Read Nugunu Meŋiigíe 11 Bible Online

Meŋiigíe 11 - Nugunu bible

Meŋiigíe 11

¹Gɔ́ɔ baapótɛlɛ na basɔ́gɔ́ɔ báaba bá mbaá lɔmɔ́ naá Yudée bɔ́ ɔ́bɔmɔ́ goŋaá batɔ báaba bá lɔ́mɔ́ bá dɛ bɛ́ɛ́mbá Beyúdene bó olímínyóo tɔ́nɔ nogálɔ ná Asaŋa.

²Píele a á ncó gunde naá Yolósalɛmɛ, basɔ́gɔ́ɔ báaba bá mbaá lɔmɔ́ ancábáalú gáábɔ́ go mo bádóɛda na ŋgúhune bá amɔ́:

³«O báá nɛ́ ɛ́dá go íŋene naá batɔ báaba bá lɔ́mɔ́ kanɛ go ancaba o báá nyáányáa nabɔ́ goakɛ́ o?»

⁴Gɔ́ɔ Píele a bó oyanamɔ́ boóma bɔ́ɔbɔ bó mbaá dómbáná gondɛ́ŋɛ́ gondɛ́ŋɛ́ a amɔ́ gáábɔ́ a amɔ́:

⁵«Mmba lɛ́ naá tɛ́sɔnɔ ya Yopée mbósógolonyo, gámɛ go bɛa giínigie: gámɛ go ɛ́na boóma aŋa gɛantá gá sanda na mokásá naá edúu énni, bó ɛ́da go úlene naá mmoɛná, bó gɔsɔnɔ, bó ŋgúlenine.

⁶Aŋa mmbaá bédíbídínyée, gámɛ go ɛ́na nnyama sá bɛgɔ́ndɔ́ bínni: nnyama sá bɛsɔgɔ, na sɛ́ɛsɛ sá go bónóŋosonyo go cí na munoní.

⁷Gámɛ go ɔ́bɔ tɔ́nɔ ukelú yó ŋgoyanɛna yó amɔ́: “Píele, fadɛ́gɛ́na! Óná, o nyáa.”

⁸Gámɛ go gundie caá: “Akɛ́ɛ, Daadáa. Mammana, mbébíényée yamɛ boóma bá gɛlɔkɔ na bá biílo bó gá báasa bó do íŋéné naá yɔmɔ́ nyuudé.”

⁹Kanɛ́ ukelú go gɔnɔ fitie naá mmoɛná yó amɔ́: “Bɔ́ɔbɔ Asaŋa a báá ná manɛ́ go gedie, maamɔ́ɔ o do bó ɛ́ná go amɔ́ bó lɛ́ na biílo.”

¹⁰Bó mba báŋánánáa nɔ́ɔnɔ ɛŋɛndɔ ɛdadɔ́. Kanɛ́ gá bɔ́ go gunde buimée púmú naá mmoɛná.

¹¹Naá gɛcamɛna moánɛ, batɔ bádadɔ́ báaba bá mbɛɛ́ ɛ́dá tómɛna naá Sɛsalɛ́ɛ go dómba go úle bá báá bolá, bá bíí íŋéné naá nnyaŋá yɛ́ɛyɛ dɛ mbaá lɔmɔ́ dɛ gɛ́ga hɔ́ɔ.

¹²Gimmúmpúu gá Giliíli go ŋgoyana a amɔ́ dɛ gundinye nabɔ́, cɛ ágá mpálɔ́. Boɔmɛ bátáanɔ na mmue báaba bá mba lɛ́ ɛ́dá tílígénéelú naá Sɛsalɛ́ɛ, dɛ bíí íŋéné naá nnyaŋá ya Kɔlɔnɛ́yɛ.

¹³Mɔ́ɔnyɔ gɛ́hɛ́ go có oyana aŋa a mbɛɛ́ ɛ́ná ɛ́ŋgɛlɛsɛ a búú úlé naá mɔ́ nnyaŋá go go mo oyana a amɔ́: “Dómá batɔ naá Yopée bɛ́ ɛ́da dɔ́ŋɛnɔ Símono mɔ́ɔnyɔ bá gɔnɔmɔ́ mo dɔ́ŋɔnɔ bá amɔ́ Píele;

¹⁴a nco go oyana dogálɔ dá goŋaá go ɛ́na gɛɔyɔ, maamɔ́ɔ na ncíbo yahɔ ya batɔ iŋkimée.”

¹⁵Aŋa mmbaá dúmé go bó gálagala, Gimmúmpúu gá Giliíli go bó siisene aŋa a mbaá lɔmɔ́ ŋaáalú nɛcɔ́ naá mabayɛga.

¹⁶Hɔ́ɔlɔ́ gámɛ go dómba go béeniŋinye nogálɔ ná Daadáa nɔ́ɔnɔ a mbaá gálɛ́dá a amɔ́: “Sáŋa a á yuménínyée na miimpo, kanɛ́ bɛɛnyɔ́ɔ, no ná béyumeninye na Gimmúmpúu gá Giliíli.”

¹⁷Kanɛ́ aŋa bó lɔ́mɔ́ goŋaá Asaŋa a lɛ́ bó ŋaáalú pááná mmue nɛcɔ́ báaba dɛ lɔ́mɔ́ ágáalú odɛ́má yɛ́cɔ́ naá Daadáa Yésu Kilítu, yɔmɔ́ɔ ŋgaá lɛ ba go bɛ́ɛmba ánɛ́ɛ goŋaá pánɛna Asaŋa o.»

¹⁸Aŋa bá mbɔɔ́ ɔ́bɔ́ nɔ́ɔnɔ, gáábɔ́ go fuuge ɛdɛ́má, bá bɛ́ɛ́ ɛ́dá go leebenye Asaŋa, bó oya bá amɔ́: «Gó lɛ́ mammana goŋaá Asaŋa a á fáá batɔ báaba bá lɔ́mɔ́ bá dɛ bɛ́ɛ́mbá Beyúdene pɛ́ ya goŋaá bó hɛma bobɛ́ bábɔ́, bá békikilidie ɛdɛ́má goŋaá bɛ́ ɛ́na gɛɔyɔ.»

¹⁹Noséésényée nɔ́ɔnɔ nó mbuú úlé naá nnyimé ya goóna Ítiene nó mba séléméndíe batɔ, gáábɔ́ go dómbana: báaba naá Fenisíi, báaba naá Sípele, báaba naá Óntiosi; bá mba lɛ́ bɛ́ ɛ́da bó oyanɛna goana Beyúdene nogálɔ ná Asaŋa.

²⁰Kanɛ́ akɛ́ nɔ́ɔnɔ gɔ́ɔ batɔ bóncodío bá Sípele na bá Siléene bá bolamɔ́ naá Óntiosi, gáábɔ́ go ɛ́da go oyanɛna Bágɛlɛ́gɛ Gɛnɔ́gɔ́ gá Cɔ́mɔ gá Yésusu.

²¹Bogaaga bá Daadáa bó mba lɛ́ nabɔ́, batɔ gɛca bá báá békikílídíe ɛdɛ́má, bá báá ágá odɛ́má yábɔ́ naá Daadáa.

²²Gɔ́ɔ cɔ́mɔ yɛ́ɛyɔ yɛ ɛ́damɔ́ bola naá edúu yá boolímínyí báaba naá Yolósalɛmɛ. Gáábɔ́ go fediginye Banábasɛ bá báá mo dómá naá Óntiosi.

²³Aŋa a mbɛɛ́ ɛ́dá bola a bɛ́ɛ ɛ́ná aŋa niibo ná Asaŋa nɛ́ mbaá lɛ hɔ́ɔ, gɛ́hɛ́ go ɛ́da go békelenye, a gíndenye boolímínyí goŋaá ɛdɛ́má yabɔ́ ɛ́ ba bɛ́ɛ́mbá ágáalú iŋkimée iŋkimée naá Daadáa.

²⁴Banábasɛ a mba lɛ́ usi ba mɔtɔ, dácɛ na Gimmúmpúu gá Giliíli, a ágana odɛ́má yɛ́hɛ́ naá Daadáa; gɛcɛcá gá batɔ gɛ́ báá ágá odɛ́má yábɔ́ naá Daadáa.

²⁵Banábasɛ go dómba kanɛ́ naá Tálasɛ go go ɛ́da fúmbe Sóole.

²⁶Aŋa a mbaá mo ɛ́ná, a báa lɛ gó gunde nɛhɛ́ naá Óntiosi. Bá mba lɛ́ bɛ́ ɛnda aganda yá boolímínyí, bá húunenye gɛcɛcá gá batɔ masɔ́mɔ má gioliminyo; nnyómá iŋkimée iŋkimée ɛ báá bó dómbɛ́ná hɔ́ɔ. Hɔ́ɔlɔ́ naá Óntiosi moánɛ, gɔ́ɔ bá mbaá dɔ́ŋɛ́nɔ́ behúúní go oŋɛndɔ yá busío bá amɔ́ bakɛlɛ́tɛnɛ.

²⁷Naá medúgú moánɛ mbúsí gá sɛ́ go bola naá Óntiosi sɛ́ ɛ́da go úlene naá Yolósalɛmɛ.

²⁸Ummue naá olɔŋɔ yábɔ́, ufíno yɛ́hɛ́ Egébusu, go dúfie naá nciŋí yɛ́ɛyɛ Gimmúmpúu gá Giliíli a mbaá mo fáá goŋaá gɛantá gá uncíli gɛ́ ní íŋene naá gɛdɔŋɔ giimée. Gɔ́ɔ mammana, uncíli moánɛ yó mbaá lɛ boláalú naá gɛcamɛna gá bufuŋe bá Kolóode.

²⁹Behúúní gáábɔ́ go ága ukelú yúmmue goŋaá bá gaá dómɛ́ná basɔ́gɔ́ɔ báaba naá Yudée gioyo, mɔtɔ uŋkimée aŋa bogaaga bɛ́hɛ́ bó mo fáananamɔ́.

³⁰Gɔ́ɔ bá mbaá ŋaáa nɔ́ɔnɔ; bá báá bó dómɛ́ná gioyo moánɛ go bafɛanɔ́ɔ báaba Banábasɛ na Sóole.