Read Nugunu Sáŋa 16 Bible Online

Sáŋa 16 - Nugunu bible

Sáŋa 16

¹«Nnyó oyanɛna moóma muimée mɔ́ɔmɔ goŋaá no do sɛmbɛ́lɛ́dá bɛnamá, no dɛ́ɛna gioliminyo.

²Bá ná nyó gúne naá nnyaŋá sá mbósógólí. Moatɛ́, gɛcamɛna gɛ́ nú úle gɛ́ɛgɛ báaba bá nyó ónamɔ́ bá ŋgaá bééníŋényée goŋaá bá yɔgɔnɛnɔ Asaŋa na go ŋanana gábɔ́ gɔ́ɔgɔ.

³Bá ŋga ŋanánáa nɔ́ɔnɔ goakɛ́ bá lɛ́ kanɛ go íyime Baaba, namɛ kɛ́.

⁴Kanɛ́ nnyó oyanɛnamɔ́ moóma mɔ́ɔmɔ goŋaá aŋa gɛcamɛna gá mɔ́ gɛ́ ná bolamɔ́, no béeniŋinye goŋaá mmba nyó oyáná boóma moánɛ. «Ndɛ́ kanɛ go nyó oyana boóma moánɛ naá mabayɛga, goakɛ́ mmba lɛ́ olɔŋɔ nɛnyɔ́.

⁵Godɔ́ɔdɔ, ŋgɛ́dana naá mɔ́ɔnyɔ a mbaá tómá, ummue naá bɛɛnyɔ́ɔ a dɛ ŋgúhúné kanɛ́ a amɔ́: “Go ɛ́danamɔ́ áhanɛ́ɛ o?”

⁶Kanɛ́ mecíkílí má á dómbá go nyó hóogo naá odɛ́má, goŋaá ŋgaá nnyó oyáná boóma moánɛ.

⁷Asáa gɔgɔ́, ŋgaá nyó oyáná mammana. Bó lɛ́ go besé yɛnyɔ́ goŋaá ŋgɛ́da, goakɛ́ aáŋa cɛ ɛ́dá, Ufuugí ɛdɛ́má a dɛ ná bóso go úle naá bɛɛnyɔ́ɔ; kanɛ́ caá ŋgɛ́da, nná nyó mo dómɛna.

⁸Mɔ́ɔ, aŋa ŋguú úlé, a ŋga dúfíe batɔ bá cí yɛ́ɛyɛ giédie gábɔ́ go busío bá bɔ́ɔbɔ bó lɔ́mɔ́ gɛlɔgɔ, bɔ́ɔbɔ bó lɔ́mɔ́ botɛ́nɛ́ɛ na bɔ́ɔbɔ bó lɔ́mɔ́ gobide bɛsɛnɛ gá Asaŋa[87].

⁹Go bɔ́ɔbɔ bó lɔ́mɔ́ gɛlɔgɔ, bó lɔ́mɔ́ goŋaá: batɔ bá dɛ ágánáa odɛ́má yábɔ́ naá yɔmɔ́ɔ[88];

¹⁰go bɔ́ɔbɔ bó lɔ́mɔ́ botɛ́nɛ́ɛ, bó lɔ́mɔ́ goŋaá: ŋgɛ́dana naá Baaba, no do ná gɔnɔ ŋgɛ́na.

¹¹Go bɔ́ɔbɔ bó lɔ́mɔ́ gobide bɛsɛnɛ gá Asaŋa bó lɔ́mɔ́ goŋaá: a báá go bide gɛsɛnɛ gá Ufuŋe yá cí yɛ́ɛyɛ.»

¹²«Ká bɛanana moóma gɛca má goŋaá nnyó oyana, kanɛ́ no do bósó ba go mó hóda godɔ́ɔdɔ.

¹³Aŋa Giliíli ba mammana a ŋguú úlé, a ŋga nyó indényée naá mammana iŋkimée. A dɛ ŋgá gálagala go ufíno yɛ́hɛ́ yá moatɛ́, kanɛ́ a ŋgoó oyáa buimée bɔ́ɔbɔ a ŋgɔɔ́ ɔ́bɔ́, a nyó dóoginyo bɔ́ɔbɔ bó háananamɔ́ go bola.

¹⁴A ŋga kúmídíe, goakɛ́ a ŋga bɛáa bɔ́ɔbɔ bó ɔ́bɛnɔnɔmɔ́ namɛ, a nyó bó dóoginyo.

¹⁵Buimée bɔ́ɔbɔ Baaba a bɛananamɔ́ bó ɔ́bɛnɔnɔ namɛ, boóma moánɛ bɔ́ mmbaá gálɛ́dá caá, a ŋga nyó dóógínyóo bɔ́ɔbɔ a ŋgaá bɛáa naá yɔmɔ́ɔ.

¹⁶«Gɔnɔ́ moɔnɔ́ ba gɛcamɛna, no do ná gɔnɔ ŋgɛ́na, moɔnɔ́ ba gɛcamɛna naá nnyimé, no lɔ go gɔnɔ ŋgɛ́na.»

¹⁷Behúúní bɛ́hɛ́ bóncodío go ɛ́da go gálagala bɔ́ɔ na bɔ́ɔ bá amɔ́: «A lɛ́galɛgamɔ́ go có oyana ɛkádɛ o? “Gɔnɔ́ moɔnɔ́ ba gɛcamɛna, no do ná gɔnɔ ŋgɛ́na, moɔnɔ́ ba gɛcamɛna naá nnyimé, no lɔ go gɔnɔ ŋgɛ́na”, ɛ́na lí: “Ŋgɛ́da naá Baaba” o?

¹⁸“Moɔnɔ́ ba gɛcamɛna” mɔ́ɔnyɔ a lɔ́mɔ́ nɛɛ́nɛ naá cí o? Dɛ dɛ ɔ́bɔ́nɔ́ɔ boóma bɔ́ɔbɔ a lɛ́galɛgamɔ́ go oyɛda.»

¹⁹Yésusu a á lɛncá goŋaá bá lɛ́galɛga go mo nɔɔ ŋgúhune, gɛ́hɛ́ kanɛ́ go bó oyana amɔ́: «Nogálɔ námɛ nɔ́ɔnɔ nó lɔ́mɔ́: “Gɔnɔ́ moɔnɔ́ ba gɛcamɛna, no do ná gɔnɔ ŋgɛ́na, moɔnɔ́ ba gɛcamɛna naá nnyimé, no lɔ go gɔnɔ ŋgɛ́na”, nɔ́ɔ no fúmbemú go íyime aŋa nó lɔ́mɔ́ naá cí o?»

²⁰Mammana, mammana, ŋgaá nyó oyáná caá, no ŋga hímée no baŋa mbií ya nigúe, batɔ bá cí yɛ́ɛyɛ bɔ́ɔ bá yaŋa. No ŋga bɛ́ɛ́mbá naá mecíkílí, kanɛ́ mecíkílí mɛ́nyɔ́ má ŋga bénúgíe na bɛyaŋa.

²¹Gɛcamɛna gɛ́ɛgɛ okɔ́dɔ a nómanamɔ́ go bíene a lɛ́ naá mecíkílí, goakɛ́ gɛcamɛna gɛ́hɛ́ gɛ́ á bolá; kanɛ́ aŋa a ŋamɔ́ a báá go bíene, a dɛ gɔnɔ́ béeniŋenye gɛdɔmbɔ gɛ́hɛ́ gá go nómana, a ná lɛ́ na bɛyaŋa bá goŋaá a á bíéné mɔtɔ naá cí.

²²Caŋa mmue nɛnyɔ́, no lɛ́ godɔ́ɔdɔ naá mecíkílí, kanɛ́ nná gɔnɔ nyó ɛ́na, gɔ́ɔ odɛ́má yɛ́nyɔ́ yó nɔ́ ɔ́bɔmɔ́ bɛyaŋa, mbɔ́dɔ ya bɛyaŋa ya goŋaá mɔtɔ a dɛ bósó ba go bɔgɔ.

²³Aŋa buisí moánɛ bó ná bolamɔ́, no do ná ŋa no gɔnɔ ŋgúhene boóma. Mammana, mammana, ŋgaá nyó oyáná caá, no amɔ́ no ɔŋɛnɔ Baaba boóma go ufíno yámɛ, a gaá nyó fáá.

²⁴Kanɛ́ gó nco go éme godɔ́ɔdɔ, no gá lɛ́ no do ɔŋɛ́nɔ́ boóma go ufíno yámɛ: ɔŋɛ́nɔ nɔnɔ, no gaá bɛa, hɔ́ɔlɔ́ gɔ́ɔ bɛyaŋa bɛ́nyɔ́ bɛ́ gaá ná bɛ́ɛ́mbá dácɛ.

²⁵«Ŋgaá nyó oyánɛ́náa buimée bɔ́ɔbɔ go ncaba. Kanɛ́ gɛcamɛna gɛ́ úlene gɛ́ɛgɛ nná ŋamɔ́ cɛ gɔnɔ́ nyó gálagala mbɔ́dɔ moánɛ, nná nyó dóogoninyo daŋɛ́daŋɛ bɔ́ɔbɔ bó núunemú Baaba.

²⁶Buisí moánɛ, no ŋgɔ ɔŋɛ́nɔ́ go ufíno yámɛ, kanɛ́ cɛ gaá nyó oyáná caá nná bósógolonyo Baaba go busío bɛ́nyɔ́.

²⁷Ɛɛ́ɛŋ, Baaba mɔ́ɔ moatɛ́ moatɛ a nyó maamana go busío bá goŋaá bɛɛnyɔ́ɔ no mba mmaamánáa, no bóó olímínyóo goŋaá yɔmɔ́ɔ ŋgɛ́damɔ́ go úlene naá Asaŋa.

²⁸Mmbɛ ɛ́dá go úle naá Baaba, mbúú úlé naá cí. Kɔ́ɔ godɔ́ɔdɔ, ŋguú úlúkíe naá cí, kunde naá Baaba.»

²⁹Behúúní bɛ́hɛ́ go mo oyana kanɛ́ bá amɔ́: «Go ɛ́ ɛ́ná, godɔ́ɔdɔ, o ná lɛ́ go gálagala daŋɛ́daŋɛ, o do gɔnɔ́ go ágana ncaba.

³⁰Godɔ́ɔdɔ, dɛ á lɛncá goŋaá maamɔ́ɔ go íyimene boóma buimée, o do bɛanánáa ncaná ya goŋaá mɔtɔ a go úhune boóma. Boóma moánɛ bɔ́ dɛ olimonyomú goŋaá go ɛ́damɔ́ go úlene naá Asaŋa.»

³¹Yésusu go bó gundie a amɔ́: «No ó olímínyóo godɔ́ɔdɔ o?

³²Ɛ́ná nɔnɔ goŋaá gɛcamɛna gɛ́ úlene, moatɛ́ gɛ́ báá go háa, gɛ́ɛgɛ no gaá ná sálámándá, onyɔ moánɛ a biene yɛhɛ́ pɛ́, no tɛ́ɛna mokáa. Kanɛ́ cɛ báá mokáa, goakɛ́ Baaba a lɛ́ namɛ.

³³Ŋgaá nyó oyánɛ́náa buimée bɔ́ɔbɔ go goŋaá no bɛa buumbénú naá gobálada gɔ́ɔgɔ namɛ. Naá cí yɛ́ɛyɛ no gɔɔ́ ɔ́bɛ́gɔ́nɔ́ɔ, kanɛ́ bɛáa nɔnɔ nigégé! Ŋgaá mánɛ́gɛ́ná bobɛ́ bá cí!»