Read Nugunu Sáŋa 17 Bible Online

Sáŋa 17 - Nugunu bible

Sáŋa 17

¹Aŋa Yésusu a mbaá dɔmbɔ́ go gálagala nɔ́ɔnɔ, gɛ́hɛ́ go fediginye oŋgíso go mmoɛná, a amɔ́: «Baaba, gigúlí gɛ́ á háá, gúmídíe Moɔnɔ́ bahɔ goŋaá Moɔnɔ́ bahɔ a go gúmidie.

²O mba mo fáá nɛgaŋa go batɔ biimée, go goŋaá a fáa biimée báaba o mbaá mo íŋéné gɛɔyɔ gá kanɛ mesúge.

³Gɛɔyɔ gá kanɛ mesúge moánɛ gɛ́ lɔ́mɔ́ goŋaá bá go lɛnca, maamɔ́ɔ mɔ́ɔnyɔ o lɔ́mɔ́ mokáa Asaŋa ba mammana; bá lɛnca tɔ́nɔ Yésu Kilítu mɔ́ɔnyɔ o mbaá dómá.

⁴Mmba dúfie nigúmi náhɔ naá cí, mbáa yibé buelí bɔ́ɔbɔ o mbaá páá go go ŋa.

⁵Kanɛ́ godɔ́ɔdɔ, Baaba, gɔnɔ́ páá nigúmi nɛ́ɛnɛ mmbaá lɛ na nɛ́ cóá naá boayá báhɔ otóotoɛ yá go gedie cí.

⁶«Mmba go lincíe naá batɔ báaba o mbaá gɔ́lɔ́ naá cí go go bó páa; bá mba lɛ́ bɔ́ ɔ́bɛnɔnɔ nahɔ, o báá bó páá, bá báá gumbéné nogálɔ náhɔ.

⁷Bí íyimene godɔ́ɔdɔ goŋaá buimée bɔ́ɔbɔ o mbaá páá, bó ncomɔ́ go úlene naá maamɔ́ɔ,

⁸go goŋaá mmba bó dúmbínyée dogálɔ dɔ́ɔdɔ o mbaá páá. Bá mba lɛncá mammana goŋaá ncomɔ́ go úlene naá maamɔ́ɔ, bá bóó olímínyóo goŋaá mammana maamɔ́ɔ mɔ́ɔ o mbaá tómá.

⁹Mbósógolonyomú go busío bábɔ́; cɛ bósógólónyóo go batɔ bá cí, kanɛ́ mbósógolonyomú go báaba o mbaá páá, goakɛ́ bɔ́ ɔ́bɛnɔnɔmɔ́ nahɔ.

¹⁰«Buimée bɔ́ɔbɔ bó lɔ́mɔ́ bámɛ, bó lɛ́ báhɔ; caŋa mmue, buimée bɔ́ɔbɔ bó lɔ́mɔ́ báhɔ, bó lɛ́ bámɛ. Nigúmi námɛ nɛ́ bédúfenye naá báaba o mbaá páá.

¹¹Gó bayɛga godɔ́ɔdɔ cɛ báá gɔnɔ́ naá cí, kanɛ́ bɔ́ɔ, bá á síéné naá cí; yɔmɔ́ɔ, ŋgúle naá maamɔ́ɔ. Baaba, maamɔ́ɔ mɔ́ɔnyɔ o lɔ́mɔ́ Gimmúmpúu, bó beŋemú go bogaaga bá ufíno yahɔ, ufíno yɔ́ɔyɔ o mbaá páá, go goŋaá bá bɛ́ɛmba boóma búmmue aŋa namɛ nahɔ dɛ lɔ́mɔ́ boóma búmmue.

¹²Gɛcamɛna gɛ́ɛgɛ mmbaá lɛ nabɔ́, mmba bó beŋébéŋée go bogaaga bá ufíno yáhɔ, ufíno yɔ́ɔyɔ o mbaá páá. Mmba bó beŋébéŋée, akɛ́ ummue naá olɔŋɔ yábɔ́ a lɛ́ kanɛ go yíme, aáŋa caá goana mɔ́ɔnyɔ a mbaá lɛ ba go yíme go goŋaá Ŋgɔ́ŋɛ́ sɛ́ bóhóogio[89].

¹³«Kanɛ́ godɔ́ɔdɔ, ŋgúle naá maamɔ́ɔ, kálagalamɔ́ dogálɔ dɔ́ɔdɔ, ká lɛ́ naá cí goŋaá bá bɛa bɛyaŋa aŋa bɛ́ɛbɛ ndɔ́mɔ́ na bɛ́, bá bɛ́ bɛa fundufundu.

¹⁴Mmba bó oyánɛ́náa nogálɔ nahɔ, kɔ́ɔ batɔ bá cí bá mbaá bó bɛlábɛ́láa, goakɛ́ bá dɛ ɔ́bɛ́nɔ́nɔ́ɔ na cí, aŋa yɔmɔ́ɔ ndɔ́mɔ́ cɛ ɔ́bɛ́nɔ́nɔ́ɔ na cí.

¹⁵Cɛ go úhénée naá mbósógólí yamɛ goŋaá o bó úlie naá cí, kanɛ́ bó lɔ́mɔ́ goŋaá o bó beŋe go Ombɛ́.

¹⁶Bá dɛ ɔ́bɛ́nɔ́nɔ́ɔ na cí, aŋa yɔmɔ́ɔ moatɛ́ ndɔ́mɔ́ cɛ ɔ́bɛ́nɔ́nɔ́ɔ na cí.

¹⁷Ŋaáa goŋaá bá bɛ́ɛmba uŋkimée uŋkimée babɔ́ naá maamɔ́ɔ go busío bá mammana, nogálɔ náhɔ nó lɛ́ mammana.

¹⁸Aŋa o mbaá tómá naá cí, yɔmɔ́ɔ tɔ́nɔ ŋgaá bó dómá naá cí.

¹⁹Ŋgaá bííŋéné uŋkimée uŋkimée bamɛ naá maamɔ́ɔ go busío bábɔ́ goŋaá bɔ́ɔ tɔ́nɔ bá bɛ́ɛmba uŋkimée uŋkimée babɔ́ mammana naá maamɔ́ɔ.

²⁰«Cɛ bósógólónyóo goana go busío bábɔ́, kanɛ́ mbósógolonyomú tɔ́nɔ go busío bá báaba bá ŋgaá ágá odɛ́má yábɔ́ naá yɔmɔ́ɔ go busío bá nogálɔ nábɔ́.

²¹Mbósógolonyo goŋaá bɔ́ɔ biimée bá bɛ́ɛmba boóma búmmue, Baaba, aŋa maamɔ́ɔ o lɔ́mɔ́ naá yɔmɔ́ɔ, yɔmɔ́ɔ naá maamɔ́ɔ. Ŋgáa bɔ́ɔ tɔ́nɔ bá bɛ́ɛmba naá bɛɛcɔ́ɔ, go goŋaá batɔ bá cí bó oliminyo bá amɔ́ maamɔ́ɔ o mbaá tómá.

²²Yɔmɔ́ɔ mmba bó fáá nigúmi nɛ́ɛnɛ o mbaá páá, go goŋaá bá bɛ́ɛmba boóma búmmue aŋa bɛɛcɔ́ɔ dɛ lɔ́mɔ́ boóma búmmue:

²³yɔmɔ́ɔ naá bɔ́ɔ, maamɔ́ɔ naá yɔmɔ́ɔ, go goŋaá bá bɛ́ɛmba boóma bummue go busío buimée; nɔ́ɔ gɔ́ɔ batɔ bá cí bá ŋgaá lɛncá goŋaá maamɔ́ɔ mɔ́ɔ o mbaá tómá, gɔnɔ́ o bó maamana aŋa o mmaamanamɔ́.

²⁴Baaba, maamɔ́ɔ o mbaá bó páá, gɔ́ɔ ndɛ́galɛgamɔ́ caá, bá bɛ́ɛmba olɔŋɔ namɛ naá hoóma háaha ka ŋgaá bɛ́ɛ́mbá. Nɔ́ɔ gɔ́ɔ bá ŋgaá núúnée nigúmi námɛ, nigúmi nɛ́ɛnɛ o mbaá páá, goakɛ́ o mba mmaamánáa otóotoɛ yá goŋaá o gedie cí.

²⁵Baaba, maamɔ́ɔ mɔ́ɔnyɔ o lɔ́mɔ́ gɛtɛ́nɛ́ɛ, batɔ bá cí bá dɛ go íyímé, kanɛ́ yɔmɔ́ɔ ko íyimene, batɔ béndiemi bí íyimene goŋaá maamɔ́ɔ mɔ́ɔ o mbaá tómá.

²⁶Mmba ŋaáa goŋaá bá go íyime, nná dúmbenye na go ŋanana nɔ́ɔnɔ. Nɔ́ɔ gɔ́ɔ gɛnɔ́ɔ́nɛ́nɔ́ gɛ́ɛgɛ o lɔ́mɔ́ na gɛ́ go busío bámɛ gɛ́ ná bɛ́ɛmbamɔ́ naá bɔ́ɔ, yɔmɔ́ɔ moatɛ́ nná bɛ́ɛmba tɔ́nɔ naá bɔ́ɔ.»