Read Nugunu Sáŋa 3 Bible Online

Sáŋa 3 - Nugunu bible

Sáŋa 3

¹Gɔ́ɔ, mɔtɔ ummue a mba lɛ́ hɔ́ɔ naá giimbó ga Befelisiéŋe, ufíno yɛ́hɛ́ Nɛkɔdɛ́mɛ; a mba lɛ́ ofɛanɔ́ɔ ummue naá Beyúdene.

²Gɛ́hɛ́ go úle na nutútúgu naá boayá bá Yésusu, go mo oyana a amɔ́: «Eléébi, dɛ íyimene goŋaá o lɛ́ iloodio hɛ́ɛhɛ Asaŋa a lɔ́mɔ́ dómáalú go go nco có húunenye, goakɛ́ mɔtɔ a dɛ bósó ba go ŋanana bieninye bá gobékúke bɛ́ɛbɛ o ŋananamɔ́ aáŋa Asaŋa a dɛ báá nɛhɛ́.»

³Yésusu go mo gundie a amɔ́: «Mammana, mammana ŋgaá go oyáná caá: go amɔ́ a á gɔnɔ́ bébíene gáandɛ́, mɔtɔ moánɛ a lɛ go ɛ́na Bufuŋe bá Asaŋa.»

⁴Nɛkɔdɛ́mɛ go mo úhune a amɔ́: «Nɛɛ́nɛ mɔtɔ a ná lɛ́ gilunú a lɔ́mɔ́ ba go gɔnɔ bébíene o? A lɛ́ ba go gɔnɔ go íŋene naá gadɛ́ɛ gá nnyeedíi, a lɛ go bébíene o?»

⁵Yésusu go mo gundie a amɔ́: «Mammana, mammana ŋgaá go oyáná caá: go amɔ́ a á gɔnɔ́ bébíene naá miimpo na naá Giliíli, mɔtɔ moánɛ a lɛ go íŋene naá Bufuŋe bá Asaŋa.

⁶Báaba onɔ́mɔtɔ́ na okɔ́dɔ bá bíenemú, bá lɔ́mɔ́ batɔ, báaba Gimmúmpúu gá Giliíli a bíenyemú bá lɔ́mɔ́ bá Giliíli.

⁷Kanɛ́ o do békúkée go gɔ́ɔgɔ mbáa ná go oyáná caá, no háanana go bébíene naá mmoɛná.

⁸Ufufu yó fufe anáa yó lɛ́galɛgamɔ́, go ɔ́bɔnɔ aŋa yó fufenemú, kanɛ́ o do íyíménée anáa yó ɛ́damɔ́ go úlene ɛ́ná anáa yó ɛ́danamɔ́. Bó lɔ́mɔ́ nɔ́ɔ caŋa mmue na uŋkimée mɔ́ɔnyɔ a bébíenemú naá Giliíli.»

⁹Kɔ́ɔ Nɛkɔdɛ́mɛ a mo úhunemú a amɔ́: «Nɛɛ́nɛ bó lɔ́mɔ́ ba go báŋa o?»

¹⁰Yésusu go mo gundie a amɔ́: «Maamɔ́ɔ mɔ́ɔnyɔ o lɔ́mɔ́ gɛantá gá uhúúnínyí naá Ɛ́sɛlahɛ́ɛlɛ, o gɔnɔ nanana moóma mɔ́ɔmɔ o?

¹¹Mammana mammana ŋgaá go oyáná caá, bɛɛcɔ́ɔ dɛ oya moóma mɔ́ɔmɔ dɛ íyimenemú, dɛ ŋanana ŋgominyo go mɔ́ɔmɔ dɛ mbɛɛ́ ɛ́na, kanɛ́ no do maamánáa go olimonyo bɔ́ɔbɔ dɛ oyamɔ́.

¹²Aáŋa no do olímónyóo gɔ́ɔgɔ nyó oyanɛnamɔ́ masɔ́mɔ má cí gɔ́ɔgɔ, kanɛ́ múunú naá mmoɛná gúunú o?

¹³Mɔtɔ a gá báasa a dɛ bólɛ́gá naá mmoɛná aáŋa caá mɔ́ɔnyɔ a mbaá siisé hɔ́ɔ, a lɔ́mɔ́ Moɔnɔ́ ba mɔtɔ[29].

¹⁴Caŋa táŋɛ́ mmue aŋa Mɔ́sɛsɛ a mbɛɛ́ ɛdɛ́gá nnyɔ́gɔ ya gɛkɔ́ŋɔ go mmoɛná naá giolóo gá bodɛ́agadɛ́[30], nɔ́ɔnɔ gɔ́ɔ tɔ́nɔ bá háananamɔ́ go ɛdɛga go mmoɛná Moɔnɔ́ ba mɔtɔ,

¹⁵goŋaá mɔtɔ uŋkimée mɔ́ɔnyɔ a ágamɔ́ odɛ́má yɛ́hɛ́ naá mɔ́ɔ, a bɛa gɛɔyɔ gá kanɛ mesúge.

¹⁶Asaŋa a mba dómbáa go maamana batɔ, gɔ́ɔ a mbií íŋéné gimmuée gɛ́hɛ́ gá Moɔnɔ́ goŋaá uŋkimée mɔ́ɔnyɔ a ágamɔ́ odɛ́má yɛ́hɛ́ naá mɔ́ɔ a dɛ yímé, kanɛ́ a bɛa gɛɔyɔ gá kanɛ mesúge.

¹⁷Mammana, Asaŋa a dɛ mbá dóma Moɔnɔ́ bɛ́hɛ́ naá cí go go nco fáa batɔ gɛoba, bó mbaá lɛ kanɛ́ go goŋaá, a bó sódio.

¹⁸Bá dɛ fáánánáa mɔ́ɔnyɔ a ágamɔ́ odɛ́má yɛ́hɛ́ naá Moɔnɔ́ gɛoba, kanɛ́ mɔ́ɔnyɔ a lɔ́mɔ́ a dɛ ágánáa odɛ́má yɛ́hɛ́ bá báa go mo fáa gɛoba, goakɛ́ a lɛ́ kanɛ go ága odɛ́má yɛ́hɛ́ naá gimmuée gá Moɔnɔ́ ba Asaŋa.

¹⁹Gɔ́ɔ, go bɛ́ɛmba na gɛoba gó lɔ́mɔ́ náana: gise gɛ́ mbu úlé naá batɔ, kanɛ́ batɔ bá báá maamánáa mbíno gó dómba gise, goakɛ́ meŋiigíe mábɔ́ má mba lɛ́ gɛgáda.

²⁰Uŋkimée mɔ́ɔnyɔ a ŋananamɔ́ gɛgáda a bɛlabɛla gise, a gunde a dɛ úlénée naá gise na bofoá bá goŋaá meŋiigíe mɛ́hɛ́ má gaá bédúfíe dalaŋanyɛ.

²¹Kanɛ́ mɔ́ɔnyɔ o oyamɔ́ mammana u úlene naá gise go goŋaá meŋiigíe mɛ́hɛ́ má bédúfie dalaŋanyɛ, goakɛ́ má lumenene na mbééníŋínyí ya Asaŋa.»

²²Naá nnyimé hɔ́ɔlɔ, Yésusu na behúúní bɛ́hɛ́ go ɛ́da naá gigísi gá cí gá Yudée; gáábɔ́ go gɛ́ga hɔ́ɔ medúgú, a yumeninye batɔ.

²³Sáŋa naá bɛ́hɛ́ boayá, a yumeninye batɔ naá Ɛ́nɔŋɔ, mekúígíi na Sélime, goakɛ́ miimpo má mba lɛ́ hɔ́ɔ nɛmbɛ nɛmbɛ. Batɔ bá mba lɛ́ bú úlene, bá bó yumeninye.

²⁴Naá gɛcamɛna moánɛ, bá mba ŋá bá gá lɛ́ bá dɛ nɔ́ɔ Sáŋa naá ncíbo ya gɛaŋɔ́.

²⁵Gɔ́ɔ cuŋí sɛ́ obamɔ́ na mɔtɔ ba Beyúdene ummue na behúúní bá Sáŋa, sɛ́ báláfa masɔ́mɔ má gɛsogona.

²⁶Kɔ́ɔ, bá ncomɔ́ huenye Sáŋa, go mo oyana bá amɔ́: «Eléébi, mɔtɔ mɔ́ɔnyɔ a mbaá lɔmɔ́ nahɔ naá Yolodɛ́ŋɛ boayá búunú, mɔ́ɔ mɔ́ɔnyɔ o mbaá dɛ́lɛ́mɛ́ná ŋgominyo go busío bɛ́hɛ́, ɛ́ná, mɔ́ɔ tɔ́nɔ a ná lɛ́ go yumeninye, batɔ biimée bɛ́ ɛ́dana hɔ́ɔ.»

²⁷Sáŋa go bó gundie a amɔ́: «Mɔtɔ a dɛ bósó ba go báága naá odɛ́nɛ́ mɔ́ɔ moatɛ́, aáŋa bó do bá yɔ́ɔyɔ Asaŋa a mo fáamɔ́.

²⁸Bɛɛnyɔ́ɔ moatɛ́ no lɛ́ ŋgominyo sámɛ goŋaá mmbo oyɛ́dá caá: “Yɔmɔ́ɔ cɛ báá Mesíi, kanɛ́ ndɛ́ mɔ́ɔnyɔ bá mbaá dómá naá busío gɛ́hɛ́[31].”

²⁹Mɔtɔ ba okɔ́dɔ a lɔ́mɔ́ onɔ́mɛ bɛhɛ́; kanɛ́ ugúle ba onɔ́mɛ a lɛ́ hɔ́ɔlɔ́ go boayá, a mo bódólonyo, ukelú yɛ́hɛ́ yó mo óbonyo bɛyaŋa gɛca. Bɛyaŋa bámɛ bɛ́ lɔ́mɔ́ kanɛ́ nɔ́ɔnɔ, bɛ́ lɛ́ dácɛ dɔgɛdɔgɛ.

³⁰Bó úhene goŋaá ɛ ɛ́dana naá busío a goma, yɔmɔ́ɔ kundene na nnyimé.»

³¹«“Mɔ́ɔnyɔ ɛ ɛ́damɔ́ go úlene naá mmoɛná, a dómbana mɔtɔ uŋkimée. Mɔtɔ ba cí ɔ ɔ́bɛnɔnɔ na cí, a gálagala moóma mɔ́ɔmɔ mó núunemú cí. Mɔ́ɔnyɔ ɛ ɛ́damɔ́ go úlene naá mmoɛná, [a dómbana mɔtɔ uŋkimée],

³²a ŋanana ŋgominyo go moóma mɔ́ɔmɔ a mbɛɛ́ ɛ́ná a báá gundé a bɔ́ɔ́ ɔ́bɔ́nɔ́ɔ, kanɛ́ mɔtɔ a dɛ olímónyóo ŋgominyo yɛhɛ́.

³³Mɔ́ɔnyɔ o oliminyomú ŋgominyo yɛhɛ́ o olimonyo goŋaá Asaŋa a lɛ́ mammana.

³⁴Mammana, mɔ́ɔnyɔ Asaŋa a mbaá dómá o oya dogálɔ dá Asaŋa, Asaŋa a mo hóogonyo na Giliíli bɛhɛ́ dácɛ.

³⁵Baaba a maamana Moɔnɔ́, a báá ágá buimée naá mɔ́ɔ ɛmbɔ́gɔ.

³⁶Mɔ́ɔnyɔ a áganamɔ́ odɛ́má yɛ́hɛ́ naá Moɔnɔ́ a bɛanana gɛɔyɔ gá kanɛ mesúge; mɔ́ɔnyɔ i inyemú go ɔ́bɛnɔ Moɔnɔ́, a dɛ ŋgá bɛa gɛɔyɔ, kanɛ́ mpímí ya Asaŋa ɛ lɔbɔ naá mɔ́ɔ.”»