Read Nugunu Meŋiigíe 17 Bible Online

Meŋiigíe 17 - Nugunu bible

Meŋiigíe 17

¹Kɔ́ɔ bá mbaá dómbɛ́ná ya Enfipólisi na Epoliníi, gáábɔ́ go ɛ́da bola naá tɛ́sɔnɔ ya Tesoloníke, anáa nnyaŋá ya mbósógólí ya Beyúdene ɛ mbaá lɔmɔ́.

²Aŋa gɔ́ɔgɔ a mbaá lɔmɔ́ u úle a ŋanana, Póolo go íŋene naá nnyaŋá ya mbósógólí. Sábadɛ ɛ́dadɔ́, Póolo a suŋe Ŋgɔ́ŋɛ́ na Beyúdene báaba bá mbaá lɔmɔ́ hɔ́ɔ.

³A mba lɛ́ a bó falonanɛna Ŋgɔ́ŋɛ́ sá ndiemi, a bó oyanɛna a amɔ́ Mesíi a mba lɛ́ ba go ɔ́bɛgɔnɔ a gúe, a lɛ go fúfuge. A gɔnɔ bó oyanɛna a amɔ́: Yésusu mɔ́ɔnyɔ nnyó oyanɛnamɔ́, mɔ́ɔ a lɔ́mɔ́ Mesíi ba ndiemi.

⁴Nɛnamá ná Beyúdene níncodío gá nɛ́ go oliminyo ŋgoyáamɔ́ ya Póolo na Sɛ́lasɛ, bá báá gundé naá gɛbágá gábɔ́. Gɛca gá Bágɛlɛ́gɛ báaba bá mbaá lɔmɔ́ bá búlugenye Asaŋa, olɔŋɔ na gɛca gá bakɔ́dɔ bá ufíno, bá báá ŋaáa nɔ́ɔ caŋa mmue.

⁵Kanɛ́ Beyúdene báaba bá mbaá lɛ na hɛagá go bándɛgɛna nɛnamá ná bepelípélí nɛ́ɛnɛ bá mbaá gídé go gɛbala, gáábɔ́ go ubie ologodo naá tɛ́sɔnɔ. Kɔ́ɔ bɛ́ ɛ́damɔ́ bolɛna Yásɔŋɔ naá mɔ́ nnyaŋá, bá fúmbe Póolo na Sɛ́lasɛ goŋaá bɛ́ ɛ́da nabɔ́ naá hoóma há Nɛgála ná gɛdɔŋɔ.

⁶Aŋa bá mbaá lɔbɔ́ bá dɛ bó gídé, gáábɔ́ go gumbene Yásaŋɔ na nɛnamá ná boolímínyí níncodío, go ɛ́da nabɔ́ naá bagɔ́nɔ́ɔ bá besúmbí bɛsɛnɛ bá tɛ́sɔnɔ, bá ánca bá amɔ́: «Batɔ báaba bá á bueŋényée hoóma hiimée, kanɛ́ godɔ́ɔdɔ, bɔ́ɔ bábáa bá ná lɔ́mɔ́ naá tɛ́sɔnɔ yɛcɔ́,

⁷Yásɔŋɔ a báá bó gɛ́ndɛ́gɛ́ná naá mɔ́ nnyaŋá. Batɔ moánɛ bá dɛ bósó go ɛnda aŋa bɛlɔsɛnɔ bá ufuŋe Sɛsáalɛ bɛ́ oyamɔ́; goakɛ́ bó oya bá amɔ́ ufuŋe yúntió yó lɛ́ hɔ́ɔ bá dɔ́ŋɔnɔ bá amɔ́ Yésusu.»

⁸Dogálɔ dábɔ́ dɔ́ɔdɔ go dómba go búlumunce gitúu olɔŋɔ na bagɔ́nɔ́ɔ bá tɛ́sɔnɔ.

⁹Yásɔŋɔ na basɔ́gɔ́ɔ bá mba soáa muinyí go go bɔ́ɔ́ndɔ naá bagɔ́nɔ́ɔ bá besúmbí bɛsɛnɛ bá tɛ́sɔnɔ, bɔ́ɔbɔ bá báá lɛ gó bó dɛ́ɛna.

¹⁰Aŋa budúgú bó mboó obá, boolímínyí go dúmbie Póolo nɛhɛ́ na Sɛ́lasɛ naá Belée. Bɛ́ ɛ́da bolana hɔ́ɔ, gáábɔ́ go íŋene naá nnyaŋá ya mbósógólí ya Beyúdene.

¹¹Beyúdene báaba naá Belée bá mba lɛ́ na bɛpɔ́ɔ́ bá ɛdɛ́má bá dómba báaba naá Tesoloníke, bá báá gɛ́ndɛ́gɛ́ná nogálɔ ná Asaŋa na odɛ́má usi. Bá mba lɛ́ medúgú miimée bá hɛnyahɛnya Ŋgɔ́ŋɛ́ go go ɛ́na ɛ́na bɔ́ɔbɔ Póolo a mbaá lɛ o oya bó mba lɛ́ bó lumenene na Ŋgɔ́ŋɛ́.

¹²Gɛca gá Beyúdene naá olɔŋɔ yábɔ́ gɛ́ báá ágá odɛ́má yábɔ́ naá Yésusu. Tɔ́nɔ naá olɔŋɔ yá Bágɛlɛ́gɛ, bakɔ́dɔ bá ufíno na banɔ́mɔtɔ́ degédegé bá bɛ́ɛ́ ɛ́yánáa boolímínyí bá Kilítusu.

¹³Kanɛ́ aŋa Beyúdene báaba naá Tesoloníke bá mbɔɔ́ ɔ́bɔ́ goŋaá Póolo o oya gɔnɔ́ nogálɔ ná Asaŋa naá Belée, gáábɔ́ go gɔnɔ go úle go go nco búlumunce batɔ báaba hɔ́ɔ.

¹⁴Boolímínyí go dómba go dúmbie Póolo gɛayá gá máŋɛ́ go go gɔ́lɔ sitíme; Sɛ́lasɛ na Timotée bá báá síéné naá Belée hɔ́ɔlɔ́.

¹⁵Batɔ báaba bá mbaá lɛ bá díligenene Póolo go ɛ́da mo dɛ́ɛna naá Atɛ́nɛ, bá báa lɛ gó nco gunde na nnyimé, na bɛlɔsɛnɔ bɛ́ɛbɛ Póolo a mbaá bó íŋéné go busío bá Sɛ́lasɛ na Timotée, goŋaá bɛ́ ɛ́da mo gíde fɛaŋɔ fɛaŋɔ.

¹⁶A gá lɛ́ naá go gɛ́gana Sɛ́lasɛ na Timotée, odɛ́má yá Póolo go ɛ́da go fɛ́ɔnɔnɔ na moɔcɔ mɔ́ɔmɔ mó mbaá lɛ dácɛ naá tɛ́sɔnɔ.

¹⁷Naá nnyaŋá ya mbósógólí, Póolo a mba lɛ́ a gálagala na Beyúdene, na Bágɛlɛ́gɛ báaba bá mbaá lɛ bá búlugenye Asaŋa, a gálagala miisí miimée naá indukí ya agósa yá gɛdɔŋɔ na batɔ bá nɛdómba.

¹⁸Nɛnamá ná benciŋínciŋi níncodío, bá bó dɔ́ŋɔnɔ bá amɔ́ epikulíse na setolíse, bá mba lɛ́ bá gálagala tɔ́nɔ na Póolo. Báaba bó oya bá amɔ́: «Bɔ́ɔbɔ ulíígí mɔ́ɔnyɔ o oyamɔ́ bó lɔ́mɔ́ ŋkádɛ o?» Báaba bóncodío bá amɔ́: «Gó fóanɛna aŋa o oya biinyí biinyí bá baasaŋa.» Mammana Póolo a mba lɛ́ a dóogonyo «Yésusu» na «kúme gɛbɛ́láa.»

¹⁹Kɔ́ɔ bá mo gɔ́lɔmɔ́ hɔ́ɔlɔ́, go ɛ́da nɛhɛ́ naá Nɛgála ná Alɛyopásɛ, go ɛ́da mo úhune bá amɔ́: «O lɛ́ ba go có oyana gɛpáa gá gohúunenye gɛ́ɛgɛ o gálagalamɔ́ o?

²⁰O có oyanɛna moóma mɔ́ɔmɔ dɛ gá báasamɔ́ dɛ dɛ mó ɔ́bɔ́, gɔ́ɔ dɛ lɛ́galɛgamɔ́ go íyime mbɔ́gɔ́ ya mɔ́.»

²¹Mammana, batɔ bá Atɛ́nɛ biimée, na biinyí báaba bɔ́ ɔyɔmɔ́ nabɔ́, bá mba lɛ́ bá dúmbenye gɛcamɛna gábɔ́ goana go go oya na go bódólonyo moóma mofáa.

²²Kɔ́ɔ Póolo a dɛ́lɛmɛnamɔ́ naá Nɛgála ná Alɛyopásɛ, go bayɛga dogálɔ a amɔ́: «Bɛɛnyɔ́ɔ batɔ bá Atɛ́nɛ báaba, ŋgɛɛ́ ɛ́ná goŋaá no lɛ́ batɔ báaba bó olimonyomú baasaŋa makɔ́nɔ́.

²³Aŋa ŋgaá lɔmɔ́ tómbana naá tɛ́sɔnɔ yɛnyɔ́, ŋgɛ́da nnúune indukí yɛnyɔ́ yɛ́ɛyɛ no búlugenyemú baasaŋa bɛ́nyɔ́ hɔ́ɔ, ŋgɛɛ́ ɛ́ná gɔnɔ́ gɛdálɛ́ná gɛ́ɛgɛ bó lɔ́mɔ́ ɔ́ŋɔ́ɔlú hɔ́ɔ goŋaá: “Go asaŋa mɔ́ɔnyɔ bá lɔ́mɔ́ bá dɛ íyi.” Kanɛ́ bɔ́ɔbɔ no búlugenyemú kanɛ go bó íyime, nnco nyó oyana obɔ moánɛ.

²⁴Asaŋa a mbaá besíe cí iŋkimée na buimée bɔ́ɔbɔ bó lɔ́mɔ́ kɔ́ɔ, mɔ́ɔ a lɔ́mɔ́ Daadáa ba mmoɛná na cí. A dɛ gɛ́gáa naá nnyaŋá sɛ́ɛsɛ batɔ bá fóagamɔ́ go go mo búlugenye hɔ́ɔ.

²⁵A dɛ báá akɛ́ ncaná goŋaá batɔ bá gɔ́lɔ gɛdɔmbɔ go go mo fáanana akɛ́ ŋkádɛ, goakɛ́ mɔ́ɔ a fáananamɔ́ mɔtɔ gɛɔyɔ, mefúnyi na boóma buimée[69].

²⁶«Go mɔtɔ táŋɛ́ ummue, gɔ́ɔ a mbaá besíe mɛɛ́nɔ miimée, a báá má lukúményée naá cí iŋkimée. A mba dóáná go sómba gɛcamɛna, a báá ágá ɛmbálá ya bigísi bá cí anáa bá mbaá lɛ ba go ɔyɔ hɔ́ɔ[70].

²⁷A mbaá ŋaáa nɔ́ɔnɔ goŋaá bá mo fúmbe, go amɔ́ gódaga, bá lɛ́ ba go mo ɛ́na naá go anana. Mammana, Asaŋa a dɛ báá halaháláa na onyɔ moánɛ,

²⁸goakɛ́ naá mɔ́ɔ gɔ́ɔ dɛ bɛananamɔ́ gɛɔyɔ, dɛ bégélegelie, gɔ́ɔ dɛ lɔ́mɔ́ batɔ. Bó lɔ́mɔ́ bɔ́ɔbɔ tɔ́nɔ nɛnamá ná boóŋí bɛ́nyɔ́ bá lɔ́mɔ́ olímínyóolú: “Bá amɔ́ dɛ lɛ́ tɔ́nɔ baaná bɛ́hɛ́.”

²⁹Kanɛ́ aŋa dɛ lɔ́mɔ́ baaná bɛ́hɛ́, dɛ dɛ sɛmɛ́gánánáa go béeniŋinye dɛ amɔ́ Asaŋa a lɛ́ hɛɔcɔ há góolo, há gɛkɔ́ŋɔ gá muinyí, ɛ́na lí há ɛdánɛ́, hɛ́ɛhɛ mɔtɔ a gedegediemú na ɛmbɔ́gɔ yɛhɛ́ naá pegíné yɛhɛ́.

³⁰Asaŋa a dɛ gɔnɔ́ núune gɛcamɛna gɛ́ɛgɛ batɔ bá á lɔmɔ́ naá kanɛ goíyime, kanɛ́ godɔ́ɔdɔ, a dɔ́ŋɔnɔ batɔ biimée, naá cí iŋkimée, goŋaá bá núgie gɛɔyɔ gábɔ́, bá dɛ́ɛna bɛbɛ́ bábɔ́ bá caŋa.

³¹Asaŋa a báa go díliminye buisí bɔ́ɔbɔ a ŋgaá ŋaáa umbidí go batɔ biimée naá botɛ́nɛ́ɛ go mɔtɔ mɔ́ɔnyɔ a mbaá lɔɔ́ɔ. A mba loodío daŋɛ́daŋɛ mɔtɔ uŋkimée goŋaá bó ná báŋa nɔ́ɔ go gofúfune gɔ́ɔgɔ a mbaá fúfúné mɔtɔ ba ndiemi.»

³²Aŋa bá mbɔɔ́ ɔ́bɔ́ Póolo a gálagala gɛsɛnɛ gá «begúe go fúfugene», bá báá gó ɛ́da go mo hɔnɔ, bóncodío bá gálagala bá amɔ́: «O ná có oyana bosɔ́mɔ bɔ́ɔbɔ naá cí oŋɛndɔ yúncodío.»

³³Hɔ́ɔlɔ́, Póolo go dómba, a báá bó síé.

³⁴Akɛ́ nɔ́ɔnɔ, nɛnamá níncodío nɛ́ báa mo biené, nɛ́ bóó olímínyóo: naá olɔŋɔ yɔ́ɔyɔ, Deníse, ummue mɔ́ɔnyɔ naá Nɛgála ná Alɛyopásɛ; okɔ́dɔ ummue ufíno Demelíse, na batɔ bóncoó gɔnɔ́.