Read Nugunu Meŋiigíe 1 Bible Online

Meŋiigíe 1 - Nugunu bible

Meŋiigíe 1

¹Tiófili, naá kálata yamɛ ya busío[1] yɛ́ɛyɛ mmbɔɔ́ ɔ́ŋɔ́, mmbo oyáa kɔ́ɔ boóma buimée bɔ́ɔbɔ Yésusu a mbaá ŋanánáa, a báá gundé a báá húúnényée gó dúme naá mabayɛga gó ɛ́da bola naá buisí bɔ́ɔbɔ Asaŋa a mbaá mo gɔ́lɔ́ naá mmoɛná. Hɔ́ɔlɔ́, na bogaaga bá Gimmúmpúu gá Giliíli, a báa go síe a bíí íŋéné baapótɛlɛ báaba a mbií iyídé, bɛlɔsɛnɔ bɛ́hɛ́.

³Naá nnyimé ya nigúe nɛ́hɛ́, goŋaá á ba loodío goŋaá a lɛ́ ogɔ́sɔ, a báá bó bédúfényée mbɔ́dɔ mbɔ́dɔ; a mba ŋaáa nɔ́ɔnɔ medúgú otíno áhandɛ́, a bó ɛ́nɛganɛna, a bó oyanɛna masɔ́mɔ má Nigúli ná Asaŋa.

⁴Budúgú búmmue, bá lɛ́ naá manyáanya, gɛ́hɛ́ go bó lɔsɛnɔ a amɔ́: No do úlúkíe naá Yolósalɛmɛ, no gɛ́gana hɔ́ɔ tánɔ yɛ́ɛyɛ Baaba a mbaá dáná, pááná yɛ́ɛyɛ mmbaá nyó oyáná[2].

⁵Ɛɛ́ɛŋ, Sáŋa a mba yuménínyée na miimpo, kanɛ́ bɛɛnyɔ́ɔ, naá baaná bá medúgú, no ná bɛ́ɛmba yuménínyéelú naá Gimmúmpúu gá Giliíli[3].

⁶Aŋa bá mbaá lɔmɔ́ bábándɛ́gɛ́náalú, Baapótɛlɛ go mo úhune bá amɔ́: Daadáa, naá gɛcamɛna gɛ́ɛgɛ gɔ́ɔ o ná gɔnɔmɔ́ díliminye bufuŋe bá boɛ́nɔ bá Ɛ́sɛlahɛ́ɛlɛ[4] lí?

⁷Yésusu go bó gundie a amɔ́: No do bɛanánáa goŋaá no íyime gɛcamɛna gɛ́ɛgɛ Baaba moatɛ́ a mbaá sómbá go nɛgaŋa nɛ́hɛ́[5].

⁸Kanɛ́ no ná bɛa bogaaga bɔ́ɔbɔ Gimmúmpúu gá Giliíli a ná nyó siisenemú na bɔ́, gɔ́ɔ no ná bɛ́ɛmbamɔ́ ŋgominyo sámɛ naá Yolósalɛmɛ, naá Yudée uŋkimée, naá Samalɛ́ɛ na naá cí iŋkimée[6].

⁹Naá nnyimé ya dogálɔ dɔ́ɔdɔ, Asaŋa go gɔ́lɔ Yésusu naá mmoɛná naá oŋgíso yábɔ́, nogálámbá go mo lindige bá dɛ gɔnɔ́ mo ɛ́na[7].

¹⁰Bá gá lɛ́ oŋgíso áfɛ́gáalú go mmoɛná go go núune anáa Yésusu a mbaá lɔmɔ́ ɛ́dáalú, batɔ báandɛ́ na bɛla bimmúmpúu go bó basɛna[8].

¹¹Bá amɔ́ gáábɔ́ bá amɔ́: Bégelilée báaba, nɛɛ́nɛ no cɛ́ɛnamɔ́ hɔ́ɔlɔ́ go go núune mmoɛná o? Yésusu mɔ́ɔnyɔ a nyó úlukinyemú go go ɛ́da naá mmoɛná mɔ́ɔnyɔ, a ŋga ncó gunde caŋa táŋɛ́ mmue aŋa no báá ná mo ɛ́ná ɛ ɛ́dana.

¹²Gɔ́ɔ Baapótɛlɛ bá fadɛgɛnamɔ́ naá gɛɛnɛ gɛ́ɛgɛ bá dɔ́ŋɔnɔmɔ́ bá mɔ́ Ogɔndɔ yá magónɛ́dá má boolifíe, bá báá gundé naá Yolósalɛmɛ; gɛɛnɛ moánɛ gɛ́ lɛ́ mekúígíi na Yolósalɛmɛ boóma bá kílo mɛ́da mmue.

¹³Bá á bolá naá Yolósalɛmɛ, gáábɔ́ go bólɛga naá nɛgɛlɛ́ nɛ́ɛnɛ nɛ́ mbaá lɔmɔ́ naá nnyaŋá mmoɛná anáa bá mbaá lɔmɔ́ bá gɛ́ga gɛcamɛna giimée; bá mba lɔmɔ́: Píele, Sáŋa, Sáakɛ na Andɛlɛ́ɛ, Fílibi, Tómasɛ, Betelemíi na Motíosi, Sáakɛ ohaŋa ba Alɛfɛ́ɛ, Símono ba go noanana goŋaá gɛdɔŋɔ gɛ́hɛ́ gɛ́ bábɛa, na Yúude, ohaŋa ba Sáakɛ[9].

¹⁴Biimée, ukelú yúmmue, bá mba lɛ́ bá bénebigenye bɛcamɛna biimée bá bósógolonyo, olɔŋɔ na bakɔ́dɔ, na Malɛ́a, nnyeedíi ba Yésusu, na bolimóní bá Yésusu.

¹⁵Buisí búmmue, boolímínyí bá go húme boóma bá ntɛdɛ na nitíno bá mba lɛ́ bábándɛ́gɛ́náalú. Kɔ́ɔ Píele a fadɛgɛnamɔ́ naá kadɛ́gadɛ́ɛ yabɔ́, go dúme a amɔ́:

¹⁶Bolimóní, boóma bɔ́ɔbɔ Gimmúmpúu gá Giliíli a mboó oyáa naá ŋgɔ́ŋɛ́ naá nyuudé ná Défidi, bó mba lɛ́ bó háanana go bóhóogio; goŋaá gɛ́ mba dóáná go gálagala go Yódasɛ[10] mɔ́ɔnyɔ a lɔ́mɔ́ ɛ́yáalú ugógí ba batɔ báaba bá mbaá gumbéné Yésusu.

¹⁷Yódasɛ ba ndiemi a mba lɛ́ ummue mɔ́ɔnyɔ naá olɔŋɔ yɛ́cɔ́; a báá bɛáa bɛ́hɛ́ bodáŋɔ naá buelí bɛ́cɔ́.

¹⁸Na muinyí mɔ́ɔmɔ bá mbaá mo soɛná go ŋgónana yɛhɛ́, a báá bɔ́ɔ́ndɛ́nɔ́ ntɛ́mɛ́; gɔ́ɔ a mboó obá hɔ́ɔ na odóɛ, nnyɔ́dɔ yɛhɛ́ ɛ báá bumúgé go tɛ́mádɛ́má, mágadɛ́ɛ mɛ́hɛ́ miimée má báá sugúgé go cí.

¹⁹Batɔ bá Yolósalɛmɛ biimée bá mbɔ ɔ́bɔ́nɔ́ɔ bosɔ́mɔ moánɛ. Kɔ́ɔ bá mbaá dɔ́ŋɛ́nɔ́ ntɛ́mɛ́ yɛ́ɛyɔ, na nogálɔ nábɔ́, bá amɔ́ Hakɛlɛdáma, naá cí goŋaá Ntɛ́mɛ́ ya manɔ́ŋɔ́[11].

²⁰Kanɛ́ bó lɛ́ ɔ́ŋɔ́ɔlú naá kálata ya Ɛsagɔ goŋaá: Ŋgáa nnyaŋá yɛhɛ́ ɛ síene gɔdɔɔ́. Mɔtɔ a dɛ gɔnɔ́ bɛ́dɛmɛna kɔ́ɔ; bó lɛ́ ɔ́ŋɔ́ɔlú gɔ́nɔ́ goŋaá: Ŋgáa mɔtɔ uncodío a gɔ́lɔ undukí yɛ́hɛ́[12].

²¹Bó úhene kanɛ́ goŋaá mɔtɔ ummue naá olɔŋɔ yá batɔ báaba bá á ná lɔmɔ́ bá có díligenene gɛcamɛna giimée gɛ́ɛgɛ Daadáa Yésusu a á nɔ́ ɔyɔ́ɔ naá kadɛ́gadɛ́ɛ yɛcɔ́, a có bégídene, go go bɛ́ɛmba ŋgominyo ya púfuge naá begúe ya Daadáa Yésusu. Gó bayɛga aŋa Sáŋa a mbaá mo yumínyée, gó nco húme aŋa bá lɔ́mɔ́ mo gɔ́lɔ́ɔlú go go ɛ́da naá mmoɛná.

²³Gɔ́ɔ bá sɔ́nɔmɔ́ batɔ báandɛ́: Yósɛbɛ, mɔ́ɔnyɔ bá dɔ́ŋɔnɔmɔ́ bá amɔ́ Balasábasɛ, bá gɔnɔ mo fínenye bá amɔ́ Yútusu, na Matɛ́asɛ.

²⁴Gɔ́ɔ biimée bɛ́ ɛ́damɔ́ go bósógolonyo bá amɔ́: Daadáa, maamɔ́ɔ mɔ́ɔnyɔ go íyimenemú ɛdɛ́má ya batɔ biimée, có dúfíemú naá batɔ bá báandɛ́ báaba, mɔ́ɔnyɔ go iyidemú.

²⁵A gɔ́lɔ undukí yá Yódasɛ naá buelí bá go dúmenye gɛnɔ́gɔ́ gá cɔ́mɔ, bɔ́ɔbɔ a mbaá síé a báá cecúgíe go go ɛ́da naá undukí yɔ́ɔyɔ yó háananamɔ́ nɛhɛ́.

²⁶Gɔ́ɔ bá nɔɔmɔ́ adɔ go go iyide ummue naá batɔ bá báandɛ́ bɔ́ɔbɔ; adɔ go iyide Matɛ́asɛ, a báá bégídéné naá ombanɔ yá baapótɛlɛ bɔ́ɔ́dɔ́ na ummue.