Read Nugunu Lókasɛ 23 Bible Online

Lókasɛ 23 - Nugunu bible

Lókasɛ 23

¹Gɔ́ɔ batɔ bá Nɛgála nɛgɔ́nɔ́ bá fadɛgɛnamɔ́ biimée, go ɛ́da na Yésusu naá Pɛlátɛ.

²Gáábɔ́ go ɛ́da go mo sɔ́mɛnɔnɔ bá amɔ́: «Dɛ mba huenyée mɔtɔ mɔ́ɔnyɔ a búlumuncenye gɛdɔŋɔ, o oyanɛna batɔ a amɔ́, bá dɛ soáa tásɛ ya Sɛsáalɛ, a gɔnɔ béfínenye a amɔ́ a lɛ́ Mesíi, a lɛ́ ufuŋe.»

³Pɛlátɛ go mo úhune a amɔ́: «O lɛ́ ufuŋe yá Beyúdene lí?» Yésusu go mo gundie a amɔ́: «Go ó oyɛ́dá[140].»

⁴Pɛlátɛ go oyana bagɔ́nɔ́ɔ bá bedúmbí bɛbáágá naá Asaŋa na gitúu gá batɔ a amɔ́: «Cɛ ɛ́nánáa boóma bɔ́ɔbɔ bó lɔ́mɔ́ bá go ubie mɔtɔ mɔ́ɔnyɔ na gɛsɛnɛ.»

⁵Kanɛ́ bɔ́ɔ go dɛ́mbɛga bá amɔ́: «A búlumuncenye gɛdɔŋɔ na gohúunenye gɛ́hɛ́. A mba bayɛ́gá naá Gelilée, a báá bááká naá Yudée uŋkimée, gɔ́gɔ́ɔ godɔ́ɔdɔ a ná lɔ́mɔ́ háalá.»

⁶Aŋa Pɛlátɛ a mbɔɔ́ ɔ́bɔ́ dogálɔ dɔ́ɔdɔ, a báa lɛ gó úhune a amɔ́: «Mɔtɔ mɔ́ɔnyɔ a lɛ́ ba Bégelilée o?»

⁷Aŋa a mbɔɔ́ ɔ́bɔ́ goŋaá Yésusu ɛ ɛ́da go úlene naá gigísi ga cí gɛ́ɛgɛ Elóode a mbaá lɛ ufuŋe hɔ́ɔ, gɛ́hɛ́ go mo dómɛna Yésusu, goakɛ́ Elóode moánɛ a mba lɛ́ tɔ́nɔ naá Yolósalɛmɛ medúgú moánɛ mɔ́ɔmɔ.

⁸Gɔ́ɔ Elóode ɔ ɔ́bɔmɔ́ bese makɔ́nɔ́ aŋa a mbɛɛ́ ɛ́ná Yésusu, goakɛ́ a mba lɛ́ na ncaná ya go mo ɛ́na fueké go moóma mɔ́ɔmɔ a mbɔɔ́ ɔ́bɔ́ bó oya go busío bɛ́hɛ́. A mba lɛ́ a béeniŋenye goŋaá a gɛɛ́ ɛ́ná Yésusu a ŋa gɛsɛɔ.

⁹A báa lɛ gó mo úhune gɛca gá ŋgúhune, kanɛ́ Yésusu go mo obɛna gɛmámɔ́.

¹⁰Bagɔ́nɔ́ɔ bá bedúmbí bɛbáágá naá Asaŋa na muloodio má gicele bá mba lɛ́ hɔ́ɔ, bɛ́ ɛ́dana naá busío na go sɔ́mɛnɔnɔ Yésusu na bogaaga.

¹¹Elóode na bisimbi bɛ́hɛ́ go ɛ́da go mo hɔnɔ, bá mo fánɛnafanɛna, bá báá mo ágá gɛmbɛ́lɛŋɛnyɛ gá gɛla, bá báa lɛ gó mo gundie naá Pɛlátɛ.

¹²Cóá, Pɛlátɛ na Elóode ba mba lɛ́ babɛlɔ́bɛlɔ, buisí moánɛ bɔ́ɔbɔ, bá bɛ́ɛ́ ɛ́yá begúle.

¹³Gɔ́ɔ Pɛlátɛ a dɔ́ŋɛnɔmɔ́ bagɔ́nɔ́ɔ bá bedúmbí bɛbáágá naá Asaŋa, mefuŋe na boɛ́nɔ,

¹⁴a amɔ́ gáábɔ́ a amɔ́: «No á ŋgúléné na mɔtɔ mɔ́ɔnyɔ no amɔ́, a búlumuncenye gɛdɔŋɔ. Yɔmɔ́ɔ ŋgaá mo bidée naá oŋgíso yɛ́nyɔ́, cɛ á gá ɛ́ná boóma bɔ́ɔbɔ a háananamɔ́ na gɛaŋɔ́ go bɔ́, naá moóma mɔ́ɔmɔ no mo sɔ́mɔnɔmɔ́ go mɔ́.

¹⁵Akɛ́ Elóode a lɛ́ kanɛ go ɛ́na boóma, goakɛ́ a á có mo gundínyée. Náana, mɔtɔ mɔ́ɔnyɔ a lɛ́ kanɛ go ŋa gɛoba gɛ́ɛgɛ a háananamɔ́ go gúe go gɛ́.

¹⁶Kaá ŋaáa kanɛ́ goŋaá bá mo sóala bɛságɔ, naá nnyimé, ndɛ go mo dɛ́ɛna.» [

¹⁷Naá gibíné gá Pásɛ́ka ya Beyúdene giimée, Pɛlátɛ a mba lɛ́ a húmenye mɔtɔ ummue naá ncíbo ya gɛaŋɔ́.]

¹⁸Batɔ biimée go ɛ́da go ánca bá amɔ́: «Óná mɔtɔ mɔ́ɔnyɔ, o có húminye Balábasɛ.»

¹⁹Balábasɛ mɔ́ɔnyɔ a mbo óná mɔtɔ gɛcamɛna gɛ́ɛgɛ ologodo a mboó obá naá tɛ́sɔnɔ, boóma moánɛ bɔ́, a mbaá lɔmɔ́ naá ncíbo ya gɛaŋɔ́.

²⁰Aŋa Pɛlátɛ a mbaá lɔmɔ́ a lɛ́galɛga go húmie Yésusu, gɛ́hɛ́ go gɔnɔ gálɛda gitúu gá batɔ.

²¹Kanɛ́ batɔ go ɛ́da go ánca bá amɔ́: «Mo gilénéemú naá kolósi! Mo gilénéemú naá kolósi!»

²²Pɛlátɛ kanɛ́ go úhune gitúu gá batɔ go oŋɛndɔ yá gádadɔ́ɔ a amɔ́: «Kasɛ́á gɛgáda gá boóma a á ná ŋaáa kanɛ́ o? Cɛ á gɛ́ ɛ́ná boóma bɔ́ɔbɔ a háananamɔ́ na nigúe go bɔ́. Kaá ŋaáa goŋaá bá manɛ mo sóala bɛságɔ, naá nnyimé hɔ́ɔlɔ́, ndɛ go mo dɛ́ɛna.»

²³Kanɛ́ bɔ́ɔ go ɛ́da go éleninye, bá ánca bá amɔ́, ŋgáa a gilene Yésusu naá kolósi. Gɛánca gábɔ́ go mánɛgɛna.

²⁴Pɛlátɛ go sómba goŋaá a hóogio ŋgɔŋɛnɔ yabɔ́.

²⁵Gɔ́ɔ a húmiemú mɔ́ɔnyɔ a mbaá lɔmɔ́ naá ncíbo ya gɛaŋɔ́ go busío bá ologodo na ŋgónana, mɔ́ɔnyɔ bá mbaá lɔmɔ́ bú úhene; naá Yésusu, a báá bó íŋéné goŋaá bá ŋa nɛhɛ́ aŋa bá lɛ́galɛgamɔ́.

²⁶Bá ná lɛ́ go húmene na Yésusu naá tɛ́sɔnɔ, gáábɔ́ go lumene na mɔtɔ ufíno yɛ́hɛ́ Símono, ba tɛ́sɔnɔ ya Siléene, ɛ ɛ́ ɛ́da go úlene naá ntɛ́mɛ́; bisimbi go mo yɔkɛnɔ bɛ́ báá mo dóɛ́gɛ́ná kolósi, a síene ɛnda na yɛ́ naá nnyimé ya Yésusu.

²⁷Gɛcɛcá gá batɔ na bakɔ́dɔ gɛ́ mo bienene: bakɔ́dɔ bá mba lɛ́ bá mo baŋa, bɛ́ ɛ́ ɛ́da bá bégide gɛsasɔ naá ndoŋá ya Beyúdene.

²⁸Yésusu go bó bábondona a amɔ́: «Bakɔ́dɔ bá Yolósalɛmɛ, no do baŋáa gámɛ; kanɛ́ baŋáa nɔnɔ go busío bɛ́nyɔ́ moatɛ́ na gá baaná bɛ́nyɔ́,

²⁹goakɛ́ medúgú má úlene máama bá ŋgaá oyáa bá amɔ́: “Besé na bɛhóádá bá bakɔ́dɔ, besé na bakɔ́dɔ báaba bá mbaá lɔbɛ́nɔ́ kanɛ go bíene, kanɛ go yúuŋenye.”

³⁰Gɔ́ɔ batɔ bá ŋgɛɛ́ ɛ́dá go gálagala ɛgɔndɔ bá amɔ́: “Có obɛ́náamɔ́ nɔnɔ!” go bɛɛnɛ bá amɔ́: “Có ɔsɛ́gɔ́ɔmɔ́ nɔnɔ[141]!”

³¹Mammana, bá amɔ́ bá ŋa náana go boɛ́tɛ bogɔ́sɔ, bó ŋgaá bɛ́ɛ́mbá nɛɛ́nɛ go boɛ́tɛ bugúe o?»

³²Gɛcamɛna gímmue eé gímmue, bá mbɛ ɛ́dá na bahándá báandɛ́ go go ɛ́da bó óna olɔŋɔ na Yésusu.

³³Aŋa bá mbɛɛ́ ɛ́dá bola naá hoóma bá dɔ́ŋɔnɔmɔ́ bá amɔ́ «Giŋóŋkólóŋó gá odóɛ», bisimbi go gilene Yésusu hɔ́ɔ naá kolósi na bahándá báandɛ́[142] gɛcamɛna gímmue eé gímmue, onyɔ moánɛ naá yɛhɛ́ kolósi; mɔ́ɔnyɔ naá boayá bá ombɔ́gɔ onɔ́mɛ, mɔ́ɔnyɔ naá boayá bá ombɔ́gɔ odádɛ́.

³⁴Gɔ́ɔ Yésusu a gálɛdamɔ́ a amɔ́: «Baaba, bó hééhínyéemú, mammana, bá dɛ íyíménée boóma bɔ́ɔbɔ bá ŋananamɔ́.» Bisimbi go nɔɔ bɛla bɛ́hɛ́ go adɔ go go bɛ́ abɛdana[143].

³⁵Boɛ́nɔ bó mba lɛ́ hɔ́ɔ tɛ́nɛ́ɛ bó núune. Naá boayá bá mefuŋe má Beyúdene, má mba lɛ́ hɔ́ɔ má kɛ́nya[144] má amɔ́: «A mba sódónyóo bóncodío; ŋgáa a bósódio mɔ́ɔ moatɛ́ aáŋa a lɛ́ Mesíi ba Asaŋa, Giiyide.»

³⁶Bisimbi tɔ́nɔ bɛ́ mba lɛ́ bɛ́ mo hɔnɔ; bɛ́ báá mo báyɛkɛ́ná go go mo dóŋio gɛtóánɔ́ɔ gá mɔgɛ́bɔ[145],

³⁷bɛ́ gálagala bɛ́ amɔ́: «Aáŋa o lɛ́ ufuŋe yá Beyúdene, bósódíomú maamɔ́ɔ moatɛ́.»

³⁸Bá bɔ́ɔ́ ɔ́ŋɔ́ naá gɛgɔ́gɔ́ náana: «Mɔ́ɔnyɔ a lɔ́mɔ́ ufuŋe yá Beyúdene», bá báá gɛ́ gilénée naá odóɛ yá kolósi.

³⁹Ohándá ummue gilénéelú naá kolósi, a mo sɛga a amɔ́: «Ábɔ, o do báá Mesíi, bósódíomú maamɔ́ɔ moatɛ́, o có sódio bɛɛcɔ́ɔ tɔ́nɔ.»

⁴⁰Kanɛ́ ohándá mɔ́ɔnyɔ untió go áncɛdɛna sɔ́gɔ́ɔ mɔ́ɔnyɔ a amɔ́: «O do hálámánánáa Asaŋa o? Maamɔ́ɔ o bɛananamɔ́ noséésényée númmue eé númmue.

⁴¹Go busío bɛ́cɔ́ bó lɛ́ tɛ́nɛ́ɛ, goakɛ́ meŋiigíe mɛ́cɔ́ má háanana na noséésényée nɔ́ɔnɔ dɛ dáŋabamɔ́ nɔ́ɔnɔ; kanɛ́ mɔ́ɔnyɔ a lɛ́ kanɛ go ŋa gɛbɛ́ gá boóma.»

⁴²Gɛ́hɛ́ go gɔnɔ go oyɛda a amɔ́: «Yésusu, mbééníŋínyéemú aŋa o ŋgaá ncó gunde naá bufuŋe báhɔ.»

⁴³Yésusu go mo gundie a amɔ́: «Mammana, ŋgaá go oyana caá, ínoni yɛ́ɛyɛ, o gaá bɛ́ɛ́mbá namɛ naá Peledísi[146].»

⁴⁴Bó mba lɛ́ boóma bá tólóbóo, mbíno go dómba go oba naá gɛdɔŋɔ giimée, gó bɛ́ɛ́ ɛ́dá húme bigúlí bɛ́dadɔ́.

⁴⁵Buisí go dómba go fúe. Sanda ya goodo yɛ́ɛyɛ ɛ mbaá lɔmɔ́ ɛ sala Nnyaŋá ya Asaŋa go cómba ɛ́handɛ́[147] go salɛga go biseli bɛ́andɛ́ go tɛ́mádɛ́má.

⁴⁶Gɔ́ɔ Yésusu a áncɛdamɔ́ ukelú ogɔ́nɔ́, go gálɛda a amɔ́: «Baaba, ŋgaá gundíe giliíli gámɛ naá ɛmbɔ́gɔ yahɔ[148].» Aŋa a mbaá gálɛ́dá nɔ́ɔnɔ, gɛ́hɛ́ go obɛnɛna.

⁴⁷Ogɔ́nɔ́ɔ ba bisimbi ɛ ɛ́nana boóma bɔ́ɔbɔ bó mbaá bádómbánáa, gɛ́hɛ́ go ɛ́da go gúmenye Asaŋa a amɔ́: «Mammana, mɔtɔ mɔ́ɔnyɔ a mba lɛ́ mɔtɔ ba bɛtɛ́nɛ́ɛ.»

⁴⁸Batɔ báaba bá mbaá bábándáa go go lɛ́ɛma boóma buimée bɔ́ɔbɔ bó mbaá bádómbánáa, go gundene naá nnyaŋá sábɔ́, bɛ́ ɛ́dá bá bégide ɛmbɔ́gɔ go gɛsasɔ na mogódí.

⁴⁹Begúle bɛ́hɛ́ biimée, na bakɔ́dɔ báaba bá mbaá lɔmɔ́ bá mo bienene gó bayɛga naá Gelilée, bá mba lɛ́ tɛ́nɛ́ɛ gɛyábá[149], go go núune bɔ́ɔbɔ bó mbaá lɛ bó bádómbana.

⁵⁰Gɔ́ɔ mɔtɔ ummue ba Nɛgála nɛgɔ́nɔ́, ufíno yɛ́hɛ́ Yósɛbɛ, u úlemú a báá bolá. A mba lɛ́ mɔtɔ ba odɛ́má, mɔ́ɔ gɔnɔ́ gɛtɛ́nɛ́ɛ.

⁵¹A dɛ mbáa lɛ ukelú nabɔ́ go go sómba gáábɔ́ gá gɛsɛnɛ na meŋiigíe mábɔ́ kɛ́. A mba lɛ́ mbíényée ya Alɛmatɛ́ɛ, tɛ́sɔnɔ mmue ya Yudée[150], a mba lɛ́ a gɛ́gana Bufuŋe bá Asaŋa.

⁵²Mɔtɔ mɔ́ɔnyɔ go ɛ́da naá Pɛlátɛ go go mo úhune gigúe gá Yésusu.

⁵³Yósɛbɛ go úlie kanɛ́ gigúe gá Yésusu naá kolósi, a báá gɛ́ máŋánáa naá nnɔ́mbɔ́ ya gɛla, a báa lɛ gó ɛ́da gɛ́ bídiginye naá gɛbɛ́lá gɛ́ɛgɛ bá mbaá dímé naá gɛdánɛ́dánɛ́, anáa bá mbaá ŋá bá gá lɛ́ bá dɛ miée mɔtɔ kɔ́ɔ.

⁵⁴Gó mba lɛ́ gobélie gá sábadɛ, buisí bá go bégedegedie.

⁵⁵Bakɔ́dɔ báaba bá mbaá lɛ olɔŋɔ na Yésusu gó bayɛga naá Gelilée, go ɛ́da go bienene Yósɛbɛ. Gáábɔ́ go núune gɛbɛ́lá, bá bɛ́ɛ́ ɛ́ná aŋa bá mbaá bídígínyée gigúe gɛ́hɛ́.

⁵⁶Gáábɔ́ go gunde naá tɛ́sɔnɔ, go gedegedie megúdé má go fofa má goŋaá bá gɛɛ́ ɛ́dá fúenene gigúe[151]. Buisí bá sábadɛ, bá báá dúúgídé aŋa gicele gɛ́ mbaá lɔ́mɔ́ gɛ́ oya[152].