Read Nugunu Sáŋa 10 Bible Online

Sáŋa 10 - Nugunu bible

Sáŋa 10

¹«Mammana, mammana, ŋgaá nyó oyáná caá: Mɔtɔ mɔ́ɔnyɔ a ŋamɔ́ a dɛ dómbá naá gɛasɛ́ gá omɛndɛ́ yá bɛdómbáa, a gabogogana go boayá, a lɛ́ uŋgíbi, a lɛ́ gɛkándáa.

²Kanɛ́ mɔ́ɔnyɔ a dómbanamɔ́ naá gɛasɛ́ go go íŋene naá buufe, a lɛ́ umbeŋíbéŋí bɛdómbáa.

³Ufífí a mo buunene gɛasɛ́, bɛdómbáa bɛ́ ɔ́bɔnɔ ukelú yɛ́hɛ́. A dɔ́ŋɔnɔ go ufíno bɛdómbáa bɛ́hɛ́, gímmue go gímmue, ɛ ɛ́dana na bɛ́ naá hanyɔ́.

⁴Aŋa a manamɔ́ go bɛ́ húmenye, ɛ ɛnda a bɛ́ gɔ́gɔ naá busío; bɛ́ bɛ́ mo bienene, goakɛ́ bí íyimene ukelú yɛ́hɛ́.

⁵Bɛ́ dɛ ŋgá biene giinyíi giinyíi gá mɔtɔ, moatɛ́ bɛ́ ŋgaá mo díínée, goŋaá bɛ́ dɛ lɛncánáa ukelú yɛ́hɛ́.»

⁶Yésusu go bó oyana ncaba yɛ́ɛyɔ, kanɛ́ báaba bá mbaá lɔmɔ́ bá mo bódólonyo, bá lɛ́ kanɛ go yɛ ɔ́bɔ naá cí.

⁷Yésusu go gɔnɔ bayɛga a amɔ́: «Mammana, mammana, ŋgaá nyó oyáná caá: Ndɛ́ gɛasɛ́ gá omɛndɛ́ yá bɛdómbáa.

⁸Biimée púmú báaba bá mbaá dóáná go úle gámɛ, bá mba lɛ́ biíbi, bɔ́ɔ gɔnɔ́ bɛkándáa[68], kanɛ́ bɛdómbáa bɛ́ lɛ́ kanɛ go bɔ́ ɔ́bɛnɔ.

⁹Yɔmɔ́ɔ ndɛ́ gɛasɛ́; mɔtɔ a amɔ́ a dómba naá yɔmɔ́ɔ go go íŋene, a ŋga sɔ́dɔ́; kɔ́ɔ a ŋgaá bɛ́ɛ́mbá, a gɔsɔ a bólɛga, a gídene manyáanya mɛ́hɛ́.

¹⁰Uŋgíbi mɔ́ɔ, u úlenemú goana go go íbe, go go óna na go fúugie. Yɔmɔ́ɔ mbu úlé goŋaá batɔ bá bɛa mammana ya gɛɔyɔ, bá gɔnɔ gɛ́ bɛa fundufundu.

¹¹«Ndɛ́ gɛnɔ́gɔ́ gá umbeŋíbéŋí[69]. Gɛnɔ́gɔ́ gá umbeŋíbéŋí gɛ́ íŋenene gɛɔyɔ gɛ́hɛ́ go bɛdómbáa bɛ́hɛ́.

¹²Mɔtɔ mɔ́ɔnyɔ bá mo soɛnanɛnamɔ́ go go beŋebeŋe bidúgé, mɔ́ɔ a dɛ bɛ́ɛ́mbá moatɛ́ ba bɛ́, aŋa u úlemú a bɛ́ɛ́ ɛ́ná gimóndó, a gúduge na odɛ́dá, a síe a báá cecúgíe bɛdómbáa, gimóndó gɛ́ síene gɛ́ bɛ́ dóda, gɛ́ bɛ́ sélemendie.

¹³A gúdugenemú na odɛ́dá, goakɛ́ a lɔ́mɔ́ hɔ́ɔ goana go muinyí, a dɛ gɔ́lɔ́nɔ́ɔ gɛdɔmbɔ go bɛdómbáa.

¹⁴Yɔmɔ́ɔ, ndɛ́ gɛnɔ́gɔ́ gá umbeŋíbéŋí. Ŋgíyimene bɛdómbáa bámɛ, bɛdómbáa bámɛ bɛ́ tɔ́nɔ bɛ́ ŋgíyimene.

¹⁵Aŋa Baaba a ŋgíyimenemú, yɔmɔ́ɔ ŋgíyimene Baaba, ŋgíŋenene gɛɔyɔ gámɛ go bɛdómbáa bamɛ.

¹⁶Ká bɛanana bɛdómbáa bíncodío bɛ́ɛbɛ bɛ́ lɔ́mɔ́ bɛ́ dɛ bɛ́ɛ́mbá naá buufe bɔ́ɔbɔ. Bɛ́ɛbɔ tɔ́nɔ, káanana go bɛ́ indenye; bɛ́ ŋgɔ ɔ́bɔ́nɔ́ɔ ukelú yámɛ, gitúu gɛ́ lɛ go bɛ́ɛmba táŋɛ́ gímmue na umbeŋíbéŋí táŋɛ́ ummue.

¹⁷Baaba a mmaamana, goakɛ́ ŋgíŋenene gɛɔyɔ gámɛ, naá nnyimé kɔnɔ bɛanana bogaaga bá go gɔnɔ gɛ́ bɛa.

¹⁸«Mɔtɔ a dɛ gɛ́ ŋgúlényée, kanɛ́ yɔmɔ́ɔ kɛ́ íŋenenemú go yɔmɔ́ɔ moatɛ́. Mbɛanana bogaaga bá go gɛ́ íŋene, kɔnɔ bɛanana bogaaga bá go gɔnɔ gɛ́ bɛa. Bɔ́ɔbɔ Baaba a mbaá ŋgoyáná a amɔ́ nco ŋa bɔ́bɔ́ɔ.»

¹⁹Dogálɔ dá Yésusu dɔ́ɔdɔ go gɔnɔ go úle na gobáadona naá kadɛ́gadɛ́ɛ ya Beyúdene.

²⁰Gɛca naá olɔŋɔ yábɔ́ gɛ́ mba lɛ́ gɛ́ oya gɛ́ amɔ́: «A lɛ́ na gɛgáda gá giliíli! A á dabálɛ́dá! No mo bódólonyo goakɛ́ o?»

²¹Kanɛ́ bóncoó bá amɔ́: «Dogálɔ dɔ́ɔdɔ dó do bósó dogálɔ dá mɔtɔ mɔ́ɔnyɔ a lɔ́mɔ́ na gɛgáda gá giliíli. Moatɛ́, gɛgáda gá giliíli gɛ́ lɛ́ ba go fuune begélígeli oŋgíso o?»

²²Bá mba lɛ́ bá leebenye gibíné gá go gɔnɔ buune Nnyaŋá ya Asaŋa naá Yolósalɛmɛ[70]. Bó mba lɛ́ gɛcamɛna gá isió.

²³Yésusu a mba lɛ́ naá Nnyaŋá ya Asaŋa, ɛ ɛ́da a nco gunde, ɛ ɛnda naá Balánda ba Salomɔ́ŋɔ.

²⁴Beyúdene go mo ágɛna gieŋí bá amɔ́ gɛ́hɛ́ aá: «O ná dɔ́bɔmɔ́ o có gígenye naá mbíno gó ɛ́da héme nikíi o? Aáŋa o lɛ́ Mesíi, có ádɛ́náamɔ́.»

²⁵Yésusu go bó gundie a amɔ́: «Mbáa go nyó oyana nɔ́ɔ, no do olímónyóo. Meŋiigíe máama ŋŋananamɔ́ go ufíno yá Baaba má dúfenye boóma bɔ́ɔbɔ ndɔ́mɔ́.

²⁶«Kanɛ́ bɛɛnyɔ́ɔ, no do ŋgolímónyóo, goakɛ́ no do báá naá olɔŋɔ yá bɛdómbáa bámɛ.

²⁷Bɛdómbáa bámɛ bɛ́ ɔ́bɔnɔ ukelú yámɛ, mbí íyimene, bɛ́ bɛ́ mbienene.

²⁸Kɔ́ɔ yɔmɔ́ɔ, mbɛ́ fáanana gɛɔyɔ gá kanɛ mesúge; bɛ́ dɛ ŋgá fúe akɛ́ go buisí, gó gɔnɔ gunde mɔtɔ a dɛ ŋgá bóso go bɛ́ bɔgɔ naá ombɔ́gɔ yámɛ.

²⁹Baaba mɔ́ɔ a mbaá bɛ́ ncoóo, a lɛ́ gɛgaaga go buimée, kɔ́ɔ mɔtɔ a dɛ bɛanánáa bogaaga bá go bɔgɔ boóma naá ombɔ́gɔ yá Baaba.

³⁰Namɛ na Baaba dɛ lɛ́ ummue.»

³¹Beyúdene go gɔnɔ báda adánɛ́ go go mo dóɛdana.

³²Kanɛ́ Yésusu go gɔnɔ gɔ́lɔ dogálɔ a amɔ́: «Mbáa go nyó dúfenye gɛca gá bɛnɔ́gɔ́ bá meŋiigíe bá go ɛ́da go úle naá Baaba. No lɛ́galɛgamɔ́ go tóɛdana adánɛ́ kanɛ́ go gɛ́hanɛ́ o?»

³³Beyúdene go mo gundie bá amɔ́: «Bó do bósó go gɛnɔ́gɔ́ gá meŋiigíe gímmue gɔ́ɔ dɛ lɛ́galɛgamɔ́ go go dóɛdana adánɛ́, kanɛ́ bó lɔ́mɔ́ goŋaá o sɛga Asaŋa, goakɛ́ maamɔ́ɔ mɔ́ɔnyɔ o lɔ́mɔ́ mɔtɔ, go amɔ́ o béeninenye na Asaŋa[71].»

³⁴Yésusu a amɔ́ gáábɔ́ a amɔ́: «Ábɔ, bó do báá ɔ́ŋɔ́ɔlú naá Kálata yɛnyɔ́ ya Gicele goŋaá: Yɔmɔ́ɔ Asaŋa ndɛ́ caá: no lɛ́ baasaŋa[72] o?

³⁵Gicele gɛ́ bó dɔ́ŋɔnɔ baasaŋa, bɔ́ɔ báaba nogálɔ ná Asaŋa nó mbaá lɛ gálɛ́dáalú go busío bábɔ́. Asáa gɔgɔ́ mɔtɔ a dɛ bósó ba go fúgune bɔ́ɔbɔ Ŋgɔ́ŋɛ́ yɛ oyamɔ́.

³⁶Gámɛ mɔ́ɔnyɔ Baaba a mbaá poná, a báá gɔnɔ́ tóma naá cí háalá, no gálagala no amɔ́: “O sɛga Asaŋa”, go busío bá goŋaá ndɛ́ oyɛ́dáalú caá ndɛ́ Moɔnɔ́ ba Asaŋa.

³⁷Aáŋa cɛ ŋanánáa meŋiigíe má Baaba, no do ágá odɛ́má yɛ́nyɔ́ naá yɔmɔ́ɔ!

³⁸Kanɛ́ aáŋa mmá ŋanana, gɔgɔ́ akɛ́ no do ágá odɛ́má yɛ́nyɔ́ naá yɔmɔ́ɔ, olímínyóo nɔnɔ meŋiigíe moánɛ, go goŋaá no lɛnca, no íyime bese bese go goŋaá Baaba a lɛ́ naá yɔmɔ́ɔ, yɔmɔ́ɔ naá Baaba.»

³⁹Kɔ́ɔ bá gɔnɔmɔ́ fúmbe go mo gumbene, kanɛ́ gɛ́hɛ́ go bɔ́bɔgɔ naá ɛmbɔ́gɔ yabɔ́.

⁴⁰Yésusu go gɔnɔ gunde naá cɔ́lɔ ya osaá yá Yɔlɔdɛ́ŋɛ boayá búunú anáa Sáŋa a mbaá bayɛ́gá go yumeninye batɔ, gɛ́hɛ́ go lukumene hɔ́ɔ.

⁴¹Gitúu gá batɔ go ɛ́da go mo úlenine hɔ́ɔ, bo oya bá amɔ́: «Mammana, Sáŋa a lɛ́ kanɛ go ŋa gieninye gá gobékúke akɛ́ gímmue, kanɛ́ buimée bɔ́ɔbɔ a mbaá gálágáláa go mɔtɔ mɔ́ɔnyɔ, bó mba lɛ́ mammana.»

⁴²Hɔ́ɔlɔ́ gɔ́ɔ gitúu gá batɔ gɛ́ ágamɔ́ odɛ́má yábɔ́ naá Yésusu.