Read Nugunu Sáŋa 14 Bible Online

Sáŋa 14 - Nugunu bible

Sáŋa 14

¹Gɔ́ɔ Yésusu o oyamɔ́ behúúní bɛ́hɛ́ a amɔ́: «No do sómbá sómbáa ɛdɛ́má. No ágana odɛ́má yɛ́nyɔ́ naá Asaŋa, yó ágánáamɔ́ nɔnɔ tɔ́nɔ naá yɔmɔ́ɔ.

²Naá nnyaŋá ya Baaba, gɛca gá indukí gɛ́ lɛ́ hɔ́ɔ, aáŋa caá nɔ́ɔ, gásɛ́ ndɛ́ kanɛ go nyó oyana caá mmanɛ go ɛ́da nyó gedinye undukí.

³Aŋa nná ŋamɔ́ mbáa go ɛ́da nyó gedinye undukí, ndɛ go nco gunde nnco nyó gɔ́lɔ, goŋaá anáa ndɔ́mɔ́, bɛɛnyɔ́ɔ tɔ́nɔ no bɛ́ɛmba hɔ́ɔ.

⁴Go bɔ́ɔbɔ bó núunemú anáa ŋgɛ́danamɔ́, no íyimene pɛ́.»

⁵Tómasɛ a amɔ́ gɛ́hɛ́ aá «Daadáa, dɛ dɛ manɛ́ go íyimene akɛ́ anáa go ɛ́danamɔ́; dɛ gaá ná ncó go íyime pɛ́ nɛ́ɛnɛ o?»

⁶Yésusu go mo gundie a amɔ́: «Yɔmɔ́ɔ mɔ́ɔ ndɔ́mɔ́ pɛ́, yɔmɔ́ɔ mammana, yɔmɔ́ɔ gɔnɔ́ gɛɔyɔ. Mɔtɔ a dɛ ɛ́dánáa naá Baaba kanɛ go dómba naá yɔmɔ́ɔ.

⁷«Aáŋa no ŋgíyimene, no íyimene tɔ́nɔ Baaba. Gó dúme godɔ́ɔdɔ, no mo íyimene, no báá gundé no báá mo ɛ́ná.»

⁸Fílibi a amɔ́ gɛ́hɛ́ aá: «Daadáa, có dúfíemú Baaba, nɔ́ɔnɔ gó có háanana.»

⁹Yésusu go mo gundie a amɔ́: «Fílibi, fueké aŋa ndɔ́mɔ́ nɛnyɔ́, gɔ́ɔ o lɔ́mɔ́ o do ŋgíyíménée o? Mɔ́ɔnyɔ a ŋgɛ́namɔ́ ɛ ɛ́ ɛ́ná Baaba; nɛɛ́nɛ o lɔ́mɔ́ go amɔ́: “Có dúfíemú Baaba o?”

¹⁰O do olímónyóo go goŋaá ndɛ́ naá Baaba, Baaba a lɛ́ tɔ́nɔ naá yɔmɔ́ɔ o? Dogálɔ dɔ́ɔdɔ nyó oyanɛnamɔ́ bɛɛnyɔ́ biimée, dó do báá dámɛ dá go básaŋɛna! Kanɛ́ aŋa Baaba a lɔ́mɔ́ naá yɔmɔ́ɔ, a hóogonyo meŋiigíe mɛ́hɛ́ má moatɛ́.

¹¹Olímínyóo nɔnɔ dogálɔ dámɛ dɔ́ɔdɔ: ndɛ́ naá Baaba, Baaba a lɛ́ tɔ́nɔ naá yɔmɔ́ɔ; kanɛ́ aáŋa no do olímónyóo nogálɔ námɛ, olímínyóo nɔnɔ akɛ́ go meŋiigíe mámɛ.

¹²Mammana, mammana, ŋgaá nyó oyáná caá: mɔ́ɔnyɔ a áganamɔ́ odɛ́má yɛ́hɛ́ naá yɔmɔ́ɔ, mɔ́ɔ tɔ́nɔ a ŋga ŋanánáa meŋiigíe máama yɔmɔ́ɔ ŋŋananamɔ́. A ŋga ŋanánáa akɛ́ má bɛantáa makɔ́nɔ́, goakɛ́ ŋgɛ́dana naá Baaba.

¹³Buimée bɔ́ɔbɔ no ŋgɔɔ́ ɔŋɛ́nɔ́ go ufíno yámɛ, nná bó ŋa, go goŋaá nigúmi ná Isée nɛ́ bédúfie naá Moɔnɔ́.

¹⁴No amɔ́ no ŋgɔŋɛnɔ boóma go ufíno yámɛ, nná bó ŋa.»

¹⁵«Aáŋa no mmaamana, no háanana go gumbene bɛlɔsɛnɔ bámɛ.

¹⁶Yɔmɔ́ɔ kaá bósógólónyóo Baaba goŋaá a nyó dómɛna Ufuugí ɛdɛ́má uncodío goŋaá a bɛ́ɛmba nɛnyɔ́ bɛcamɛna biimée.

¹⁷Mɔ́ɔ a lɔ́mɔ́ Giliíli ba mammana, batɔ bá cí bá dɛ báá naá odɛ́nɛ́ yá go mo gɛ́ndɛgɛna, goakɛ́ bá dɛ mo ɛ́nánáa, bá dɛ mo íyíménée. Kanɛ́ bɛɛnyɔ́ɔ no mo íyimene, goakɛ́ a gɛ́ga naá boayá bɛ́nyɔ́, a lɛ́ naá bɛɛnyɔ́ɔ.

¹⁸Cɛ ná nyó síe cíinini, nco gundene naá boayá bɛ́nyɔ́.

¹⁹Gɔnɔ́ moɔnɔ́ ba gɛcamɛna, batɔ bá cí bá dɛ ná gɔnɔ ŋgɛ́na, kanɛ́ bɛɛnyɔ́ɔ, no ná ŋgɛ́na, goakɛ́ ŋgɔyɔ, bɛɛnyɔ́ɔ tɔ́nɔ no nɔ́ ɔyɔ.

²⁰Naá budúgú moánɛ, no ná lɛnca goŋaá ndɛ́ naá Baaba, bɛɛnyɔ́ɔ naá yɔmɔ́ɔ, yɔmɔ́ɔ naá bɛɛnyɔ́ɔ.

²¹Mɔ́ɔnyɔ a lɔ́mɔ́ na bɛlɔsɛnɔ bámɛ a báá bɛ́ gumbéné, ba ndiemi a mmaamana. Kɔ́ɔ mɔ́ɔnyɔ a mmaamanamɔ́, Baaba a ŋga mo maamánáa, yɔmɔ́ɔ tɔ́nɔ mmo maamana, kɔnɔ mmo bédúfenye.»

²²Yúude, kanɛ́ caá akɛ́ Yódasɛ Ɛsɛkalɛ́ɔtɛ, go mo oyana a amɔ́: «Daadáa, nɛɛ́nɛ bó lɔ́mɔ́ goŋaá o có bédúfenye goana bɛɛcɔ́ɔ caá akɛ́ go batɔ bá cí o?»

²³Yésusu go mo gundie a amɔ́: «Aáŋa mɔtɔ a mmaamana, a gumbene nogálɔ námɛ. Baaba a ná mo maamana, dɛ úle naá mɔ́ɔ, dɛ nco dága kɛ́gɛ́ná yɛcɔ́ naá mɔ́ɔ.

²⁴Mɔ́ɔnyɔ a lɔ́mɔ́ a dɛ mmaamánáa a dɛ gumbénénée dogálɔ dámɛ. Nogálɔ nɔ́ɔnɔ no ɔ́bɔnɔmɔ́ nó do báá námɛ ná go básaŋɛna, kanɛ́ nó lɔ́mɔ́ ná Baaba mɔ́ɔnyɔ a lɔ́mɔ́ tómáalú.

²⁵«Ŋgaá nyó oyánɛ́náa moóma mɔ́ɔmɔ hɔ́ɔlɔ́ ká gɛ́ga naá boayá bɛ́nyɔ́.

²⁶Kanɛ́ Ufuugí ɛdɛ́má, a lɔ́mɔ́ Gimmúmpúu gá Giliíli mɔ́ɔnyɔ Baaba a ŋgaá mo dómá go ufíno yámɛ, mɔ́ɔ a ŋgaá nyó húúnényée moóma muimée, a nyó úncugenye buimée bɔ́ɔbɔ mbaá nyó oyánɛ́náa.

²⁷Buumbénú bɔ́ nnyó síenemú, buumbénú bámɛ bɔ́ nnyó fáamɔ́[82]. Cɛ á gá nyó fáá naá mbɔ́dɔ yɛ́ɛyɛ batɔ bá cí bá fáananamɔ́. Ŋgáa odɛ́má yɛ́nyɔ́ yó do sómbá sómbáa, no do bɛáa bofoá.

²⁸No bɔ́ɔ ɔ́bɔ goŋaá mbáa nyó oyana caá ŋgɛ́dana, kanɛ́ nco gundene naá bɛɛnyɔ́ɔ. Aáŋa gɔ́ɔ no mmaamanamɔ́, gásɛ́ no békelenye go gɔ́ɔgɔ ŋgɛ́danamɔ́ naá Baaba, goakɛ́ Baaba a lɛ́ gɛkɔ́nɔ́nɔ́ɔ a tómbana.

²⁹Ŋgaá nyó oyánɛ́náa moóma mɔ́ɔmɔ godɔ́ɔdɔ, otóotoɛ yá mɔ́ go bola, goŋaá nembeli, aŋa mo gaá ná bolá, no oliminyo.

³⁰Cɛ ná gɔnɔ go oya ŋkanɔ́ nɛnyɔ́ makɔ́nɔ́, goakɛ́ ufuŋe yá batɔ bá cí yɛ́ɛyɛ yó úlene. A dɛ bɛanánáa nɛgaŋa namɛ.

³¹Kanɛ́ bó háanana goŋaá batɔ bá cí bí íyime goŋaá mmaamana Baaba, ŋŋanana aŋa a mbaá ndɔsɛ́nɔ́. Fadɛ́gɛ́na nɔnɔ, dɛ dómba naá hoóma háaha.»