Read Nugunu Sáŋa 15 Bible Online

Sáŋa 15 - Nugunu bible

Sáŋa 15

¹«Ndɛ́ mammana ya mbɔ́gɔ́ ya bogónɛ́dá[83], Baaba a lɔ́mɔ́ uyogóní ba bogónɛ́dá.

²Otáfɛ uŋkimée naá yɔmɔ́ɔ yɔ́ɔyɔ yó lɔ́mɔ́ kanɛ bɛsamɔ́, a yó sómba; uŋkimée yɔ́ɔyɔ yó lɔ́mɔ́ na bɛsamɔ́, a yó fálona goŋaá yó bɛa bɛsamɔ́ gɔnɔ́ makɔ́nɔ́.

³Bɛɛnyɔ́ɔ no ná lɛ́ fálónáalú na nogálɔ nɔ́ɔnɔ mmbaá nyó oyáná.

⁴Gɛ́gáa nɔnɔ báladáalú namɛ aŋa yɔmɔ́ɔ kɛ́gamɔ́ báladáalú nɛnyɔ́. Aáŋa otáfɛ yó do gɛ́gáa báladáalú na mbɔ́gɔ́ yó do báá bá go bɛa bɛsamɔ́ go yɔ́ moatɛ́. Bó lɛ́ tɔ́nɔ nɔ́ɔ go bɛɛnyɔ́ɔ, aáŋa no do gɛ́gáa báladáalú namɛ.

⁵Ndɛ́ mbɔ́gɔ́ ya bogónɛ́dá, bɛɛnyɔ́ɔ no lɔ́mɔ́ ɛtáfɛ. Mɔ́ɔnyɔ a gɛ́gamɔ́ báladáalú namɛ, yɔmɔ́ɔ báladáalú nɛhɛ́, be ndiemi a bɛanana bɛsamɔ́ fundufundu, goakɛ́ kanɛ yɔmɔ́ɔ, no do bósó ba go ŋa boóma.

⁶Aáŋa mɔtɔ a dɛ gɛ́gáa báladáalú namɛ, bá mo nɔɔ go hanyɔ́ aŋa ɛtáfɛ yɛ́ɛyɛ bá báá ná sómbáa, ɛ kóta bá yɛ báda, bá yɛ nɔɔnɔnɔ naá íyuke, ɛ lɔ́kɔ.

⁷No amɔ́ no gɛ́ga báladáalú namɛ, tɔ́nɔ dogálɔ dámɛ dó gɛ́ga naá bɛɛnyɔ́ɔ, ɔŋɛ́nɔ nɔnɔ buimée bɔ́ɔbɔ no lɛ́galɛgamɔ́, no ŋga bó bɛáa.

⁸Bɔ́ɔbɔ bó fáananamɔ́ Baaba nigúmi, bó lɔ́mɔ́ goŋaá no bɛa bɛsamɔ́ fundufundu; nɔ́ɔnɔ no dúfenye goŋaá no lɛ́ behúúní bámɛ.

⁹Aŋa Baaba a mmaamanamɔ́, yɔmɔ́ɔ tɔ́nɔ nnyó maamana; gɛ́gáa nɔnɔ naá gɛnɔ́ɔ́nɛ́nɔ́ gámɛ.

¹⁰No amɔ́ no gumbene yɔmɔ́ bɛlɔsɛnɔ, no gɛ́ga naá gɛnɔ́ɔ́nɛ́nɔ́ gámɛ. Caŋa mmue namɛ, mmba gumbéné bɛlɔsɛnɔ bá Baaba, kɛ́ga báladáalú naá gɛnɔ́ɔ́nɛ́nɔ́ gɛ́hɛ́.

¹¹«Nnyó oyanamɔ́ obɔɔ́ moánɛ goŋaá no bɛa bɛyaŋa bɛ́ɛbɛ ndɔ́mɔ́ na bɛ́, gɔnɔ́ bɛyaŋa bɛ́nyɔ́ bɛ́ bɛ́ɛmba dácɛ dɔgɛ dɔgɛ[84].

¹²Gɛlɔsɛnɔ gámɛ gɛ́gɛ́ɛ: maamánɛ́náa nɔnɔ aŋa yɔmɔ́ɔ mmbaá nyó maamánáa.

¹³Gɛantáanta gá gɛnɔ́ɔ́nɛ́nɔ́ gɛ́ɛgɛ mɔtɔ a lɔ́mɔ́ ba go dúfie gɛ́ lɔ́mɔ́ goíŋene gá gɛɔyɔ gɛ́hɛ́ go begúle bɛ́hɛ́.

¹⁴No amɔ́ no gumbene bɛlɔsɛnɔ bámɛ, no lɛ́ begúle bámɛ.

¹⁵Cɛ gɔnɔ́ nyó dɔ́ŋɔnɔ caá boyogóní, goakɛ́ uyogóní a dɛ íyíménée boóma bɔ́ɔbɔ ogɔ́nɔ́ɔ bɛhɛ́ a ŋananamɔ́. Nnyó dɔ́ŋɔnɔmɔ́ caá begúle bámɛ, goakɛ́ buimée bɔ́ɔbɔ mbɔɔ́ ɔ́bɔ́ naá Baaba, ndɛ́ nyó dúmbínyéelú.

¹⁶Caá akɛ́ bɛɛnyɔ́ɔ no mbaá ŋgiyídé, yɔmɔ́ɔ mɔ́ɔ mbaá nyó iyídé, mbáá nyó dóma goŋaá no bɛa bɛsamɔ́, bɛsamɔ́ bɛ́nyɔ́ bɛ́ gɛ́ga. Hɔ́ɔlɔ́ gɔ́ɔ Baaba a ŋgaá nyó fáá buimée bɔ́ɔbɔ no ŋgaá mo ɔŋɛ́nɔ́ go ufíno yámɛ.

¹⁷Gɛlɔsɛnɔ gɛ́ɛgɛ nnyó fáamɔ́ gɛ́ lɔ́mɔ́ goŋaá maamánɛ́náa nɔnɔ kanɛ́.

¹⁸«Aáŋa batɔ bá nyó bɛlabɛla, íyíme nɔnɔ no amɔ́, bá mba dóáná go mbɛlabɛla yɔmɔ́ɔ.

¹⁹Aáŋa gɔ́ɔ no ɔ́bɛnɔnɔmɔ́ na batɔ bá cí, gásɛ́ bá nyó lɛ́galɛga, goakɛ́ no lɛ́ báábɔ́. Kanɛ́ no do bósó go ɔ́bɛnɔnɔ na batɔ bá cí. Yɔmɔ́ɔ mɔ́ɔ mmbaá nyó yáŋóná go batɔ bá cí, go busío moánɛ gɔ́ɔ bá nyó bɛlabɛlamɔ́.

²⁰Bééníŋínyéemú nɔnɔ nogálɔ nɔ́ɔnɔ mbáá ná nyó oyáná caá: “Uyogóní a dɛ dómbánáa ogɔ́nɔ́ɔ bɛhɛ́[85]”. Aáŋa batɔ bá cí bá mba céésényée, bá ná nyó séesenye tɔ́nɔ. Aáŋa bá mba gumbéné nogálɔ námɛ, bá ŋga gumbéné tɔ́nɔ nɛ́nyɔ́.

²¹Bá ná nyó ŋanana buimée bɔ́ɔbɔ go busío bámɛ, goakɛ́ bá dɛ íyíménée mɔ́ɔnyɔ a mbaá tómá.

²²Aáŋa gɔ́ɔ ndɔ́mɔ́ kanɛ go úle, aáŋa gɔ́ɔ ndɔ́mɔ́ kanɛ go bó oyana nogálɔ, gásɛ́ bá lɛ́ kanɛ gɛlɔgɔ. Kanɛ́ godɔ́ɔdɔ gɛlɔgɔ gáábɔ́ gɛ́ lɛ́ kanɛ bihéehinye.

²³Mɔ́ɔnyɔ a mbɛlabɛlamɔ́, a bɛlabɛla tɔ́nɔ Baaba

²⁴Aáŋa gɔ́ɔ ndɔ́mɔ́ kanɛ go ŋanana naá kadɛ́gadɛ́ɛ yabɔ́ meŋiigíe máama mɔtɔ untió a lɔ́mɔ́ kanɛ go ŋa gásɛ́ bá lɛ́ kanɛ gɛlɔgɔ, kanɛ́ godɔ́ɔdɔ, bɔ́ɔ bá mó ɛ́nana, bɛ́ ɛ́dana naá busío bá mbɛlabɛla, bá bɛlabɛla tɔ́nɔ Baaba.

²⁵Kanɛ́ buimée bɔ́ɔbɔ bó lɔ́mɔ́ goŋaá nogálɔ nɔ́ɔnɔ nó lɔ́mɔ́ ɔ́ŋɔ́ɔlú naá gicele gábɔ́ nó bóhóógío. Nogálɔ moánɛ nó lɔ́mɔ́: “Bá mba mbɛlábɛ́láa go dugúnú[86]”.

²⁶«Nná nyó dómɛna Ufuugí ɛdɛ́má go ufíno yá Baaba; a lɔ́mɔ́ Giliíli ba mammana mɔ́ɔnyɔ ɛ ɛ́damɔ́ go úlene naá Baaba. Aŋa a ŋguú úle a ŋga nyó oyánɛ́náa moóma mɔ́ɔmɔ mó nnúunemú.

²⁷Gɔ́ɔ bɛɛnyɔ́ɔ tɔ́nɔ no ŋgoó oyáa moóma mɔ́ɔmɔ mó nnúunemú, goakɛ́ no lɛ́ namɛ gó dúme naá mabayɛga.»