Read Nugunu Lókasɛ 8 Bible Online

Lókasɛ 8 - Nugunu bible

Lókasɛ 8

¹Yésusu gɛ́hɛ́ go ɛ́da naá busío, ɛ ɛ́da ɛ ɛnda go tɛ́sɔnɔ na bɛdɔŋɔ, a dúmenye Gɛnɔ́gɔ́ gá Cɔ́mɔ gá Bufuŋe bá Asaŋa. A mba lɛ́ olɔŋɔ na behúúní bɛ́hɛ́ bɔ́ɔ́dɔ́ na báandɛ́,

²na bakɔ́dɔ báaba a mbaá bó úlíe bɛgáda bá biliíli, a báá bó éŋúgíe go ɛgɔnɔ́ yabɔ́. Bakɔ́dɔ moánɛ bá mbaá lɛ náana: Malɛ́a ba Magadaláa mɔ́ɔnyɔ Yésusu a mbaá mo úlíe bɛgáda bá biliíli bɛ́táanɔ na bɛ́andɛ́,

³Sáánɛ, okɔ́dɔ ba Kósa, umbeŋíbéŋí ba masɔ́mɔ má ufuŋe Elóode; Sosána na bakɔ́dɔ gɛca, bɔ́ɔ bá mbaá lɛ bá dúgune Yésusu na behúúní bɛ́hɛ́ na bɔ́ɔbɔ bá mbaá lɛ bá bɛanana.

⁴Aŋa bitúu bitúu bá batɔ bɛ́ mbaá lɛ bɛ́ bábánda, batɔ bá fadɛgana naá tɛ́sɔnɔ iŋkimée, bó úlene naá mɔ́ɔ, gɛ́hɛ́ go ɛ́da go oya go ncaba a amɔ́:

⁵«Uyogóní ummue a mba hémé go go kasana masámá naá ntɛ́mɛ́ yɛhɛ́. A lɛ́ naá go kasana nɔ́ɔnɔ, masámá móncodío go oba go pɛ́ gimbúlúu; bá báá má naadánáa, munoní mó búú úlé, mó báá nyáá púmú.

⁶Masámá móncodío má bóó obá naá cí ya adánɛ́: gɔgɔ́ aŋa má mbaá dandá má basa, má báá gó ɛ́da go ɔlɔnɔ, má báá gúénénée; goakɛ́ sumbusumbu ɛ dɛ mbá lɛ hɔ́ɔ.

⁷Masámá móncodío má bóó obá naá musíníni, kanɛ́ aŋa mó mbaá besínyée, mó báá mɔ́mɛ́nɔ́ɔ magónɛ́dá.

⁸Kɔ́ɔ móncodío mó obamɔ́ naá gɛnɔ́gɔ́ gá cí, má báá basáa, má báá ágánáa bɛondá ntɛdɛ go ntɛdɛ.» Aŋa a mbaá maná go oya ncaba yɛ́ɛyɔ, gɛ́hɛ́ go gálɛda ukelú naá mmoɛná a amɔ́: «Mɔ́ɔnyɔ a lɔ́mɔ́ na edúu go go ɔ́bɔnɔ, ɔ ɔ́bɔ!»

⁹Behúúní bɛ́hɛ́ go mo úhune goŋaá a bó falonɛna ncaba moánɛ.

¹⁰Gɛ́hɛ́ go bó gundie a amɔ́: «Bɛɛnyɔ́ɔ no lɛ́ bɛáalú goíyime gá nnindíi sá Bufuŋe bá Asaŋa; kanɛ́ naá batɔ bóncodío bá bó oyanɛna go ncaba goŋaá bá núune bá dɛ ɛ́ná, bɔ́ ɔ́bɔnɔ bá dɛ ɔ́bɔ́ naá cí.[58]»

¹¹«Kanɛ́ ncaba yɛ́ɛyɛ ɛ lɔ́mɔ́ naá cí náana: masámá má lɔ́mɔ́ nogálɔ ná Asaŋa.

¹²Batɔ bóncodío bá lɛ́ caŋa táŋɛ́ mmue aŋa pɛ́ gimbúlúu yɛ́ɛyɛ masámá mó obamɔ́ hɔ́ɔ: bɔ́ ɔ́bɔnɔ nogálɔ ná Asaŋa, kanɛ́ ohándá a lɛ go úle a nco no sógada naá ɛdɛ́má yabɔ́ goŋaá bá dɛ olímínyóo, Asaŋa a bó sódio.

¹³Bóncodío bá lɛ́ caŋa táŋɛ́ mmue aŋa cí ya gɛgɔyɔ. Aŋa bɔ́ ɔ́bɔmɔ́ nogálɔ ná Asaŋa, bá nó gɛ́ndɛgɛna na bɛyaŋa. Kanɛ́ bá dɛ nó dɛ́ɛ́ná nó sume ɛŋaŋá, bó oliminyo go moɔnɔ́ ba gɛcamɛna. Aŋa ɛsɔgɛdɔ hɛ́ bó gídemú, bú umbe gioliminyo.

¹⁴Masámá máama mó obamɔ́ naá musíníni, má lɔ́mɔ́ batɔ báaba bɔ́ ɔ́bɔnɔmɔ́ nogálɔ ná Asaŋa; kanɛ́ bá lɛ go bádɛ́ɛnɛna mecíkílí, bonɔ́mɛ na gɛɔyɔ gá cí, mó nó mɔ́mɛnɔ, nó lɔbɔ kanɛ goága bɛondá bɛ́ gónɛna.

¹⁵Kanɛ́ masámá máama mó obamɔ́ naá gɛnɔ́gɔ́ gá cí má lɔ́mɔ́ batɔ báaba bɔ́ ɔ́bɔnɔmɔ́ nogálɔ ná Asaŋa na odɛ́má usi gɔnɔ́ gedíelú bese, bá nó gumbene, bá ága bɛondá aŋa bá lɔbɔmɔ́ tɛ́ŋɛ́tɛŋɛ.

¹⁶«Mɔtɔ a dɛ nébígényée lámba go go yɛ cúbigene naá iséní, ɛ́na lí, a yɛ íŋenye naá cí ya ombɛ́dɛ́; kanɛ́ a yɛ áganamɔ́ naá gɛdálɛ́ná gá yɛ́ goŋaá báaba bí íŋenemú naá ncíbo bɛ́ ɛ́na gise[59].

¹⁷Mammana, boóma buimée bɔ́ɔbɔ bó lɔ́mɔ́ ɔsɛ́gɔ́ɔlú bó ŋga dambɛ́mɛ́dá, buimée bɔ́ɔbɔ naá nnindíi bó ŋga dálɛ́mɛ́dá naá gise.

¹⁸Gɔ́ɔ, bégedíemú nɔnɔ bese go mbɔ́dɔ yɛ́ɛyɛ no ɔ́bɔnɔmɔ́! Mammana, bá gídenine mɔ́ɔnyɔ a bɛananamɔ́, bú úlie naá mɔ́ɔnyɔ a lɔ́mɔ́ a dɛ bɛanánáa akɛ́ bɔ́ɔbɔ a béeniŋenyemú a amɔ́ a bɛanana.»

¹⁹Gɔ́ɔ nnyeedíi na bolimóní bá Yésusu bú úlemú go go nco mo ɛ́na. Kanɛ́ pɛ́ ya go mo báyɛkɛna ɛ dɛ mbáa lɛ hɔ́ɔ goŋaá batɔ bá mba lɛ́ gɛca.

²⁰Kɔ́ɔ bó oyanamɔ́ Yésusu bá amɔ́: «Yigúédíi na batɛ́ɔbɛnɔ bá lɛ́ go hanyɔ́, bá lɛ́galɛga go go ɛ́na.»

²¹Gɛ́hɛ́ go bó gundie a amɔ́: «Mmaáa na bolimóní bámɛ bá lɔ́mɔ́ batɔ báaba bá bódólonyomú nogálɔ ná Asaŋa bá gɔnɔ go ɔyɔ aŋa nó oyamɔ́.»

²²Budúgú búncodío, gɔ́ɔ Yésusu na behúúní bɛ́hɛ́ bá bólɛgamɔ́ naá gilué. Gɛ́hɛ́ go bó oyana a amɔ́: «Ŋgáa dɛ no yooga gɛsɔmbɔsɔ́mbɔ́ɔ, dɛ ɛ́da naá cɔ́lɔ boayá búunú[60].» Gáábɔ́ go ɛ́da.

²³Kanɛ́ aŋa gilué gɛ́ mbaá ŋá gɛ́ ná lɛ́ go nɛ́naba nabɔ́ naá miimpo, Yésusu go ɛ́da go dɔnɔ́ɔ. Gɛcamɛna gɛ́ dɛ dómbá, gɔ́ɔ gɛantáanta gá puŋe gɛ́ ɛ́damɔ́ go fufe naá gɛsɔmbɔsɔ́mbɔ́ɔ, gilué gá gɛ́ go ɛ́da go hóogono miimpo, batɔ báaba kɔ́ɔ bá báá bɛ́ɛ́ná naá gɛbɛ́.

²⁴Kanɛ́ behúúní go báyɛkɛna bá báá mo foyóná, bá amɔ́ gɛ́hɛ́ aá: «Iloodio, Iloodio, gɛ́cɔ́ go ɛ́da goŋaá dɛ fúe!» Gɛ́hɛ́ go foyoga, go áncɛdɛna puŋe na miimpo máama má mbaá lɔmɔ́ má bɛlɛmɛncana, muimée mɔ́ɔmɔ mó báá yɔyɔ́. Gɛantá gá pɔ́ɔ́ go nco gunde.

²⁵Yésusu go gálɛda behúúní bɛ́hɛ́ a amɔ́: «Gioliminyo gɛ́nyɔ́ gɛ́ lɔ́mɔ́ áhanɛ́ɛ o?» Kanɛ́ bá mba lɛ́ na bofoá, bá békúke makɔ́nɔ́, bá bágálɛnagalɛna bá amɔ́: «Mbɔ́dɔ ya mɔtɔ ɛhanɛ́ɛ yɛ́yɛ́ɛ o? A áncɛdɛna puŋe na miimpo, mó mo ɔ́bɛnɔnɔ[61]!»

²⁶Gɔ́ɔ bɛ́ ɛ́damɔ́ bola naá gigísi gá cí gá Béyeleseniéŋe, boayá búunú bá gɛsɔmbɔsɔ́mbɔ́ɔ, cɛŋɛ na Gelilée.

²⁷Aŋa Yésusu a mbaá ágá gɛgɔ́ndɔ́ go cí, mɔtɔ ba tɛ́sɔnɔ go úle giluméní nɛhɛ́. Mɔtɔ mɔ́ɔnyɔ a mba lɛ́ na bɛgáda bá biliíli gó ɛ́da bayɛga fueké, a dɛ mbáá lɛ́ a báágana gɛla, a dɛ bɛ́dɛ́mɛ́ná go nnyaŋá, kɛ́gɛ́ná yɛhɛ́ naá bɛbɛ́lá.

²⁸Kanɛ́ aŋa a mbɛɛ́ ɛ́ná Yésusu, gɛ́hɛ́ go ága kóokóo, go nco go obɛna Yésusu naá bɛgɔ́ndɔ́, go mo gálɛda ukelú naá mmoɛná a amɔ́: «Yésusu, Moɔnɔ́ ba Asaŋa ba Páábɔ́ naá mmoɛná, o fúmbemú ŋkádɛ́ namɛ o? Sɔ́kɔlɛ, o do páá noséésényée.»

²⁹Mammana Yésusu a mbuú úhúné gɛgáda gá giliíli goŋaá gɛ́ húme naá mɔtɔ mɔ́ɔnyɔ. Ɛŋɛndɔ gɛca, gɛgáda gá giliíli gɛ́ɛgɔ gɛ́ mba lɛ́ gɛ́ mo gumbene; bá mo góda iŋgolí na ɛmbɔ́gɔ na bɛgɔ́ndɔ́ na magala go go mo beŋebeŋe. Kanɛ́ a mba lɛ́ a gása iŋgolí yɛhɛ́, gɛgáda gá giliíli gɛ́ɛgɔ gɛ́ mo pemugie, gɛ́ ɛ́da nɛhɛ́ naá bɛcɔ́lɔ́kɔ́ɔ bá hoóma.

³⁰Yésusu a báa lɛ gó mo úhune a amɔ́: «Ufíno yáhɔ yó lɔ́mɔ́ ánɛ́ɛ o?» Gɛ́hɛ́ go mo gundie a amɔ́: «Ufíno yámɛ yó lɔ́mɔ́ Nɛgósa.» Mammana, bɛgáda bá biliíli bɛ́ mba lɛ́ íŋénéelú naá mɔ́ nnyɔ́dɔ gɛca;

³¹bɛgáda bá biliíli bɛ́ɛbɔ bɛ́ mba lɛ́ bɛ́ bósógolonyo Yésusu goŋaá a dɛ bɛ́ dómá naá ɛbɛ́lá ná noséésényée.

³²Hɔ́ɔ hɔ́ɔlɔ́, buufe bá ŋgɔnɔ́bɛ́[62] bó mba lɛ́ bó nyáanya naá ogɔndɔ; bɛgáda bá biliíli bɛ́ɛbɔ go ɛ́da go béyéeyenye Yésusu goŋaá o oliminyo, bɛ́ íŋenene naá ŋgɔnɔ́bɛ́ sɛ́ɛsɔ. Gɛ́hɛ́ go oliminyo.

³³Bɛgáda bá biliíli bɛ́ báa lɛ gó húmene naá mɔtɔ, go íŋene naá ŋgɔnɔ́bɛ́. Buufe buimée bá ŋgɔnɔ́bɛ́ go ɛ́da kíkide naá ogɔndɔ go nco bésugune naá gɛsɔmbɔsɔ́mbɔ́ɔ cuuu, go fúe púmú naá miimpo.

³⁴Aŋa batɔ báaba bá mbaá lɛ bá beŋebeŋe ŋgɔnɔ́bɛ́ bá mbɛɛ́ ɛ́ná nɔ́ɔnɔ, gáábɔ́ go díine, go cekie boóma bɔ́ɔbɔ bó mbaá bádómbánáa naá tɛ́sɔnɔ na naá nnyimé ya gɛdɔŋɔ.

³⁵Batɔ go émene go go ɛ́na boóma moánɛ, gáábɔ́ go ɛ́da naá Yésusu go gíde mɔtɔ mɔ́ɔnyɔ bɛgáda bá biliíli bɛ́ mbaá hémé naá mɔ́ nnyɔ́dɔ, a mba lɛ́ ndukíi naá bɛgɔ́ndɔ́ bá Yésusu na bɛla go nnyɔ́dɔ, nciŋí yɛhɛ́ ɛ báa go nco gunde. Kɔ́ɔ bá bɛamɔ́ bofoá.

³⁶Batɔ báaba bá mbaá lɔmɔ́ ɛ́náalú boóma bɔ́ɔbɔ buimée go bó oyanɛna aŋa mɔtɔ ba bɛgáda bá biliíli mɔ́ɔnyɔ a mbaá bɛáa go éŋuge.

³⁷Gɔ́ɔ batɔ biimée bá béyéeyenyemú Yésusu goŋaá a dómba naá gigísi gábɔ́ gá cí, goakɛ́ ba mba lɛ́ na bofoá makɔ́nɔ́. Yésusu go bólɛga naá gilué go gunde na nnyimé.

³⁸Mɔtɔ mɔ́ɔnyɔ bɛgáda bá biliíli bɛ́ mbaá húmé naá mɔ́ nnyɔ́dɔ go ɛ́da go bósógolonyo Yésusu goŋaá a lɔbɛnɔ nɛhɛ́. Kanɛ́ Yésusu go mo gundie na nnyimé a báá mo oyáná a amɔ́:

³⁹«Gundé naá mamɔ́ nnyaŋá, go oyanɛna batɔ buimée bɔ́ɔbɔ Asaŋa a báá ná ŋaáa go busío báhɔ.» Kɔ́ɔ mɔtɔ a gundemú na nnyimé, ɛ ɛ́da a gúmenye naá tɛ́sɔnɔ iŋkimée boóma buimée bɔ́ɔbɔ Yésusu a mbaá ŋaáa go busío bɛ́hɛ́.

⁴⁰Aŋa Yésusu a mbɛɛ́ ɛ́dá go úlukie boayá búunú, a báá gɔnɔ́ yooga gɛsɔmbɔsɔ́mbɔ́ɔ, gitúu gá batɔ go mo gólio. Mammana, batɔ biimée bá mba lɛ́ bá mo gɛ́gana.

⁴¹Mɔtɔ ummue, ufíno yɛ́hɛ́ Yeyílusu, go úle a báá bolá. A mba lɛ́ ogɔ́nɔ́ɔ ba nnyaŋá ya mbósógólí. Gɔ́ɔ ɔ obɛnamɔ́ Yésusu naá bɛgɔ́ndɔ́ a mo béyéeyenye goŋaá ɛ ɛ́da naá mɔ́ nnyaŋá,

⁴²goakɛ́ a mba lɛ́ a bɛanana gimmuée gɛ́hɛ́ gá ombóla a bégide na nigúe. Gɛ́ mba lɛ́ na boóma bá nnyómá sɛ́ɔ́dɔ́ na ɛ́handɛ́. Gɛcamɛna gɛ́ɛgɛ Yésusu a mbaá lɛ ɛ ɛ́dana hɔ́ɔ, gitúu gá batɔ gɛ́ mba lɛ́ nɛhɛ́ nábɛnábɛ, gɛ́ mo óda maayá miimée.

⁴³Okɔ́dɔ ummue a mba lɛ́ hɔ́ɔ a nóma ogɔnɔ́ yá goémene manɔ́ŋɔ́, bó báá go ŋa nnyómá sɛ́ɔ́dɔ́ na ɛ́handɛ́. A mba ŋá a báá go yímie bonɔ́mɛ bɛ́hɛ́ buimée naá bogóódíníní[63], kanɛ ummue ba go mo gɔ́ɔdɛnɔ ɛ ɛ́na bese.

⁴⁴Kɔ́ɔ a báyɛkɛnamɔ́ Yésusu naá nnyimé a báá báláfɛ́ná udúu yá gɛla gɛ́hɛ́, hɔ́ɔ na hɔ́ɔ, ogɔnɔ́ yɛ́hɛ́ yá go húmene manɔ́ŋɔ́ yó báá sómbɛ́gɛ́ná.

⁴⁵Gɔ́ɔ Yésusu u úhunemú a amɔ́: «Ánɛ́ɛ a mbáláfɛnamɔ́ o?» Batɔ biimée go sáŋona goŋaá bá lɛ́ kanɛ go mo báláfɛna. Píele go oyɛda a amɔ́: «Iloodio, bó lɔ́mɔ́ batɔ báaba bá go ódamɔ́ maayá miimée.»

⁴⁶Yésusu go oyɛda a amɔ́: «Mɔtɔ a á mbáláfɛ́ná, goakɛ́ ŋgɔɔ́ ɔ́bɔ́ bogaaga bó báá kémé go nnyɔ́dɔ.»

⁴⁷Okɔ́dɔ go ɛ́na goŋaá bá á mo lɛncá. Gɛ́hɛ́ go u úle a tatana a báá ncó bɔ́nɔ Yésusu naá bɛgɔ́ndɔ́. Go ɛ́da go mo oyanɛna batɔ biimée bɔ́ ɔ́bɔnɔ, goakɛ́ a báá ná mo báláfɛ́ná, tɔ́nɔ aŋa a báá ná dómbá go éŋuge.

⁴⁸Yésusu go mo oyana a amɔ́: «Ombóla bámɛ, gioliminyo gáhɔ gɛ́ á go sódío[64], ɛ́dá naá buumbénú.»

⁴⁹Yésusu a gá lɛ́ na dogálɔ naá nyuudé, mɔtɔ ba bosɔ́mɔ naá nnyaŋá ya ogɔ́nɔ́ɔ ba nnyaŋá ya mbósógólí go úle a báá bolá go oyɛda a amɔ́: «Ombóla bahɔ a á gúé, dɔmbɔ́ go génegenye Iloodio.»

⁵⁰Kanɛ́ Yésusu go ɔ́bɔ́ cɔ́mɔ moánɛ, gɛ́hɛ́ go oyana Yeyílusu a amɔ́: «O do gɔ́lɔ́ bofoá, ágá goana odɛ́má yáhɔ naá Asaŋa, ombóla bahɔ a geé éŋúgé.»

⁵¹Aŋa Yésusu a mbɛɛ́ ɛ́dá bola naá nnyaŋá, a lɛ́ kanɛ go dɛ́ɛna goŋaá mɔtɔ untió i íŋene nɛhɛ́ naá ncíbo, gó do dómbáa goana Píele, Sáŋa, Sáakɛ, isée na nnyeedíi bá moádɔmbɔ́.

⁵²Bɔ́ɔ biimée bá mba lɛ́ bá baŋa, bá bégide go busío bá moádɔmbɔ́. Yésusu go bó oyana a amɔ́: «No do baŋáa; a lɛ́ kanɛ go gúe, a lɔ́mɔ́ go dɔnɔ́ɔ.»

⁵³Gɔ́ɔ batɔ bɛ́ ɛ́damɔ́ go mo hɔnɔ, goakɛ́ bá mba lɛ́ bí íyimene bá amɔ́ a lɛ́ ugúe.

⁵⁴Yésusu go mo gumbene go ombɔ́gɔ, go mo dɔ́ŋɛnɔ a amɔ́: «Moɔnɔ́ bamɛ, foyóga.»

⁵⁵Giliíli gá moádɔmbɔ́ go nco gunde, gɛ́hɛ́ go fadɛgɛna hɔ́ɔ. Yésusu go bó oyana goŋaá bá mo fáa manyáanya.

⁵⁶Bebíéní moɔnɔ́ go békúke makɔ́nɔ́. Kanɛ́ Yésusu go bó lɔsɛnɔ goŋaá bá dɛ hóámá bá dɛ oyáná mɔtɔ boóma bɔ́ɔbɔ bó báá ná bádómbánáa.