Read Nugunu Lókasɛ 9 Bible Online

Lókasɛ 9 - Nugunu bible

Lókasɛ 9

¹Gɔ́ɔ Yésusu a bándɛgɛnamɔ́ behúúní bɛ́hɛ́ bɔ́ɔ́dɔ́ na báandɛ́ go bó fáa bogaaga na nɛgaŋa go bɛgáda bá biliíli biimée, bé éŋugenye ɛgɔnɔ́.

²Gɛ́hɛ́ go bó dóma goŋaá bɛ́ ɛ́da dúmenye Gɛnɔ́gɔ́ gá Cɔ́mɔ gá Bufuŋe bá Asaŋa, bé éŋugenye bɔgɔnɔ́gɔnɔ;

³kɔ́ɔ a bó oyanamɔ́ a amɔ́: «No do hóámá no do gɔ́lɔ́ boóma bá oŋɛndɔ: akɛ́ gidímbo, akɛ́ gɛgada, akɛ́ boóma bá go nyáa, akɛ́ muinyí, mɔtɔ a dɛ bɛáa bɛla bɛ́andɛ́.

⁴Nnyaŋá iŋkimée yɛ́ɛyɛ no íŋenemú hɔ́ɔ, gɛ́gáa nɔnɔ hɔ́ɔ gó ɛ́da go éme naá buisí bɛ́nyɔ́ bá go dómba.

⁵Bá amɔ́ bí inye go nyó gɔ́lɔ bese, úlúkíe nɔnɔ hɔ́ɔ, no bégidide bibúu bá bɛgɔ́ndɔ́ bɛ́nyɔ́[65]: bá gaá bɛáa gɛlɔsɛnɔ hɔ́ɔlɔ́.»

⁶Kɔ́ɔ behúúní bá bienemú pɛ́, bɛ́ ɛ́da bá dómbana naá bɛdɔŋɔ biimée, bó oya Gɛnɔ́gɔ́ gá Cɔ́mɔ, bé éŋugenye bɔgɔnɔ́gɔnɔ hoóma hiimée.

⁷Gɔ́ɔ kanɛ́ ufuŋe Elóode ɔ ɔ́bɔmɔ́ bó oya boóma buimée bɔ́ɔbɔ bó mbaá lɔ́mɔ́ bó bádómbana. Nciŋí ya boóma moánɛ go mo yímene, goakɛ́ batɔ bóncodío bá mba lɛ́ bó oya bá amɔ́: «Sáŋa Begiyuminye a á fúfúgé.»

⁸Batɔ bóncoó bá amɔ́: «A lɔ́mɔ́ Elíi mɔ́ɔ a á nɛ́ ɛ́nɛ́gá.» Báaba gɔnɔ́ bá a amɔ́: «Mbúsí ya Asaŋa mmue ya cóá yɛ á fúfúgé.»

⁹Kanɛ́ Elóode go oyɛda a amɔ́: «Yɔmɔ́ɔ ba moatɛ́ mmbaá dómá batɔ bá báá sómbá Sáŋa odóɛ. Ánɛ́ɛ kanɛ́ mɔ́nyɔ́ɔ ŋgɔ́bɔnɔmɔ́ bó oya moóma mɔ́ɔmɔ muimée gɛ́hɛ́ o?» Gɛ́hɛ́ go ɛ́da go fúmbe goŋaá ɛ ɛ́na Yésusu.

¹⁰Aŋa baapótɛlɛ bá mbaá ncó gunde; gáábɔ́ go oyanɛna Yésusu boóma buimée bɔ́ɔbɔ bá mbaá ŋaáa. Gɛ́hɛ́ go bó gɔ́lɔ, a bɛ́ɛ́ ɛ́dá nabɔ́ gɛyáŋɛ́ gɛayá gá tɛ́sɔnɔ ya Bɛcayɛ́da.

¹¹Kɔ́ɔ aŋa bitúu bá batɔ bɛ́ mbɔɔ́ ɔ́bɔ́ nɔ́ɔnɔ, gá bɛ́ go mo fídene. Yésusu go bó gɔ́lɔ bese, a bó oyanɛna ɛkádɛ́ bó lɔ́mɔ́ Bufuŋe bá Asaŋa, e éŋugenye báaba bá mbaá lɔmɔ́ bá mbaŋɔ́.

¹²Buisí bó ná lɛ́ go gúlugene, Bɛɔdɔ́ɔ na bɛ́andɛ́ bá behúúní go báyɛkɛna Yésusu, bá amɔ́: «Gúlúgíe gitúu gá batɔ gɛ́ɛgɛ, bɛ́ ɛ́da naá bɛdɔŋɔ na naá motɔtɔ́ŋɔ má maayá bá fúmbe manyáanya na mbɛ́dɛ́mɛ́nɛ́ná, goakɛ́ anáa dɛ lɔ́mɔ́ háalá, há lɛ́ gɛcɔ́lɔ́kɔ́ gá hoóma.»

¹³Gɛ́hɛ́ go bó gundie a amɔ́: «Bó fáamɔ́ nɔnɔ bɛɛnyɔ́ɔ moatɛ́ manyáanya.» Bɔ́ɔ go mo gundie bá amɔ́: «Dɛ lɛ́ goana na bɛlɛ́dɛ bɛ́táanɔ na moɔbɔ́ móandɛ́. O lɛ́galɛga goŋaá dɛ ɛ́ ɛ́dá go ɔ́ndɔ manyáanya bɛɛcɔ́ɔ moatɛ́ go batɔ báaba biimée o?»

¹⁴Báaba bá mbaá lɔmɔ́ hɔ́ɔ bá mba lɛ́ ombanɔ yá batɔ banɔ́mɔtɔ́ bá go húme tɔ́sɛnɔ ɛ́táanɔ. Kɔ́ɔ Yésusu o oyanamɔ́ behúúní bɛ́hɛ́ a amɔ́: «Bó lukúménényéemú nɔnɔ go bɛɛca: gɛɛca gímmue batɔ aŋa otíno áhandɛ́ na bɔ́ɔ́dɔ́.»

¹⁵Gɔ́ɔ bá mo ɔ́bɛnɔmɔ́, bá báá lukúménényée batɔ.

¹⁶Yésusu go gɔ́lɔ bɛlɛ́dɛ bá bɛ́táanɔ na moɔbɔ́ móandɛ́ mɔ́ɔmɔ, a báá búlúgíe oŋgíso go mmoɛná, a báá béhiigí Asaŋa go moóma má go nyáa mɔ́ɔmɔ. Gɛ́hɛ́ go mó gɛ́sa, i íŋenene behúúní goŋaá bá abana gitúu.

¹⁷Batɔ biimée bá báá nyáányáa bá báá hóógío, bá báá gɔ́lɔ́ bigísi bá bɛlɛ́dɛ bɛ́ɛbɛ bɛ́ mbaá síéné, bɛ́ mba lɛ́ ncada sɛ́ɔ́dɔ́ na ɛ́handɛ́[66]dácɛ dácɛ.

¹⁸Aŋa Yésusu a mbaá lɔmɔ́ bɔ́gɔ́gɛ́dɔ́ɔlú go mbósógólí, behúúní olɔŋɔ nɛhɛ́, gɛ́hɛ́ go bó úhune a amɔ́: «Bitúu bá batɔ bɛ́ oya bɛ́ amɔ́ ndɔ́mɔ́ ánɛ́ɛ o?»

¹⁹Gáábɔ́ go gundie bá amɔ́: «Batɔ bó oya bá amɔ́ o lɔ́mɔ́ Sáŋa Begiyuminye, bóncodío bá amɔ́ o lɔ́mɔ́ Elíi, bóncodío gɔnɔ́ bá amɔ́ o lɔ́mɔ́ mbúsí sá Asaŋa mmue ya cóá yɛ́ yɛ á ná fúfúgé.»

²⁰Yésusu go bó úhunemú a amɔ́: «Kanɛ́ bɛɛnyɔ́ɔ no oyamɔ́ no amɔ́ ndɔ́mɔ́ ánɛ́ɛ o?» Píele a á gɔ́lɔ́ dogálɔ, go gundie a amɔ́: «O lɔ́mɔ́ Mesíi ba Asaŋa.»

²¹Kanɛ́ Yésusu go bó bébégidine goŋaá bá dɛ hóámá bá dɛ oyáná mɔtɔ ánɛ́ɛ a lɔ́mɔ́,

²²gɛ́hɛ́ go ɛ́da naá busío a bó oyanɛna a amɔ́: «Gó háanana goŋaá Moɔnɔ́ ba mɔtɔ a lumene na gɛɔ́bɛgɔ makɔ́nɔ́; bafɛanɔ́ɔ bá gɛdɔŋɔ, bagɔ́nɔ́ɔ bá bedúmbí bɛbáágá naá Asaŋa na muloodio má gicele bá mo umbe, batɔ bá mo óna, kanɛ́ naá nnyimé ya medúgú mádadɔ́, a lɛ go fúfuge.»

²³Kɔ́ɔ a bó oyanamɔ́ bɔ́ɔ biimée a amɔ́: «Aáŋa mɔtɔ a lɛ́galɛga go mbiene, ŋgáa a dɔmbɔ go ɔyɔ go gɛ́hɛ́ moatɛ́, a kélemene bɛdɔmbɔ miisí miimée, a lɛ go mbiene.

²⁴Goŋaá mɔtɔ mɔ́ɔnyɔ a lɛ́galɛgamɔ́ go beŋe gɛɔyɔ gɛ́hɛ́ a ná gɛ́ yímie. Kanɛ́ mɔ́ɔnyɔ a ná yímiemú gɛɔyɔ gɛ́hɛ́ go busío bámɛ, a ná gɔnɔ bɛa gɛ́.

²⁵Mɔtɔ a amɔ́ a bóda cí iŋkimée, a amɔ́ a yímie gɛɔyɔ gɛ́hɛ́ ɛ́na a amɔ́ a bésulie mɔ́ɔ moatɛ́, kasɛ́á besé a lɔ́mɔ́ ba go dáŋaba o?

²⁶Mammana, mɔtɔ a amɔ́ a nóanana odóɛ namɛ gɔnɔ́ na dogálɔ dámɛ naá tɛ́mádɛ́má ya batɔ bá ínoni báaba bá fíidenyemú Asaŋa nnyimé bá gɔnɔ lɔgɔ makɔ́nɔ́, Moɔnɔ́ ba mɔtɔ a ŋga mo nóɛ́ná tɔ́nɔ odóɛ gɔ́ɔgɔ a ŋguú úlé naá nigúmi nɛ́hɛ́, na naá nɛ́ɛnɛ ná Isée na bimmúmpúu bá bɛɛ́ŋgɛlɛsɛ.

²⁷Mammana, ŋgaá nyó oyáná caá, batɔ bóntió naá báaba bá lɔ́mɔ́ háalá, bá dɛ ŋgá gúenene kanɛ goŋaá bɛ́ ɛ́ ɛ́ná Bufuŋe bá Asaŋa.»

²⁸Naá nnyimé ya medúgú aŋa mánnámanyɛ́ go dómba aŋa a mbaá gálágáláa nɔ́ɔnɔ, Yésusu go gɔ́lɔ Píele Sáŋa na Sáakɛ; go ɛ́da naá ogɔndɔ mmoɛná go go bósógolonyo.

²⁹A lɛ́ naá go bósógolonyo, busío bɛ́hɛ́ go bénúgie, gɛla gɛ́hɛ́ gɛ́ báá púméné genyi genyi.

³⁰Gɔ́ɔ bá ncomɔ́ go ɛ́na goŋaá batɔ báandɛ́ bó oya ŋkanɔ́ nɛhɛ́; Mɔ́sɛsɛ na Elíi. Bá mba lɛ́ naá kadɛ́gadɛ́ɛ ya nigúmi ná mmoɛná. Bá gálagala nɛhɛ́ mbɔ́dɔ yɛ́ɛyɛ a mbaá lɛ bá go hóogio bosɔ́mɔ bɛ́hɛ́ bá go ɛ́da gúe naá Yolósalɛmɛ.

³¹

³²Píele na boɛhɛ́ɛ bá mba lɛ́ golá golá na dɔnɔ́ɔ. Kɔ́ɔ bá foyogamɔ́ go ɛ́na nigúmi ná Yésusu na báandɛ́ báaba bá mbaá lɔmɔ́ tɛ́nɛ́ɛ nɛhɛ́[67].

³³Aŋa gɔ́ɔgɔ bɔ́ɔbɔ bá mbaá ŋá bá ná lɛ́ go ádoganana na Yésusu, Píele go mo oyana a amɔ́: «Iloodio, bó lɛ́ bese goŋaá dɛ bɛ́ɛmba háalá; ŋgáa dɛ dábɛga bincumu bɛ́dadɔ́: gáhɔ gímmue, gá Mɔ́sɛsɛ gímmue, gá Elíi gímmue.» A dɛ mbáa lɛ i íyimene boóma bɔ́ɔbɔ a mbaá lɔmɔ́ a gálagala.

³⁴Aŋa a mbaá lɔmɔ́ a gálagala nɔ́ɔnɔ, nogálámbá go úle nó báá bó boɛgɛ́ná. Behúúní go bɛa bofoá aŋa bá mbɛɛ́ ɛ́ná nogálámbá nɔ́ɔnɔ nó bó boɛgana.

³⁵Ukelú kanɛ́ go dónogoga naá nogálámbá yó amɔ́: «Mɔ́ɔnyɔ a lɔ́mɔ́ Moɔnɔ́ bamɛ, mɔ́ɔ mbií iyídé, mo bódólónyóomú nɔnɔ[68]!»

³⁶Aŋa ukelú yɔ́ɔyɔ yó mbaá lɛ yó dónogogana, gáábɔ́ go nco teme Yésusu mokáa. Behúúní go bɛ́dɛgɛna boóma bɔ́ɔbɔ bá mbɛɛ́ ɛ́ná pɔ́ɔ́, bá dɛ oyáná mɔtɔ naá gɛcamɛna moánɛ.

³⁷Gó á bélíe, aŋa Yésusu a mbaá siisé ogɔndɔ olɔŋɔ na behúúní bɛ́hɛ́ bɔ́ɔbɔ, gɛlɔŋɔlɔ́ŋɔ́ gá gitúu go úle go go lumene nɛhɛ́.

³⁸Gɔ́ɔ mɔtɔ ummue naá gitúu ɛ ɛ́damɔ́ go ánca a amɔ́: «Iloodio, sɔ́kɔlɛ, núúníde moɔnɔ́ bamɛ mɔ́ɔnyɔ, a lɛ́ gimmuée gámɛ gá moɔnɔ́.

³⁹A lɛ́ aŋa gɛgáda gá giliíli gɛ́ mo gumbenemú, a dómba go ɛ́da go ánca, a canagagana, a húmenye mbúcú; gɛ́ lɛ go ɛ́da go mo séesenye nɔ́ɔnɔ, gɛ́ nco mo dɛ́ɛna tɔkɔ, a báá go gunde yɛkɛ́ɛ.

⁴⁰Mbáa baŋana behúúní báhɔ goŋaá bá gɛ́ gúne, kanɛ́ gɛ́ báá bó yágɛgɛna.»

⁴¹Yésusu go gɔ́lɔ dogálɔ a amɔ́: «Ogɛlɛ yá edúu bɛlɔ́kɔ́ gɔnɔ́ na monóŋgólí, nná bɛ́ɛmba nɛnyɔ́ gó ɛ́da héme nikíníi o? Nná nyó bénúmitenye gó ɛ́da héme nikíníi o? Úlé na moɔnɔ́ bahɔ háalá.»

⁴²Moádɔmbɔ́ a á báyɛkɛ́ná Yésusu, gɛgáda gá giliíli go mo góba go cí, a báá canágágá. Kɔ́ɔ Yésusu áncɛdɛnamɔ́ gɛgáda gá giliíli, a béé éŋúgíe moádɔmbɔ́, a báá gundínyée isée.

⁴³Batɔ biimée go ɛ́da go békúke bogɔ́nɔ́ɔ bá Asaŋa. Aŋa batɔ bá mbaá lɔmɔ́ bá békúke buimée bɔ́ɔbɔ Yésusu a mbaá lɔmɔ́ a ŋanana, gɛ́hɛ́ go oyana behúúní bɛ́hɛ́ a amɔ́:

⁴⁴«Bódólígínyóomú nɔnɔ bese bɔ́ɔbɔ ndɔ́mɔ́ goŋaá nyó oyana: bá ná dúe Moɔnɔ́ ba mɔtɔ go ɛmbɔ́gɔ ya batɔ.»

⁴⁵Kanɛ́ behúúní bá dɛ mbɔ́ ɔ́bɔ nogálɔ nɔ́ɔnɔ naá cí; bá mba nó ɔsɛ́gɔ́ goŋaá bá dɛ nó ɔ́bɔ́ naá cí; bá báá dííné go mo úhune nogálɔ moánɛ aŋa mó lɔ́mɔ́ naá cí.

⁴⁶Gɔ́ɔ behúúní bú ubiemú mpálɔ́ bɔ́ɔ na bɔ́ɔ go go íyime ánɛ́ɛ a lɔ́mɔ́ gɛkɔ́nɔ́nɔ́ɔ a dómba basɔ́gɔ́ɔ naá olɔŋɔ yábɔ́.

⁴⁷Yésusu a mba lɛ́ i íyimene aŋa bá mbaá lɔmɔ́ bá béeniŋenye naá ɛdɛ́má yabɔ́, gɔ́ɔ a gɔ́lɔmɔ́ moádɔmbɔ́ ummue, a báá mo ágá go mɔ́ boayá,

⁴⁸Gɛ́hɛ́ go bó oyana a amɔ́: «Mɔ́ɔnyɔ a gɛ́ndɛgɛnamɔ́ moádɔmbɔ́ mɔ́ɔnyɔ go busío bámɛ, a kɛ́ndɛgɛnamɔ́ yɔmɔ́ɔ moatɛ́; gɔnɔ́ mɔ́ɔnyɔ a kɛ́ndɛgɛnamɔ́, a gɛ́ndɛgɛnamɔ́ mɔ́ɔnyɔ a lɔ́mɔ́ tómáalú. Mammana, mɔ́ɔnyɔ a lɔ́mɔ́ sɔŋkɛdɛgɛdɛ naá bɛɛnyɔ́ɔ biimée, mɔ́ɔ a lɔ́mɔ́ gɛkɔ́nɔ́nɔ́ɔ.»

⁴⁹Sáŋa go gɔ́lɔ dogálɔ a amɔ́: «Iloodio dɛ bɛ́ɛ́ ɛ́na mɔtɔ mɔ́ɔnyɔ a lɔ́mɔ́ a dɛ go bienénée nɛcɔ́ a gúne bɛgáda bá biliíli a buŋe ufíno yáhɔ. Dɛ báá ná ŋá dɛ amɔ́ dɛ mo lege.»

⁵⁰Yésusu go oyɛda a amɔ́: «No do mo legé, mammana, mɔ́ɔnyɔ a lɔ́mɔ́ a dɛ nyó bábɛndábɛ́ndáa a lɛ́ nnyimé yɛnyɔ́.»

⁵¹Aŋa medúgú máama Yésusu a mbaá háánánáa go bólɛga naá mmoɛná má mbaá lɛ má úle má úlene, gɛ́hɛ́ go saŋa naá odɛ́má goŋaá ɛ ɛ́da naá Yolósalɛmɛ.

⁵²Gɔ́ɔ a dúenyemú batɔ bá bosɔ́mɔ. Gáábɔ́ go biene pɛ́ bá bɛ́ɛ́ ɛ́dá bola naá gɛdɔŋɔ gímmue gá Samalɛ́ɛ go go mo gedinye boóma buimée bɔ́ɔbɔ bó mbaá lɔmɔ́ bó háanana.

⁵³Kanɛ́ bá mbi inyé go mo gɛ́ndɛgɛna hɔ́ɔ goŋaá a mbaá lɔmɔ́ ɛ ɛ́dana naá Yolósalɛmɛ.

⁵⁴Aŋa behúúní bá Yésusu, Sáakɛ na Sáŋa bá mbɔɔ́ ɔ́bɔ́ nɔ́ɔnɔ, gáábɔ́ go gálɛda bá amɔ́: «Daadáa, o lɛ́galɛga goŋaá dɛ́ ba dɔ́ŋɛ́nɔ́ íyuke naá mmoɛná, hɛ́ gɔsɔ, hɛ́ bó fúugie[69] o?»

⁵⁵Yésusu go bó bábondona a báá bó coomɛ́dɛ́ná.

⁵⁶Kɔ́ɔ bá dómbamɔ́ naá gɛdɔŋɔ gíncodío.

⁵⁷Aŋa bá mbaá ŋá bá ná lɛ́ go pɛ́, mɔtɔ ummue go gálɛda Yésusu a amɔ́: «Nná go bienene hoóma hiimée háaha o nɛ́ ɛ́damɔ́.»

⁵⁸Yésusu go mo gundie a amɔ́: «Pága sɛ́ bɛanana mabɛ́lá, munoní má mmoɛná mó bɛanana aŋaanɔ; kanɛ́ Moɔnɔ́ ba mɔtɔ, mɔ́ɔ, a dɛ báá na hoóma há go dála odóɛ hɔ́ɔ a dúugide.»

⁵⁹Yésusu go oyana mɔtɔ uncodío a amɔ́: «Mbienéemú.» Kanɛ́ mɔtɔ mɔ́ɔnyɔ go oyɛda a amɔ́: «Manɛ́ tɛ́ɛna ŋgɛ́da mie baaba.»

⁶⁰Yésusu go mo gundie a amɔ́: «Dɛ́ɛ́na begúe bá mienene bɛlɔ́ŋɔ́ bábɔ́. Maamɔ́ɔ, ɛ́dá dúményée Gɛnɔ́gɔ́ gá Cɔ́mɔ gɛ́ɛgɛ gɛ́ núunemú Bufuŋe bá Asaŋa.»

⁶¹Mɔtɔ uncodío go gɔnɔ go oyana Yésusu a amɔ́: «Iloodio, kaá go biené, manɛ́ tɛ́ɛna kanɛ́ ŋgɛ́da bédíigie batɔ bámɛ bá nnyaŋá, dɛ ádogana nabɔ́.»

⁶²Kanɛ́ Yésusu go mo gundie a amɔ́: «Mɔtɔ mɔ́ɔnyɔ a ágamɔ́ ombɔ́gɔ naá gɛkáládá gá buelí, a báá gɔnɔ́ go ɛ́da go núune naá nnyimé, a dɛ báá bá goŋaá a yɔgɔnɔ go Bufuŋe bá Asaŋa.»