Read Nugunu Lókasɛ 5 Bible Online

Lókasɛ 5 - Nugunu bible

Lókasɛ 5

¹Kɔ́ɔ, buisí búmmue, Yésusu a mba lɛ́ tɛ́nɛ́ɛ naá cɔ́lɔ ya máŋɛ́ má Sɛnɛsalɛ́dɛ, gitúu go ɛ́da go nco mo óda go go bódólonyo dogálɔ dá Asaŋa.

²Gɛ́hɛ́ go ɛ́na bilué bɛ́andɛ́ naá boayá bá miimpo, bonóbí báaba bá mbaá lɔmɔ́ kɔ́ɔ bá báá gó siise, bá soga mafɔ́ɔ́dɔ́ɔ mábɔ́.

³Gɛ́hɛ́ go bólɛga naá gilué gímmue gɛ́ɛgɛ gɛ́ mbaá lɛ gɛ́ ɔ́bɔnɛnɔ na Símono. A báa lɛ gó oyana Símono goŋaá bá bɔ́gɔ́gɛdɔ sɔŋɛ na cɔ́lɔ. Gɔ́ɔ bá bɔ́gɔ́gɛdɔmɔ́, Yésusu go lukumene naá gilué, gɛ́hɛ́ go ɛ́da go húunenye bitúu bá batɔ bɛ́ɛbɔ.

⁴Aŋa a mbaá dɔmbɔ́ go gálagala, gɛ́hɛ́ go oyana Símono a amɔ́: «Báyɛkɛ́náamɔ́ naá busío na gilué naá hoóma há go íŋenene makɔ́nɔ́, no nɔɔ mafɔ́ɔ́dɔ́ɔ mɛ́nyɔ́ go go gumbene moɔbɔ́.»

⁵Símono go mo gundie a amɔ́: «Iloodio, dɛ á béséésényée budúgú buimée buimée dɛ dɛ gumbéné boóma, kanɛ́ go nnyuudé náhɔ, kaá nɔɔ́ɔ mafɔ́ɔ́dɔ́ɔ.»

⁶Aŋa bá mbaá ŋaáa nɔ́ɔnɔ, gáábɔ́ go gumbene gɛcɛcá gá moɔbɔ́, mɔfɔ́ɔ́dɔ́ɔ mábɔ́ go ɛ́da go gásagasa[43].

⁷Gáábɔ́ go ɛ́da go dɔ́ŋɔnɔ na igéyi bɔsɔ́ɔ́gɔ́ɔ báaba bá mbaá lɛ naá gilué gɛ́ɛgɛ gíntió goŋaá bú úle bá nco bó óhiginyo. Bú ú úlé, gáábɔ́ go gɔ́gɔ mafɔ́ɔ́dɔ́ɔ, go hóogio bilué biimée bɛ́andɛ́ na moɔbɔ́ dácɛ bɔmbɔ bɔmbɔ, bɛ́ báá bayɛ́gá go íŋenene naá miimpo.

⁸Símono Píele ɛ ɛ́nana nɔ́ɔnɔ, go dómba go kuncene Yésusu enúu a amɔ́ gɛ́hɛ́ aá: «Daadáa, úlúkíe naá busío bámɛ, goakɛ́ ndɛ́ ulogílógí.»

⁹A mbaá ŋaáa nɔ́ɔnɔ goŋaá a mba bɛáa bofoá makɔ́nɔ́, mɔ́ɔ na batɔ biimée báaba bá mbaá lɔmɔ́ olɔŋɔ nɛhɛ́, go mbɔ́dɔ ya gɛcɛcá gá moɔbɔ́ gɛ́ɛgɛ bá mbaá gumbéné.

¹⁰Bó mba bɛ́ɛ́mbá tɔ́nɔ nɔ́ɔnɔ go begúle bá Símono báaba Sáakɛ na Sáŋa, baaná bá Sebedée. Yésusu go oyana Símono a amɔ́: «O do gɔ́lɔ́ bofoá. Gó bayɛga ínoni yɛ́ɛyɛ, o ná bɛ́ɛmbamɔ́ unóbí batɔ.»

¹¹Gɔ́ɔ bé émiemú bilué biimée naá kɔndɔ, go síe moóma muimée, bá báá mo biené.

¹²Yésusu a á bɛ́ɛ́mbá naá tɛ́sɔnɔ mmue, gɔ́ɔ ukúnúkunu ummue a mo ɛ́namɔ́, gɛ́hɛ́ go nco mo obɛna busío go cí, a mo baŋana a amɔ́: «Daadáa, aáŋa o lɛ́galɛga, o lɛ́ ba go cogona.»

¹³Yésusu a á gaanóná ombɔ́gɔ go mo báláfɛna a amɔ́ gɛ́hɛ́ aá: «Ndɛ́galɛga, bɛ́ɛ́mba sogónáalú!» Hɔ́ɔ na hɔ́ɔ, mɔtɔ go dómba go éŋuge ogɔnɔ́ yɛ́hɛ́ yá kúnú.

¹⁴Gɔ́ɔ Yésusu a mo oyanamɔ́ a amɔ́: «O do hóámá o do oyáná mɔtɔ boóma moánɛ, ɛ́dá bédúfie goana naá udúmbí bɛbáágá naá Asaŋa, o gunde o fáa go gɛsogona gáhɔ gɛbáágá gɛ́ɛgɛ Mɔ́sɛsɛ a mbaá sómbá, nɔ́ɔnɔ bó gaá dúfíe mɔtɔ uŋkimée goŋaá go é éŋúgé[44].»

¹⁵Akɛ́ nɔ́ɔnɔ, ufíno yá Yésusu go ɛ́da goana naá busío yó bóoya, bitúu bá batɔ bɛ́ ɛ́da bɛ́ bábánda go go ɔ́bɔnɔ dogálɔ dɛ́hɛ́, bá gunde bá bɛanana goéŋuge.

¹⁶Kanɛ́ mɔ́ɔ, a mba lɛ́ a bɔ́gɔ́gɛdɔ naá hoóma háaha há lɔ́mɔ́ gɛyáŋɛ́ go go bósógolonyo hɔ́ɔ.

¹⁷Buisí búmmue, Yésusu a mba lɛ́ a húunenye, Befelisiéŋe na muloodio má bicele hɔ́ɔ hɔ́ɔlɔ́ ndukíi. Bá mbɛ ɛ́dá fadɛgana naá bɛdɔŋɔ biimée bá Gelilée na bá Yudée na bá Yolósalɛmɛ; Daadáa Asaŋa a mba lɛ́ a dúfenye bogaaga bɛ́hɛ́ naá Yésusu, e éŋugenye bɔgɔnɔ́gɔnɔ.

¹⁸Kɔ́ɔ batɔ bá bolamɔ́ na gɛcɛ́gɛlɛ bádóɛ́gɛ́náalú naá dókandá, bá fúmbe pɛ́ ya go íŋene nɛ́hɛ́ go go ɛ́da mo ága naá busío bá Yésusu.

¹⁹Kanɛ́ aŋa bá mbaá lɛ bá dɛ bɛáa pɛ́ ya go mo íŋenye goŋaá batɔ bá mba lɛ́ gɛca, gáábɔ́ go bólɛga naá mpɔnɔ́ mmoɛná, go fága gɛasɛ́ hɔ́ɔ, go mo íŋenye na dokandá, bá báá mo siisíe hɔ́ɔlɔ́ naá kadɛ́gadɛ́ɛ ya batɔ naá busío bá Yésusu.

²⁰Aŋa Yésusu a mbɛɛ́ ɛ́ná mbɔ́dɔ yabɔ́ ya go ágana odɛ́má yábɔ́ naá mɔ́ɔ, go oyana gɛcɛ́gɛlɛ gɛ́ɛgɔ a amɔ́: «Bá á go hééhínyée bɛlɔgɔ báhɔ.»

²¹Muloodio má gicele na Befelisiéŋe go ɛ́da go béeniŋenye, bá búúhene bá amɔ́: «Mbɔ́dɔ ya mɔtɔ ɛhanɛ́ yɛ́yɛ́ɛ ɛ sɛgamɔ́ Asaŋa o? Mɔtɔ ohanɛ́ a lɔ́mɔ́ ba go héehineninye bɛlɔgɔ aáŋa caá Asaŋa mokáa[45]!»

²²Yésusu i í íyímé mbééníŋínyí sábɔ́, gɛ́hɛ́ go bó baga a amɔ́: «Goakɛ́ no lɔ́mɔ́ na mbɔ́dɔ sá mbééníŋínyí sɛ́ɛsɔ nɔ́ɔnɔ naá ɛdɛ́má yɛnyɔ́ o?

²³Bóhanɛ́ bó lɔ́mɔ́ fɛaŋɔ go oyɛda: “Bá á go hééhínyée bɛlɔgɔ báhɔ”, ɛ́na lí, “Fadɛ́gɛ́na, ɛndá o?”

²⁴Ɛɛ́ɛŋ! Go goŋaá nó bi íyímé no amɔ́ Moɔnɔ́ ba mɔtɔ a bɛanana nɛgaŋa ná go héehinenye bɛlɔgɔ naá cí háalá, — gɛ́hɛ́ go oyana gɛcɛ́gɛlɛ a amɔ́: “Ŋgaá go oyáná: fadɛ́gɛ́na, o gɔ́lɔ dokandá dáhɔ, go ɛ́da naá mamɔ́ nnyaŋá.”»

²⁵Hɔ́ɔ na hɔ́ɔ, gɛcɛ́gɛlɛ go úle a báá fadɛ́gɛ́na naá busío bábɔ́, a báá gɔ́lɔ́ dokandá dɛ́hɛ́ anáa a mbaá lɔmɔ́ mbɛ́dɛ́ɛ, go gunde naá nnyaŋá, ɛ ɛ́da a gúmenye Asaŋa.

²⁶Batɔ na gɛantá gá bibékúkí go ɛ́da go gúmenye Asaŋa; bofoá dácɛ naá nnyɔ́dɔ, bá gálagala bá amɔ́: «Dɛ ɛ́ ɛ́ná ínoni yɛ́ɛyɛ biseyi bá moóma.»

²⁷Naá nnyimé hɔ́ɔlɔ́, gɔ́ɔ Yésusu a hémemú, go ɛ́na ugólí tásɛ ummue ufíno yɛ́hɛ́ Léfi. A mba lɛ́ ndukíi naá hoóma háaha bá ncomɔ́ soanana muinyí má tásɛ. Yésusu go mo dɔ́ŋɛnɔ go mo oyana a amɔ́: «Mbienéemú.»

²⁸Gɔ́ɔ Léfi a cecugiemú buimée, go fadɛgɛna a báá mo biené.

²⁹Léfi go ŋa gɛantá gá gɛdáágá naá nnyaŋá yɛhɛ́ go busío bá Yésusu. Gɛca gá bogólí tásɛ na batɔ bóncodío bá mba lɛ́ bá nyáanya tábɛ́la mmue olɔŋɔ nabɔ́.

³⁰Befelisiéŋe na muloodio má gicele mábɔ́ gooba go uŋguluŋgule, bó oyanɛna behúúní bɛ́hɛ́ bá amɔ́: «No nyáanyamɔ́ no gunde no nyóanana olɔŋɔ na bogólí tásɛ na bologílógí[46] goakɛ́ o?»

³¹Yésusu go gɔ́lɔ dogálɔ go bó oyana a amɔ́: «Caá akɛ́ batɔ báaba bá lɔ́mɔ́ bá dɛ nómáa bɔ́ɔ bá fúmbemú ugóódíníní, kanɛ́ bá lɔ́mɔ́ bɔgɔnɔ́gɔnɔ.

³²Ndɛ́ kanɛ go úle go go nco dɔ́ŋɔnɔ bɛtɛ́nɛ́ɛ bá batɔ, mmbu úlé go bologílógí goŋaá bá núgie gɛɔyɔ gábɔ́.»

³³Gáábɔ́ go mo oyana bá amɔ́: «Bɛcamɛna bɛ́ lɛ́ hɔ́ɔ bɛ́ɛbɛ behúúní bá Sáŋa bá bécelenemú manyáanya bá gɔnɔ bósógolonyo, caŋa mmue go behúúní bá Befelisiéŋe, gɛcamɛna moánɛ báhɔ bá nyáanya, bá nyóanana mɔgɛ́bɔ!»

³⁴Yésusu go bó gundie a amɔ́: «No lɛ́ ba go ŋa goŋaá batɔ báaba bá lɔ́mɔ́ dɔ́ŋɛ́nɔ́ɔlú naá gibíné gá gigiŋe bá bécelene manyáanya gɛcamɛna gɛ́ɛgɛ ugiŋénú a gá lɔ́mɔ́ nabɔ́ o?

³⁵Kanɛ́ medúgú má úlene bá ná bó úlinye ugiŋénú, hɔ́ɔlɔ́ gɔ́ɔ bá ŋgaá bayɛ́gá go bécelene manyáanya.»

³⁶Yésusu go gɔnɔ bó ágɛna ncaba yɛ́ɛyɛ a amɔ́: «Mɔtɔ a dɛ bósó go gɔ́lɔnɔ gigísi naá gɛla gɛfáa go go gíde gá gilunú; amóŋa nɔ́ɔnɔ bá gaá lafá gɛla gá gɛfáa, gɔnɔ́ gigísi gɛ́ɛgɛ bá gɔ́lɔmɔ́ hɔ́ɔ gɛ́ dɛ gumbéníné na gilunú gá gɛla.

³⁷Bá dɛ fɛgáa gɛkɔ́sɔ gá mɔgɛ́bɔ naá bilunú bá kɔbɛ sá bɛɔbɔ, goŋaá bilunú bá kɔbɛ bɛ́ gaá gúdégúdée, mɔgɛ́bɔ má uduge, kɔbɛ sɛ́ sola.

³⁸Kanɛ́ bá sɛmɛgananamɔ́ go fɛga gɛkɔ́sɔ gá mɔgɛ́bɔ naá kɔbɛ sá páa.

³⁹Uŋkimée mɔ́ɔnyɔ a báá ná nyóá mɔgɛ́bɔ megúe a dɛ gɔnɔ́ maamana máama má mɔgɔ́sɔ, naá ŋgoyáamɔ́ ya goŋaá: “Má megúe má má fɛananamɔ́ má dómba.”»