Read Nugunu Lókasɛ 4 Bible Online

Lókasɛ 4 - Nugunu bible

Lókasɛ 4

¹Gɔ́ɔ Yésusu, dácɛ na Gimmúmpúu gá Giliíli, u úlukiemú naá máŋɛ́ má Yɔlɔdɛ́ŋɛ. Giliíli go mo gɔ́gɛdɔ naá giolóo gá bodɛ́agadɛ́.

²Kɔ́ɔ a ŋamɔ́ hɔ́ɔ medúgú otíno áhandɛ́, ohándá a mo gogona. Medúgú mɔ́ɔmɔ miimée a dɛ mbáa lɛ a nyáanya. Kanɛ́ aŋa má mbaá maná, gɛ́hɛ́ go bɛa ncaná.

³Ohándá go mo oyana a amɔ́: «Aáŋa[31] o lɛ́ Moɔnɔ́ ba Asaŋa, gálɛ́da ɛdánɛ́ nɛ́ɛnɛ, nɛ́ ɛ́ya boóma bá go nyáa.»

⁴Yésusu go mo gundie a amɔ́: «Bó lɛ́ ɔ́ŋɔ́ɔlú goŋaá: “Caá goana go manyáanya gɔ́ɔ mɔtɔ ɔ ɔyɔmɔ́[32]”.»

⁵Gɔ́ɔ ohándá a bólɛgamɔ́ nɛhɛ́ naá mmoɛná gúunú, go mo dúfie mefuŋe má cí miimée go moɔnɔ́ ba gɛcamɛna,

⁶gɛ́hɛ́ go mo oyana a amɔ́: «Kaá go íŋéné nɛgaŋa niimée nɛ́ɛnɛ na nigúmi ná mefuŋe máama; muimée mó ɔ́bɔnɛnɔmɔ́ námɛ, ndɛ́ ba go fáá akɛ́ ánɛ́ɛ mɔ́ɔnyɔ ndɛ́galɛgamɔ́.

⁷Go amɔ́ o mbúlugie, o gaá bɛáa muimée.»

⁸Yésusu go mo gundie a amɔ́: «Bó lɛ́ ɔ́ŋɔ́ɔlú goŋaá: “Búlúgényée Daadáa Asaŋa bahɔ, o mo yɔgɔnɛnɔ mɔ́ɔ mokáa[33]”.»

⁹Gɔ́ɔ ohándá ɛ ɛ́damɔ́ nɛhɛ́ naá Yolósalɛmɛ, go mo búlugie naá tóndi ya Nnyaŋá ya Asaŋa, a amɔ́ gɛ́hɛ́ a amɔ́: «Aáŋa o lɛ́ Moɔnɔ́ ba Asaŋa mammana, bécuméemú go cí, goakɛ́ bó lɛ́ ɔ́ŋɔ́ɔlú goŋaá:

¹⁰“A ŋgi íŋéné bɛɛ́ŋgɛlɛsɛ bɛ́hɛ́ bogaaga, bá go beŋebeŋe”;

¹¹gɔnɔ́ “bá go nɛ́hanɛha na ɛmbɔ́gɔ yabɔ́, gɛgɔ́ndɔ́ gáhɔ gɛ́ dɛ kúkéné ɛdánɛ́[34]”.»

¹²Yésusu go mo gundie a amɔ́: «Bó lɛ́ ɔ́ŋɔ́ɔlú goŋaá: “O do ná gogona Daadáa Asaŋa bahɔ[35]”.»

¹³Aŋa ohándá a mbaá ŋá a báa go gogona Yésusu pɛ́ iŋkimée nɔ́ɔnɔ a dɛ mo bɛáa, gɛ́hɛ́ go mo síe, a báá dómbá go go gɛ́gana oŋɛndɔ yúncodío[36].

¹⁴Gɔ́ɔ Yésusu a gundemú naá Gelilée dácɛ na bogaaga bá Gimmúmpúu gá Giliíli. Ufíno yɛ́hɛ́ go saa naá gigísi ga cí moánɛ giimée.

¹⁵A mba lɛ́ a húunenye naá nnyaŋá sá mbósógólí, batɔ biimée bó oya nigúmi nɛ́hɛ́.

¹⁶Yésusu ɛ ɛ́ ɛ́dá naá Násalɛdɛ anáa a mbaá gomá, gɛ́hɛ́ go íŋene naá nnyaŋá ya mbósógólí go buisí bá sábadɛ, bó mbaá lɛ naá caŋa yɛ́hɛ́. Gɔ́ɔ a fadɛgɛnamɔ́ go go bana.

¹⁷Gáábɔ́ go mo íŋene kálata ya mbúsí ya Asaŋa Iseyíi, go yɛ fulune, go ɛ́na hoóma háaha há mbaá lɔ́mɔ́ ɔ́ŋɔ́ɔlú goŋaá:

¹⁸«Giliíli ba Daadáa a lɛ́ naá yɔmɔ́ɔ, goakɛ́ a mba ŋgiyídé goŋaá mbóó oyánɛ́náa basógasoga Gɛnɔ́gɔ́ gá Cɔ́mɔ. A mba tómá goŋaá ŋgoyanɛna ŋkólío gosúduge gáábɔ́, begélígeli bɛ́ ɛ́nanɛna, báaba bá lɔ́mɔ́ naá noséésényée bá súdugene,

¹⁹kunde tóogonyo nnyómá yɛ́ɛyɛ Daadáa a ná dúfiemú niibo nɛ́hɛ́[37].»

²⁰Gɛ́hɛ́ go máŋa kálata, a báá gundínyée uyogóní, mɔ́ɔ go lukumene; batɔ biimée báaba bá mbaá lɔmɔ́ naá nnyaŋá ya mbósógólí go mo ágɛna oŋgíso.

²¹Gɔ́ɔ ɛ ɛ́damɔ́ go bó oyanɛna a amɔ́: «Nogálɔ ná Ŋgɔ́ŋɛ́ nɔ́ɔnɔ nó ɔ́bɔmɔ́ nɔ́ɔnɔ nó á bóhóógío ínoni yɛ́ɛyɛ.»

²²Batɔ biimée bá mba lɛ́ bá mo lɛ́ɛma, bá békúke biseyi bá dogálɔ[38] bɛ́ɛbɛ a mbaá lɔmɔ́ a gálagala. Gáábɔ́ go ɛ́da go búúhene bá amɔ́: «Ábɔ caá ohaŋa ba Yósɛbɛ mɔ́nyɔ́ɔ o?»

²³Yésusu go bó oyana a amɔ́: «Mammana, nó gaá ŋgágɛ́ná ncaba yá ŋaá: “Ugóódíníní, bééŋúgíemú maamɔ́ɔ moatɛ́ moatɛ”. Dɛ lɛ́ ɔ́bɔ́nɔ́ ɔ́bɔ́nɔ́ buimée bɔ́ɔbɔ go á ná ŋanánáa naá Kapɛlɛnahɔ́mɛ, ŋaáa ɔbɔ moánɛ tɔ́nɔ naá gɛdɔŋɔ gáhɔ háalá.»

²⁴Gɛ́hɛ́ go ɛ́da na dogálɔ naá busío a amɔ́: «Ŋgaá nyó oyáná mammana caá, bá dɛ gɔ́lɔ́nɔ́ɔ mbúsí ya Asaŋa bese naá gɛdɔŋɔ gɛ́hɛ́ gá mbíényée.

²⁵Mammana, ŋgaá nyó oyáná goŋaá, naá medúgú má Elíi, mbúsí ya Asaŋa, bisí bá bakɔ́dɔ bɛ́ mba lɛ́ makɔ́nɔ́ naá cí yá Ɛ́sɛlahɛ́ɛlɛ, aŋa dobólá dó mbaá ŋaáa nnyómá ɛ́dadɔ́ na gigísi dó do naáa, gó báá ŋaáa goŋaá gɛantá gá uncíli gɛ́ oba naá gɛdɔŋɔ giimée[39];

²⁶kanɛ́ akɛ́ nɔ́ɔnɔ, Asaŋa a dɛ mbá bóso go dóma Elíi naá gisí gá okɔ́dɔ gímmue gɛ́ɛgɛ naá Ɛ́sɛlahɛ́ɛlɛ, kanɛ́ goana naá gisí gá okɔ́dɔ gɛ́ɛgɛ naá Salabɛ́ta, naá gɛdɔŋɔ gá Sídono[40].

²⁷Bekúnúkunu makɔ́nɔ́ bá mba lɛ́ naá Ɛ́sɛlahɛ́ɛlɛ naá gɛcamɛna gá mbúsí ya Asaŋa Elisée; kanɛ́ akɛ́ ummue naá bɔ́ɔ a dɛ mbé éŋuge, gó do dómbáa goana Naamáana ba gɛdɔŋɔ gá Silíi[41].»

²⁸Batɔ biimée báaba bá mbaá lɛ naá nnyaŋá ya mbósógólí gáábɔ́ go ɔ́bɔ mpímí makɔ́nɔ́ aŋa bá mbɔɔ́ ɔ́bɔ́ boóma moánɛ.

²⁹Gɔ́ɔ bá dúmbiemú go fadɛgana, bá báá mo hémíe naá tɛ́sɔnɔ. Go ɛ́da nɛhɛ́ naá hoóma háaha há mbaá lɛ há yóŋkimidono, anáa tɛ́sɔnɔ yabɔ́ ɛ mbaá lɛ fóágáalú, goŋaá bá mo dídige a nco go oba gɛmbádáa.

³⁰Kanɛ́ mɔ́ɔ, go bó sɔlɔmɛdɛnɔ, a báá dómbá.

³¹Yésusu go ɛ́da naá Kapɛlɛnahɔ́mɛ, tɛ́sɔnɔ ya Gelilée mmue, a mba lɛ́ a húunenye batɔ buisí bá sábadɛ.

³²Bá mba lɛ́ na bibékúkí na mbɔ́dɔ yɛhɛ́ ya go húunenye, goakɛ́ dogálɔ dɛ́hɛ́ dó mba lɛ́ na nɛgaŋa niimée.

³³Mɔtɔ ba gɛgáda gá giliíli go bɛ́ɛmba hɔ́ɔ naá nnyaŋá ya mbósógólí. Gɛ́hɛ́ go áncɛda ukelú naá mmoɛná a amɔ́:

³⁴«Nɛɛ́nɛ, Yésusu ba Násalɛdɛ, ɛkádɛ o fúmbemú nɛcɔ́ o? O lɔ́mɔ́ úléelú go go nco có fúugie lí? Ŋgíyimene ánɛ́ɛ o lɔ́mɔ́: o lɔ́mɔ́ Gimmúmpúu mɔ́ɔnyɔ Asaŋa a mbaá dómá.»

³⁵Yésusu go áncɛdɛna gɛgáda gá giliíli gɛ́ɛgɔ a báá gɛ́ gálɛ́dá a amɔ́: «Buíge nyuudé, o húme naá mɔtɔ mɔ́ɔnyɔ!» Gɛgáda gá giliíli go dómba go góba mɔtɔ mɔ́ɔnyɔ go cí naá kadɛ́gadɛ́ɛ yabɔ́, gɛ́ báá húmé naá mɔ́ nnyɔ́dɔ kanɛ go mo ŋa boóma bá gɛbɛ́.

³⁶Gɛantá gá bofoá go gɔ́lɔ batɔ biimée báaba bá mbaá lɛ hɔ́ɔ, gáábɔ́ go ɛ́da go bágálɛnagalɛna bá amɔ́: «Mbɔ́dɔ ya nogálɔ ɛhanɛ́ yɛ́yɛ́ɛ náana o? Mɔtɔ mɔ́ɔnyɔ a gálagala na nɛgaŋa gɔnɔ́ na bogaaga, bɛgáda bá biliíli bɛ́ húmene!»

³⁷Ufíno yɛ́hɛ́ go dómba go saa hoóma hiimée naá gigísi gá cí gɛ́ɛgɔ.

³⁸Aŋa Yésusu a mbaá hémé naá nnyaŋá ya mbósógólí, gɛ́hɛ́ go ɛ́da naá nnyaŋá ya Símono. Nnyeedíi ba ogánɛ́ Símono a mbaá ŋa a báá go bólɛga nnyɔ́dɔ makɔ́nɔ́. Gáábɔ́ go mo bósógolidio goŋaá a mo éŋugie.

³⁹Yésusu go mo báyɛkɛna, go áncɛdɛna gobólɛga gá nnyɔ́dɔ na bogaaga, gó báá dómbá go mo dɛ́ɛna. Hɔ́ɔ na hɔ́ɔ, okɔ́dɔ mɔ́ɔnyɔ go fadɛgɛna, go ɛ́da go bó ala.

⁴⁰Na kɛnca buisí[42], batɔ biimée báaba bá mbaá lɛ na bɔgɔnɔ́gɔnɔ mbɔ́dɔ mbɔ́dɔ go mo úlenine nabɔ́. Gɛ́hɛ́ go bó dálana ɛmbɔ́gɔ ummue go ummue a báá bó éŋúgényée.

⁴¹Bɛgáda bá biliíli tɔ́nɔ bɛ́ mba héménée naá batɔ gɛca, bɛ́ ɛ́da bɛ́ ánca bɛ́ amɔ́: «O lɛ́ Moɔnɔ́ ba Asaŋa!» Kanɛ́ mɔ́ɔ a lɛ go ɛ́da go bɛ́ lɔsɛnɔnɔ na bogaaga goŋaá bɛ́ dɛ gálágáláa, goakɛ́ bɛ́ mba lɛ́ bɛ́ íyimene bɛ́ amɔ́ a lɛ́ Mesíi.

⁴²Aŋa buisí bó mbaá bálá, Yésusu go húme, a bɛ́ɛ́ ɛ́dá naá giolóo gá hoóma. Bitúu bitúu bá batɔ go ɛ́da go mo fúmbe. Kanɛ́ aŋa bá mbɛɛ́ ɛ́dá mo gíde, gáábɔ́ go ɛ́da go fúmbe goŋaá a lukumene nabɔ́, a dɛ bó síé a dɛ dómbá.

⁴³Kanɛ́ Yésusu go bó oyana a amɔ́: «Cɛmɛganana go dúmenye Gɛnɔ́gɔ́ gá Cɔ́mɔ gá Bufuŋe bá Asaŋa naá tɛ́sɔnɔ sɛ́ɛsɛ síncodío tɔ́nɔ: mammana, Asaŋa a lɔ́mɔ́ tómáalú go busío moánɛ.»

⁴⁴Yésusu go ɛ́da o oya Gɛnɔ́gɔ́ gá Cɔ́mɔ naá nnyaŋá sá mbósógólí sɛ́ɛsɛ naá Yudée.