Read Nugunu Meŋiigíe 15 Bible Online

Meŋiigíe 15 - Nugunu bible

Meŋiigíe 15

¹Batɔ bóncoó bá go ɛ́da fadɛgɛna naá Yudée go bola naá Óntiosi, gáábɔ́ go ɛ́da go húunenye boolímínyí báaba hɔ́ɔ bá amɔ́: «No do báá ba go bɛa gisódio aáŋa no do ancábá aŋa gicele gá Mɔ́sɛsɛ gɛ́ oyamɔ́[66].»

²Póolo na Banábasɛ go lɔbɛnɔ bá dɛ húmé ukelú nabɔ́, gɛantá gá cuŋí go oba go ŋgoyáamɔ́ ya ndiemi. Gɔ́ɔ Boolímínyí bá gediemú goŋaá bá dóma naá Yolósalɛmɛ, Póolo, Banábasɛ na batɔ bóncodío, go go ɛ́da gálagala gɛsɛnɛ moánɛ na baapótɛlɛ na bafɛanɔ́ɔ bá gioliminyo báaba hɔ́ɔ.

³Boolímínyí go bó óhiginyo go oŋɛndɔ yɔ́ɔyɔ. Bá báa lɛ gó biene pɛ́. Bá báa dómbá Fenesíi na Samalɛ́ɛ, bɛ́ ɛ́da bó oya aŋa batɔ báaba bá lɔ́mɔ́ bá dɛ bɛ́ɛ́mbá Beyúdene bá mbaá ágá odɛ́má yábɔ́ naá Daadáa: boolímínyí go ɔ́bɔ bɛyaŋa makɔ́nɔ́ na gɛpáa moánɛ.

⁴Aŋa bá mbaá bolá naá Yolósalɛmɛ, boolímínyí báaba hɔ́ɔ, baapótɛlɛ na bafɛanɔ́ɔ bá gioliminyo go bó gɛ́ndɛgɛna. Póolo na Banábasɛ na batɔ bóncoó báaba bá mbaá lɔmɔ́ olɔŋɔ go ɛ́da go bó oyanɛna buimée bɔ́ɔbɔ Daadáa a mbaá ŋanánáa gábɔ́.

⁵Nɛnamá ná boolímínyí bá giimbó gá Befelisiéŋe nɛ́ɛnɛ nɛ́ mbɛɛ́ ɛ́yá boolímínyí go fadɛgɛna bá amɔ́: Gó sɛmɛganana go anca boolímínyí báaba bá lɔ́mɔ́ bá dɛ bɛ́ɛ́mbá Beyúdene, bá gɔnɔ bó lɔsɛnɔ goŋaá bá gumbene gicele gá Mɔ́sɛsɛ.

⁶Kɔ́ɔ baapótɛlɛ na bafɛanɔ́ɔ bá gioliminyo bá bábándɛgɛnamɔ́ go go bide bosɔ́mɔ bá ndiemi.

⁷Kanɛ́ aŋa cuŋí sɛ́ mbaá lɔmɔ́ sɛ́ ɛ́dana naá busío, Píele go fadɛgɛna, go gɔ́lɔ dogálɔ a amɔ́: «Bolimóní, no íyimene no amɔ́ Asaŋa a mba ŋgiyídé naá kadɛ́gadɛ́ɛ yɛnyɔ́, bó ná lɛ́ fueké, goŋaá ŋgoya Gɛnɔ́gɔ́ gá Cɔ́mɔ go báaba bá lɔ́mɔ́ bá dɛ bɛ́ɛ́mbá Beyúdene, bá gɛ́ ɔ́bɔ bá gunde bó oliminyo.

⁸Asaŋa mɔ́ɔnyɔ i íyimenemú ɛdɛ́má ya batɔ a mba dúfíe goŋaá a á bó olímínyóo a báá bó fáá Gimmúmpúu gá Giliíli aŋa a mbaá có fáá tɔ́nɔ,

⁹kanɛ akɛ́ boóma bá go dádoga nɛcɔ́ nabɔ́; a báá sogáa ɛdɛ́má yabɔ́ goakɛ́ bá mbo olímínyóo.

¹⁰Goakɛ́ kanɛ́ no magamɔ́ Asaŋa na go fúmbe go dóɛgɛna boolímínyí gilúututu gá gɛnóɛ́ gɛ́ɛgɛ akɛ́ biisée bɛ́cɔ́, akɛ́ bɛɛcɔ́ɔ moatɛ́, dɛ mbaá lɔmɔ́ dɛ dɛ hódá o?

¹¹Dɛ béeniŋenye goana goŋaá go niibo ná Daadáa Yésusu gɔ́ɔ Asaŋa a có sódonyomú caŋa táŋɛ́ mmue aŋa bɔ́ɔ.»

¹²Kɔ́ɔ batɔ biimée báaba bá mbaá lɔmɔ́ naá nɛganda bá mámamɔ́ pɔ́ɔ́, go ɛ́da go bódólonyo Póolo na Banábasɛ bó oya muune na bɛsɛɔ mɔ́ɔmɔ Asaŋa a mbaá ŋanánáa gábɔ́ naá kadɛ́gadɛ́ɛ ya batɔ báaba bá lɔ́mɔ́ bá dɛ bɛ́ɛ́mbá Beyúdene.

¹³Aŋa bá mbaá dɔmbɔ́ go gálagala, Sáakɛ go gɔ́lɔ dogálɔ a amɔ́: «Bolimóní, mbódólígínyóomú nɔnɔ.

¹⁴Símono a bóo oya aŋa Asaŋa a mbaá beŋé naá mabayɛga batɔ báaba bá lɔ́mɔ́ bá dɛ bɛ́ɛ́mbá Beyúdene go go iyide boɛ́nɔ bɔ́ɔbɔ bó ɔ́bɔnɛnɔmɔ́ nɛhɛ́ naá kadɛ́gadɛ́ɛ yabɔ́.

¹⁵Gɔnɔ́ dogálɔ dá mbúsí sá Asaŋa dó lumenene na ŋgoyáamɔ́ moánɛ goakɛ́ bó lɛ́ ɔ́ŋɔ́ɔlú goŋaá:

¹⁶“Daadáa o oya a amɔ́: naá medúgú má go ɛ́da go úle, nná nco gunde go go gɔnɔ sume gincumu gá Défidi gɛ́ɛgɛ gɛ́ mbaá gadɛ́gá, Nná gɛ́ gedegedie Kɔnɔ gɛ́ díliminye tɛ́nɛ́ɛ.

¹⁷Gɔ́ɔ batɔ báaba bóncodío biimée bá ná fúmbemú Daadáa, ɛɛ́ŋ, bɛdɔŋɔ biimée bɛ́ɛbɛ ndɔ́mɔ́ iyídéelú go go bɛ́ɛmba bámɛ.

¹⁸Nɔ́ɔnɔ gɔ́ɔ Daadáa o oyamɔ́, mɔ́ɔ mɔ́ɔnyɔ a mbaá lincíe batɔ moóma mɔ́ɔmɔ fueké[67].”

¹⁹«Sáakɛ go gídene a amɔ́: Boóma moánɛ bɔ́ɔ ŋgɛ́nanamɔ́ caá: dɛ dɛ ágɛ́ná batɔ báaba bá lɔ́mɔ́ bá dɛ bɛ́ɛ́mbá Beyúdene, báaba bá áganamɔ́ odɛ́má yábɔ́ naá Daadáa, bɛdɔmbɔ.

²⁰Kanɛ́, ŋgáa dɛ bó ɔ́ŋɛnɔ, dɛ bó oyana dɛ amɔ́ bá dɛ nyáá mesugé má biséégé bá moɔcɔ, bá bébeŋe go gɛdáŋa, bá dɛ nyáá nnyama ya kanɛ go sɛ́sɛda ukelú, akɛ́ manɔ́ŋɔ́[68].

²¹Mammana, fueké fueké, batɔ bá húunenye gicele gá Mɔ́sɛsɛ naá tɛ́sɔnɔ iŋkimée, bá gunde bá gɛ́ bana miisí miimée má sábadɛ naá nnyaŋá sá mbósógólí.»

²²Kɔ́ɔ baapótɛlɛ, na bafɛanɔ́ɔ bá boolímínyí, na boolímínyí biimée, bá gediemú go iyide batɔ bá bosɔ́mɔ naá kadɛ́gadɛ́ɛ yabɔ́ go go bó dóma naá Óntiosi olɔŋɔ na Póolo na Banábasɛ. Gáábɔ́ go iyide Yúude, mɔ́ɔnyɔ bá mo dɔ́ŋɔnɔmɔ́ bá amɔ́ Balasábasɛ, na Sɛ́lasɛ, biimée báandɛ́ báaba bá mbaá lɛ batɔ bá ufíno naá kadɛ́gadɛ́ɛ ya boolímínyí.

²³Bá báá bó íŋéné kálata go go ɛ́da na yɛ́. Dogálɔ dá kálata moánɛ dó mbaá lɛ náana: «Bondimóní bɛ́nyɔ́ baapótɛlɛ na bafɛanɔ́ɔ báaba naá gioliminyo, bá á bédíígíe bolimóní bábɔ́ báaba bá lɔ́mɔ́ bá dɛ bɛ́ɛ́mbá Beyúdene, bɔ́ ɔyɔmɔ́ naá Óntiosi, naá Silíi na naá Silisíi.

²⁴Dɛ lɛ́ ɔ́bɔ́ɔlú goŋaá batɔ bá go nco go úle naá bɛɛcɔ́ɔ bá lɛ́ ncó nyó hencíelú bá báá nyó gólío bofoá na ŋgoyáamɔ́ yabɔ́. Bɛɛcɔ́ɔ dɛ lɛ́ kanɛ go bó dóma.

²⁵Boóma moánɛ bɔ́ dɛ lɔ́mɔ́ húméelú ukelú yúmmue, dɛ bíí iyídé batɔ bá bosɔ́mɔ, dɛ báá nyó bó dómɛ́ná. Bá lɛ́ olɔŋɔ na bondimóní bɛ́cɔ́ bá odɛ́má Banábasɛ na Póolo,

²⁶báaba bá lɔ́mɔ́ íŋénéelú gɛɔyɔ gábɔ́ naá Daadáa bɛcɔ́ Yésu Kilítu.

²⁷Dɛ á nyó dómɛ́ná kanɛ́ Yúude na Sɛ́lasɛ, bɔ́ɔ bá gaá ná nyó dúmbínyée na nyuudé nábɔ́ bɔ́ɔbɔ dɛ á nɔ́ ɔ́ŋɔ́ naá kálata yɛ́ɛyɛ.

²⁸Mammana, Gimmúmpúu gá Giliíli na bɛɛcɔ́ɔ moatɛ́ dɛ lɛ́ gedíelú goŋaá dɛ dɛ bósó ba go nyó dóɛgɛna gɛnóɛ́ gíncoó, bó do dómbá goana bɛ́ɛbɛ bɛ́ lɔ́mɔ́ ba go nyó oyo;

²⁹bɛ́bɛ́ɛ bɛ́ lɔ́mɔ́: No do nyáá mesugé má biséégé bá moɔcɔ, no do nyáá manɔ́ŋɔ́, no do nyáá nnyama ya kanɛ go sɛ́sɛda ukelú, no bébeŋe go gɛdáŋa. No amɔ́ no bébeŋe go moóma mɔ́ɔmɔ muimée, no á ŋaáa bese. Mbédíígí nɛnyɔ́.»

³⁰Kɔ́ɔ bá ádoganamɔ́ na batɔ bá bosɔ́mɔ, báaba bá báa biené pɛ́ go go ɛ́da naá Óntiosi. Hɔ́ɔ hɔ́ɔlɔ́ bá báá bándɛ́gɛ́ná boolímínyí biimée, bá báá bó íŋéné kálata.

³¹Aŋa bá mbaá bó banɛ́ná kálata, boolímínyí go ɛ́da go békelenye go cɔ́mɔ ya gigúluminye yɛ́ɛyɛ ɛ mbaá lɔ́mɔ́ naá kálata moánɛ.

³²Yúude na Sɛ́lasɛ báaba bá mbaá lɔmɔ́ mbúsí sá Asaŋa, go fáanana boolímínyí gɛantá gá gɛcamɛna ɛsɔ́mɔ há gigúluminye na há go bó gíndie.

³³Kɔ́ɔ bá dúmbiemú baaná bá medúgú naá hoóma hɔ́ɔhɔ, bá báa lɛ gó ádogana na boolímínyí naá buumbénú, bɔ́ɔbɔ bá báa lɛ gó bó sɔ́nɛnɔ gɛnɔ́gɔ́ gá oŋɛndɔ gá go gunde naá báaba bá mbaá bó dómá. [

³⁴Kanɛ́ Sɛ́lasɛ mɔ́ɔ go ɛ́na bese goŋaá a síene.]

³⁵Kɔ́ɔ Póolo na Banábasɛ bá manɛmɔ́ gɛ́gɛda naá Óntiosi. Bá mba lɛ́ bá húunenye, bó oya Nogálɔ ná Daadáa, olɔŋɔ na gɛca gá batɔ gíncodío.

³⁶Gɛcamɛna gɛ́ á dómbá, Póolo go oyana Banábasɛ a amɔ́: «Ŋgáa dɛ gunde, dɛ ɛ́da dɛ mɛ́nɛgana boolímínyí naá tɛ́sɔnɔ iŋkimée sɛ́ɛsɛ dɛ lɔ́mɔ́ oyá oyá nogálɔ ná Daadáa hɔ́ɔ, dɛ ɛ́na aŋa bá lɔ́mɔ́.»

³⁷Banábasɛ mɔ́ɔ a mba lɛ́ a maamana goŋaá gásɛ́ bɛ́ ɛ́ ɛ́dá olɔŋɔ na Sáŋa Mélékusu;

³⁸Kɔ́ɔ Póolo a ŋamɔ́ a dɛ ɔ́bɔ́ bese goŋaá bɛ́ ɛ́da nɛhɛ́, goakɛ́ a mba bó síé naá Penfilíi, a dɛ gɔnɔ́ bó díligenene naá buelí bábɔ́.

³⁹Kɔ́ɔ bá díenemú, Póolo na Banábasɛ, bá báá ádógáná. Banábasɛ a báá gɔ́lɔ́ Sáŋa Mélékusu, bá báá yalá sitíme, bá bɛ́ɛ́ ɛ́dá naá Sípele.

⁴⁰Póolo, naá bɛ́hɛ́ boayá, go gɔ́lɔ Sɛ́lasɛ, bá bɛ́ɛ́ ɛ́dá nɛhɛ́ aŋa boolímínyí bá mbaá ŋá bá báá go bó íŋene go gibeŋe gá Daadáa.

⁴¹Póolo a báá dómbá naá Silíi na naá Silisíi, ɛ ɛ́da a gíndenye biimbó bá boolímínyí bɛ́ɛbɛ hɔ́ɔ.