Read Nugunu Sáŋa 20 Bible Online

Sáŋa 20 - Nugunu bible

Sáŋa 20

¹Buisí bá busío bá gɛanyɛ, na gɛyɛ́nɛ́ túlúbú, mobínobínó má gá lɛ́, Malɛ́a ba Magadaláa go ɛ́da naá gɛbɛ́lá. Gɛ́hɛ́ go ɛ́na goŋaá ɛdánɛ́ nɛ́ɛnɛ nɛ́ mbaá lɛ́ naá miíŋene má gɛbɛ́lá nɛ́ lɛ́ tíŋgílídíelú.

²Gɛ́hɛ́ go gɔ́lɔ odɛ́dá, go ɛ́da gíde Símono Píele na uhúúní uncodío, mɔ́ɔnyɔ Yésusu a mbaá lɛ a maamana. Gɛ́hɛ́ go bó oyana a amɔ́: «Bá búu úlie Daadáa naá gɛbɛ́lá. Dɛ dɛ íyíménée anáa bá báá ná mo ágá.»

³Píele go húme na uhúúní mɔ́ɔnyɔ uncodío go go ɛ́da naá gɛbɛ́lá.

⁴Bá mba lɛ́ bɛ́ ɛ́da bá díine olɔŋɔ, kanɛ́ uhúúní mɔ́ɔnyɔ uncodío go díine fɛaŋɔ fɛaŋɔ a báá dómbá Píele, a báá dóáná go ɛ́da bola naá gɛbɛ́lá.

⁵A á gudíméné, go ɛ́na biseli bá nnɔ́mbɔ́ ya gɛla dɛ́ɛ́náalú hɔ́ɔlɔ́ go cí, kanɛ́ a lɛ́ kanɛ go íŋene kɔ́ɔ.

⁶Gɔ́ɔ Símono Píele a síenemú a nco bola, go íŋene naá gɛbɛ́lá, gɛ́hɛ́ go ɛ́na biseli bá nnɔ́mbɔ́ ya gɛla dɛ́ɛ́náalú go cí.

⁷A bɛ́ɛ́ ɛ́ná tɔ́nɔ nnɔ́mbɔ́ ya gɛla yɛ́ɛyɛ bá mbaá boáa odóɛ yá Yésusu kɔ́ɔ dɛ́ɛ́náalú go boayá, muimée mɔ́ɔmɔ mó do mbáa lɛ nébígínyéelú.

⁸Hɔ́ɔlɔ́ gɔ́ɔ uhúúní mɔ́ɔnyɔ uncodío a mbaá dóáná go nco bola í íŋenemú tɔ́nɔ naá gɛbɛ́lá; go ɛ́na, a bóó olímínyóo.

⁹Mammana, behúúní bá mbaá ŋá bá gá lɛ́ bá dɛ ɔ́bɔ́ naá cí bɔ́ɔbɔ bó mbaá lɛ ɔ́ŋɔ́ɔlú naá Ŋgɔ́ŋɛ́ goŋaá: «Yésusu a háanana go fúfuge naá kadɛ́gadɛ́ɛ ya begúe[97].»

¹⁰Naá nnyimé yɛ́ɛyɔ, behúúní bá báandɛ́ bɔ́ɔbɔ go gunde naá nnyaŋá yabɔ́.

¹¹Malɛ́a mɔ́ɔ a mba lɛ́ síénéelú hɔ́ɔlɔ́ mekúígíi na gɛbɛ́lá, a baŋa. A baŋa nɔ́ɔnɔ, gɛ́hɛ́ go gudimene go go núunide naá gɛbɛ́lá,

¹²go ɛ́na bɛɛ́ŋgɛlɛsɛ báandɛ́ na bɛla bimmúmpúu, ndukíi naá hoóma moatɛ́ háaha bá mbaá bídígínyée gigúe gá Yésusu, mɔ́ɔnyɔ naá odóɛ, mɔ́ɔnyɔ naá bɛgɔ́ndɔ́.

¹³Bɛɛ́ŋgɛlɛsɛ bɔ́ɔbɔ go mo úhune bá amɔ́: «O baŋamɔ́ ŋkádɛ o?» Gɛ́hɛ́ go bó gundie a amɔ́: «Bó lɔ́mɔ́ goŋaá bá búu úlie Daadáa bamɛ, cɛ íyíménée anáa bá báá ná mó ágá.»

¹⁴Aŋa a mbaá gálɛ́dá nɔ́ɔnɔ, gɛ́hɛ́ go békikilidie go ɛ́na Yésusu hɔ́ɔlɔ́ tɛ́nɛ́ɛ, kanɛ go íyime goŋaá a lɔ́mɔ́ mɔ́ɔ.

¹⁵Yésusu go mo úhune a amɔ́: «O baŋamɔ́ ŋkádɛ o? O fúmbemú ánɛ́ɛ o?» Malɛ́a naá yɛhɛ́ mbééníŋínyí a amɔ́ a lɔ́mɔ́ uyogóní ntɛ́mɛ́. Go mo gundie a amɔ́: «Ogɔ́nɔ́ɔ, ɛ́na maamɔ́ɔ mɔ́ɔ o báá ná mo úlíe, ŋgoyánáamɔ́ anáa o báá ná mo ágá, ŋgɛ́da mo gɔ́lɔ.»

¹⁶Yésusu go mo fínidinye a amɔ́: «Malɛ́a!» Malɛ́a go bábondona gɔ́gɔ́ɔ, go mo dɔ́ŋɛnɔ na nohébelée: «Elebúni», nɔ́ɔnɔ gó lɛ́ aá: «Iloodio.»

¹⁷Yésusu go mo oyana kanɛ́ a amɔ́: «Tɛ́ɛ́náamɔ́, goakɛ́ ká lɛ́ cɛ bólɛ́gá naá Baaba. Gundé kanɛ́ naá bolimóní bámɛ, o bó oyana go amɔ́ mbólɛgana naá Baaba, a lɔ́mɔ́ tɔ́nɔ Isée bɛnyɔ́, naá Asaŋa bamɛ, a lɔ́mɔ́ tɔ́nɔ Asaŋa bɛnyɔ́.»[98]

¹⁸Kanɛ́ Malɛ́a ba Magadaláa go nco go óbio behúúní a amɔ́: «Ŋgɛɛ́ ɛ́ná Daadáa.» Gɔ́ɔ a bó óbiomú bɔ́ɔbɔ Daadáa a mbaá mo oyáná.

¹⁹Hɛɔbɔ́bɔ́ɔ há buisí bá busío bá gɛanyɛ moánɛ bɔ́ɔbɔ, behúúní bá mba buigénée bɛasɛ́ bá hoóma háaha bá mbaá lɔmɔ́ bá gɛ́ga hɔ́ɔ tɛ́ŋɛ́tɛŋɛ, goakɛ́ bá mba lɛ́ bá díine bagɔ́nɔ́ɔ Beyúdene. Yésusu go bola, a báá dɛ́lɛ́mɛ́ná naá tɛ́mádɛ́má yabɔ́, go bó oyana a amɔ́: «Ŋgáa buumbénú bó bɛ́ɛmba nɛnyɔ́.»

²⁰Naá nnyimé ya nogálɔ nɔ́ɔnɔ, gɛ́hɛ́ go bó dúfie ɛmbɔ́gɔ yɛhɛ́ na boayá bɛ́hɛ́ bá doɛndá. Behúúní go bɛ́ɛmba na bɛyaŋa dácɛ aŋa bá mbɛɛ́ ɛ́ná Daadáa.

²¹Yésusu go gɔnɔ bó oyana a amɔ́: «Ŋgáa buumbénú bó bɛ́ɛmba nɛnyɔ́. Aŋa Baaba a mbaá tómá, yɔmɔ́ɔ tɔ́nɔ ŋgaá nyó dómá.»

²²Aŋa a mbaá gálɛ́dá nɔ́ɔnɔ, gɛ́hɛ́ go bó fúnidene a báá bó oyáná a amɔ́: «Gɛ́ndɛ́gɛ́na nɔnɔ Gimmúmpúu gá Giliíli.

²³Mɔtɔ uŋkimée mɔ́ɔnyɔ no ŋgaá mo hééhínyée bɛlɔgɔ bɛ́hɛ́, a ŋga bɛáa ihéehinye go bɛlɔgɔ bɛ́hɛ́; mɔtɔ uŋkimée mɔ́ɔnyɔ no ŋgií inyé go mo héehinye bɛlɔgɔ bɛ́hɛ́, a dɛ ŋgá bɛa ihéehinye[99].»

²⁴Kanɛ́ gɔ́ɔgɔ Yésusu a mbaá lɔmɔ́ u úléelú, Tómasɛ, bá gɔnɔ mo dɔ́ŋɔnɔ bá amɔ́ «Ɛbáása», ummue naá Bɛɔdɔ́ɔ na bɛ́andɛ́, a dɛ mbáa lɛ olɔŋɔ nabɔ́.

²⁵Kɔ́ɔ behúúní báaba bóntió bá mo oyana bá amɔ́: «Dɛ bɛ́ɛ ɛ́na Daadáa.» Kanɛ́ mɔ́ɔ go bó gundie a amɔ́: «Aáŋa cɛ ɛ́ná naá ɛmbɔ́gɔ yɛhɛ́ bieninye bá mpóŋa, ŋgága ɛnɔɔ́nnɔɔ́ hámɛ kɔ́ɔ, aáŋa cɛ ágá ombɔ́gɔ yámɛ naá boayá bɛ́hɛ́ bá doɛndá, akɛ́ɛ, cɛ goó olímínyóo.»

²⁶Naá nnyimé ya medúgú mánnámanyɛ́, behúúní bá Yésusu bá mba lɛ́ gɔnɔ́ bábándɛ́gɛ́náalú naá ncíbo, Tómasɛ olɔŋɔ nabɔ́. Bɛasɛ́ buigéelú tɛ́ŋɛ́tɛŋɛ, Yésusu go bola, go dɛ́lɛmɛna naá tɛ́mádɛ́má yabɔ́, go bó oyana a amɔ́: «Ŋgáa buumbénú bó bɛ́ɛmba nɛnyɔ́.»

²⁷Kɔ́ɔ o oyanamɔ́ Tómasɛ a amɔ́: «Úlé na ɛnɔɔ́nnɔɔ́ háhɔ háalá, go ɛ́na ɛmbɔ́gɔ yamɛ; úlé na ombɔ́gɔ yáhɔ, o yó ága naá yɔmɔ́ boayá bá doɛndá. Dɛ́ɛ́na cuŋí, go oliminyo.»

²⁸Tómasɛ go mo oyana a amɔ́: «Daadáa bamɛ gɔnɔ́ Asaŋa bamɛ.»

²⁹Yésusu a amɔ́ gɛ́hɛ́ a amɔ́: «Go ó olímínyóo goakɛ́ go á ŋgɛ́ná. Besé makɔ́nɔ́ na báaba bá lɔ́mɔ́ bɔ́ɔ kanɛ go ɛ́na, bó olimonyo[100].»

³⁰Yésusu a mba ŋanánáa bieninye bíncodío gɔnɔ́ makɔ́nɔ́ go oŋgíso yá behúúní bɛ́hɛ́, bɛ́ɛbɛ bá lɔ́mɔ́ kanɛ go ɔ́ŋɔ naá kálata yɛ́ɛyɛ.

³¹Bɛ́ɛbɛ bá mbɔɔ́ ɔ́ŋɔ́ɔ go goŋaá no oliminyo no amɔ́ Yésusu a lɛ́ Mesíi, Moɔnɔ́ ba Asaŋa; gɔnɔ́ goŋaá naá go oliminyo gɛ́nyɔ́ moánɛ no bɛa gɛɔyɔ go ufíno yɛ́hɛ́.