Read Nugunu Lókasɛ 6 Bible Online

Lókasɛ 6 - Nugunu bible

Lókasɛ 6

¹Kɔ́ɔ buisí bá sábadɛ gɔnɔ́ búmmue bá ofɛ́ yá busío, Yésusu go nco fɛ́lɛda naá ntɛ́mɛ́ sá belée. Behúúní bɛ́hɛ́ go ɛ́da go sóga bɛondá bá sɛ́, bá fombona, bá nyáanana[47].

²Befelisiéŋe bóncodío go bó úhune bá amɔ́: «Ɛkádɛ no ŋananamɔ́ bɔ́ɔbɔ bó lɔ́mɔ́ gicele go buisí bá sábadɛ[48]o?»

³Yésusu go bo gundie a amɔ́: «No lɛ́ kanɛ akɛ́ go bana boóma bɔ́ɔbɔ Défidi a mbaá ŋaáa buisí búmmue bɔ́ɔbɔ a mbaá lɛ ɔ ɔ́bɔnɔ ncaná na batɔ bɛ́hɛ́ o?

⁴A mbi íŋéné naá Nnyaŋá yá Asaŋa, a báá gɔ́lɔ́ bɛlɛ́dɛ bá bɛbáágá bɛ́ɛbɛ bedúmbí bɛbáágá naá Asaŋa bákáa bá lɔ́mɔ́ na bogaaga bá go nyáa; a báá nyáá na batɔ bɛ́hɛ́ kɛ́.»

⁵Yésusu go gɔnɔ bó oyana a amɔ́: «Moɔnɔ́ ba mɔtɔ a lɛ́ ogɔ́nɔ́ɔ ba sábadɛ.»

⁶Buisí bá sábadɛ búncoó, Yésusu go íŋene naá nnyaŋá ya mbósógólí, go ɛ́da go húunenye. Mɔtɔ ummue a mba lɛ́ hɔ́ɔ na ombɔ́gɔ onɔ́mɛ ugúe.

⁷Muloodio má gicele na Befelisiéŋe go ágɛna Yésusu oŋgíso go go ɛ́na aáŋa a geé éŋúgíe mɔtɔ buisí bá sábadɛ, bá bɛa hɔ́ɔlɔ́ gɛlabɛ́ná go go mo sɔ́mɛnɔ.

⁸Kanɛ́ Yésusu a mba lɛ i íyimene go béeniŋenye gábɔ́, gɛ́hɛ́ go oyana mɔtɔ bá ombɔ́gɔ ugúe a amɔ́: «Fadɛ́gɛ́na, o dɛ́lɛmɛna hɔ́ɔlɔ naá oŋgíso yá mɔtɔ uŋkimée.» Mɔtɔ go dɛ́lɛmɛna tɛ́nɛ́ɛ.

⁹Yésusu go bó gálɛda a amɔ́: «Nnyó úhene caá, gicele gɛ́cɔ́ gɛ́ oyamɔ́ gɛ á amɔ́ dɛ ŋanana besé buisí bá sábadɛ, lí dɛ ŋanana gɛbɛ́ o? Dɛ sódio mɔtɔ, lí dɛ mo dɛ́ɛna a gúe o?»

¹⁰A á núúnídé batɔ biimée, gɛ́hɛ́ go oyana mɔtɔ a amɔ́: «Gaanóna ombɔ́gɔ yáhɔ.» Mɔtɔ go yó gaanona, ombɔ́gɔ yɛ́hɛ́ yó báá dómbá go éŋuge.

¹¹Mpímí go hóogo muloodio má gicele na Befelisiéŋe ɛdɛ́má dácɛ, gáábɔ́ go ɛ́da go fúmbe boóma bɔ́ɔbɔ bá lɔ́mɔ́ bá go ŋa na Yésusu.

¹²Naá medúgú moánɛ mɔ́ɔmɔ, Yésusu go ɛ́da naá ogɔndɔ go go bósógolonyo, a báá bósógólónyóo Asaŋa budúgú buimée buimée.

¹³Aŋa gó mbaá semídé, gɛ́hɛ́ go dɔ́ŋɛnɔ behúúní bɛ́hɛ́, go iyide bɔ́ɔ́dɔ́ na báandɛ́ kɔ́ɔ, a báá bó fínídínyée a amɔ́ baapótɛlɛ.

¹⁴Ifíno yabɔ́ yɛ́yɛ́ɛ: Símono, mɔ́ɔnyɔ Yésusu a mbaá mo logá a amɔ́ Píele, na Andɛlɛ́ɛ, ondimóní; Sáakɛ na Sáŋa, Fílibi na Betelemíi,

¹⁵Motíosi na Tómasɛ, Sáakɛ, ohaŋa bá Alafɛ́ɛ[49], na Símono ba go noanana goŋaá gɛdɔŋɔ gɛ́hɛ́ gɛ́ bábɛa,

¹⁶Yódasɛ, ohaŋa bá Sáakɛ[50], na Yódasɛ Ɛsɛkalɛ́ɔtɛ, mɔ́ɔ a mbaá lɛ ba go dúe Yésusu.

¹⁷Yésusu a á siisé naá ogɔndɔ na Behúúní báaba a mbií íyídé, gɛ́hɛ́ go dɛ́lɛmɛna naá hoóma há lambɔlambɔ, na gɛcɛcá gá behúúní bóntió. Batɔ bóncodío gɛca bá mbaá lɛ tɔ́nɔ hɔ́ɔ, bɛ́ ɛ́da go úlene naá Yudée uŋkimée, naá Yolósalɛmɛ na naá tɛ́sɔnɔ sɛ́ɛsɛ sɛ́ lɔ́mɔ́ naá gɛayáa gá máŋɛ́, Tíile na Sídono.

¹⁸Bá mbaá lɔmɔ́ úléné úléné go go ɔ́bɔnɔ dogálɔ dɛ́hɛ́, gɔnɔ́ goŋaá a bó éŋugenye ɛgɔnɔ́ yabɔ́. Báaba bá mbaá lɔmɔ́ na bɛgáda bá biliíli, bé éŋugene tɔ́nɔ.

¹⁹Biimée bá mba lɛ́ bá fúmbe go mo báláfɛna go busío bá bogaaga bɔ́ɔbɔ bó mbaá lɛ bó húmene naá mɔ́ nnyɔ́dɔ, bó bó éŋugenye biimée.

²⁰Gɔ́ɔ Yésusu a núunidemú behúúní bɛ́hɛ́, go ɛ́da go oya a amɔ́: «Besé makɔ́nɔ́ na bɛɛnyɔ́ɔ báaba nó lɔ́mɔ́ basógasoga, Bufuŋe bá Asaŋa bó lɛ́ go busío bɛnyɔ́.

²¹Besé makɔ́nɔ́ na bɛɛnyɔ́ɔ báaba nó lɔ́mɔ́ na ncaná godɔ́ɔdɔ, no ŋga nyáányáa no hóogio. Besé makɔ́nɔ́ na bɛɛnyɔ́ɔ báaba no baŋamɔ́ godɔ́ɔdɔ, no ŋga hɔnɔ́ɔ.

²²Besé makɔ́nɔ́ na bɛɛnyɔ́ɔ báaba batɔ bá nyó bɛlabɛlamɔ́, bá nyó pímepimemú, bá nyó sɛgamɔ́, bá gɔnɔ bude ufíno yɛ́nyɔ́ go busío bá Moɔnɔ́ bá mɔtɔ.

²³Békelényéemú nɔnɔ naá gɛcamɛna moánɛ, no fulefule na bɛyaŋa, bɛsoɛná bɛ́nyɔ́ bɛ́ lɛ́ makɔ́nɔ́nɔ́ɔ naá mmoɛná. Mammana, nɔ́ɔnɔ gɔ́ɔ biisée bábɔ́ bá mbaá lɛ bá míneminie mbúsí sá Asaŋa[51].

²⁴Kanɛ́ mahana makɔ́nɔ́ na bɛɛnyɔ́ɔ báaba nó lɔ́mɔ́ bɛnɔ́mɛ, goakɛ́ no báá go bɛa bɛ́nyɔ́ bodáŋɔ.

²⁵Mahana makɔ́nɔ́ na bɛɛnyɔ́ɔ báaba no nyáanyamɔ́ no hóogonyo godɔ́ɔdɔ, goakɛ́ no ŋga súgúdínyée go ɔ́bɔnɔ ncaná. Mahana makɔ́nɔ́ na bɛɛnyɔ́ɔ báaba no hɔnɔmɔ́ godɔ́ɔdɔ, goakɛ́ egúe na mbií mó nyó gɛ́gana.

²⁶Mahana makɔ́nɔ́ nɛnyɔ́ aáŋa batɔ biimée bá nyó ségisegi, goakɛ́ nɔ́ɔnɔ gɔ́ɔ biisée bábɔ́ bá mbaá ŋanánáa na mbúsí sá mbele.

²⁷«Kanɛ́ bɛɛnyɔ́ɔ báaba no mbódólónyóomú, ŋgaá nyó oyáná caá, maamánáa nɔnɔ babɛlɔ́bɛlɔ bɛ́nyɔ́, no ŋanana báaba bá nyó bɛlabɛlamɔ́ besé.

²⁸Fonáa nɔnɔ báaba bá nyó yɔmɔmɔ́, no bósógolonyo go báaba bá nyó sómbanamɔ́ bɛamɔ́ɔ.

²⁹«Mɔtɔ a amɔ́ a go góba ombɔ́lɛ́ go nɛ́ɛnɛ ɛdáma, mo sɛncɛ́gɛ́náamɔ́ nɛ́ɛnɛ níntió. Mɔtɔ a amɔ́ a bɔgɔ gɛla gáhɔ gá isió, o do mo legé gɛ́ɛgɛ o bááganamɔ́ naá cí.

³⁰Fáá uŋkimée mɔ́ɔnyɔ a go ɔŋɔnɔmɔ́. Mɔtɔ a amɔ́ a gɔ́lɔ boóma báhɔ, o do mo úhúné.

³¹Moóma muimée mɔ́ɔmɔ no lɛ́galɛgamɔ́ goŋaá batɔ bá nyó ŋɛɛna, bɛɛnyɔ́ɔ tɔ́nɔ bó ŋanánáamɔ́ nɔnɔ caŋa mmue[52].

³²«No amɔ́ no maamana báaba bá nyó maamanamɔ́, kasɛ́á bɛsoɛná no gaá ná bɛáa o? Akɛ́ bologílógí tɔ́nɔ bá maamana báaba bá bó maamanamɔ́.

³³Gɔnɔ́, no amɔ́ no ŋanana besé goana go báaba bá nyó ŋananamɔ́ besé, kasɛ́á bɛsoɛná no gaá ná bɛáa o? Akɛ́ bologílógí bá ŋanana nɔ́ɔ caŋa mmue.

³⁴Aáŋa no fáananamɔ́ ifínó goana go báaba bá lɔ́mɔ́ bá go nyó gundinye, kasɛ́á mbɔ́dɔ ya bɛsoɛná no gɛ́ganamɔ́ gɔnɔ́ o? Akɛ́ bologílógí bá fáanana tɔ́nɔ ifínó go bologílógí báaba bá lɔ́mɔ́ bá go gundie.

³⁵Kanɛ́ maamánáa nɔnɔ babɛlɔ́bɛlɔ bɛ́nyɔ́, no bó ŋanana besé, no fáanana ifínó kanɛ go gɛ́gana boóma bá go nyó gundinye. Hɔ́ɔlɔ́ gɔ́ɔ no ŋgaá bɛáa bɛantáanta bá bɛsoɛná, no bɛ́ɛmba baaná bá Asaŋa ba Páábɔ́ naá mmoɛná, goakɛ́ mɔ́ɔ, a lɛ́ usi go báaba bá lɔ́mɔ́ bá dɛ íyíménée go fáa bibéhiigí na báaba bá lɔ́mɔ́ bahándá.

³⁶«Bɛ́ɛmba nɔnɔ dácɛ na odɛ́má yá niibo aŋa Isée bɛnyɔ́ a lɔ́mɔ́ dácɛ na niibo[53].

³⁷No do bɛ́ɛ́mbá báaba bá sómbanamɔ́ basɔ́gɔ́ɔ bɛsɛnɛ, gɔ́ɔ Asaŋa a ŋgaá ŋá a dɛ nyó sómbánáa bɛɛnyɔ́ɔ. No do ágánáa basɔ́gɔ́ɔ naá ncíbo ya gɛaŋɔ́, nɔ́ɔ gɔ́ɔ Asaŋa a ŋgaá ŋá a dɛ nyó ágá tɔ́nɔ. Hééhínényée nɔnɔ basɔ́gɔ́ɔ, nɔ́ɔ gɔ́ɔ Asaŋa a ŋgaá nyó hééhínyée tɔ́nɔ.

³⁸Fáánánáa nɔnɔ basɔ́gɔ́ɔ, nɔ́ɔ gɔ́ɔ Asaŋa a ŋgaá nyó fáá tɔ́nɔ. Bá ŋga sugúné naá gɛgada gɛ́nyɔ́ mɛ́da dácɛ, nɔdɔ́nɔ́ nɔdɔ́nɔ́, yihéné yihéné, gɛ ɛ́da gɛ́ udude. Bá ŋga gɔ́lɔ́ go busío bɛ́nyɔ́ mɛ́da máama no lɔ́mɔ́ na máa go bɔsɔ́gɔ́ɔ.»

³⁹Yésusu go gɔnɔ bó ágɛna ncaba yɛ́ɛyɛ a amɔ́: «Ugélígeli a dɛ bósó ba go gɔ́gɔ sɔ́gɔ́ ugélígeli, ábɔ o? Aáŋa nɔ́ɔnɔ, bá goó obɛ́ná bɔ́ɔ biimée báandɛ́ naá gɛbɛ́lábɛ́lá.

⁴⁰Uhúúní a dɛ dómbánáa uhúúnínyí bɛhɛ́, kanɛ́ uhúúní uŋkimée mɔ́ɔnyɔ a hóonamɔ́ a bɛ́ɛ́ ɛ́dá meninye, a ŋga bɛ́ɛ́mbá aŋa uhúúnínyí bɛhɛ́.

⁴¹Goakɛ́ o lɔ́mɔ́ bá go ɛ́na gifumbú gɛ́ɛgɛ gɛ́ lɔ́mɔ́ naá niíso ná tɛ́ɔbɛnɔ, o lɔbɛnɔ o do ɛ́ná boɛ́tɛ bɔ́ɔbɔ naá náhɔ o?

⁴²Nɛ́ɛnɛ o lɔ́mɔ́ bá go oyana tɛ́ɔbɛnɔ go amɔ́: “Ondimóní, ɔ́bɔ́ ko úlie gifumbú gɛ́ɛgɛ naá niíso náhɔ”, maamɔ́ɔ mɔ́ɔnyɔ o lɔ́mɔ́ o do bɛ́ɛ́mbá bá go ɛ́na boɛ́tɛ bɔ́ɔbɔ bó lɔ́mɔ́ naá niíso náhɔ o? Ukuilí mɔ́ɔnyɔ, dóána go búúlie boɛ́tɛ bɔ́ɔbɔ naá niíso náhɔ, hɔ́ɔlɔ́ gɔ́ɔ o gaá nɛ́ ɛ́nánɛ́náa bese, o lɛ go úlie gifumbú gɛ́ɛgɛ gɛ́ lɔ́mɔ́ naá niíso na tɛ́ɔbɛnɔ.

⁴³«Gɛnɔ́gɔ́ gá boɛ́tɛ gɛ́ dɛ úmée bɛbɛ́ bá bɛsamɔ́, tɔ́nɔ gɛbɛ́ gá boɛ́tɛ gɛ́ dɛ úmée bɛnɔ́gɔ́ bá bɛsamɔ́.

⁴⁴Bá lɛncanamɔ́ boɛ́tɛ buimée go bɛsamɔ́ bá bɔ́. Bá dɛ gásáa bíkodóo naá gɛ́loŋká, nɔ́ɔnɔ gɔ́ɔ bá lɔ́mɔ́ bá dɛ gásáa mulíómólíómóo naá molɛ́ŋa.

⁴⁵Usi ba mɔtɔ a gɔ́lɔnɔmɔ́ besé yɛhɛ́ naá bonɔ́mɛ bá busi bá odɛ́má yɛ́hɛ́. Ombɛ́ ba mɔtɔ a gɔ́lɔnɔ bobɛ́ bɛ́hɛ́ naá bonɔ́mɛ bɛ́hɛ́ bá bobɛ́; goakɛ́ bɔ́ɔbɔ nyuudé nɛ́ gálagalamɔ́, bó ɛ́damɔ́ go úlene naá godege gá bɔ́ɔbɔ naá odɛ́má.

⁴⁶«Ɛkádɛ́ kanɛ́ no tɔ́ŋɔnɔmɔ́ no amɔ́: “Daadáa, Daadáa!” aáŋa no do ŋanánáa bɔ́ɔbɔ ŋgoyamɔ́ o?

⁴⁷«Mɔtɔ uŋkimée mɔ́ɔnyɔ u úlemú naá yɔmɔ́ɔ, ɔ ɔ́bɔ yɔmɔ́ dogálɔ a gunde a ŋanana aŋa dó oyamɔ́, kaá nyó dúfíe púényí yɛhɛ́.

⁴⁸«A fóanana mɔtɔ mɔ́ɔnyɔ a mbaá fóágá nnyaŋá, a báá dímée bɛbɛ́lábɛ́lá bɛ́ bíí íŋéné, a báá dábɛ́gá mogoná naá gɛdánɛ́dánɛ́ mmoɛná. Gɛantá gá nobólá gɛ́ ɛ́dá go úle, miimpo go bombɛna nnyaŋá, kanɛ́ má báá lɔbɛ́nɔ́ má dɛ yɛ buhé, goakɛ́ ɛ mba lɛ́ fóágáalú bese bese.

⁴⁹«Kanɛ́ mɔtɔ mɔ́ɔnyɔ ɔ ɔ́bɔmɔ dogálɔ dámɛ, a báá lɔbɛ́nɔ́ a dɛ ŋaáa aŋa dó oyamɔ́, a fóanana mɔtɔ mɔ́ɔnyɔ a mbaá fóágá nnyaŋá yɛhɛ́ naá cí, a lɔbɛnɔ kanɛ go díme, i íŋenye. Miimpo gá má go bombɛna nnyaŋá, ɛ báá buhúgé busío buimée.»