Read Nugunu Meŋiigíe 12 Bible Online

Meŋiigíe 12 - Nugunu bible

Meŋiigíe 12

¹Gɔgɔ́ naá medúgú moánɛ mɔ́ɔmɔ, ufuŋe Elóode go ɛ́da go séesenye boolímínyí bóncodío.

²A bíí íŋéné bogaaga bá bóó óná Sáakɛ, ondimóní ba Sáŋa, na kalafɔ.

³Aŋa a mbɛɛ́ ɛ́ná goŋaá Beyúdene bɔ́ ɔ́bɔnɔ bese na goŋanana gɛ́hɛ́ moánɛ, gɛ́hɛ́ go gɔnɔ go íŋene bogaaga, bá báá gumbéné Píele. Bó mbaá lɛ naá gɛcamɛna gá gibíné gá bɛlɛ́dɛ bá kanɛ ondɔ yá go fudugenye[55].

⁴Aŋa bá mbaá ŋá bá báá go gumbene Píele bá báá mo ágá naá ncíbo ya gɛaŋɔ́, bá báá gó díliminye ɛlɔŋɔ ya bisimbi inni ya bisimbi bínni bínni go go mo beŋebeŋe. Ufuŋe Elóode a mba lɛ́ a béeniŋenye goŋaá a gaá mo húmíe naá gɛdɔŋɔ go go mo bide naá nnyimé ya gibíné gá Pásɛ́ka ya Beyúdene.

⁵Píele go bɛ́ɛmba naá ncíbo ya gɛaŋɔ́, bisimbi bɛ́ mo beŋebeŋe. Kanɛ́ boolímínyí, bɔ́ɔ, bá mba lɛ́ bá bósógolonyo Asaŋa na bogaaga go busío bɛ́hɛ́.

⁶Naá budúgú bá go bélie bɔ́ɔbɔ Elóode a mbaá lɔmɔ́ ba go mo húmie naá gɛdɔŋɔ go nɛgála, Píele gódágódá na bɛantá bá magala bɛ́andɛ́, a mba lɛ́ ɛ ɛ́dana godɔnɔ́ɔ naá kadɛ́gadɛ́ɛ ya bisimbi bɛ́andɛ́. Bisimbi bá go fɛ́fa tɛ́nɛ́ɛ naá miíŋene má ncíbo ya gɛaŋɔ́.

⁷Kɔ́ɔ ɛ́ŋgɛlɛsɛ ba Daadáa a magamɔ́ boasɛ, nɛgɛlɛ́ nɛ́ɛnɛ Píele a mbaá lɔmɔ́ kɔ́ɔ go dómba go hóogo na gise. Ɛ́ŋgɛlɛsɛ go yiŋkidinye Píele a báa mo foyóná, a báa mo oyáná a amɔ́: «Fadɛ́gɛ́na fɛaŋɔ.» Magala go dómba go hɔlɔgoga naá ɛmbɔ́gɔ ya Píele má bóo obá go cí.

⁸Ɛ́ŋgɛlɛsɛ go gɔnɔ mo oyana a amɔ́: «Báágáamɔ́ kandáa yahɔ o gɔnɔ báága mamɔ́ basɛ́lɛ́pasɛ.» Píele go ŋa nɔ́ɔ. Ɛ́ŋgɛlɛsɛ go gɔnɔ mo oyana a amɔ́: «Báágáamɔ́ gɛla gáhɔ gá isió o píde.»

⁹Píele go héme naá ncíbo ya gɛaŋɔ́, a báa mo fídé. Kanɛ́ a dɛ mbáa lɛ i íyimene goŋaá boóma bɔ́ɔbɔ ɛ́ŋgɛlɛsɛ a ŋananamɔ́ bó lɛ́ mammana. Kanɛ́ mɔ́ɔ a fege a amɔ́ bó lɔ́mɔ́ giínigie.

¹⁰Bá á bácaá ɛlɔŋɔ ya bisimbi ɛhandɛ́ ya busío, gáábɔ́ go ɛ́da bola naá gɛasɛ́ gá gɛkɔ́ŋɔ gá go ɛ́da naá tɛ́sɔnɔ. Gɛasɛ́ gɛ́ɛgɔ go bébuune gɛ́ moatɛ́ moatɛ naá busío bábɔ́, gáábɔ́ go húme. Aŋa bá mbaá húmé, gáábɔ́ go gɔ́lɔ pɛ́ mmue. Ɛ́ŋgɛlɛsɛ go dómba go mo ságɛgɛnɛna.

¹¹Aŋa nciŋí ya Píele ɛ mbaá ncó mo gundene; gɛ́hɛ́ go gálɛda a amɔ́: «Godɔ́ɔdɔ yɛ́ɛyɛ, ŋgɔɔ́ ɔ́bɔ́ mammana goŋaá Daadáa a báa dóma ɛ́ŋgɛlɛsɛ bɛhɛ́ a báá ncó códio go ɛmbɔ́gɔ ya Elóode na go buimée bá gɛbɛ́ bɔ́ɔbɔ gɛdɔŋɔ gá Beyúdene gɛ́ á ná lɔmɔ́ gɛ́ gɛ́gana naá boayá bámɛ.»

¹²Aŋa a mbaá lɛncá odɛ́nɛ́ yɛ́hɛ́, gɛ́hɛ́ go ɛ́da naá nnyaŋá ya Malɛ́a, nnyeedíi ba Sáŋa Mélékusu. Gɛca gá batɔ gɛ́ mba lɛ́ bábándɛ́gɛ́náalú hɔ́ɔ gɛ́ bósógolonyo.

¹³Aŋa Píele a mbaá kɔŋɛ́dɛ́nɔ́ gɛasɛ́, uyogóní ba okɔ́dɔ, ufíno yɛ́hɛ́ Lóode, go báyɛkɛna go go bódóliginyo.

¹⁴Aŋa a mbaá lɛnca ukelú yá Píele, gá goŋaá a buune gɛasɛ́, go béguelide na odɛ́dá, ɛ ɛ́da a békelenye go go ɛ́da go oyɛda a amɔ́ Píele a lɛ́ naá gɛasɛ́.

¹⁵Gáábɔ́ go mo gundie bá amɔ́: «O lɛ́ na buegu o.» Mɔ́ɔ kanɛ́ go bó dúfie goŋaá bó lɛ́ mammana. Gáábɔ́ go gálɛda bá amɔ́: «Bó lɔ́mɔ́ ɛ́ŋgɛlɛsɛ bɛhɛ́.»

¹⁶Gɔgɔ́ Píele ɛ ɛ́dana naá busío a kɔŋɔnɔ. Aŋa bá mbaá ncó buune gɛasɛ́, gáábɔ́ go békúke makɔ́nɔ́ aŋa bá mbaá mo ɛ́ná.

¹⁷Píele go bó mémie na ombɔ́gɔ, a bɛ́ɛ́ ɛ́dá go bó oyanɛna aŋa Daadáa a báá ná mo úlíe naá ncíbo ya gɛaŋɔ́. Gɛ́hɛ́ go bó oyana kanɛ́ a amɔ́: «Ɛ́dá no oyana Sáakɛ na bolimóní bɛ́cɔ́ nɔ́ɔnɔ.» Gɛ́hɛ́ go héme a bɛ́ɛ́ ɛ́dá hoóma hóntió.

¹⁸Gó á seemídé, bisimbi bɛ́ɛbɛ bɛ́ mbaá lɔmɔ́ bɛ́ beŋebeŋe Píele bɛ́ ná lɛ́ go bégide, bɛ́ búúhene bɔ́ɔbɔ Píele a báá nɛ́ ɛ́yá.

¹⁹Ufuŋe Elóode go dóma goŋaá bá mo fúmbe, kanɛ́ bá dɛ mbá mo ɛ́na. A bíi íŋéné bogaaga bá go bide bisimbi bá gibeŋe, naá nnyimé bá bɛ́ óna. Naá Nnyimé ya masɔ́mɔ mɔ́ɔmɔ, Ufuŋe Elóode go úlukie naá Yudée a bɛ́ɛ́ ɛ́dá naá Sɛsalɛ́ɛ go go ɛ́da dúmbie gɛcamɛna hɔ́ɔ.

²⁰Elóode a mba lɛ́ gɛsɛnɛ na batɔ bá tɛ́sɔnɔ ya Tíile na ya Sídono, a bó ɔ́bɔnɛnɔ mpímí makɔ́nɔ́. Kanɛ́ bɔ́ɔ go bágálɛdɛna goŋaá bɛ́ ɛ́da mo ɛ́na. Aŋa bá mbaá ŋá bá báa go gɔ́lɔ Bilétusu, mɔtɔ ba gɛɛŋɔ́ gá Ufuŋe, a báá gundé nnyimé yabɔ́; gáábɔ́ kanɛ́ go ɛ́da go ɛ́na ufuŋe Elóode goŋaá bá bégedie, gɛsɛnɛ gábɔ́ gɛ́ mana. Mammana, gɛɔyɔ gábɔ́ gá manyáanya giimée gɛ́ mbaá lɔmɔ́ naá gɛdɔŋɔ gá Ufuŋe.

²¹Buisí bɔ́ɔbɔ bá mbaá gódá, Elóode go bálɛŋa na bɛla bɛ́hɛ́ bá bufuŋe, go lukumene naá ɔŋgɛ́yɔ́ yɛ́hɛ́, go ɛ́da go gálagala na gɛdɔŋɔ.

²²Gɛdɔŋɔ go ɛ́da go gálagala ukelú naá mmoɛná gɛ́ amɔ́: «A gálagala aŋa Asaŋa, caá akɛ́ aŋa mɔtɔ[56].»

²³Kanɛ́ hɔ́ɔ na hɔ́ɔ, ɛ́ŋgɛlɛsɛ ba Daadáa go mo dóɛda ogɔnɔ́ goŋaá a mbi inyé go fáa Asaŋa nigúmi, biyelí gá bɛ́ go bayɛga go mo nyáanana, a báá gúé.

²⁴Gɔ́ɔ nogálɔ ná Asaŋa no ɛ́damɔ́ hoóma hiimée, boolímínyí bá báá bɛ́ɛ́mbá degédegé.

²⁵Kanɛ́ naá boayá bá Banábasɛ nɛhɛ́ na Sóole, aŋa bá mbaá maná bosɔ́mɔ bɔ́ɔbɔ bá mbɛɛ́ ɛ́dá go bɔ́ naá Yolósalɛmɛ, gáábɔ́ go nco gunde naá Óntiosi olɔŋɔ na Sáŋa Mélékusu.