Read Nugunu Sáŋa 11 Bible Online

Sáŋa 11 - Nugunu bible

Sáŋa 11

¹Mɔtɔ ummue ufíno yɛ́hɛ́ Lasáalɛ, o obamɔ́ na ogɔ́nɔ́ɔ. A mbá lɛ́ a gɛ́ga naá gɛdɔŋɔ gá Beteníi, olɔŋɔ na bolimóní bɛ́hɛ́ bá bakɔ́dɔ báaba bá lɔ́mɔ́ Malɛ́a na Mááta.

²Malɛ́a moánɛ mɔ́ɔnyɔ mɔ́ɔ a mbaá fúé Yésusu alabɛ́nda go bɛgɔ́ndɔ́, a báá bɛ́ fúúnée na cóɛ sɛ́hɛ́. Ondimóní Lasáalɛ, mɔ́ɔ a mbaá lɛ́ a nóma.

³Bolimóní bá bakɔ́dɔ go dómɛna Yésusu cɔ́mɔ bá amɔ́: «Daadáa ugúle bahɔ a nóma.»

⁴Aŋa Yésusu a mbɔɔ́ ɔ́bɔ́ cɔ́mɔ yɛ́ɛyɔ, gɛ́hɛ́ go gálɛda a amɔ́: «Ogɔnɔ́ yá Lasáalɛ yɔ́ɔyɔ yó do gaá mo óná. Yó lɔ́mɔ́ go go dúfie bogaaga bá Asaŋa. Gɔnɔ́ bá gúmidie Moɔnɔ́ ba Asaŋa a.»

⁵Yésusu a mba lɛ́ a maamana Mááta na ondimóní Malɛ́a, na Lasáalɛ kɛ́.

⁶Kanɛ́ akɛ́ aŋa a mbíi íyime goŋaá Lasáalɛ a nóma, gɛ́hɛ́ go gɔnɔ dúmbie medúgú máandɛ́ tisi naá hoóma háaha a mbaá lɔ́mɔ́ hɔ́ɔ.

⁷Naá nnyimé hɔ́ɔlɔ́ kanɛ́, gɔ́ɔ o oyanamɔ́ behúúní bɛ́hɛ́ a amɔ́: «Ŋgáa dɛ no gunde naá Yudée.»

⁸Behúúní bɛ́hɛ́ go mo gundie bá amɔ́: «Eléébi, medúgú kanɛ go béfíidie, Beyúdene bá báá fúmbée go go óna na adánɛ́, gɔ́ɔ o lɔ́mɔ́ go a amɔ́ o gɔnɔ gunde hɔ́ɔ o?»

⁹Yésusu go bó oyana a amɔ́: «Ábɔ, buisí bó do bɛanánáa bigúlí bɛ́ɔ́dɔ́ na bɛ́andɛ́ o? Aáŋa mɔtɔ ɛ ɛnda sisíi, a dɛ bósó go kúkenene, goakɛ́ ɛ ɛ́nana gise gá cí yɛ́ɛyɛ.

¹⁰Kanɛ́ aáŋa ɛ ɛnda na budúgú, a kúkenene, goakɛ́ a dɛ báá na gise.»

¹¹Naá nnyimé ya dogálɔ dɔ́ɔdɔ, Yésusu go gidene a amɔ́: «Ugúle bɛcɔ́ Lasáalɛ a lɛ́ go dɔnɔ́ɔ, kanɛ́ ŋgɛ́danamɔ́ go go ɛ́da mo foyona.»

¹²Behúúní go mo oyana kanɛ́ bá amɔ́: «Daadáa, aáŋa a lɛ́ go dɔnɔ́ɔ, a geé éŋúgé.»

¹³Yésusu a mbaá lɔ́mɔ́ o oyanɛna behúúní bɛ́hɛ́ nigúe ná Lasáalɛ, kanɛ́ bɔ́ɔ, bá béeniŋenye goŋaá bó lɔ́mɔ́ dɔnɔ́ɔ mammana.

¹⁴Gɔ́ɔ Yésusu a bó ádɛnamɔ́ pasɛ́pasɛ́ a amɔ́: «Lasáalɛ a lɛ́ ugúe.

¹⁵Ŋgɔ́bɔnɔ bese makɔ́nɔ́ go busío bɛ́nyɔ́ aŋa gɔ́ɔgɔ bó mbaá bádómbánáa yɔmɔ́ɔ kanɛ hɔ́ɔ, hɔ́ɔlɔ́ gɔ́ɔ no gaá ná ágá odɛ́má yɛ́nyɔ́ naá yɔmɔ́ɔ. Kanɛ́ ŋgáa dɛ no ɛ́da anáa a lɔ́mɔ́.»

¹⁶Tómasɛ, mɔ́ɔnyɔ bá gɔnɔmɔ́ dɔ́ŋɔnɔ bá amɔ́ Moɔnɔ́ ba ɛbáasa, o oyanamɔ́ behúúní báaba bóncodío a amɔ́: «Ŋgáa dɛ no ɛ́da tɔ́nɔ, dɛ gúenye olɔŋɔ na Iloodio.»

¹⁷Yésusu ɛ ɛ́da bola, go gíde goŋaá bá mba miée Lasáalɛ, a ná lɛ́ medúgú ménni.

¹⁸Aŋa Beteníi a lɔ́mɔ́ a dɛ ɔmpɔ́nɛ́nɔ́ɔ na Yolósalɛmɛ, boóma bá go húme ba kílo mɛ́da bádadɔ́,

¹⁹gɔ́ɔ gɛca gá Beyúdene gɛ́ mbuú úlénée naá nnyaŋá ya Mááta na Malɛ́a go go nco bó folofolio go nigúe ná ondimóní bábɔ́.

²⁰Mááta ɔ ɔ́ ɔ́bɔ́ goŋaá Yésusu a ná lɛ́ go pɛ́, gɛ́hɛ́ go fadɛgɛna go go ɛ́da mo gólio; Malɛ́a, mɔ́ɔ a báá síéné naá nnyaŋá.

²¹Mááta go oyana Yésusu a amɔ́: «Daadáa, aáŋa o mba lɛ́ hɔ́ɔ, gásɛ́ ondimóní bamɛ a lɛ́ kanɛ go gúe.

²²Kanɛ́ akɛ́ godɔ́ɔdɔ, ŋgíyimene goŋaá buimée bɔ́ɔbɔ o gaá nú úhúné Asaŋa, a gaá go fáá.»

²³Yésusu a amɔ́ gɛ́hɛ́ aá: «Tɛ́ɔbɛnɔ a gaá fúfúgé.»

²⁴Mááta go gundie a amɔ́: «Ŋgíyimene caá a ŋga fúfúgé naá kúme gɛbɛ́láa ya begúe, buisí bá mesúgidinye[73].»

²⁵Yésusu go mo oyana a amɔ́: «Ndɛ́ kúme gɛbɛ́láa, yɔmɔ́ɔ gɔnɔ́ gɛɔyɔ. Mɔ́ɔnyɔ a ágamɔ́ odɛ́má yɛ́hɛ́ naá yɔmɔ́ɔ a ŋgɔ ɔyɔ́ɔ, akɛ́ a gúe.

²⁶Gɔnɔ́, uŋkimée mɔ́ɔnyɔ ɔ ɔyɔmɔ́ a gunde a ŋgolimonyo a dɛ ŋgá bóso go gúe. Go olimonyo nɔ́ɔnɔ o?»

²⁷Mááta a amɔ́: «Ɛɛ́ɛŋ Daadáa, ŋgolimonyo goŋaá o lɛ́ Mesíi, Moɔnɔ́ ba Asaŋa, mɔ́ɔ mɔ́ɔnyɔ a mbaá lɛ ba go úle naá cí.»

²⁸Naá nnyimé ya dogálɔ dɔ́ɔdɔ, Mááta go fadɛgɛna go go ɛ́da dɔ́ŋɛnɔ ondimóní Malɛ́a, a báá mo oyáná naá udúu a amɔ́: «Iloodio a lɛ́ héení, a go dɔ́ŋɔnɔ.»

²⁹Malɛ́a ɔ ɔ́bɔnɔ cɔ́mɔ yɛ́ɛyɔ, go dómba go fadɛgɛna, go ɛ́da anáa Yésusu a mbaá lɔmɔ́.

³⁰Yésusu a mba ŋá a gá lɛ́ go pɛ́ kanɛ go íŋene naá gɛdɔŋɔ, kanɛ́ a mbaá ŋá a gá lɛ́ naá hoóma háaha Mááta a mbaá ncó mo gíde hɔ́ɔ.

³¹Aŋa Beyúdene báaba bá mbaá lɛ naá nnyaŋá na Malɛ́a go go mo foloofolio, bá mbaá mo ɛ́ná a báá gaŋányɛ́dá go fadɛgɛna go go húme, gáábɔ́ go mo biene. Bá mba lɛ́ bá béeniŋenye bá amɔ́ ɛ ɛ́danamɔ́ naá gɛbɛ́lá go go baŋa.

³²Aŋa Malɛ́a a mbaá ncó bola naá hoóma háaha Yésusu a mbá lɔmɔ́ hɔ́ɔ, u úle a mo ɛ́nana, go dómba go mo obɛna naá bɛgɔ́ndɔ́ a amɔ́ gɛ́hɛ́ aá: «Daadáa, aáŋa o mba lɛ́ hɔ́ɔ, gásɛ́ ondimóní bamɛ a lɛ́ kanɛ go gúe.»

³³Yésusu ɛ ɛ́nana Malɛ́a na Beyúdene báaba bá mbaá lɛ bá mo díligenene bá baŋa, nnyɔ́dɔ yɛhɛ́ go sagɛmɛda, odóɛ yɛ́hɛ́ yó báá bógólɛ́dá.

³⁴Gɛ́hɛ́ go úhune a amɔ́: «No lɔ́mɔ́ mo miéelú áhanɛ́ɛ o?» Batɔ go mo gundie bá amɔ́: «Daadáa u úle ncó go ɛ́na.»

³⁵Gɔ́ɔ Yésusu a dúmbugemú na mbií.

³⁶Beyúdene go ɛ́da go oya bá amɔ́: «Éé! Ɛ́ná nɔnɔ mbɔ́dɔ yɛ́ɛyɛ a á lɔmɔ́ a maamana Lasáalɛ.»

³⁷Kanɛ́ bóncodío naá olɔŋɔ yábɔ́ bá amɔ́: «A lɛ́ fuunéelú ugélígeli oŋgíso, a dɛ á gá lɛ́ bá go ŋa goŋaá Lasáalɛ a dɛ gúé o?»

³⁸Gɔ́ɔ nnyɔ́dɔ ya Yésusu ɛ gɔnɔmɔ́ sagɛmɛda, gɛ́hɛ́ go ɛ́da naá gɛbɛ́lá. Bó mba lɛ́ gikeŋgúlu gindígénéelú na ɛdánɛ́[74].

³⁹Yésusu go oyɛda a amɔ́: «Úlíe nɔnɔ ɛdánɛ́ nɛ́ɛnɛ.» Mááta, ondimóní ba gɛlɔ́ŋɔ́ɔ, go oyana Yésusu a amɔ́: «Daadáa, a ná lɛ́ go numpe, goakɛ́ medúgú ménni mámáa aŋa bá lɔ́mɔ́ mo miéelú.»

⁴⁰Kanɛ́ Yésusu go mo gundie a amɔ́: «Mbáa go oyana caá aáŋa go olimonyo, o gɛɛ́ ɛ́ná nigúmi ná Asaŋa.»

⁴¹Batɔ go úlie ɛdánɛ́ gɔ́gɔ́ɔ. Yésusu go fediginye oŋgíso go mmoɛná, go gálɛda a amɔ́: «Baaba, ko béhiigi go gɔ́ɔgɔ o ŋgɔ́bɔmɔ́.

⁴²Mammana, ŋgíyimene caá o ŋgɔ́bɔnɔ bɛcamɛna biimée, kanɛ́, kálagalamɔ́ nɔ́ɔnɔ go busío bá gitúu gá batɔ gɛ́ɛgɛ naá boayá bámɛ gɛ́ɛgɛ, go goŋaá bó oliminyo bá amɔ́ o mba tómá.»

⁴³Naá nnyimé ya dogálɔ dɔ́ɔdɔ, gɛ́hɛ́ go áncɛda na ukelú ogɔ́nɔ́ a amɔ́: «Lasáalɛ, húme!»

⁴⁴Lasáalɛ go húme, bɛgɔ́ndɔ́ na ɛmbɔ́gɔ méŋínényé méŋínényé na biseli bá nnɔ́mbɔ́, busío boáalú na sanda ya gɛla. Yésusu go oyana batɔ a amɔ́: «Mo fulúnéemú nɔnɔ, no mo dɛ́ɛna ɛ ɛ́da!»

⁴⁵Gitúu naá olɔŋɔ yá Beyúdene báaba bá mbaá lɛ úléelú naá Malɛ́a, gɛ́ mbɛ ɛ́ná bɔ́ɔbɔ Yésusu a mbaá ŋaáa, gɛ́ báá ágá odɛ́má yábɔ́ naá Yésusu.

⁴⁶Kanɛ́ bóncodío go ɛ́da gíde Befelisiéŋe, go bó oyanɛna bɔ́ɔbɔ Yésusu a mbaá ŋaáa.

⁴⁷Bagɔ́nɔ́ɔ bá bedúmbí bɛbáágá naá Asaŋa na Befelisiéŋe go lukumenye nɛgála nɛgɔ́nɔ́ go oyɛda hɔ́ɔ bá amɔ́: «Dɛ gaá ná no ŋaáa nɛɛ́nɛ o? Mɔtɔ mɔ́ɔnyɔ a ŋanana gɛcɛcá gá bieninye bá gobékúke!»

⁴⁸«Dɛ amɔ́ dɛ mo dɛ́ɛna a dúmbenye náana, batɔ biimée bá gaá ágá odɛ́má yábɔ́ naá mɔ́ɔ, manɛ́ kanɛ́ Balomɛ́ŋɛ ba gaá ná ncó gaŋɛmɛda, bá gada Nnyaŋá ya Asaŋa yɛcɔ́, bá fúugie gɛdɔŋɔ gɛ́cɔ́.»

⁴⁹Ummue naá olɔŋɔ yábɔ́, ufíno yɛ́hɛ́ Keyífe, a mba lɛ́ Ufuŋe yá bedúmbí bɛbáágá naá nnyómá moánɛ, go oyɛda a amɔ́: «No do ɔ́bɔ́nɔ́ɔ boóma.

⁵⁰No do ɛ́nánáa no amɔ́ bó lɛ́ bese go busío bɛ́nyɔ́ go goŋaá mɔtɔ táŋɛ́ ummue a gúe go boɛ́nɔ, nɔ́ɔnɔ gɛdɔŋɔ giimée gɛ́ dɛ fúé o?»

⁵¹A dɛ mbá gálɛda nɔ́ɔnɔ go mɔ́ɔ moatɛ́, kanɛ́ aŋa a mbaá lɛ Ufuŋe yá bedúmbí bɛbáágá naá nnyómá moánɛ, gɔ́ɔ a mbaá gálɛ́dá dogálɔ dá mbúsí dɔ́ɔdɔ go goŋaá Yésusu a háanana go gúe go gɛdɔŋɔ;

⁵²caá akɛ́ goana go gɛdɔŋɔ gɛ́hɛ́, kanɛ́ go go bándɛgɛna baaná bá Asaŋa báaba bá lɔ́mɔ́ sálámándáalú naá cí iŋkimée hoóma táŋɛ́ hémmue.

⁵³Buisí moánɛ bɔ́ɔbɔ bɔ́, bagɔ́nɔ́ɔ bá Beyúdene bá gediemú go óna gá Yésusu.

⁵⁴Naá bɛ́hɛ́ boayá, Yésusu go békile go gɔsɔ a bólɛga naá oŋgíso yá Beyúdene. Kɔ́ɔ a bɔ́gɔ́gɛdɔmɔ́ na behúúní bɛ́hɛ́ naá gigísi gá cí mekúígíi na giolóo gá bodɛ́agadɛ́, naá tɛ́sɔnɔ yɛ́ɛyɛ bá dɔ́ŋɔnɔ bá amɔ́ Efelehíme.

⁵⁵Gibíné gá Pásɛ́ka ya Beyúdene gɛ́ mbaá ŋá gɛ́ ná lɛ́ mekúígíi; gitúu gá batɔ bá gɛdɔŋɔ go ɛ́da naá Yolósalɛmɛ otóotoɛ yá gibíné go go básogona.

⁵⁶Bá mba lɛ́ bá fúmbe Yésusu; bɔ́ɔ naá Nnyaŋá ya Asaŋa gadɛ́ɛ, bá bágálɛnagalɛna bá amɔ́: «Go goɛ́na gɛ́nyɔ́, a guú úlé naá gibíné lí a dɛ guú úlé o?»

⁵⁷Bagɔ́nɔ́ɔ bá bedúmbí bɛbáágá naá Asaŋa na Befelisiéŋe, bá mba fáá bɛlɔsɛnɔ bá amɔ́ mɔtɔ mɔ́ɔnyɔ a gaá ní íyímé anáa Yésusu a gaá ná bɛ́ɛ́mbá, a háanana go dóogio goŋaá bá mo gumbene.