Read Nugunu Meŋiigíe 14 Bible Online

Meŋiigíe 14 - Nugunu bible

Meŋiigíe 14

¹Aŋa Póolo nɛhɛ́ na Banábasɛ bá mbɛɛ́ ɛ́dá bola naá Ikoniumu, bá báá lɛ gó íŋene tɔ́nɔ naá nnyaŋá ya mbósógólí ya Beyúdene. Gáábɔ́ go oya dogálɔ dá Asaŋa mbɔ́dɔ yɛ́ɛyɛ ɛ mbaá bɛ́ɛ́mbá goŋaá gɛcɛcá gá Beyúdene na batɔ báaba bá mbaá lɔmɔ́ bá dɛ bɛ́ɛ́mbá Beyúdene bá ága odɛ́má yábɔ́ naá Kilítusu.

²Kanɛ́ Beyúdene báaba bá mbaá lɔmɔ́ kanɛ go oliminyo go oba go sónconyo batɔ báaba bá lɔ́mɔ́ bá dɛ bɛ́ɛ́mbá Beyúdene goŋaá bá bɛ́ɛ́ya báaba bá mboó olímínyóo.

³Póolo na Banábasɛ bá mba gɛ́gáa gɛca gá medúgú naá Ikoniumu. Bó oya Dogálɔ dá Asaŋa kanɛ bofoá, odɛ́má yábɔ́ uŋkimée naá Daadáa. Asaŋa a mba lɛ́ a bó fáanana bogaaga bá go ŋanana bɛsɛɔ na muune go go dúfie goŋaá dábɔ́ dɔ́ɔdɔ bá mbaá lɛ bó oya dó lɛ́ kɔ́ɔ.

⁴Tɛ́sɔnɔ iŋkimée gá yɛ́ go básala, báaba batɔ bá báá gundé nnyimé ya Beyúdene, báaba bóntió bá báá gundé nnyimé ya baapótɛlɛ.

⁵Aŋa batɔ báaba bá lɔ́mɔ́ bá dɛ bɛ́ɛ́mbá Beyúdene, na Beyúdene, na mefuŋe mábɔ́ bá mbaá ŋá bá ná lɛ́ go bégedegedie go go bó séesenye, bá bó óna na adánɛ́,

⁶Póolo na Banábasɛ go lɛnca ɛdɔgɛ hábɔ́, go díine bá bɛ́ɛ́ ɛ́dá bɔ́ɔsɛgɔ naá Lísitele na naá Dɛ́lɛbɛ, tɛ́sɔnɔ sá hoóma háaha bá dɔ́ŋɔnɔmɔ́ bá amɔ́ Likoníi.

⁷Gáábɔ́ go ɛ́da go oya dogálɔ dá Asaŋa hɔ́ɔ.

⁸Kanɛ́ naá Lísitele hɔ́ɔlɔ́, mɔtɔ a mba lɛ́ hɔ́ɔ, onɛ́mɔnɛmɔ naá bɛgɔ́ndɔ́, gó ɛ́da bayɛga naá gobébíene gɛ́hɛ́, kanɛ akɛ́ go maga go ɛndɛda.

⁹Buisí búmmue, aŋa a mbaá lɔmɔ́ a bódólonyo Póolo, Póolo go mo ágɛna oŋgíso, go ɛ́na goŋaá a mba lɛ́ odɛ́má a amɔ́ gásɛ́ e é éŋúgé,

¹⁰gɛ́hɛ́ go mo gálɛda ukelú naá mmoɛná a amɔ́: «Fadɛ́gɛ́ná tɛ́nɛ́ɛ dagɛdagɛ.» Gɔ́ɔ mɔtɔ mɔ́ɔnyɔ a dómbamɔ́ go lúduge, a báá fadɛ́gɛ́ná, a bɛ́ɛ́ ɛ́dá go ɛnda.

¹¹Aŋa gitúu gá batɔ gɛ́ mbɛɛ́ ɛ́ná boóma bɔ́ɔbɔ Póolo a mbaá ŋaáa, go áncɛda na nogálɔ ná gɛdɔŋɔ, nulikoníi, bá amɔ́: «Baasaŋa bá á gɔ́lɔ́ nnyɔ́dɔ sá batɔ, bá báá siisé naá kadɛ́gadɛ́ɛ yɛcɔ́.»

¹²Bá báá fáá Banábasɛ ufíno yá Sése, Póolo ufíno yá Hɛ́lɛmɛsɛ, goŋaá mɔ́ɔ a mbaá lɔmɔ́ a gálagala.

¹³Udúmbí bɛbáágá ba asaŋa Sése, asaŋa mɔ́ɔnyɔ nnyaŋá ya mbúlugie yɛhɛ́ ɛ mbaá lɔmɔ́ naá miíŋene má tɛ́sɔnɔ, go úle na bɛnɔ́mɛ bá gúlúge lɛŋá lɛŋá na bɛncɛŋɛ bá bióli, naá busío bá bɛasɛ́: go go fáa Banábasɛ na Póolo bɛbáágá kɔ́ɔ, aŋa tɔ́nɔ gitúu gá batɔ gɛ́ mbaá lɔmɔ́ gɛ́ maamana.

¹⁴Kanɛ́ aŋa baapótɛlɛ Banábasɛ na Póolo bá mbií íyímé boóma moánɛ, gáábɔ́ go bálafa bɛla na mahana naá odɛ́má, go ɛ́da bɔ́nɔ naá kadɛ́gadɛ́ɛ ya batɔ na gɛánca naá nyuudé bá amɔ́:

¹⁵«Boɔmɛ, no ŋananamɔ́ nɔ́ɔnɔ goakɛ́ o? Bɛɛcɔ́ɔ tɔ́nɔ dɛ lɛ́ batɔ aŋa bɛɛnyɔ́ɔ. Dɛ nyó oyanɛnamɔ́ Gɛnɔ́gɔ́ gá Cɔ́mɔ, goŋaá nó ba búumbéné bɛndɛbáákɔ́ɔ bɛ́ɛbɛ, no ága odɛ́má yɛ́nyɔ́ naá Asaŋa ba ogɔ́sɔ, mɔ́ɔ mɔ́ɔnyɔ a mbaá gedíe mmoɛná, cí, máŋɛ́, na buimée bɔ́ɔbɔ bó lɔ́mɔ́ kɔ́ɔ[64].

¹⁶Naá medúgú má cóá, a mba lɛ́ dɛ́ɛ́náalú mɛɛ́nɔ goŋaá má bienene pɛ́ sá má sá moatɛ́ moatɛ.

¹⁷Akɛ́ nɔ́ɔnɔ, a lɛ́ kanɛ do dɔmbɔ go bédúfenye batɔ go besé yɛ́ɛyɛ a bó ŋananamɔ́: a nyó fáanana dobólá na bɛcamɛna bá goúlene manyáanya[65], a nyó sugunenine manyáanya na bese ya odɛ́má.»

¹⁸Akɛ́ go dogálɔ dábɔ́ dɔ́ɔdɔ, bó mba lɛ́ gɛdɔmbɔ go go lege batɔ goŋaá bá bó fáa bɛbáágá.

¹⁹Beyúdene bɛ́ ɛ́da fadɛgana naá Óntiosi ba Pisidíi na naá Ikoniumu, gɔ́ɔ bá gundiemú batɔ nnyimé yabɔ́, bá báá dóɛ́dánáa Póolo adánɛ́ go go mo óna, bá báá mo gógólónyóo, bá bɛ́ɛ́ ɛ́dá mo dɛ́ɛna naá nnyimé ya tɛ́sɔnɔ, bá fege bá amɔ́ a báá go gúe.

²⁰Kɔ́ɔ boolímínyí bɛ́ ɛ́damɔ́ mo bábándɛgɛnɛna hɔ́ɔlɔ́, gɛ́hɛ́ go fadɛgɛna, a báá gundé naá tɛ́sɔnɔ. Aŋa gó mbaá bélíe, gɛ́hɛ́ go ɛ́da naá Dɛ́lɛbɛ, nɛhɛ́ na Banábasɛ.

²¹Aŋa bá mbaá dɔmbɔ́ go oya dogálɔ dá Asaŋa naá tɛ́sɔnɔ yɛ́ɛyɛ, batɔ bá bóó olímínyóo gɛca, Póolo na Banábasɛ kanɛ́ go gunde naá Lísitele, naá Ikoniumu na naá Óntiosi ba Pisidíi.

²²Bá mba lɛ́ bá gíndenye boolímínyí, bá bó sɔ́mɔ goŋaá bá dɛ dɛ́ɛ́ná gioliminyo, bó oya bá amɔ́: «Dɛ háanana go lumenene na bɛdɔmbɔ makɔ́nɔ́ goŋaá dɛ ɛ́dá naá Bufuŋe bá Asaŋa.»

²³Gɔ́ɔ Banábasɛ na Póolo bá bó dílimeninyemú bafɛanɔ́ɔ naá bɛɔ́fɔ biimée. Naá nnyimé ya go bósógolonyo na gobécelene gá manyáanya, gáábɔ́ go bó dɛ́ɛna naá ɛmbɔ́gɔ ya Daadáa mɔ́ɔnyɔ bá mboó olímínyóo.

²⁴Aŋa bá mbaá dómbá, gáábɔ́ go báca Pisidíi, bá bɛ́ɛ́ ɛ́dá go éme naá Penfilíi.

²⁵Aŋa bá mbaá ŋá bá báa go oyanɛna batɔ báaba naá Pɛ́lɛsɛ dogálɔ dá Asaŋa, gáábɔ́ go gɔsɔ naá tɛ́sɔnɔ ya Atálɛa.

²⁶Bá lɛ́ hɔ́ɔlɔ́, gáábɔ́ go gɔ́lɔ sitíme, bá bɛ́ɛ́ ɛ́dá naá Óntiosi, tɛ́sɔnɔ yɛ́ɛyɛ anáa bá mbaá lɔmɔ́ bó fáalú naá gibeŋe gá Asaŋa go buelí bɔ́ɔbɔ bá mbaá lɔmɔ́ bá gá lɛ́ na go ŋa.

²⁷Naá nnyimé yabɔ́ ya go ɛ́da bola naá Óntiosi, gáábɔ́ go bándɛgɛna boolímínyí, bá báá bó oyánɛ́náa boóma buimée bɔ́ɔbɔ Asaŋa a mbaá lɔmɔ́ ŋaáalú gábɔ́, na nɛɛ́nɛ a mbaá lɔmɔ́ buunénéelú batɔ báaba bá lɔ́mɔ́ bá dɛ bɛ́ɛ́mbá Beyúdene gɛasɛ́ gá Gioliminyo.

²⁸Gɔ́ɔ bá gɛ́gamɔ́ hɔ́ɔ hɔ́ɔlɔ́ na boolímínyí gɛca gá medúgú.