió go ɛ́da go éleninye a amɔ́: «Bó lɛ́ mammana, mɔtɔ múunyú a mba lɛ́ olɔŋɔ nɛhɛ́; moatɛ́, a lɛ́ ba Bégelilée.»

⁶⁰Píele go gundie a amɔ́: «Cɛ íyíménée bɔ́ɔbɔ o lɛ́galɛgamɔ́ go oyɛda.» Hɔ́ɔ na hɔ́ɔ, a gá lɛ́ na dogálɔ naá nyuudé, gɛnɔ́mɛ gá ŋgɔɔ́ go dádɛda.

⁶¹Daadáa go bábondona, go ɛ́da go mo núune. Gɔ́ɔ Píele a béeniŋinyemú nogálɔ nɔ́ɔnɔ Daadáa a mbaá mo gálɛ́dá a amɔ́: «Otóotoɛ yá goŋaá gɛnɔ́mɛ gá ŋgɔɔ́ gɛ́ dádɛda ínoni, o gaá ŋá o báa go mbásáŋona ɛŋɛndɔ ɛdadɔ́.»

⁶²Píele go húme, a báá dúmbúgé na mbií gɛbɛ́ gɛbɛ́.

⁶³Batɔ báaba bá mbaá lɔmɔ́ bá beŋebeŋe Yésusu, bá mba lɛ́ bá mo fánɛnafanɛna, bá mo gide.

⁶⁴Bá báá mo gódá busío, bá mo úhene bá amɔ́: «Lɛncá ánɛ́ɛ a go góbamɔ́ o?»

⁶⁵Bá mba lɛ́ bá mo lába gɛcɛcá gá cigí síntió.

⁶⁶Aŋa gɛyɛ́nɛ́ gɛ́ mbaá bálá, bafɛanɔ́ɔ bá boɛ́nɔ bá Beyúdene, bagɔ́nɔ́ɔ bá bedúmbí bɛbáágá naá Asaŋa na muloodio má gicele go bábándɛgɛna. Gáábɔ́ go ŋa goŋaá bú úle na Yésusu naá Nɛgála nɛgɔ́nɔ́ nábɔ́.

⁶⁷Go mo úhune bá amɔ́: «Aáŋa o lɛ́ Mesíi, có oyánáamɔ́ nɔ́ɔ.» Gɛ́hɛ́ go bó gundie a amɔ́: «Caá nyó oyana nɔ́ɔ, no do gaá ŋgolímínyóo.

⁶⁸Caá kunde mbáá nyó úhúné ŋgúhune, no do gaá kundíe.

⁶⁹Kanɛ́ gó bayɛga godɔ́ɔdɔ, Moɔnɔ́ ba mɔtɔ a ŋga bɛ́ɛ́mbá ndukíi naá boayá bá ombɔ́gɔ onɔ́mɛ yá Asaŋa bogaaga[139].»

⁷⁰Biimée go oyɛda bá amɔ́: «O lɛ́ kanɛ́ Moɔnɔ́ ba Asaŋa!» Gɛ́hɛ́ go bó gundie a amɔ́: «No ó oyɛ́dá, ndɛ́ nɔ́ɔ.»

⁷¹Gɔ́ɔ bá gálɛdamɔ́ bá a amɔ́: «Dɛ dɛ gaá gɔnɔ́ fúmbe batɔ bóntió bá go mo sɔ́mɔnɔ, goŋaá dɛ á bɔ́ɔ́bɛ́nɔ́ bɛɛcɔ́ɔ moatɛ́ naá nyuudé nɛ́hɛ́!»