Read Nugunu Sáŋa 9 Bible Online

Sáŋa 9 - Nugunu bible

Sáŋa 9

¹Yésusu a dómbana, gɛ́hɛ́ go ɛ́na ugélígeli ba mbébíényée.

²Behúúní bɛ́hɛ́ go mo úhune bá amɔ́: «Eléébi, ánɛ́ɛ a mbaá lɔgɔ́ goŋaá mɔtɔ mɔ́ɔnyɔ a nco bébíene na bigélí, mɔ́ɔ lí, bebíéní bɛ́hɛ́[65] o?»

³Yésusu go gundie a amɔ́: «Bó do bósó akɛ́ mɔ́ɔ, akɛ́ bebíéní bɛ́hɛ́ bɔ́ɔ bá mbaá lɔgɔ́. Kanɛ́ bó lɔ́mɔ́ go goŋaá buelí bá Asaŋa bó bédúfie naá nnyɔ́dɔ ya mɔtɔ mɔ́ɔnyɔ.

⁴Gɔ́ɔgɔ siisíi ɛ gá lɔ́mɔ́ kɔ́ɔ, bó úhene goŋaá dɛ yɔgɔnɔ buelí bá mɔ́ɔnyɔ a mbaá tómá. Gɔ́ɔgɔ budúgú bó obamɔ́, mɔtɔ a dɛ bósó bá goŋaá a yɔgɛdɛnɔ.

⁵Gɛcamɛna gɛ́ɛgɛ ká lɔ́mɔ́ naá cí háalá, ndɛ́ gise gá batɔ bá cí.»

⁶Yésusu a á gálɛ́dá nɔ́ɔnɔ, gɛ́hɛ́ go cábɛda bɛdɛ́ go cí, go dɔ́bɛdɔ bɛcambá na bɛdɛ́ moánɛ, go fúe ugélígeli naá oŋgíso,

⁷a báá mo oyáná a amɔ́: «Ɛ́dá básoga naá osɔmbɔ yá Silóe[66].» (Silóe a lɔ́mɔ́ naá cí goŋaá «Dómáalú.») Ugélígeli go ɛ́da, a báá básogá; naá go ncogunde gɛ́hɛ́, a mbaá ŋá a ná lɛ́ go ɛ́nanɛna.

⁸Mebégu mɛ́hɛ́ na batɔ báaba mbaá lɔmɔ́ bá mo ɛ́nana cóá ɔ ɔŋɔnɔ, go ɛ́da go gálagala bá amɔ́: «Ábɔ, caá mɔtɔ mɔ́ɔnyɔ a á ná lɔmɔ́ a lukumene go gɛbala ɔ ɔŋɔnɔ, múnyúu o?»

⁹Báaba bá amɔ́: «A lɔ́mɔ́ mɔ́ɔ cá!» Bóncodío bá amɔ́: «Akɛ́ɛ, a lɔ́mɔ́ púényí yɛhɛ́.» Kanɛ́ ugélígeli o olimonyo a amɔ́: «Ndɔ́mɔ́ yɔmɔ́ɔ moatɛ́ moatɛ.»

¹⁰Kɔ́ɔ bá mo úhunemú bá amɔ́: «Kanɛ́ nɛɛ́nɛ oŋgíso yáhɔ yá báá ná fuunúgé o?»

¹¹Ugélígeli go gundie a amɔ́: «Mɔtɔ mɔ́ɔnyɔ bá dɔ́ŋɔnɔmɔ́ bá amɔ́ Yésusu mɔ́ɔ a báá ná dɔ́bɔ́ bɛcambá, a báá púé go oŋgíso, gɔ́gɔ́ɔ a ŋgoyanamɔ́ a amɔ́: “Ɛ́dá básoga naá osɔmbɔ yá Silóe”. Gɔ́ɔ mbáá nɛ́ ɛ́dá, mbáá básogá, mbáá bayɛ́gá go ɛ́nanɛna.»

¹²Batɔ bɔ́ɔbɔ go mo úhune bá amɔ́: «Mɔtɔ moánɛ a lɔ́mɔ́ áhanɛ́ɛ o?» Ugélígeli go gundie a amɔ́: «Cɛ íyi.»

¹³Gɔ́ɔ batɔ bɛ́ ɛ́damɔ́ na mɔtɔ mɔ́ɔnyɔ a mbaá lɔmɔ́ cóá ugélígeli naá Befelisiéŋe.

¹⁴Buisí bɔ́ɔbɔ Yésusu a mbaá dɔ́bɔ́ bɛcambá, a báá fuuné ugélígeli oŋgíso, bó mbaá lɛ buisí bá sábadɛ.

¹⁵Befelisiéŋe tɔ́nɔ go úhune mɔtɔ aŋa nɛɛ́nɛ a mbaá fuunúgé oŋgíso. Mɔ́ɔ go bó gundie a amɔ́: «A báa púe bɛcambá go oŋgíso, mbáá básogá, godɔ́ɔdɔ ŋgɛ́nanɛna.»

¹⁶Naá olɔŋɔ yá Befelisiéŋe, báaba bá amɔ́: «Mɔtɔ mɔ́ɔnyɔ a dɛ ɛ́dá go úlene naá Asaŋa, goakɛ́ a dɛ bɛ́dɛ́gánáa gicele gá sábadɛ.» Kanɛ́ bóncodío bá amɔ́: «Nɛɛ́nɛ ulogílógí a lɔ́mɔ́ ba go bɛa bogaaga bá go ŋanana mbɔ́dɔ sá bieninye bá gobékúke aŋa bɛ́ɛbɛ náana o?» Gobásala gáábɔ́ gó do dómbá hɔ́ɔlɔ́.

¹⁷Kɔ́ɔ bá gɔnɔmɔ́ go úhune ugélígeli bá amɔ́: «Kanɛ́ maamɔ́ɔ, o gálagalamɔ́ nɛɛ́nɛ go mɔtɔ mɔ́ɔnyɔ a báá ná go fuuné oŋgíso mɔ́ɔnyɔ o?» Gɛ́hɛ́ go bó gundie a amɔ́: «A lɛ́ mbúsí ya Asaŋa mmue.»

¹⁸Gó ɛ́da go éme aŋa bá mbaá ŋá bá gá lɛ́ bá dɛ dɔ́ŋɛ́nɔ́ bebíéní bɛ́hɛ́, bagɔ́nɔ́ɔ bá Beyúdene bá dɛ mbáa lɛ bó olimonyo goŋaá mɔtɔ mɔ́ɔnyɔ a mba bébíéné na bigélí, gɔ́ɔ a ná lɔ́mɔ́ go ɛ́nanɛna.

¹⁹Gáábɔ́ go úhune bebíéní bá amɔ́: «Mɔtɔ mɔ́ɔnyɔ a lɛ́ maamana moɔnɔ́ bɛnyɔ́ o? No olimonyo no amɔ́ a mba bébíéné na bigélí o? Nɛɛ́nɛ kanɛ́ a ná lɔ́mɔ́ go ɛ́nanɛna godɔ́ɔdɔ o?»

²⁰Bebíéní go bó gundie bá amɔ́: «Dɛ íyimene mammana mammana goŋaá a lɔ́mɔ́ moɔnɔ́ bɛcɔ́, gɔnɔ́ a báá bébíéné na bigélí.

²¹Kanɛ́ nɛɛ́nɛ a ná lɔ́mɔ́ go ɛ́nanɛna godɔ́ɔdɔ, dɛ dɛ íyi. Ánɛ́ɛ a á ná mo fuuné oŋgíso, dɛ dɛ mo íyi. Mo úhénéemú nɔnɔ mɔ́ɔ moatɛ́. A báá go goma, ŋgá o oya bɔ́ɔbɔ bó lɔ́mɔ́ go nnyɔ́dɔ yɛhɛ́ mɔ́ɔ moatɛ́.»

²²Bebíéní bɛ́hɛ́ bá mbaá lɔmɔ́ gundíelú nɔ́ɔnɔ goakɛ́ bá mba lɛ́ bá díine bagɔ́nɔ́ɔ bá Beyúdene. Báaba bá mbaá ŋá bá báá go bégedie bá báá húmé ukelú goŋaá mɔtɔ uŋkimée mɔ́ɔnyɔ oliminyomú dáŋɛ́daŋɛ a amɔ́ Yésusu a lɛ́ Mesíi, mɔ́ɔnyɔ moánɛ, bá mo gúne naá nnyaŋá ya mbósógólí.

²³Boóma moánɛ bɔ́ bebíéní bɛ́hɛ́ bá mbaá gundíe bá amɔ́: «Mo úhénéemú nɔnɔ mɔ́ɔ moatɛ́, a báá go goma.»

²⁴Befelisiéŋe go gɔnɔ dɔ́ŋɛnɔ naá oŋɛndɔ yá gáandɛ́ɛ, mɔtɔ mɔ́ɔnyɔ a mbaá lɛ cóá ugélígeli, go mo oyana bá amɔ́: «Búlúgényée Asaŋa! Bɛɛcɔ́ɔ dɛ íyimene dɛ amɔ́ mɔtɔ mɔ́ɔnyɔ a lɛ́ ulogílógí.»

²⁵Gɛ́hɛ́ go bó gundie a amɔ́: «Yɔmɔ́ɔ cɛ íyi ɛ́na mɔtɔ mɔ́ɔnyɔ a lɛ́ ulogílógí. Ŋgíyimenemú boóma táŋɛ́ búmmue: mmba lɛ́ na bigélí, godɔ́ɔdɔ ŋgɛ́nanɛna.»

²⁶Bá amɔ́ gɛ́hɛ́ aá: «A báá ná go ŋaáa ŋkádɛ o? A báá ná go fuuné oŋgíso nɛɛ́nɛ o?»

²⁷Gɛ́hɛ́ go bó gundie a amɔ́: «Mbáa go nyó oyanɛna, kanɛ́ no do báa ŋgɔ́bɔ! No lɛ́galɛgamɔ́ go gɔnɔ go ɔ́bɔ ɛŋɛndɔ ɛhandɛ́ goakɛ́ o? No maamana bɛɛnyɔ́ɔ tɔ́nɔ go ɛ́ya behúúní bɛ́hɛ́ o?»

²⁸Gɔ́ɔ Befelisiéŋe bá dúmemú go mo sɛga, bá amɔ́: «Maamɔ́ɔ mɔ́ɔ o lɔ́mɔ́ uhúúní bɛhɛ́! Bɛɛcɔ́ɔ dɛ lɔ́mɔ́ behúúní bá Mɔ́sɛsɛ.

²⁹Dɛ íyimenemú dɛ amɔ́ Asaŋa a mba gálágáláa na Mɔ́sɛsɛ. Kanɛ́ múunyú, dɛ dɛ manɛ́ akɛ́ go íyimene go ɛ́da go úle gɛ́hɛ́!»

³⁰Mɔtɔ go bó gundie a amɔ́: «Bibékúkí bɛ́ lɔ́mɔ́ kanɛ́ hɔ́ɔlɔ́ goŋaá: no do íyíménée go ɛ́da go úle gɛ́hɛ́, asáa gɔgɔ́ a báa puune oŋgíso!

³¹Dɛ íyimene bese goŋaá Asaŋa a dɛ bódólónyóo mbósógólí ya bologílógí; kanɛ́ a bódólonyomú mbósógólí ya mɔtɔ uŋkimée mɔ́ɔnyɔ a mo hálamananamɔ́ a gunde a ŋanana ndɛ́ga yɛhɛ́[67].

³²Bá gá báasa bá dɛ ɔ́bɔ́ bó oya goŋaá mɔtɔ a á manɛ́ go fuune oŋgíso yá mɔtɔ ba go bébíene na bigélí.

³³Aáŋa mɔtɔ mɔ́ɔnyɔ a dɛ ɛ́dá go úlene naá Asaŋa, gásɛ́ a dɛ báá ba go ŋa boóma.»

³⁴Befelisiéŋe go mo gundie bá amɔ́: «Maamɔ́ɔ mɔ́ɔnyɔ o lɔ́mɔ́ uŋkimée uŋkimée bahɔ naá gɛlɔgɔ mbébébíényée yahɔ, go amɔ́ o nco có húunenye boóma!» kɔ́ɔ bá mo nɔɔmɔ́ go hanyɔ́.

³⁵Yésusu go ɔ́bɔ goŋaá bá mba nɔɔ́ɔ mɔtɔ mɔ́ɔnyɔ a mbaá lɛ cóá na bigélí go hanyɔ́. Gɔ́ɔ a ncomɔ́ mo gíde, go mo úhune a amɔ́: «Maamɔ́ɔ, go ágana odɛ́má yáhɔ naá Moɔnɔ́ ba mɔtɔ lí?»

³⁶Mɔtɔ go gundie a amɔ́: «A lɔ́mɔ́ ánɛ́ɛ, Ogɔ́nɔ́ɔ o? Ŋgoyánáamɔ́ goŋaá ŋgága odɛ́má yámɛ naá mɔ́ɔ.»

³⁷Yésusu go mo oyana a amɔ́: «Go á mo ɛ́ná, a lɔ́mɔ́ mɔ́ɔ a go gálagalamɔ́.»

³⁸Mɔtɔ go oyɛda a amɔ́: «Ŋgolimonyo, Daadáa», gɛ́hɛ́ go dómba go gule enúu naá busío bɛ́hɛ́.

³⁹Gɔ́ɔ Yésusu o oyɛdamɔ́ a amɔ́: «Ndɔ́mɔ́ úléelú naá cí háalá go go nco gála bɛsɛnɛ bá batɔ, go goŋaá báaba bá mbaá lɛ bá dɛ ɛ́nánɛ́náa bɛ́ ɛ́nanɛna, gɔnɔ́ báaba bá mbaá lɛ bɛ́ ɛ́nanɛna bɛ́ ɛ́ya begélígeli.»

⁴⁰Befelisiéŋe báaba bá mbaá lɛ olɔŋɔ nɛhɛ́ go ɔ́bɔ dogálɔ dɔ́ɔdɔ, go mo oyana bá amɔ́: «Dɛ lɛ́ bɛɛcɔ́ɔ tɔ́nɔ begélígeli dɔ́gɔ́ɔ́ o?»

⁴¹Yésusu go bó gundie a amɔ́: «Amóŋa no mba lɛ́ begélígeli, gásɛ́ no lɛ́ kanɛ gɛoba. Kanɛ́ aŋa no lɔ́mɔ́ godɔ́ɔdɔ no amɔ́ “no ɛ́nanɛna”, no á lɔbɛ́nɔ́ naá gɛoba.»