Read Nugunu Sáŋa 2 Bible Online

Sáŋa 2 - Nugunu bible

Sáŋa 2

¹Naá nnyimé ya medúgú máandɛ́, gɔ́ɔ gibíné gá gigiŋe gɛ́ bɛ́ɛmbamɔ́ naá Kána, gigísi gá cí gá Gelilée. Nnyeedíi ba Yésusu a mba lɛ́ naá gibíné moánɛ.

²Bá mba lɛ́ dɔ́ŋɛ́nɔ́ɔlú tɔ́nɔ Yésusu naá gibíné moánɛ, olɔŋɔ na behúúní bɛ́hɛ́.

³Gɛcamɛna gɛ́ á dómbá, mɔgɛ́bɔ go mana. Nnyeedíi ba Yésusu go nco mo oyana a amɔ́: «Bá dɛ báá gɔnɔ́ na mɔgɛ́bɔ.»

⁴Kanɛ́ Yésusu go mo gundie a amɔ́: «Mma, maamɔ́ɔ o ŋgoyanɛnamɔ́ bɔ́ɔbɔ ndɔ́mɔ́ bá go ŋa[23] o? Gɛcamɛna gámɛ gɛ́ gá lɛ́ gɛ́ dɛ háá.»

⁵Nnyeedíi go oyana beelí gibíné a amɔ́: «Ŋaáa nɔnɔ buimée bɔ́ɔbɔ a gaá ná nyó oyáná.»

⁶Muséní má adánɛ́ mótáanɔ na hímmue mó mba lɛ́ hɔ́ɔ sɛ́gɛ́lá sɛ́gɛ́lá, mó dúgune Beyúdene go biséégé bábɔ́ bá gɛsogona; iséní hímmue hɛ́ mba lɛ́ ba go gɔ́lɔ boóma bá ɛlɔmbɔ ntɛdɛ.

⁷Yésusu go oyana beelí gibíné a amɔ́: «Ncó no hóogonyo nɔnɔ miimpo naá muséní mɔ́ɔmɔ.» Gɔ́ɔ bá mbaá mó hóógónyóo dácɛ bɔmbɔ bɔmbɔ.

⁸Gɛ́hɛ́ go bó oyana a amɔ́: «Godɔ́ɔdɔ, bɔ́ŋɔ́dɛ́dɔ nɔnɔ miimpo máama, no ɛ́da fáa ogɔ́nɔ́ɔ ba beelí gibíné.» Bá báá lɛ gó ŋa nɔ́ɔ.

⁹Ogɔ́nɔ́ɔ ba beelí gibíné go ɔ́bɛdɛnɔ miimpo má báá go ɛ́ya mɔgɛ́bɔ, a dɛ íyímé go ɛ́da go úle gá máa, asáa gɔgɔ́ beelí gibíné báaba bá mbaá dɛ́gánáa miimpo bá mba lɛ́ bí íyimene. Gɔ́ɔ a dɔ́ŋɛnɔmɔ́ ugiŋénú,

¹⁰a amɔ́ gɛ́hɛ́ a amɔ́: «Mɔtɔ uŋkimée a dóanamɔ́ go namanɛna nnumpe ya mɔgɛ́bɔ, aŋa biinyí bá ŋamɔ́ bá báá go gúe mɔgɛ́bɔ, bá lɛ go bó namana gɛtɔmbɔ́ɔ. Kanɛ́ maamɔ́ o báa bɛ́dɛgana nnumpe ya mɔgɛ́bɔ gó nco go éme godɔ́ɔdɔ!»

¹¹Gieninye gá go békúke gá busío busío gɛ́ɛgɛ Yésusu a mbaá ŋaáa gɛ́gɔ́ɔ naá Kána, gigísi gá cí gá Gelilée. A báá dúfíe nigúmi nɛ́hɛ́, behúúní bɛ́hɛ́ bá báá ágá odɛ́má yábɔ́ naá mɔ́ɔ.

¹²Naá nnyimé hɔ́ɔlɔ́, gɛ́hɛ́ go ɛ́da naá tɛ́sɔnɔ ya Kapɛlɛnahɔ́mɛ[24] olɔŋɔ na nnyeedíi, na bolimóní na behúúní bɛ́hɛ́. Bá mba ŋaáa hɔ́ɔ medúgú sɔŋɛ.

¹³Hɔ́ɔlɔ́ gibíné gá Pásɛ́ka ya Beyúdene gɛ́ ná lɛ́ mekúígíi, gɔ́ɔ Yésusu a bólɛgamɔ́ naá Yolósalɛmɛ[25].

¹⁴Gɛ́hɛ́ go gíde lukúmé lukúmé, bedúí gúlúge, bedúí bɛdómbáa na bedúí mmɛŋá; benúgí muinyí bá mba lɛ́ hɔ́ɔ tɔ́nɔ[26].

¹⁵Gɔ́ɔ a nogamɔ́ ɛbágɔ na duelí, go bó tusie nábɔ́ ná biimée naá Nnyaŋá ya Asaŋa, na bɛdómbáa na gúlúge sábɔ́. A báá kasáa muinyí má benúgí, a beŋgelenye tábɛ́la sábɔ́;

¹⁶a amɔ́ go bedúí mmɛŋá a amɔ́: «Úlényée nɔnɔ buimée bɔ́ɔbɔ bó lɔ́mɔ́ háalá! No do ŋaáa goŋaá nnyaŋá ya Asaŋa yɛ ɛ́ya nnyaŋá ya nyonyí!»

¹⁷Behúúní bɛ́hɛ́ go béeniŋinye dogálɔ dá Ŋgɔ́ŋɛ́ dɔ́ɔdɔ: «Gɛlola gɛ́ɛgɛ mbɛananamɔ́ go nnyaŋá yahɔ gɛ́ ná mbigidenye[27].»

¹⁸Kanɛ́ bagɔ́nɔ́ɔ bá Beyúdene go gɔ́lɔ dogálɔ, go mo oyana bá amɔ́: «Gieninye gá go békúke gɛ́hanɛ́ gɛ́ɛgɛ o gaá ná ŋaáa go go có dúfíe go goŋaá o bɛanana bogaaga bá goŋaá boóma bɔ́ɔbɔ o ŋamɔ́ bɔ́ɔbɔ o?»

¹⁹Yésusu go bó gundie a amɔ́: «Gadá nɔnɔ Nnyaŋá ya Asaŋa yɛ́ɛyɛ, naá nnyimé ya medúgú mádadɔ́, nná gɔnɔ yɛ fóaga[28].»

²⁰Bá amɔ́ gɛ́hɛ́ aá: «Batɔ bá lɛ́ ágáalú nnyómá otíno áhandɛ́ na ɛ́táanɔ na mmue go go fóaga Nnyaŋá ya Asaŋa yɛ́ɛyɛ, maamɔ́ɔ go amɔ́ o gaá ágá medúgú mádadɔ́ go go yɛ fóaga o?»

²¹Kanɛ́ Nnyaŋá ya Asaŋa yɛ́ɛyɛ Yésusu a mbaá lɔmɔ́ a gálagala, bó mbaá lɛ nnyɔ́dɔ yɛhɛ́.

²²Gó moánɛ, aŋa Yésusu a mbaá fúfúgé naá begúe, behúúní bɛ́hɛ́ go béeniŋinye goŋaá a mba lɛ́ gálɛ́dáalú nɔ́ɔ, gáábɔ́ go oliminyo ŋgoyáamɔ́ ya Ŋgɔ́ŋɛ́, tɔ́nɔ na nogálɔ nɔ́ɔnɔ a mbaá gálɛ́dá.

²³Aŋa gɔ́ɔgɔ Yésusu a mbaá lɔmɔ́ naá Yolósalɛmɛ, naá gɛcamɛna gá gibíné gá Pásɛ́ka ya Beyúdene, gɛca gá batɔ gɛ́ mba ágá odɛ́má naá mɔ́ɔ aŋa bá mbaá ɛ́ná bieninye bá gobékúke bɛ́ɛbɛ a mbaá ŋanánáa.

²⁴Kanɛ́ Yésusu a dɛ mbáa lɛ odɛ́má nabɔ́, goakɛ́ a mba lɛ́ a bó íyimene bɔ́ɔ biimée bese bese.

²⁵Gó gunde a dɛ mbáa lɛ ncaná ya goŋaá bá mo oyana boóma go mɔtɔ, goakɛ́ a mba lɛ́ íyimene mɔ́ɔ moatɛ́ odɛ́má yá mɔtɔ.