Read Nugunu Lókasɛ 7 Bible Online

Lókasɛ 7 - Nugunu bible

Lókasɛ 7

¹Aŋa Yésusu a mbaá maná go oyanɛna boɛ́nɔ dogálɔ dɔ́ɔdɔ, gɛ́hɛ́ go ɛ́da naá tɛ́sɔnɔ ya Kapɛlɛnahɔ́mɛ.

²Hɔ́ɔ hɔ́ɔlɔ́, ogɔ́nɔ́ɔ ba bisimbi ntɛdɛ a mba lɛ́ na gɛnɔ́gɔ́ gá uyogóní gɛ́ɛgɛ a mbaá lɛ a maamana makɔ́nɔ́. Kɔ́ɔ uyogóní mɔ́ɔnyɔ a mbaá lɛ a nóma degédegé, nigúe nɛhɛ́ mekúígíi.

³Aŋa ogɔ́nɔ́ɔ ba bisimbi mɔ́ɔnyɔ a mbɔɔ́ ɔ́bɔ́ bá gálagala ufíno yá Yésusu, go mo dómɛna nɛnamá ná bafɛanɔ́ɔ bá batɔ bá Beyúdene goŋaá bɛ́ ɛ́da mo bósógolidio, a nco go éŋugie uyogóní bɛhɛ́.

⁴Bɛ́ ɛ́ ɛ́dá bola mekúígíi na Yésusu, gáábɔ́ go ɛ́da go mo bósógolonyo, bá latɛnana bá amɔ́: «Mɔtɔ mɔ́ɔnyɔ a sɛmɛganana na gióhiginyo gáhɔ,

⁵goakɛ́ a maamana gɛdɔŋɔ gɛ́cɔ́, gɔnɔ́ mɔ́ɔ a lɔ́mɔ́ có fóágɛ́náalú nnyaŋá yɛcɔ́ ya mbósógólí.»

⁶Gɔ́ɔ Yésusu a bienemú pɛ́ olɔŋɔ nabɔ́, a mba ŋá a ná lɛ́ mekúígíi na nnyaŋá, ogɔ́nɔ́ɔ bá bisimbi go dóma begúle bɛ́hɛ́ bóntió goŋaá bá mo oyana bá amɔ́: «Daadáa, o do gɔ́lɔ́ gɛdɔmbɔ, cɛ háánánáa goŋaá go íŋene naá yɔmɔ́ nnyaŋá.

⁷Go busío moánɛ bɔ́ɔ mbáá ná bɛ́ɛ́ná boóma bá dugúnú goŋaá nco go dɛ́lɛmɛnɛna yɔmɔ́ɔ moatɛ́ moatɛ; kanɛ́ gálɛda goana nogálɔ númmue, uyogóní bamɛ e éŋuge.

⁸Yɔmɔ́ɔ moatɛ́ moatɛ ŋgɔ́bɛnɔnɔ na ogɔ́nɔ́ɔ bamɛ, ndɛ́ na bisimbi bɛ́ɛbɛ bɛ́ ŋgɔ́bɔnɛnɔmɔ́. Ŋgoyana gímmue caá “Ɛ́dá”, gɛ́ ɛ́da, ŋgoyana gíncodío caá: “Úlé”, gɛ́ úle. Ŋgoyana uyogóní bamɛ caá “Ŋaáa gɛnáa”, a ŋa.»

⁹Aŋa Yésusu a mbɔɔ́ ɔ́bɔ́ dogálɔ dá ogɔ́nɔ́ɔ ba bisimbi dɔ́ɔdɔ, gɛ́hɛ́ go békúke makɔ́nɔ́. Go bábondona, go oyana gitúu gá batɔ gɛ́ɛgɛ gɛ mbaá lɛ gɛ́ mo bienene a amɔ́: «Ŋgaá nyó oyáná mammana caá; akɛ́ naá gɛdɔŋɔ gá Ɛ́sɛlahɛ́ɛlɛ, ká báasa cɛ gídé mɔtɔ hɔ́ɔ a ágana odɛ́má yɛ́hɛ́ naá Asaŋa náana.»

¹⁰Batɔ bá bosɔ́mɔ bá á gundé naá nnyaŋá ya ogɔ́nɔ́ɔ ba bisimbi, gáábɔ́ go gíde goŋaá uyogóní a ná lɛ́ bese.

¹¹Naá nnyimé yɛ́ɛyɔ[54], Yésusu go ɛ́da naá tɛ́sɔnɔ yɛ́ɛyɛ bá dɔ́ŋɔnɔmɔ́ bá amɔ́ Néyine, behúúní bɛ́hɛ́ na gitúu gá batɔ makɔ́nɔ́ bá bɛ́ɛ́ ɛ́dá olɔŋɔ nɛhɛ́.

¹²Naá gɛcamɛna gɛ́ɛgɛ a mbaá lɛ mekúígíi na miíŋene má tɛ́sɔnɔ, batɔ bá mbaá ŋá bá ná lɛ́ go ɛ́dana na gigúe gá mɔtɔ gímmue go go ɛ́da mie. Bó mbaá lɛ gimmuée gá moɔnɔ́ ba gisí gá okɔ́dɔ. Gɛcɛcá gá batɔ gɛ́ɛgɛ naá tɛ́sɔnɔ gɛ́ mba lɛ́ olɔŋɔ nɛhɛ́.

¹³Aŋa Daadáa a mbɛɛ́ ɛ́ná gisí gɛ́ɛgɔ, mahana go mo gɔ́lɔ naá odɛ́má go busío bɛ́hɛ́, go mo oyana a amɔ́: «Dɛ́ɛ́na mbií!»

¹⁴A á báyɛkɛ́ná, go bádáfɛna gisímbí. Bebigí go dómba go dɛ́lɛmɛna. Yésusu go gálɛda a amɔ́: «Ohaŋa, ŋgaá go oyáná caá, fadɛ́gɛ́na!»

¹⁵Gɔ́ɔ ohaŋa a fadɛgɛnamɔ́, a báá lukúméné, go ɛ́da go gálagala. Kɔ́ɔ Yésusu a gundinyemú okɔ́dɔ moɔnɔ́ bɛ́hɛ́.

¹⁶Batɔ biimée báaba bá mbaá lɔ́mɔ́ hɔ́ɔ go gɔ́lɔ bofoá, bá bɛ́ɛ́ ɛ́dá go búlugenye Asaŋa bá amɔ́: «Gɛantáanta gá mbúsí ya Asaŋa gɛ́ á bológá naá tɛ́mádɛ́má yɛcɔ́! Bá gunde bá gálagala bá amɔ́: Asaŋa u ú úlé go go nco go óhiginyo boɛ́nɔ bɛ́hɛ́.»

¹⁷Gɔ́ɔ batɔ bɛ́ ɛ́damɔ́ go gálagala boóma bɔ́ɔbɔ Yésusu a mbaá ŋaáa naá gigísi gá cí gá Yudée giimée na naá bɛdɔŋɔ ba maayá.

¹⁸Behúúní bá Sáŋa go mo oyanɛna boóma buimée bɔ́ɔbɔ Yésusu a mbaá ŋaáa. Kɔ́ɔ a dɔ́ŋɛnɔmɔ́ báandɛ́ naá olɔŋɔ yábɔ́,

¹⁹go bo dóma naá Daadáa go go ɛ́da mo úhune bá amɔ́: «O lɛ́ “mɔ́ɔnyɔ u úlenemú”, lí dɛ háanana go gɛ́gana untió o?»

²⁰Aŋa bá mbaá ncó bola naá boayá bá Yésusu, gáábɔ́ go mo oyana bá amɔ́: «Sáŋa Begiyuminye a có dómamɔ́ goŋaá dɛ nco go úhune dɛ amɔ́: O lɛ́ “Mɔ́ɔnyɔ u úlenemú”, lí dɛ háanana go gɛ́gana untió o?»

²¹Naá gɛcamɛna gímmue eé gímmue, Yésusu go éŋugie gɛca gá batɔ go ɛgɔnɔ́ yabɔ́, na bɛnɛ́mɔ bábɔ́, a báá bó dúgúnée go bɛgáda bá biliíli, a báá fuuné oŋgíso yá begélígeli gɛca.

²²Gɔ́ɔ a gundiemú batɔ bá bosɔ́mɔ a amɔ́: «Ɛ́dá nɔnɔ no oyanɛna Sáŋa boóma bɔ́ɔbɔ no báá nɛ́ ɛ́ná no bɔ́ɔ́ ɔ́bɔ́nɔ́ɔ: begélígeli bɛ́ ɛ́nanɛna, banɛ́mɔnɛmɔ bɛ́ ɛnda tɛ́nɛ́ɛ, bekúnúkunu bé éŋugene, bɔlɔ́kɔ́lɔkɔ bɔ́ ɔ́bɔnɔ, begúe bá fúfugene, bá dúmenye Gɛnɔ́gɔ́ gá Cɔ́mɔ naá basógasoga[55].

²³Besé makɔ́nɔ́ na mɔ́ɔnyɔ ka ŋgaá ŋá cɛ bɛ́ɛ́mbá gɛlɔŋɔ go busío bɛ́hɛ́.»

²⁴Aŋa batɔ bá bosɔ́mɔ báaba Sáŋa a mbaá lɛ dómáalú bá mbaá gundé, Yésusu go ɛ́da go gálagala go busío bá Sáŋa, o oyanɛna bitúu bá batɔ a amɔ́: «No lɔ́mɔ́ ɛ́dáalú go go ɛ́da núune ɛkádɛ naá giolóo gá bodɛ́agadɛ́ o? Ɛgɔɔ́ nɛ́ɛnɛ ufufu yó diiŋenyemú lí?

²⁵Kɔ́ɔ, no mbɛɛ́ ɛ́dá núune kanɛ́ ŋkádɛ o? Mɔtɔ mɔ́ɔnyɔ a mbaá lɛ bálɛŋá bálɛŋá lí? Kanɛ́ batɔ báaba bá lɔ́mɔ́ bálɛŋá bálɛŋá bá gɛ́gamɔ́ naá ndáŋɛ sá mefuŋe!

²⁶No mbɛɛ́ ɛ́dá núune kanɛ́ ŋkádɛ o? Mbúsí ya Asaŋa lí? Ɛɛ́ɛŋ, ŋgaá nyó oyáná caá, a dómbana moánɛ mbúsí ya Asaŋa.

²⁷Sáŋa a lɔ́mɔ́ mɔ́ɔnyɔ Ŋgɔ́ŋɛ́ sɛ́ oyamɔ́ go busío bɛ́hɛ́ sɛ́ amɔ́: “Ɛ́ná, ŋgaá dúényée mɔtɔ bamɛ ba bosɔ́mɔ naá busío gáhɔ; a ná gediegedie pɛ́ yahɔ naá busío báhɔ[56]”.

²⁸Mammana, ŋgaá nyó oyáná caá: naá batɔ biimée báaba bakɔ́dɔ bá bíenemú, ummue ba go bɛ́ɛmba gɛantáa hɔ́ɔ a dómba Sáŋa a dɛ báá; asáa gɔgɔ́, mɔ́ɔnyɔ a lɔ́mɔ́ hɛandɛ́dɛ́dá naá Bufuŋe bá Asaŋa a lɛ́ gɛantáa a mo dómbana.»

²⁹«Batɔ biimée báaba bá mbaá lɛ bá mo bódólonyo, akɛ́ na bogólí tásɛ, bá mba lɛncá goŋaá Asaŋa a lɛ́ gɛtɛ́nɛ́ɛ, bá báá gɔ́lɔ́ giyuminye naá Sáŋa.

³⁰Kanɛ́ Befelisiéŋe na muloodio má bicele, gáábɔ́ go umbe nɛkɛsa ná Asaŋa, bá bíí inyé go gɔ́lɔ giyuminye naá Sáŋa.

³¹Ndɔ́mɔ́ bá go eninye batɔ bá ogɛlɛ yɔ́ɔyɔ na ánɛ́ɛ o? Bá fóananamɔ́ ánɛ́ɛ o?

³²Bá fóananamɔ́ baábayɔ́ báaba bá lɔ́mɔ́ ndukíi naá hoóma há batɔ go bábánda, bá gálagala báaba go bɔsɔ́gɔ́ɔ bá amɔ́: “Dɛ mba nyó ómbánáa osagɔ yá gibíné na ncolí no bíí inyé go bíne. Dɛ báá dóndídío osagɔ yá nigúe, no bíí inyé go baŋa.”

³³«Mammana, Sáŋa Begiyuminye a mbu úlé, a dɛ nyáá gɛlɛ́dɛ, a dɛ nyóɛ́ná mɔgɛ́bɔ, no amɔ́: “A lɛ́ na gɛgáda gá giliíli.”

³⁴Moɔnɔ́ ba mɔtɔ u ú úlé, a nyáanya, a nyóanana mɔgɛ́bɔ, no amɔ́: “Ɛ́ná, mɔtɔ mɔ́ɔnyɔ a lɛ́ unyéényí gɔnɔ́ gɛnyóa, ugúle ba bogólí tásɛ na bologílógí.”

³⁵Kanɛ́ nciŋí ya Asaŋa ɛ mba bóloodío tɛ́nɛ́ɛ gá baaná bá yɛ́ biimée.»

³⁶Gɔ́ɔ moɔnɔ́ ba Befelisiéŋe a dɔ́ŋɛnɔmɔ́ Yésusu go manyáanya naá mɔ́ nnyaŋá. Yésusu go íŋene naá mɔ́ nnyaŋá, a báá lukúméné naá tábɛ́la go manyáanya.

³⁷Gɔ́ɔ ulogílógí bá okɔ́dɔ ummue mɔ́ɔnyɔ a mbaá lɛ a gɛ́ga naá tɛ́sɔnɔ yɛ́ɛyɔ i íyimemú goŋaá Yésusu a lɛ naá nnyaŋá ya moɔnɔ́ ba Béfelisiéŋe a nyáanya. Gɛ́hɛ́ go úle na idógódógó hɛ́ɛhɛ bá mbaá gedíe na ɛdánɛ́ ná ntɔ́nɔ nɛ́ɛnɛ bá dɔ́ŋɔnɔ bá amɔ́ alabátɛlɛ, hɛ́ mba lɛ́ na alabɛ́nda kɔ́ɔ dácɛ.

³⁸Gɛ́hɛ́ go dɛ́lɛmɛna naá nnyimé ya Yésusu, naá bɛgɔ́ndɔ́ bɛ́hɛ́. A baŋa, a yukukenye bɛgɔ́ndɔ́ bá Yésusu na biósino bɛ́hɛ́, a bɛ́ fúune na cóɛ sɛ́hɛ́, a bɛ́ bágóda, a bɛ́ sugunenine alabɛ́nda.

³⁹Aŋa moɔnɔ́ bá Befelisiéŋe mɔ́ɔnyɔ a mbaá dɔ́ŋɛ́nɔ́ Yésusu a mbɛɛ́ ɛ́ná nɔ́ɔnɔ, go ɛ́da go bágálɛna galɛna a amɔ́: «Aáŋa gɔ́ɔ mɔtɔ mɔ́ɔnyɔ a lɔ́mɔ́ mammana mbúsí ya Asaŋa, gásɛ́ i í íyímé ánɛ́ɛ a lɔ́mɔ́ okɔ́dɔ mɔ́ɔnyɔ a mo báláfamɔ́ gɔnɔ́ na boóma bɔ́ɔbɔ a lɔ́mɔ́: a lɛ́ ulogílógí bá okɔ́dɔ.»

⁴⁰Yésusu go fediginye dogálɔ, go oyana moɔnɔ́ bá Befelisiéŋe a amɔ́: «Símono, ndɛ́ na boóma bá go go oyana.» Símono go gundie a amɔ́: «Iloodio, gálɛ́da.» Kanɛ́ Yésusu go dúme go oya a amɔ́:

⁴¹«Batɔ báandɛ́ bá mba lɛ́ bá bɛananɛna mɔtɔ ufínó. Mɔ́ɔnyɔ bɛkɔ́ŋɔ bá muinyí mantɛdɛ mátáanɔ, mɔ́ɔnyɔ untió otíno áhandɛ́ na bɛ́ɔ́dɔ́.

⁴²Kanɛ́ aŋa mó mbaá bó sugé go gundie, mɔtɔ mɔ́ɔnyɔ go bó dɛ́ɛnɛna bɔ́ɔ biimée báandɛ́ ifínó yabɔ́. Kanɛ́ naá bɔ́ɔ biimée báandɛ́, ohanɛ́ a lɔ́mɔ́ bá go dómba go lɛ́galɛga mɔtɔ mɔ́ɔnyɔ o?»

⁴³Símono go mo gundie a amɔ́: «Pege caá, a lɔ́mɔ́ mɔ́ɔnyɔ bá mbaá mo dɛ́ɛ́nɛ́ná gɛantá gá ufínó.» Yésusu go mo oyana a amɔ́: «Go ó oyɛ́dá mammana.»

⁴⁴Gɔ́ɔ a bábondonamɔ́ okɔ́dɔ, go gálɛda Símono a amɔ́: «Go ɛ́ ɛ́ná okɔ́dɔ mɔ́ɔnyɔ o? Mbíi íŋene naá mamɔ́ nnyaŋá, o do báá páa miimpo má go soga bɛgɔ́ndɔ́ bámɛ, kanɛ́ mɔ́ɔ a á cogáa bɛgɔ́ndɔ́ na biósino bɛ́hɛ́, a báá bɛ́ fúúnée na cóɛ sɛ́hɛ́.

⁴⁵O do báá kólio na kude, kanɛ́ mɔ́ɔ gɔgɔ́ aŋa mbáá ní íŋéné háalá, gɔ́gɔ́ɔ a lɔ́mɔ́ a dɛ dɔmbɔ́nɔ́ɔ go mbágóda go bɛgɔ́ndɔ́.

⁴⁶O do báá púe megúdé má go fofa go odóɛ[57], kanɛ́ mɔ́ɔ a á ŋgudénínée alabɛ́nda go bɛgɔ́ndɔ́.

⁴⁷Boóma moánɛ bɔ́ɔ ko oyanamɔ́ caá, bó lɔ́mɔ́ go gɛcɛcá gɛ́hɛ́ gá bɛlɔgɔ gɛ́ɛgɛ Asaŋa a á ná mo hééhínyée gɔ́ɔ a dúfiemú gɛantá gá gɛnɔ́ɔ́nɛ́nɔ́. Kanɛ́ mɔtɔ mɔ́ɔnyɔ bá mo héehinyemú sɔŋɛ, a dúfenye goana sɔŋɛ ya gɛnɔ́ɔ́nɛ́nɔ́.»

⁴⁸Gɛ́hɛ́ go oyana kanɛ́ okɔ́dɔ a amɔ́: «Ŋgaá go hééhínyée bɛlɔgɔ báhɔ.»

⁴⁹Báaba bá mbaá lɛ nɛhɛ́ naá tábɛ́la go oba go bágálɛnagalɛna bá amɔ́: «Mɔtɔ ohanɛ́ mɔ́nyɔ́ɔ a lɔ́mɔ́ bá go héehineninye akɛ́ bɛlɔgɔ o?»

⁵⁰Yésusu go oyana okɔ́dɔ a amɔ́: «Gioliminyo gáhɔ gɛ á go sódío, ɛ́dá naá buumbénú.»