Read Nugunu Lókasɛ 3 Bible Online

Lókasɛ 3 - Nugunu bible

Lókasɛ 3

¹Naá nnyómá ya buinyo ya bufuŋe bogɔ́nɔ́ bá Sɛsáalɛ Tɛbɛ́ɛlɛ[27], Pɔ́nsɛ Pɛlátɛ mɔ́ɔ ŋgɔ́mɔnɔ ba Yudée, Elóode, ufuŋe yá Gelilée, ondimóní Fílibi, ufuŋe yá bigísi bá cí bɛ́ɛbɛ bɛ́ lɔ́mɔ́ Itulée na Telekoníte, Lɛsánɛasɛ, ufuŋe yá Ébilene,

²Háanɛ nɛhɛ́ na Káyɛfɛ, bagɔ́nɔ́ɔ bá bedúmbí bɛbáágá naá Asaŋa. Kɔ́ɔ Asaŋa a gálagalamɔ́ Sáŋa, ohaŋa ba Sakalɛ́a naá giolóo gá bodɛ́agadɛ́.

³Sáŋa go biene pɛ́, a báá bégéŋgélídíe gigísi gá cí giimée gá Yɔlɔdɛ́ŋɛ, o oyanɛna batɔ goŋaá bá núgie gɛɔyɔ gábɔ́, bá béyuminye, Asaŋa a héehinye bɛlɔgɔ bábɔ́.

⁴Aŋa bó lɔ́mɔ́ ɔ́ŋɔ́ɔlú naá kálata ya mbúsí ya Asaŋa Iseyíi goŋaá: «Ukelú yá mɔtɔ yó dónogogana naá giolóo gá bodɛ́agadɛ́ yó amɔ́: “Gedégédíe nɔnɔ pɛ́ ya Daadáa, bónónáa nɔnɔ ŋŋɛndɛ́ná sɛ́hɛ́”.»

⁵Gídée nɔnɔ dufendu duimée, no sile ɛgɔndɔ iŋkimée na bɛɛnɛ biimée, bónónáa nɔnɔ mbónóŋgolío iŋkimée sá bɛbala, no yɛ́ya bɛgáda bá pɛ́;

⁶gɔ́ɔ mɔtɔ uŋkimée a ŋgɛɛ́ ɛ́ná aŋa Asaŋa a có sódonyomú.

⁷Gitúu gá batɔ gɛ́ mba lɛ́ gɛ́ úlenine Sáŋa goŋaá a bó yuminye. Mɔ́ɔ a lɛ go ɛ́da go bo gálagala a amɔ́: «Bɛɛnyɔ́ɔ pɛ́nɛ sɛ́ɛsɛ, ánɛ́ɛ a ná nyó fáá nciŋí ya go pamba go mpímí ya Asaŋa yɛ́ɛyɛ yɛ úlenemú o?

⁸Dúfényée kanɛ́ nɔnɔ na meŋiigíe má bese, bó loodio goŋaá no á núgíe gɛɔyɔ gɛ́nyɔ́. Kanɛ́, no do ɛ́dá go bágálɛnagalɛna naá odɛ́má no amɔ́: “Ábalaháma a lɛ́ isée kɔ́nɔ́ɔ bɛcɔ́[28].” Ɛɛ́ɛŋ, ŋgaá nyó oyáná caá, Asaŋa a lɛ́ ba go gɔ́lɔ adánɛ́ yáaya, yá ɛ́ya baaná bá Ábalaháma.

⁹Moánɛ, iléŋú hɛ́ ná lɛ́ mekúígíi go go sómba ɛŋaŋá ya mɛɛ́tɛ; boɛ́tɛ buimée bɔ́ɔbɔ bó lɔ́mɔ́ bó do úmée bɛnɔ́gɔ́ bá bɛsamɔ́ bá bó sómba, bá bó nɔɔ naá íyuke.»

¹⁰Kɔ́ɔ gitúu gɛ́ úhunemú Sáŋa gɛ́ amɔ́: «Dɛ háananamɔ́ go ŋa nɛ́ɛnɛ o?»

¹¹Gɛ́hɛ́ go bó gundie a amɔ́: «Mɔ́ɔnyɔ a bɛananamɔ́ bɛla bɛ́andɛ́, ŋgáa a fáa mɔ́ɔnyɔ a lɔ́mɔ́ a dɛ bɛanánáa gímmue. Mɔ́ɔnyɔ a lɔ́mɔ́ na boóma bá go nyáa, a ŋa caŋa táŋɛ́ mmue nɔ́ɔ.»

¹²Bogólí tásɛ tɔ́nɔ bá búú úlíné Sáŋa goŋaá a bó yuminye, bá báá gó mo úhune bá amɔ́: «Iloodio, dɛ háananamɔ́ go ŋa nɛɛ́nɛ o?»

¹³A báá bó gundíe a amɔ́: «No do ɛ́dá go suugenye batɔ goŋaá bá soanana bó dómba bɔ́ɔbɔ gicele gɛ́ úhenemú.»

¹⁴Bisimbi bɛ́ báá mo úhúné tɔ́nɔ bɛ́ amɔ́: «Bɛɛcɔ́ɔ dɛ háananamɔ́ go ŋa nɛɛ́nɛ o?» A báá bó gundíe a amɔ́: «No do bɔgɔ́ boóma bá mɔtɔ, ɛ́na lí, no do gaŋɛ́náa mɔtɔ na gɛsɛnɛ gá kanɛ kɔ́ɔ. Ɔ́bɔ́nɔ́ɔ nɔnɔ kanɛ́ bese na bɛsoɛná bɛ́nyɔ́.»

¹⁵Aŋa boɛ́nɔ bó mbaá lɛ naá gogɛ́gana gá muúle má Mesíi, batɔ biimée bá búúhene naá ɛdɛ́má yabɔ́ goŋaá ɛ́daga Sáŋa a gaá ná bɛ́ɛ́mbá Mesíi.

¹⁶Gɛ́hɛ́ go gɔ́lɔ dogálɔ go bó oyana a amɔ́: «Yɔmɔ́ɔ nnyó yumeninye na miimpo, kanɛ́ mɔtɔ mɔ́ɔnyɔ a lɔ́mɔ́ na bogaaga a tómbana u úlene, cɛ háánánáa naá odɛ́nɛ́ yá go fulune nuelí ná nnaadɛna sɛ́hɛ́. Mɔ́ɔ, a ná nyó yumeninyemú naá Gimmúmpúu gá Giliíli na íyuke.

¹⁷A lɛ́ na gifúne ŋkeŋé[29] go ombɔ́gɔ go go úlenye bifúnú. A bɛ́dɛgana camɔ́ naá gɛɔ́lɔ gɛ́hɛ́, a lókononyo bifúnú naá íyuke há kanɛ go fúenene.»

¹⁸Náana gɔ́ɔ Sáŋa a mbaá lɛ a fáanana boɛ́nɔ gɛca gá ɛsɔ́mɔ gíncodío gɔnɔ́ go go bó dúmeninye Gɛnɔ́gɔ́ gá Cɔ́mɔ.

¹⁹Kanɛ́ Sáŋa a mba goomɛ́ná ufuŋe Elóode, goakɛ́, a mba giŋé Ɛlɔdɛ́adɛ, ogánɛ́ ondimóní, gɔnɔ́ na moóma mobɛ́ muimée mɔ́ɔmɔ a mbaá ŋanánáa.

²⁰Elóode go gɔnɔ ŋa gɛbɛ́ gá boóma gíncodío: a báá ágá Sáŋa naá ncíbo ya gɛaŋɔ́.

²¹Naá nnyimé ya boɛ́nɔ buimée go béyuminye, Yésusu tɔ́nɔ a báá béyumínyée. Naá gɛcamɛna gɛ́ɛgɛ a mbaá lɛ a bósógolonyo, mmoɛná go bébuune.

²²Gimmúmpúu gá Giliíli go mo siisene, gɛ́ núunenine naá nnyɔ́dɔ aŋa yɛ́ɛyɛ ya mmɛŋá, ukelú go ɛ́da go úle naá mmoɛná yó amɔ́: «O lɛ́ Moɔnɔ́ bamɛ ba odɛ́má, bɛyaŋa bámɛ biimée bɛ́ lɔ́mɔ́ naá maamɔ́ɔ[30].»

²³Yésusu a mba lɛ́ a bɛanana boóma bá nnyómá nitíno na sɛ́ɔ́dɔ́ gɔ́ɔgɔ a mbaá bayɛga buelí bɛ́hɛ́. A mba lɛ́, go gobéeniŋenye gá batɔ, ohaŋa ba Yósɛbɛ, ohaŋa bá Héli,

²⁴ohaŋa ba Mátatɛ, ohaŋa ba Léfi, ohaŋa ba Melekíi, ohaŋa ba Yánayɛ, ohaŋa ba Yósɛbɛ,

²⁵ohaŋa ba Matatɛ́asɛ, ohaŋa ba Ámoso, ohaŋa ba Néhume, ohaŋa ba Heselíi, ohaŋa ba Nágayɛ,

²⁶ohaŋa ba Maatɛ, ohaŋa ba Matatɛ́asɛ, ohaŋa ba Sɛ́mɛnɛ, ohaŋa ba Yósɛkɛ, ohaŋa ba Yóda,

²⁷ohaŋa ba Yoánana, ohaŋa ba Olɛ́sa, ohaŋa ba Solababɛ́ɛlɛ, ohaŋa ba Selétiele, ohaŋa ba Nelíi,

²⁸ohaŋa ba Melekíi, ohaŋa Edíi, ohaŋa ba Kósama, ohaŋa ba Ɛlɛmadáma, ohaŋa Ɛ́lɛ,

²⁹ohaŋa ba Yésusu, ohaŋa ba Elieséele, ohaŋa ba Yólime, ohaŋa ba Mátatɛ, ohaŋa ba Léfi,

³⁰ohaŋa ba Símiyono, ohaŋa ba Yóda, ohaŋa ba Yósɛbɛ, ohaŋa ba Yónama, ohaŋa ba Elíekime,

³¹ohaŋa ba Mɛlɛ́a, ohaŋa ba Mɛna, ohaŋa ba Mátata, ohaŋa ba Natáma, ohaŋa ba Défidi,

³²ohaŋa ba Yesée, ohaŋa ba Yóbɛdɛ, ohaŋa ba Búuse, ohaŋa ba Sáála, ohaŋa ba Nasɔ́ɔnɛ,

³³ohaŋa ba Amɛnadába, ohaŋa ba Adɛmɛ́ɛnɛ, ohaŋa ba Eléni, ohaŋa ba Ɛ́sɛlɔmɔ, ohaŋa ba Fálɛsɛ, ohaŋa ba Yóda,

³⁴ohaŋa ba Yɔ́kɔbɔ, ohaŋa ba Ɛ́saga, ohaŋa ba Ábalaháma, ohaŋa ba Tála, ohaŋa ba Nákɔlɔ,

³⁵ohaŋa ba Séluku, ohaŋa ba Olagóo, ohaŋa ba Fálɛkɛ, ohaŋa ba Ɛbɛ́ɛlɛ, ohaŋa ba Sala,

³⁶ohaŋa ba Kayɛnáma, ohaŋa ba Alafásadɛ, ohaŋa ba Seme, ohaŋa ba Nóe, ohaŋa ba Lamɛ́kɛ,

³⁷ohaŋa ba Matósala, ohaŋa ba Ɛ́nɔgɔ, ohaŋa ba Yálɛtɛ, ohaŋa ba Malɛ́lɛ́ɛlɛ, ohaŋa ba Kayɛnáma,

³⁸ohaŋa ba Enóse, ohaŋa ba Sɛ́tɛ, ohaŋa ba Ádama, ohaŋa ba Asaŋa.